السيرة النبوية الجزء العاشر
إحنا مش هنخلي حد يسمع قرآن ،،
احنا عايزين الناس كلها تسمع أغاني !!
ومين اللي هيعمل كدة !؟
النّضْر بن الحارث ..
هاتولنا يا جماعة " النّضْر بن الحارث " نخليه يقعد بين الناس ويحكي لهم حكايات وروايات ومسلسلات وأساطير ،
و إحنا وهو نفضل نعمل دوشة ونغني ومش هنخلي حد يسمع القرآن أبدا 😈
ماهو أصل خطط الكفار كلها فشلت ، فيعملوا اييييه 🤔 يعملوا خطة جديدة بقي ،،
طب واشمعني النّضْر بن الحارث !؟
= لأنه هو أول واحد دخل العزف بالعود لمكة وهو اللي علمهم الأغاني ،،
ولما عرف النّضْر بن الحارث إن في حد عايز يدخل الإسلام بقي بيروحله ومعاه العود ويقعد يغنيله ويقوله الغناء والموسيقى أحسن من الصلاة والصيام واتباع دين محمد!!!
فنزلت فيه آية:
"وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ"
بس برضو الخطة فشلت 🤭
قالوا خلاص كل واحد يشوف إللي أسلم من أهله ويقنعهم إنهم يسيبوا الدين ده ويبعدوا عن محمد،،
واللي مش هيعبد الأصنام بتاعتنا هنعذبه ونضربه ..!
عثمان بن عفان كان عمه بيلفه في ورق النخيل ويولعه نار من تحت ويطفيه ،، بحيث انه يخلي الدخان يخنقه ،،
بلال بن رباح كان عبد من الحبشة يملكه واحد من سادات قريش اسمه " أمية بن خلف "..
كان يحط في رقبته حبل ويعطي الحبل للصبيان يلعبوا به،
يشدوه ويوقعوه!!
وكانوا يربطوه ويحطوه في الشمس من غير مياة ولا آكل
ويجيبوا صخره كبيييييرة سخنه يحطوها علي جسمه !!
ويقولوله هااااااااا ، هتعبد الأصنام .!!؟
فيقولهم لا ... هعبد ربنا بس
ويقول : .. أحد ... أحد ..
يعني ربنا واحد ومش هعبد غيره
فكانوا طبعا بيتغاظوا منه ويزودا عليه العذاب وهو ميسكتش يغيظهم برضو ويقولهم أحد أحد..
فضلوا يعذبوا فيه لحد ما اشتراه أبو بكر الصديق ،، واعتقه لوجه الله..
خبّاب بن الأَرَتْ كان من أشد الناس اللي بتتعذب ،،
كان الكفار بيولعوا الفحم بالنار، لحد ما يبقى جمر وينيّموا خبّاب على الجمر ده لحد ما الشحم ينزل من ظهره ويطفي الجمر !!
عمار بن ياسر ،،
وأبوه ياسر ،،
وأمه سمية ،،،
كان أبو جهل المسؤول عن تعذيب ياسر لأنه شيخ كبير في السن وزوجته سمية ..
وكان بيطلعهم في الصحراء ويعذبهم في الحر ،
النبي ﷺ لما كان بيعدي عليهم وهم بيُعذبوا كان بيقولهم :
"صبرا آل ياسر فإن موعدكم الجنة"..
مات ياسر من كتر التعذيب ،،
وأبو جهل قعد يعذب في سمية ،،
فضل يعذب فيها و يقولها وريني إلهك اللي بتعبديه ده هينقذك ازاي !!!
فهي تقوله : لا تدركه الأبصار وهو يدرك الأبصار وهو اللطيف الخبير ،،
فراح ماسك سيخ وطعن سمية في فرجها من الأمام فماتت !!
وكانت أول شهيدة في الإسلام ،،
فضل عمار ابنهم..
لما شاف أبوه قتل تحت التعذيب ،، وشاف أمه طعنت وماتت،
وهو نفسه كان بيتعذب أشد العذاب،،
فالكفار قالوله مش هنسيبك غير لما تشتم محمد وتمدح الآلهة بتاعتنا..
فمع شدة التعذيب عمار عمل اللي طلبوه منه ، فسابوه ،،
طبعاً عمار كان حزين جدا وكان عايز ينجي من العذاب اللي هو فيه دة ،،
فراح عمار لرسول الله ﷺ وقاله :
والله يا رسول الله لم يتركوني إلا لما شتمتك ومَدَحت آلهتهم!!
فالنبي ﷺ قاله: و إنت راضي بالكلام اللي قولته ولا رافض؟
عمار قاله طبعا رافض يا رسول الله
فالنبي ﷺ قاله: لو رجعوا بعذبوك تاني وأمروك إن تشتمني فاعمل إللي يقولوا لك عليه ..
ونزلت آية :
"مَن كَفَرَ بِاللَّهِ مِن بَعْدِ إِيمَانِهِ إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ "
سعد بن أبي وقاص كان بار بأمه جدا وبيخاف أوي علي زعلها ،، فاستخدمت أمه النقطة دى لصالحها عشان تضغط علي سعد بيها وتخليه يبعد عن اتباع النبي ﷺ ،،
فقالتله يا سعد أنا مش هاكل ولا أشرب إلا لما تسيب الإسلام ،، خليني أموت بقى والعرب يعايروك بأنك قتلت أمك!!
فسعد بن أبي وقاص قالها ايييه !؟
والله يا أمي لو كانت لك مائة نفس فخرجت نفسا نفسا ما تركت ديني هذا، فكلي أو متاكليش ،،
فطبعاً أمه لما اتأكدت من كلامه إنه مش هيغير دينه،
فأكلت أمه وهو بقي على الإسلام💪
مين بقي اللي كان بيعذب المسلمين المستضعفين !!
رجل من أهل مكة ،، ومعروف جداااااا !
مش هتصدقوا هيكون مين ؟؟ ياتري مين ؟؟
❤️❤️❤️❤️❤️صلوا على النبي ❤️❤️❤️❤️❤️
أي إمرأة هتدخل في الإسلام هقتلها !
هعذبها ،،
هموتها ،،
ف في جارية في مكة أسلمت ،،
قعد يعذب فيها لحد ما زهق ،، فقالها والله ما تركت تعذيبك إلا لأني زهقت ،،
وهي تقوله : والله ده ربنا هو اللي صرفك عني 💪
هو مين دة !!؟
هو جرئ ،، وشديد ،، ومن أشد الناس تعذيباً للمسلمين ،،
هو سيدنا " عمر بن الخطاب "..
سيدنا عمر بن الخطاب كان بيعذب أي حد يدخل الإسلام !
المسلمين كانوا صابرين ،، متحملين التعب والألم والعذاب ،،
لكن لما التعب اشتدد عليهم ،،
قال خبّاب بن الأرت إنه هيتكلم مع النبي ﷺ ويشكيله تعبه هو والصحابة ،،
ف راح للنبي ﷺ عند الكعبة ،، وكان النبي ﷺ حاطط ردائه ونايم عليه ..
وقعد يشتكي للنبي ﷺ عن التعب اللي حاسس بيه هو والصحابة ،، وقاله :
يا رسول الله ألا تدعو لنا؟ ألا تستنصر لنا ؟
ممكن تدعيلنا إن ربنا ينصرنا علي الناس اللي عذبتنا وقتلوا أصحابنا !!؟
فالنبي ﷺ غضب ،، ووشه احمر جدااااا 😡
وقاله :
" كان الرجل فيمن قبلكم ، يحفر له في الأرض فيجعل فيه ، فيجاء بالمنشار فيوضع على رأسه ، فيشق باثنتين وما يصده ذلك عن دينه ، ويمشط بأمشاط الحديد ما دون لحمه من عظم أو عصب ،وما يصده ذلك عن دينه ، والله ليتمن هذا الأمر، حتى يسير الراكب من صنعاء إلى حضرموت لا يخاف إلا الله أو الذئب على غنمه، ولكنكم تستعجلون ،،
رواه البخاري 👆
.......
يعني الناس اللي كانت قبلكم كانوا بيجيبوا الراجل ويحفروا له في الأرض حفرة ويحطوه فيها ،
ويجيبوا منشار ويحطوا المنشار على رأسه ويشقوه نصفين ومفكرش إنه يرجع عن دينه !
ف الإسلام كدة كدة هينتشر لدرجة إن أملاك أقوى دولة في العالم هتبقى تحت حكم المسلمين ،،
وربنا هينصر الإسلام، ويذل أهل الذل والعصيان ،،
طبعاً المفروض خباب يضايق بقي ويقول إيه الدين دة !! ،، لا دة أسلوبه وحش !! وفظ أوي
دة كدة هيكرهنا في الدين !!
الدين يسر مش عسر !! 🙄 "" زي ما بيحصل دلوقتي ""
كل دة ليه !؟ لأنه جاي للنبي ﷺ عشان يصبره ويطيب خاطره بكلمتين ويواسيه ،، و النبي ﷺ اتكلم بشدة وكان غضبان جداً من طلبه !!
بس دة محصلش 😊
خباب متضايقش خالص .. وسمع كلام النبي ﷺ وفضل ثابت وصابر علي اذي الكفار ..
طب ليه النبي ﷺ غضب من طلب خباب وكلمه بشدة كدة !؟
لأن خباب كان فاقد الامل خلاص ،، وكان ممكن إيمانه يضعف ويستسلم ..
فكان لازم النبي ﷺ يخليه يحافظ على إيمانه ،،
ماهو كان سهل أوي النبي ﷺ يدعيلهم وربنا هيتقبل وينصرهم وخلاص كدة ،،
لكن النبي ﷺ مكنش عايزه يستعجل ،، وكان عايز يرجع لخباب إيمانه ،، فمينفعش في الوقت دة يكلمه باللين ،،
لازم الاول يرجعله إيمانه ويفكره بالمؤمنين اللي كانوا قبله واتعرضوا لعذاب أكبر ..
وبعدين يزرع جواه الأمل والتفاؤل إن ربنا هيتم الإسلام في العالم كله ،،
بعد كل التعذيب اللي مر بيه المسلمين ،، ولسه برضو الناس بتدخل الاسلام ،،
فبرضو خطط الكفار فشلت 🤭
فقالوا خلاص نشوف خطة جديدة ،، نعمل ايه ،، نعمل ايه ،،
واحد منهم قال إحنا نتفاوض معاه نعبد إلهه ويعبد إلهنا !!!
فإتبرع واحد من سادات قريش ،، وراح للنبي ﷺ وقاله :
يا محمد احنا هنقبل بالدين بتاعك لكن بشرط :
إنك تعبد إلهنا سنة ونعبد إلهك سنة 😒
فربنا عزوجل أنزل :
"قلْ يَا أَيُّهَا الْكَافِرُونَ ،، لا أَعْبُدُ مَا تَعْبُدُونَ ،، وَلا أَنتُمْ عَابِدُونَ مَا أَعْبُدُ ،، وَلا أَنَا عَابِدٌ مَّا عَبَدتُّمْ ،، وَلا أَنتُمْ عَابِدُونَ مَا أَعْبُدُ ،، لَكُمْ دِينُكُمْ وَلِيَ دِينِ"..
.
فربنا عزوجل قال إن أمر العقيدة مفهوش جدال ولا مفاوضات ولا نقاش اصلاً ،،
فحسوا كدة الخطة برضو هتفشل !!
فقالوله طب خلاص إحنا عشان نؤمن بيك ورينا معجزة من معجزات الرسل !؟
فالنبي ﷺ قالهم : إنه أتى لهم بكلام الله وهو أعظم معجزة ،،
فقالوله لأ احنا عايزين معجزات نشوفها عشان نصدقك ..
إنت فَجّر لنا من الأرض ينبوع ماء ،،
"وَقَالُوا لَن نُّؤْمِنَ لَكَ حَتَّىٰ تَفْجُرَ لَنَا مِنَ الْأَرْضِ يَنبُوعًا"
أصل بلادهم مفيهاش مياه بقي فعايزين الينابيع تنبع من الأرض ،،
فالنبي ﷺ قالهم: أنا لم أُبعث بهذا ..أنا بشير ونذير ..
فقالوله:
خلاص ابعث آباءنا وأجدادنا من الموت وبالذات " قُصَي بن كلاب " لأنه كان صادق واحنا بنصدقه ،، فلو قال إنك صادق هنصدقك ..
فالنبي ﷺ قالهم : أنا لم أُبعث بهذا ،، ربنا وحده اللي بيبعث الموتى..
فقالوله :
طب خلاص خلينا نشوف الملائكة ،،
فالنبي ﷺ قالهم : أنا لم أبعث بهذا ،،
فقالوله بكل سوء أدب !!
يعني أنت لا غني مثلاً عشان نتبعك ونؤمن بك ،،
ولا عندك جِنان وقصور وفلوس ،،
هنتبعك ليه وانت فقير !!
" أَوْ تَكُونَ لَكَ جَنَّةٌ مِّن نَّخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا"
"أَوْ يَكُونَ لَكَ بَيْتٌ مِّن زُخْرُفٍ "
فالنبي ﷺ قالهم : مش بالغنى والفقر ،، بالإيمان ❤️
فقالوله :
ماانت بتقولنا إن في عذاب ،، طب هات يلا العذاب اللي انت بتقول عليه ده، ووقّع علينا السماء حتة حتة ،،
"أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا"
فالنبي ﷺ قالهم : ربنا وحده اللي قادر يعمل كدة ،، أنا بشير و نذير ..
"قُلْ سُبْحَانَ رَبِّي هَلْ كُنتُ إِلَّا بَشَرًا رَّسُولًا"
فقالوله :
والله إنك لكذاب !!!!
إنت اللي بيعلمك الكلام بتاعك ده واحد اسمه الرحمن!!
"وَإِذَا قِيلَ لَهُمُ اسْجُدُوا لِلرَّحْمَٰنِ قَالُوا وَمَا الرَّحْمَٰنُ أَنَسْجُدُ لِمَا تَأْمُرُنَا وَزَادَهُمْ نُفُورًا"
عايزنا نؤمن بيك !؟ إحنا مش هنؤمن بك إلا لو شفناك بتطير في الهواء لحد ما توصل للسماء وتجيب لينا كتاب من السماء ونشوفه بنفسنا ..
"أَوْ تَرْقَىٰ فِي السَّمَاءِ وَلَن نُّؤْمِنَ لِرُقِيِّكَ حَتَّىٰ تُنَزِّلَ عَلَيْنَا كِتَابًا نَّقْرَؤُهُ"
يا اما نشوف ربنا ونشوف الملائكة كلهم !!
" أَوْ تَأْتِيَ بِاللَّهِ وَالْمَلَائِكَةِ قَبِيلًا"..
فالنبي ﷺ سابهم ومشي ..
فالله عزوجل بعت جبريل للنبي ﷺ يقوله:
يا رسول الله لو إنت عايز ربنا يوافق علي كل اللي طلبوه ،، فربنا عزوجل هيبينلهم كل المعجزات اللي عايزينها ،،
لكن لو كذبوا بعد ما يشوفوا المعجزات دي ، هيهلكوا كلهم
زي الأمم السابقة ،،
أو إنك تصبر عليهم ..
تختار ايه !؟
ياتري النبي ﷺ بقي هيختار إيه !؟
