اسكريبت صدفه كامله وحصريا
_هو ايه اللي بيحصل دا !!
=في ايه حضرتك !!
_ليك ربع ساعه ماشي ورايا خير؟
=لا هو في الحقيقة يعني ..
_حقيقة ايه ما تنطق
=بصي انا محتاج اتكلم معاكي في موضوع مهم
_موضوع ايه المهم دا..ثم انا اصلا معرفكش
=لا انتي تعرفيني ..ركزي كويس بس وهتتأكدي
_اي دا ..خالد ابن طنط شكرية ..يخرب بيتك
انا معرفتكش
=أزيك يا إسراء..عامله ايه؟
=الحمدلله وانت ازيك وطنط وعمو عاملين ايه
=طيب في كافيه قدام اهو ..هنقعد فيه شوية
بدل ما نقف نتكلم في الشارع كدا
=امممم...اوك بس مش عايزة اتأخر
_ها يا سيدي ..اهو قعدنا وشربنا العصير كمان
ايه بقى الموضوع ؟
=إسراء ..انا بصراحة ليا أسبوع براقبك من بعيد لبعيد
وكنت خايف ومتردد اني اكلمك اصلا
_خايف ومتردد..وبتراقبني..ايه الجو دا يا بني
=انا ليا فترة طويلة بدور عليكي ..خصوصا وانكم
بعد ما رجعتوا من الخليج ..مرجعتوش على بيتكم القديم
اللي كنا جيران فيه ..ومن ساعة الثانوي وانا معرفش عنك
اي حاجة
_وايه فكرك بيا بعد المدة دي كلها ..ووصلتلي أزاي اصلا؟
=شوفي يا ستي ..انا بعد الثانوي دخلت هندسه
وحاليا انا شغال في شركة كبيرة ..مهندس اتصالات
_اها جميل ..ربنا يوفقك
=ايام الثانوي ..كنت معجب بيكي وكنت بحاول
أقرب منك بس انتي مكنتيش واخده بالك خالص
_دا بجد!!
=انا الطالب الوحيد اللي كنت بكره يوم الأجازة
عشان مش بشوفك فيه ..انتي كنتي سبب حبي للمدرسة
وبرغم أننا كنا ساكنين في نفس العمارة
بس باباكي كان شديد شوية عليكم ..وخصوصا انتي واختك
ودا طبعا كان سبب مخليني اخاف اقربلك او اكلمك
عشان مكنتش حابب اسببلك مشاكل
_انا مستغربة اوي من اللي انت بتقوله دا
انا فعلا عمري ما لاحظت حاجة زي دي..يعني كنت بشوفك
زميل في الفصل وجار وبس
=ماهو دا من خيبتي..انا اصلا كنت لما بشوفك
وشي بيحمر والكلام بيتوه مني، ولو حصل وعينك جات في عيني بالصدفه ساعتها دقات قلبي كانت بتزيد
ومكنتش ببقى على طبيعتي ..وبرغم من دا
كنت براقبك في صمت ..ومحاولاتي اني الفت انتباهك
كانت هبلة اوي ..لدرجة انك افتكرتيها اني بخاف عليكي
ومهتم بيكي زي أختي او بحكم الجيرة
_انت عايز تقول ايه يا خالد ..وايه فكرك بيا ،وعرفت توصلي بعد المدة دي كلها ؟
=انا اصلا عمري ما نسيتك عشان افتكرك
ووصلتلك بالصدفة لما قابلت سحر زميلتنا في المدرسة
وسألتها عنك ..وقالت انكم على تواصل وعرفتني مكان شغلك
_سحر!!..ماشي لما اشوفها الكلبة..دي مجابتليش سيرة
عنك خالص
=ماهو دا عشان انا طلبت منها متقولش ليكي اي حاجة
_ويا ترى عرفت منها أيه تاني!!
=بصراحة ؟
_ياريت
=عرفت منها انك كنتي مخطوبة لمدة سنتين
وبعدها محصلش نصيب
_مظبوط
=وان سبب فشل العلاقة ..كانت خيانته ليكي
وشها بيتغير وبتاخد شنطتها وبتقوم *
=إسراء..من فضلك من فضلك بلاش تمشي
انا ما صدقت لقيتك
_
=عشان خاطري استني
بتقعد مرة تانية وبحزن بتقول
_الموضوع دا بيعصبني جدا ..وأنا زعلت من سحر اوي
انها عرفتك كل التفاصيل دي من غير ما تقولي حتى
=ياريت ما تزعليش منها ..هي متقصدش الا كل خير
_وايه الخير في انها تحكيلك حاجة زي دي يا خالد
=تصدقي اول مرة احب اسمي كدا
واسمعه بشكل مختلف
أبتسمت وقالها
=ايوه كدا ..ضحكتك دي أجمل حاجة في الدنيا
_خااالد وبعدين
=طيب خلاص .. شوفي يا ستي ..انا بعد ما يأست اني الاقيكي ..وبعد ضغط أهلي وصحابي عليا اني اخطب
قررت افكر في الموضوع لأني كنت لاغيه من دماغي اصلا
وكان معايا زميلة في الشغل ..بنت ناس وطيبة
كانت بتحاول تقرب ليا ..وانا كنت بصدها
لكن بعد الضغط عليا من كل اللي حوليا ..قولت ليه لأ
انا هدي نفسي فرصة ..يمكن أحبها
_ها وحبيتها ؟؟
=للأسف مقدرتش ..كل ما كنت بقرب منها
كانت في حاجة جوايا بتمنعني ..شعور غريب مكنتش عارفه
_شعور ايه؟
=اني هلاقيكي
_يا سلام !
=حسيت اني هظلمها وهظلم نفسي معاها لو اننا ارتبطنا
كنت في صراع كبير بين قلبي وعقلي ..
لحد ما قابلت سحر بالصدفة ..وكنت هطير من الفرحة
لما قالت انها على تواصل معاكي
_برضو مش فاهمه انت عايز ايه
=لا فاهمه ..اعتقد #انها_وضحت
انتي ضعتي مني زمان ..ومش هسمح انك تضيعي مني دلوقت ..
_خالد..
=تجربتك كانت قاسية انا عارف ..بس صدقيني
لو ادتيني الفرصة دي هتتأكدي من صدق كلامي
_انا مش عارفه اقولك ايه ..انت جيت ولخبطت لي
كل حساباتي ..انا اصلا شيلت الموضوع دا من دماغي
وكل تركيزي دلوقت في شغلي وبس
=انا عارف ..بس مش محتاج غير فرصة بس
وهتعرفي اد ايه اني ...
_أنك ايه؟
=أني بحبك
_خالد
=صدقيني بحبك ..ومش هسيبك تضيعي مني تاني
أبتسمت وهي بتخبي وشها
=ها هتكلميه انتي ولا اكلمه انا ؟
_هو مين
=والدك ..عشان احدد معاه ميعاد وازوركم في البيت
_انت جبت رقمه كمان
=البركة في سحر بصراحة
_سحر ..دا انا هموتها لما اشوفها بس
=اوعي تقربي منها
_ليه بقى أن شاء الله
=عشان هي السبب في اني الاقي نفسي
بعد المدة دي كلها ..هي السبب في اني الاقيكي❤
تمت❤
انتهت احداث الرواية نتمني ان تكون نالت اعجابكم وبانتظار ارائكم في التعليقات وشكرا لزيارتكم عالم روايات سكيرهوم
شكرا لزيارتكم عالم روايات سكيرهوم
