رواية 1622 جامعة القاهرة الفصل الثاني 2 بقلم فاطمه عبد ربه#روية_1622 البارت الثاني لو التفاعل زاد وعد مني هنزل كمان بارت بليل .. " يابنتي بقولك مش هعرف أرفضه، أبويا مستحلفلي ولو رفضته هيجوزني الواد ذكي جمباز ابن " فاطمة " عمتي تحدثت عائشة في الهاتف ثم وضعت ملعقة من الأرز في فمها من الطبق الموضوع على صينية الطعام أمامها على السرير "طب ما تخليه هو الي يرفضك طفشيه زي الي فاتوا " اقترحت عليها نورة مش هينفع بابا مصمم مايسيبنيش أنا وهو لوحدنا، خايف على العريس منى. طب ماتتجوزيه وخلاص مش يمكن يطلع إنسان كويس !! ألقت عائشة بالملعقة في الطبق وصرخت " لا مش هتجوز أنا أنا عايزة أسافر وأنتي عارفة ده كويس لو أتجوزت هتحبس هنا للأبد وحلمي هيضيع... تذمرت صديقتها " يعني هتسافري تهببي إيه ! ماتتجوزي زي باقي خلق الله !! " " هشتغل وأكون نفسي وأعيش العيشة الي أنا عايزاها وأتجوز واحد عينيه زرقا وشعره أصفر ويقولي جود مورنينج بيبي مش فين الفطار يا ولية ... صمتت نورة لدقيقة وسرعان ما لمعت رأسها بفكرة " طب بصي أنا لقيت حل يخلي العريس هو الي يرفضك. "حل إيه ؟ " . بعد ساعة كانت عائشة تخرج من منزلها وهي تصيح لوالدتها ماما، أنا رايحة الكوافير عشان العريس عشان بس ماتقولوش إني عايزة أطفشه وكده.. ثم هرولت للخارج بسرعة دون أن تنتظر ردًا من والدتها. تقابلت هي ونورة وسرعان ما سألت بخوف " إنتي متأكدة إن الساحرة دي هتخلي العريس يطفش ؟ " " أيوة يابنتي دي مضمونة البت هدى بنت خالتي كان كل الي ييجي يتقدملها يشوفها جاموسة ويهرب ولما راحت للساحرة دي طلعت واحدة عاملالها سحر عشان ما تتجوزش فأحنا هنخلي الساحرة تعملك نفس العمل لحد ما العريس يطفش وبعدها نفكه تاني عادي يعني ... "!! طب افرضي الساحرة مارضيتش تفك العمل !! " " لا هتفكه، ما احنا هنديها فلوس " قالت عندما وصلا أخيرًا إلى بيت يبدو مهجورًا ومهترئ وعلى وشك السقوط.. " أنا خايفة. " تمسكت عائشة بنورة فهدئتها الأخرى "يابنتي ماتخافيش مش هيحصل حاجة أنا جيت هنا قبل كده " طرقت على الباب فانفتح الباب بمفرده مصدرًا صوتًا مزعج قد جعل عائشة تصك على أسنانها بضيق.. ترجلا إلى داخل البيت الذي بدى فارغا من كل شيء إلا من التراب الذي يغلف الجدران والسقوف والأرضية " يابنتي ده باين مافيش حد !! " صرخت عائشة في أذن نورة فجأة فارتعبت الأخرى ثم دفعتها بعيدًا "روحي إلهي تموتي خضتيني ربنا يخضك يابعيدة !! " "بعد الشر عليا إن شالله إنتي ".. " اخرسي إنتي وهي " وجدوا صوتًا يصرخ فيهما فجأة فانتفضا برعب وأحتضنا بعضهما بعضًا... نظرا أمامهما فاصطدمت أعينهم بسيدة تبدو في الخمسون من عمرها سمينة جدًا وقصيرة جدًا وترتدي عباءة سوداء جعلتها تبدو وكأنها كرة قدم كبيرة فلم تمنع عائشة نفسها من الضحك " أنا طول عمري بسمع عن الساحرة المستديرة، بس أول مرة أشوفها ! " " الله يخربيتك دي ممكن تسخطك قردة دلوقتي !! " لكمتها نورة بخوف وهمست في أذنها .. تملك الخوف منها ونظرت نحو الساحرة ثم ابتلعت لعابها وأردفت " آسفة مش قصدي، بس عندي سؤال لو ما سألتوش هموت مشلولة، هو طالما إنتي ساحرة ليه ماعملتيش عمل لنفسك عشان تخسي أو تبقي شبه إيما ستون مثلًا ؟ " سارعت نورة بتكميم فمها سارعت نورة بتكميم فمها بيدها وهمست بنبرة باكية "الله يخربيتك اخرسي هتودينا في داهية. " " أنتم عايزين إيه ؟ " صرخت السيدة فجأة فأجابت عليها نورة بنبرة مرتعشة " إحنا عايزين نعمل عمل لعائشة عشان تطفش بيه العريس الي متقدملها، ممكن تخليه يشوفها على هيئة أي حيوان كلبة مثلًا ".. توسعت أعين عائشة بغيظ ثم لكمتها وتذمرت " كلبة مين ياكلبة الكلاب ! " ثم نظرت للساحرة وأكملت " ممكن قطة ؟ " تعالوا ورايا " قالت الساحرة وتحركت تجاه إحدى الغرف فدخلا خلفها ليجدا الغرفة مليئة بالرفوف وعلى كل رف هناك الكثير من الزجاجات التي بداخلها سوائل ذات ألوان مختلفة. تحركت الساحرة تجاه إحدى الرفوف وأمسكت بزجاجة بداخلها سائل أحمر وأخرى بداخلها سائل أزرق ثم تقدمت لتجلس على الكرسي الذي قبع أمامه طاولة خشبية عتيقة جلست نورة وعائشة على الأريكة الموضوعة على الجانب الآخر من الطاولة وأخذا بمراقبة ما تفعل بتركيز شديد أمسكت الساحرة بزجاجة صغيرة فارغة ووضعت قطرة من السائل الأحمر وقطرتين من السائل الأزرق فتحول السائل إلى اللون البنفسجى ثم أغلقتها وتحدثت " سعرها مية جنيه. التقطتها نورة بسرعة وسارعت عائشة بإخراج النقود كانت نورة ستنهض لكن عائشة أمسكت بها ثم نظرت للساحرة " ماينفعش تعمليلي عمل يخليني أتجوز كريس هيمسورث ؟ " "مین كريس هيمسورث ده؟ " سألت الساحرة فسارعت عائشة بإخراج هاتفها وهي تقول " ده الي عامل دور ثور إله الرعد في عالم مارفل اصبري هجيبلك صورته... أخرجت صورته ووضعت الهاتف أمام أعين الساحرة التي تجهم وجهها فتراجعت عائشة بالهاتف ثم تمتمت بخوف " أو حد شبهه مش لازم هو تحديدًا يعني... ممكن حاجة نفس الإصدار ده أنا موافقة عادي " . رمقتها الساحرة بصمت ثم نهضت لتمسك بثلاثة زجاجات وبدأت بوضع بضع قطرات من هنا وبضع قطرات من هنا حتى انتهت أخيرًا ودفعت إليها بزجاجة صغيرة تحتوي على سائل بني اللون لمعت أعين نورة وسرعان ما أخرجت صورة من هاتفها وأرتها للساحرة " وأنا كمان بصي عايزة أتجوز البني آدم ده بالظبط، مش حد شبهه ولا حاجة معلش أنا عايزة الإصدار نفسه" " مين ده ؟ " سألت الساحرة فأجابت الأخرى "بصي ده مغني أجنبي اسمه زين مالك، هو سرسجي وصايع تحسيه طيب وأهبل وحياة أغلى حاجة عندك اعمليلي عمل خليه يشوفني داكوتا فانينج ويتجوزني " " بس كده مش هينفع الواد ده واحدة عاملاله عمل متاخد خلاص " هاتي حاجة غيره " سارعت بإخراج صورة هاري ستايلز ووضعتها أمام الساحرة طب وده ؟ " حدقت الساحرة للصورة قليلا ثم ابتسمت بمكر " ده مش متاخد بس لمصلحتك أنتي بلاش " شعرت نورة بالإحباط فأردفت " خلاص هاتيلي واحد شبه زين مش لازم هو نفسه عايزين نفس الإصدار زي كريس كده. " أعطتها الساحرة زجاجة تحتوي على سائل أسود فنهضا ليرحلا لكن عائشة استدارت لها لتتساءل "إحنا هنعمل إيه بيهم ؟ نحطهم قطرة في عنينا ! يعني ولا نرشهم على وش الي يعجبنا ولا نستحمى بيهم ولا إيه ؟ " "تشربوهم". كانت نورة ستتحرك لكن عائشة أوقفتها ثم نظرت للساحرة وارتسمت ابتسامة شريرة على وجهها وأردفت " فيه واحد اسمه فوزي سقطنا وعايزين ننتقم منه فأحنا هنسيبك بقى تختاري عمل على ذوقك كده يجيبه الأرض، عايزين نشوف عجائب المصائب فيه، وهتبقي عملتي خدمة جليلة لكلية حقوق وضواحيها والمقيمين خارجها. " جلست نورة بجانب عائشة في الأوتوبيس وأخرجا الزجاجات قالت عائشة وهي تتفحص الزجاجتين " الإزازة البنفسجي تطفيش العريس الإزازة البني جلب العريس " ثم نظرت لنورة ودفعت إليها بالزجاجة التي تحتوي العمل الخاص بدكتور فوزي وأردفت " خلي معاكي إنتي الإزازة دي عشان هنحطها في الشاي بتاع دكتور فوزي بكرة يكش يجيله رباط صليبي ويريحنا من وش أمه. " نظرت نورة إلى الزجاجة السوداء والزجاجة الكحلي وشعرت بالتشوش وسألت " يعني أنهي بتاعة فوزي وأنهي بتاعة إصدار زين ؟ " نظرت عائشة مرة أخرى للزجاجتين وشعرت بالتشوش هي الأخرى وأجابت "الإزازة السودة بتاعة فوزي باين والإزازة الكحلي بتاعة العريس... هنحط لفوزي بكرة من الإزازة السودة بس ماتشربيش الإزازة التانية إلا لما نتأكد من فوزي، لو فوزي أتحول شاذ وأتجوز واحد شبه زين يبقى كده إحنا حطينا الإزازة الغلط بس هنبقى انتقمنا منه في نفس الوقت. " طب وأنتي هتشربي الإزازتين بتوعك أمتى ؟ " سألتها نورة وهي تومئ " قبل ما العريس ييجي هشرب الإزازة بتاعة تطفيشه والإزازة الثانية هخليها لحد ما أسافر عشان الإصدار يبقى كويس طب ماتشربيها دلوقتي مانتي كده كده هترجعي البيت تلاقيه هناك ! " " لا، جعانة دلوقتي مش هشرب عمل على لحم بطني أنا !! رأيكم إيه في شخصية عائشة لحد دلوقتي ؟ انطباعكم عنها إيه ؟ وإيه الصفات الي لاحظتوها بتحدد شخصيتها ؟ ملحوظة : السحر حرام يعني مافيش واحدة تقول عايزة أعمل عمل لنايل هوران وتروح للشيخة خديجة المغربية لجلب الحبيب للكاتبة فاطمة عبدربه الفصل الثالث من هنا |
