رواية للخذلان وجه اخر الفصل السابع 7 بقلم مني



رواية للخذلان وجه اخر الفصل السابع 7 بقلم مني 







لوحدي أقوي ..
البارت السابع

طلعت علي بيتي علي طول مكنتش قادرة اتكلم مع حد دخلت و نيمتة في سريرة و انا ببص لملامحة بخوف خوف من بكرة و اتملك مني احاسيس سلبيه كتير طيب انا هقدر احافظ عليه ؟ هقدر احميه من مجمتع اسهل حاجة فيه التنمر ؟ هقدر اكمل واعافر معاه للاخر ؟ حسيت اني ضعفيه و عاجزة عاجزة اني احقق ابسط شعور اي ام بتحققه لابنها عاجزة اطمنة عشان أنا خايفة

_ بعد ساعتين كنت عيطت فيهم كتير قررت اني اهدي وكنت محتاجة اوي خالد جمبي في الوقت دا اتصلت بيه في المعاد اللي بنتكلم فيه كل يوم بعد ما يخلص شغله رد عليا بصوت تعبان 

خالد ... الو حبيبي عامله ايه
ميرنا ... مال صوتك الاول ؟ انت تعبان ؟
خالد ... لا لا مش تعبان مجهد شوية بس انتي اللي مال صوتك ؟ في ايه ؟ 
ميرنا ... مينفعش تنزل إجازة قريب ؟
خالد ... ميرنا متقلقنيش في ايه ؟ قولي ع طول 
ميرنا ... انا رحت ل دكتور زي ما قلتلك 
خالد ... تمام وقالك ايه ؟

_ قعدت احكيلة كل اللي الدكتور قالو بالتفصيل وهو معلقش خالص وبعد ما خلصت خالص رد عليا 

خالد ... ومفروض أننا نسلم بكلام اول دكتور نروحلو مش كدة ؟
ميرنا ... دا دكتور شاطر جدا صدقني 
خالد ... بصي يا حبيبتي لو عايزاني اقتنع يبقا ع الأقل دا راي اكتر من دكتور مش واحد بس 
ميرنا ... حاضر يا خالد هنأجل المناقشه لحد ما اروح ل اتنين كمان تمام كدة ؟
خالد ... مع أن عارف أنه تعب ع فاضي والولد زي الفل بس عشان نطمن تمام 

_ قفلت معاه وانا مخنوقة زيادة و دورت تاني ع دكاترة و رحت فعلا في خلال تلت ايام ل اربع دكاترة اللي أكدوا المشكلة اللي عند سليم وفي اتنين منهم طلبو مني اعملو جلسات ع المخ و اديلو مهدئات كمان علي قد ما كنت ما مضايقة ع قد ما اطمنت لاختياري ل دكتور ياسر أنة هو أنسب حد ل سليم و كلمت خالد تاني و المرة دي اتصدم و قفل معايا من غير ما يرد عليا كل اللي قاله اعملي اللي شايفاه صح وبعدها ب كام ساعه لاقيت ماماتة و باباه و اختة عرفو رغم اني مكنتش لسه قررت إذا كنت هعرف حد دلوقتي ولا لا و استقبلت اول مكالمة كانت من ماماتة 

رقيه ... صحيح اللي خالد قاله دا يا ميرنا ؟ بخصوص سليم ؟
ميرنا ... اه يا طنط صحيح 
رقيه بضيق ... وانتي بتروحي لوحدك ليه ؟ مخدتيش معاكي حد مننا لية ؟
ميرنا ... محبتش اتعب حد معايا 
رقيه ... تعب ايه وبتاع ايه والدكتور بقا قالك هيتكلم امتي ؟
ميرنا ... قالي اخر حاجة هتتحسن الكلام يا طنط و مفكرش ف كلام حتي لو حروف دلوقتي لسه ف جلسات و أدوية و شغل كتير معاه 
رقيه ... ازاي يعني اهم حاجة يتكلم زي العيال عشان ميبقاش منبوذ لوحدة كدة 
ميرنا بضيق ... أنا ابني مش منبوذ يا طنط وان شاء الله هيكون كويس 

هند شدت التليفون منها
هند ... ماما متقصدش يا ميمو معلش من حبها فيه بس 
ميرنا ... عادي يا هند حصل خير 
هند ... طيب يا حبيبتي ربنا يطمنك عليه 
ميرنا ... تسلملي 

_ قفلت معاهم وأنا خنقيتي زادت من كل حاجة الضغط اللي انا فيه سلبيه خالد كلام حماتي حسيت اني محتاجة لامي قمت عملت شنطة صغيرة ليا انا و سليم و روحتلها واول ما دخلت رميت نفسي في حضنها وفضلت اعيط اعيط من كل الضغط اللي انا فيه وهي سابتني لحد ما طلعت كل اللي جوايا وبعدين سالتني مالي و لاقتني بحكي كل حاجة و دموعي مش بتقف وهي بتطبطب عليا و الابتسامة مفرقتهاش ولما خلصت ردت عليا 

حنان ... وانتي مموتة نفسك من العياط ليه هه ؟ ربنا حطكم في اختبار و بيشوف هتعملو ايه حبيبتي ادعي ربنا يجعلهولك احسن طفل في الدنيا مفيش حاجة بعيدة عن ربنا سبحانه و تعالي اتعبي معاه و عافري وربنا مش هيضيع تعبك دا ابدا ابدا لازم تكوني قوية عشانة و متخليش اي كلمة تهزك و تحبطك كدة 
ميرنا ... بس الموضوع صعب حسه بوش في دماغي ومش عارفه ابدء منين 
حنان ... براحة ع نفسك انتي تنامي انهاردة ومتفكريش ف اي حاجة و من بكرة نشوف أخصائية كويسة و نجيب الأدوية و نبدء ف النشاط اللي الدكتور قال عليه انا معاكي خطوة خطوة لحد ما نطمن عليه باذن الله ماشي ياقلب امك ؟
ميرنا ببتسامة ... ماشي يا ماما ربنا يخليكي ليا ومتحرمش منك ابدا 

_ عملت كدة فعلا اليوم دا قفلت تلفوني و مكلمتش حتي خالد و خدت سليم في حضني و نمت كانت محتاجة انام جدا كلامي مع ماما هداني واداني طاقة إيجابية كبيرة اوي 

_ تاني يوم جبت الأدوية و اتواصلت مع الدكتور و طلبت منه يرشحلي هو أخصائية وفعلا حصل و خالد مش موجود لا بيتصل ولا بيسأل عملت ايه ولا انا بكلمة 

_ عدي اسبوع كامل كنت فيه انا و ماما لوحدنا الموضوع طلع مرهق جسمانيا و مكلف شوية ماديا و حمدت ربنا اني قادرة البي احتياجات علاجة و رجع خالد من السفر من غير ما يبلغني ولما راح البيت و ملقاش حد طلع تلفونة واتصل بيا 

خالد. .. انتم فين ؟
ميرنا ... طب قول سلام عليكم الاول
خالد ... سلام عليكم يا ستي انتم فين بقا ؟ جيت البيت ملقتكيش
ميرنا ... انا قاعدة عند ماما مكنتش حبه افضل لوحدي 
خالد ... مقلتيش يعني ؟
ميرنا .. وانت فين عشان اقولك ؟ 
خالد .. اه طب مش هنتكلم ف تلفون لما ترجعي نتكلم ... سلام 
_ مكنتش مصدومة بصراحة خدت نفس طووووويل و قمت سبت سليم مع ماما و روحت لوحدي 

خالد ... اومال فين سليم 
ميرنا ... حمد لله على السلامه الاول 
خالد .. الله يسلمك .. فين سليم ؟ 
ميرنا ... لما كلمتني كان نام والجو وحش صعب عليا انزلة دلوقتي الصبح هجيبو
خالد .. ماشي .. مقلتيش ليه قبل ما تروحي ل ماماتك ؟
ميرنا ... وانت بقالك اسبوع مش بتكلمني ليه ؟
خالد ... احنا هنقضيها رد سؤال ب سؤال
ميرنا ... خالد انت بطلت تتصل ولا حتي كلفت خاطرك من اخر مكالمة تعرف عملت ايه في موضوع سليم 
خالد بضيق ... ما قلتلك اعملي اللي انتي عايزاة اعمل ايه تاني 
ميرنا بدهشه ... تعمل ايه تاني ؟ وانت كنت عملت ايه اولاني ؟ هو دا مش ابنك زي ماهو ابني ؟
خالد ... ميرنا انا مضغوط و تعبان بنزل إجازة ارتاح فيها عايزة تكملي في حوار الدكتور دا براحتك اعملي اللي تعمليه عن ازنك هنام 

_ سبني و مشي وانا واقفه مش عارفه ادخل وراة انفجر فيه ولا اسيبة و مكلملوش ف الآخر سبتة و دخلت نمت في اوضه سليم 
_ عدي سنة كااااااملة ١٢ شهر وانا لوحدي بين جلسات تخاطب و تمارين و متابعه مع دكتور و أدوية ماما كانت تحاول تعوضني عن غياب خالد ... خالد اللي اتغير كليا اهتمامة ب سليم قل اوي مكالماتة لينا بقت يادوب كل كام يوم مكالمة مش بتكمل دقيقتين ... رافض يعرف اي حاجة عن علاج سليم رافض يسمع أو يشوف اي حاجة تخصه أما بقا أهله في السنة دي 

_ هند بعيدة نزلت شغل جديد محتاج كل وقتها وهي ادتلو كل وقتها لا ليها تأثير سلبي ولا إيجابي زيها زي حكايا بالظبط اللي بيتعامل مع سليم ع أنة طفل طبيعي و مبيسألش ف اي تفاصيل تانيه 
_ أما بقا حماتي ... ف هي مش بتفوت فرصه الا لما تسالني هيتكلم امتي ؟ الدكتور دا مش بيفهم أو الأخصائية دي حمارة ولما اشكر فيهم تقولي يبقي العيب فيكي انتي ومش عارفه تعملي اللي بيقولوا عليه كويس هاتيه ليا وسيبيه وانا هعرف اخد بالي منة و ف خلال شهر هخليهولك يتكلم 😏
_ كمية الطاقة السلبيه اللي حماتي كانت بتدهيالي كانت عاليه اوي ولازم بعد ما اقفل معاها انهار من العياط و ارجع ابص لابني و افكر ان انا بس جيشه الوحيد ولازم اكون قوية عشانة 
_ ولما بدأت اتأقلم ع كلام حماتي و غياب خالد ظهرتلي مشكلة جديدة الحضانة لما سليم تم سنتين الدكتور قالي لازم حضانة حضرت لستة باسم أقرب تلت حضانات ليا و كان مستواهم كويس جدا و رحت و انا كلي طاقه حلوة أن دي خطوة جديدة في علاج ابني ودخلت اول حضانة و حكيت ليها حاله سليم بالظبط و اتصدمت من ردها 

ميرنا ... دي كدة كل معلومات عن حاله سليم بالظبط
مديرة الحضانة. .. طب وجيباه هنا ليه ؟
ميرنا بعدم فهم ... معلش مش فاهمة ؟
مديرة الحضانة ... اقصد أن هنا الأطفال كلهم طبيعين مينفعش نحطة بينهم بصي حضرتك بيرفرف بايديو ازاي ؟ و حركتة زيادة شوية انا هعمل بيه ايه هنا اكيد في حضانات فيها حالات شبه حالتة ودية واحدة منهم اسفة جدا هنا هو مرفوض 
ميرنا 😳 ... انتي بتتكلمي جد ؟ 
مديرة الحضانة .. اكيد اسفة مرة تانيه و شرفتينا جدا 

_ متسالونيش انا ازاي قمت مشيت من غير ولا كلمة ... اصل انا كنت لسه مصدومة مكنتش مستوعبه اللي سمعتة منها مفوقتش غير وانا برة الحضانة خالص كتمت دموعي جوايا و حاولت انظم نفسي و فضلت في عربيتي ربع ساعه بحارب اني مبعيطش و بعدين طلعت علي الحضانة التانيه 

مديرة الحضانة ٢ ... بصي يا مدام انا هكون صريحة معاكي 
ميرنا بصوت مخنوق ... اتفضلي 
مديرة الحضانة ٢ ... انا معنديش اطفال زي سليم بس انا شايفاه كويس حالتة مش صعبه واهم حاجة أنه مش عنيف 
ميرنا مسرعه .. لالا والله ما عنيف خالص 
مديرة الحضانة ٢ ... تمام احنا هنقبلة و نجرب سوا ونشوف الدنيا هتمشي ازاي 
ميرنا ... اوكي شكرا جدا ل حضرتك 

_ روحت وانا مخنوقة و عندي طاقة غضب رهيبه بسبب اني مقدرتش ارد علي مديرة الحضانة و اتكرر في دماغي كلمتها سليم مرفوض وانا ابني يترفض ليه ؟ ميدهوش فرصه ليه يكون طفل طبيعي هيضر الاطفال التانيه في ايه ؟ حسيت اني هموت من الخنقه اتوضيت و صليت ودعيت ربنا كتييييير يقويني ويصبرني و يشفهولي و اتمنيت من كل قلبي اسمع منه كلمة (((((( ماما ))))))

_ و دخل سليم الحضانة و خالد بلغني أنه مش هيقدر ينزل إجازة الا كل شهرين تلاتة و انا معلقتش عليه مبقاش فيه كلام اقولو بدأت اظبط اموري ع الوضع الجديد الصبح وسليم في حضانة شغل البيت و شغل اون لاين خاص بيا بداتة لما حسيت الضغط ذاد عليا ومحتاجة أفرغ دا في حاجة بحبها و لما سليم يرجع يتغدي و نشوف تمارين أو لو عندة جلسه و هكذا بس الاستقرار دا مدمش كتير لما في يوم رحت اجيبة من الحضانة و اتفاجات بالمديرة طلبه تشوفني و لما دخلتلها بلغتني 

يتبع ...



الفصل الثامن من هنا 

 

تعليقات



×
insticator.com, 6ed3a427-c6ec-49ed-82fe-d1fadce79a7b, DIRECT, b3511ffcafb23a32 sharethrough.com, Q9IzHdvp, DIRECT, d53b998a7bd4ecd2 pubmatic.com, 95054, DIRECT, 5d62403b186f2ace rubiconproject.com, 17062, RESELLER, 0bfd66d529a55807 risecodes.com, 6124caed9c7adb0001c028d8, DIRECT openx.com, 558230700, RESELLER, 6a698e2ec38604c6 pmc.com, 1242710, DIRECT, 8dd52f825890bb44 rubiconproject.com, 10278, RESELLER, 0bfd66d529a55807 video.unrulymedia.com, 136898039, RESELLER lijit.com, 257618, RESELLER, fafdf38b16bf6b2b appnexus.com, 3695, RESELLER, f5ab79cb980f11d1