رواية بائعة الورد الفصل الخامس
دخلت ملك اوضتها
قعدت ع السرير بتعيط
وفجأة سمعت سها وهي
بتقول : يارب خدني بقي وريحني من القرف ده
ياسر : انا قرف طب انا هوريكي القرف بجد
سها : اه قرف ، كرهتني في عيشتي انا وبنتك ومشغلنا وانت قاعد كده وكل يوم ضرب واهانه وبعد ده كله زعلت لما قولت عليك قرف
ياسر : طب انا هخلصك من القرف اللي انتي بتتكلمي عليه ده
سها : ياريت يا اخي علي الاقل هعيش انا وبنتي لوحدنا في راحه
ياسر : لا بنتك مينفعش تكون معاكي
سها : لا طبعاً
وقبل ما تكمل كلامها * كانت السكينه * في قلبها *
وملك كانت وافقه ورا الباب تشوف اي اللي بيحصل ولما امها اتضربت بالسكينه خرجت جري عليا
وهي بتقول : ماما قومي يا ماما متسبنيش
سها بصوت منخفض : متخافيش انا اكيد هبقي في مكان احسن
ملك فجأه جريت علي باب الشقه وقعدت تصوت عشان تلم الجيران وتلحق امها
وفعلا الجيران اتلموا وجزء منهم خد سها وراحوا بيها المستشفى وجزء تاني سلم ياسر للبوليس
ولما وصلوا المستشفى كانت سها لسه فيها النفس بس ضعيف جداً
احد الجيران ويدعي عامر : دكتور بسرعه
الممرضين اتلموا واخدوا سها منهم ودخلوها العمليات واتوفت في العمليه
خرج الدكتور
وقال : البقاء لله
ملك بانهيار : انت كداب ماما عايشه
عامر : اهدي يا بنتي ده امر الله
الدكتور : انا لازم اعمل محضر الاول
عامر : تمام يا دكتور احنا كده كده عارفين مين اللي ضربها وسلمناه كمان للشرطه
الدكتور : طب تمام ، ممكن حضراتكم تمشوا دلوقتي وتيجوا تخلصوا الاجراءات بكره وتستلموها
وسابهم ومشي
ملك : انا مش همشي من غير ماما
عامر : مينفعش يا بنتي تفضلي هنا
ملك : لا يعني لا
عامر : طب تعالي غيري هدومك وارجعي تاني وانا بنفسي اللي هرجعك هنا تاني
ملك : بجد
عامر : اه بجد
مشيت ملك معاه وهي عارفه انها مش هترجع تاني النهارده
وروحوا كانت نهي مرات عامر نضفت مكان الدم
اول ما دخلوا
ملك : انا هغير هدومي بسرعه واجي
عامر : ماشي يا بنتي
نهي : خير طمني سها عامله اي
عامر بحزن : البقاء لله
نهي : لا اله الا الله ، يا حبيبتي يا بنتي فقدت امها و ابوها مره واحده
عامر : وده اب ده اللي يضرب ويهين مراته وبنته كل يوم ويشغلهم وهو قاعد عاله عليهم واللي يوصل انه يقتل مراته ميبقاش اب
نهي : عندك حق والله ، انا مش صعبان عليا غير البت اللي جوا دي
عامر : طب ادخليلها وهديها شويه واقنعيها اننا هنروح لامها بكره عشان ماكنتش عايزه تيجي
نهي : حاضر
ودخلت لملك اللي كانت منهاره من العياط
نهي حضنتها
وقالت : اهدي يا ملك متعمليش في نفسك كده هي اكيد في حته احسن ومش عايزه منك غير الدعاء
ملك : مش متخيله اني هعيش من غيرها وهعيش ازاي اصلا
نهي : طب تعالي باتي معانا النهارده وبكره من النجمه هنروحلها
ملك : بجد
نهي : اه بجد
تاني يوم خلصوا الاجراءات ودفنوها وكل ده عقل ملك مش مستوعب اللي حصل
وبعد اسبوع
ملك حالتها بتدهور ومبقتش تاكل ولا تنزل الشغل ولا تعمل اي حاجه غير انها تعيط بس نهي وعامر ماكنوش بيسوبها ودايما معاها
وخلال الاسبوع ده كان يحيي كل يوم بيروح المحل علي امل انه يشوفها لكن امله بيخيب
عند ملك
شريف راحلها
ملك : اهلا يا استاذ شريف
شريف : اهلا يا ختي ، انتي هتفضلي مستعبطه كده لحد امتا
ملك : مستعبطه ازاي مش فاهمه
شريف : يعني مبتجيش الشغل
ملك : هو حضرتك مش شايف اللي انا فيه ولا اي
شريف : لا شايف بس امك وماتت بقالها اسبوع يعني خلاص بقي كده كفايه وتنزلي شغلك
ملك : انا الصراحه بقي مش نازله الشغل تاني
شريف : عشان ابوكي اتحبس تعملي اللي انتي عايزاه
ملك : اه انا كنت شغاله معاك غصب عني بسببه لكن دلوقتي مش هيقدر يغصبني
شريف : انا اقدر
ملك : تقدر ازاي
شريف : عندك حل من الاتنين يا اتجوزك ومتنزليش الشغل زي ما انتي عايزه يا تنزلي الشغل وترفضي الجواز
ملك : ولو رفضت الاتنين
شريف : يبقي في حل تالت وده اللي انتي بتختاريه
ملك : واي هو بقي
شريف : انك تمشي من الشقه دي
ملك : يعني اي
شريف : يعني يا تنزلي تشتغلي وتقعدي في الشقه يا تسيبي الشغل وتسيبي الشقه
وسابها ومشي
وقعدت تفكر هتعمل اي وتختار اي
بدل ماتدور وتبحث علي الروايات خليها علي تليفونك وحمل تطبيقنا
