رواية اميرتي الفصل الرابع عشر
ندى بصيت لحبيبها بحزن وغيرة وهي شايفاه واقف وايده في ايد مراته ومتجاهلها تماماً وبيتكلم مع صحابه
قريت منهم بغضب ووجهت كلامها لمؤمن بإبتسامه مصطنعه ونظرات مليانه عتاب
_مبروك يامؤمن
الجو اتوتر أول ما ظهرت وكلهم بصوا لندى ومؤمن بفضول لأنها كانت اول مقابله مبينهم بعد جوازه
سكتت اميره وراقبت نظرات جوزها لندى
واللي لقيتها كلها وجع وشوق وعتاب
حسيت بنغزة في قلبها وبعدت عنيها من عليه
_الله يبارك فيكي ياندى..عقبالك
_قريب..قريب جداً كمان
قالتها ندى بتحدي وابتسامه وبادلها مؤمن نفس الابتسامه بإستهزاء
اتدخل محمود صاحب مؤمن المقرب علشان ينقذ الموقف واللي كان صاحب العيد ميلاد
_طب يلا يجماعه نطفي الشمع بقا ولا ايه
_اه يلا
اتجمعوا كلهم حوالين محمود وغنوله
وبعد شوية قالت صاحبة محمود واللي كانت مش بتحب ندى
_طب يجماعه بما اننا عندنا عرسان جديدة ف لازم نخلوهم يرقصوا مع بعض ولا انتوا شايفين ايه
اتدخلت واحده بتشجيع
_اه يامؤمن يلا حابين نشوفك بترقص مع اللي قدرت تخطف قلبك
ابتسملهم بمجامله وبص لأميره بتساؤل
اللي هزيت دماغها بموافقه وابتسامه
مسك ايدها ووقفوا في النص وكلهم اتجمعوا حواليهم وندى وقفت بعيد تراقبهم وحسيت انها سامعه صوت قلبها وهو بيتكسر
اشتغلت الاغنية ومؤمن حط ايده على وسط اميرة وهي حطيت ايديها على كتفه وابتدوا بتحركوا ببطئ على الاغنية
ومؤمن نفخ بضيق لأنها كانت نفس الاغنية اللي هو وندى كلنوا متفقين يشغلوها في فرحهم وكانت على طول بتغنهاله
♥"عا بالي حبيبي..عا بالي حبيبي"♥
اغمرك ما اتركك..اسرقك ما ارجعك
احبسك ما طلعك من قلبي ولا يوم
اخطفلك نظراتك..ضحكاتك حركاتك بث
اعلقهم بغرفتي..انيمهم على فرشتي
احلامهم بغفوتي ليحلى بعبني النوم
عابالي حبيبي
ليلة الألبسلك الابيض
واصير ملكك والدنيا تشهد
واجيب منك انت طفلك انت متلك انت
عابالي حبيبي
عيش حتى عمر او اكتر
وحبي يكبر كل مانكبر
واشيب لما تشيب عمري يغيب لما تغيب
عابالي حبيبيي...
♥" "♥
خلصت الاغنية وكلهم سقفولهم بحرارة وتشجيع
ومؤمن بص لندى لقاها دموعها نازلة وبتبصله بقهر
بص لأميرة واتكلم وهو بيحاول يكون طبيعي
_اميره انا داخل الحمام اقعدي عالكرسي اللي هناك ده عقبال ما اجيلك
هزيت دماغها بموافقه ومشيت من قدامه بصمت
اتحولت ملامحه للغضب وراح ناحية ندى وشدها من ايديها بعيد عن الكل لحد ما وصلوا لمكان فاضي ووقف قدامها واتكلم بغضب ومخدش باله من البنت اللي شافتهم وكانت نفس البنت اللي عرضت عليهم يرقصوا قدام ندى
_انتِ بتبصيلي كده ليه..ها
ليه محسساني اني خونتك!
ليه محسساني ان انا اللي طلعت ندل معاكي وانا السبب في ان علاقتنا تنتهي
ندى بدموع وغضب
_علشان فعلا انت السبب ، ليه مع اول غلطه عملتها سبتني وروحت اتجوزت
ليه مدتنيش فرصه تانيه
هز دماغه برفض لكلامها
_علشان دي مش اي غلطه
دي نهاية لكل حاجه بينا
كون انك كنتي عايزة ترجعيلي علشان الفلوس ولو مكنش معايا فلوس كان زمانك متجوزه واحد غيري يبقى انتِ اصلا محبتنيش
ندى بصراخ
_انا خوفت !
خوفت اعيش معاك نفس المأساة اللي امي عاشتها مع ابويا
واول ما مستقبلك بقى كويس رجعتلك
عارفه ان تفكيري غلط بس ده مكنش بأيدي يامؤمن
قسماً بالله ما كان بإيدي
_ولا ذنبي انا كمان يا ندى ، كملي حياتك بعيد عني وانسيني زي ما انا بحاول انساكي
_____________________
في نفس الوقت اميره كانت قاعده مستنيه مؤمن
ولقيت واحده بتقرب عليها وعلى ملامحها الخبث والمكر
_الحقي جوزك من ندى دي بنت مش كويسه وشوفته واقف معاها هناك
شاورتلها على المكان ومشيت من قدامها
بصيت اميره للمكان اللي البنت قالت عليه بتردد ومحسيتش بنفسها غير وهي بتتحرك اتجاهه
واول ما وقفت شافت مؤمن وقدامه ندى استخبت من عنيهم وقررت تسمع الكلام اللي هيقولوه وهو ده اللي هيحدد علاقتها بمؤمن
_يعني لو انا كملت حياتي مع حد غيرك مش هتتضايق يامؤمن!
يعني لو حد لمسني غيرك مش هيفرق معاك
اتوترت نظراته وبعد عنيه من عليها
_عادي دي حياتك وانتِ..وانتِ حره فيها
وابتسمت بسخريه وهي بتمسح دموعها
_كداب..انت لسه بتحبني زي ما انا بحبك ويمكن اكتر كمان
انت مش شايف شكلك عامل ازاي معاها
وشكلك كان عامل ازاي معايا !
مش شايف نظراتك ليا كانت بتبقى ازاي اللي مشفتكش بتبص لأميرة ربعها حتى
احنا اللي بينا مش شوية يامؤمن
اللي بينا سنين وذكريات ولا انا ولا انت هنقدر ننساها
_وانتِ قدّرتي ده !
_غلطت..دي الغلطه الوحيده اللي غلطتها في علاقتنا
كنت عاقبني..ابعد عني شويه وانا اقسم بالله ندمت وعرفت غلطي
لكن انت روحت اتجوزت واحده بتظلمها معاك
_انتِ عايزة مني ايه ياندى
قربت منه واتكلمت بحب
_نرجع
انا مليش غيرك يامؤمن في الدنيا
وعارفه ومتأكده انك عايزني زي ما انا عايزاك
بطل تقسى عليا كده
انا والله العظيم بحبك ومبقتش عايزة مليم واحد من فلوسك
بصلها بتردد وهو متخدر من قربها
_و...واميره
اتدخلت اميره في اللحظه دي بجمود
_انا هريحك من اميره اللي واقفه في طريقكم
طلقني يامؤمن
_انا هريحك من اميره اللي واقفه في طريقكم
طلقني يامؤمن
قالتها اميره ومشيت من قدامهم بسرعه البرق وهي بتعيط ومش شايفه قدامها من دموعها
مؤمن كان واقف بيبص للمكان اللي خرجت منه بصدمه وحس انه اتشل ومش قادر يتحرك وكأنه فاق من اللي هو فيه وفهم الغلطه الكبيره اللي عملها دلوقت
ندى قربت منه بسرعه واتكلمت بحنان
_مؤمن اميره معاها حق
هي فعلا لازم تطلع من حياتك ونتجوز وننسى اللي فات
انا حب حياتك يامؤمن مش هي
هي طرف تالت في علاقتنا ولازم تتخلص منه
زقها بعيد عنه بعنف واتكلم بغضب وصراخ
_مش عايز اشوف وشك تاني
ابعدي عني
انا مش عارف انا ايه اللي حصلي وازاي جاريتك في اللي بتقوليه
كان هيمشي بس مسكته بسرعه بغضب
_لو مشيت دلوقت يامؤمن هبعد عنك ومش هرجعلك تاني
بعد ايدها وابتسم بسخريه
_في ستين داهية
انا مش هرجعلك لو انتِ آخر واحده في الدنيا ومش هكسر مراتي اللي وقفت جنبي واللي ضفرها برقبتك
سابها وجرى ورا اميرة اللي لقاها ركبت تاكسي ومشيت من المكان
نفخ بضيق وركب عربيته وراح وراها بسرعه
لحد ما وصلت بيتهم وابتديت تلم هدومها وهي مقرره انها تسيبه ومتبقاش معاه لحظه واحده زيادة
وصل مؤمن بسرعه ومنعها من اللي بتعمله واتكلم بأسف وندم
_اميرة انا اسف
وحياة ربنا ما كنت هرجعلها من تاني ولو كنتي صبرتي دقيقه كنتي هتشوفيني وانا بهزقها
سابت اللي في ايدها وبصتله بهدوء
_بتتأسف على ايه يامؤمن!
انا اللي المفروض اتأسف لنفسي اني ظلمتها
واتجوزتك وانت قلبك مع غيري
وبتستخدمني علشان تداوي جروحك من حبيبتك القديمه
_لأ طبعا انا متجوزتكيش علشان كده
_اومال اتجوزتني ليه
عندك رد..معندكش صح
انا هقولك ليه
علشان تنساها بيا ولا تكونش اتجوزتني علشان تنتقم منها مثلا بسبب اللي عملته معاك ف تتجوز اكتر واحده هي بتكرها
ولا علشان اميره الهبله اللي بتهتم بيك وبتديك كل اللي محتاجه من غير ما تطلب ومش عايز تخسر كل ده
_خلتيني بستغلك علشان اموف اون من ندى بمجرد اني انشغلت عنك شويه
انتِ شايفاني بالبشاعه دي!
هزيت دماغها بتأكيد
_اه..انت اناني
عايز اميرة اللي بتحبك وفي نفس الوقت عايز ندى اللي بتحبها
بس انا فوقت من القر.ف اللي كنت فيه
وعقابي ليك اني اسيبك ترجعلها يامؤمن
انت وهي لايقين على بعض
قرب منها واتكلم بألم
_اميرة متظلمنيش
انا مقدرش اعمل فيكي كده ولا افكر فيكي بالطريقه دي
وندى لو آخر واحده في العالم انا عمري ما هرجعلها حتى لو علاقتي بيكي انتهت
انا عايزك واختارتك انتِ
اديني فرصه تانيه وهثبتلك ده
صرخت بغضب وقهر
_كفاية بقا..كفاية كلام معسول بتغرقني بيه وانا وقلبي بنصدقك وفي الآخر بنتك.سر ونفوق على صدمه كبيره منك
انت الفترة اللي فاتت كنت معايشني في عذاب وحيرة وتجاهل وسايبني اكلم نفسي
ليه كل ده...علشان ايه كل ده
علشان بحبك!
ما في داهية الحب قصاد نفسي
انا بقيت اكره ابص لنفسي في المرايه بسببك
بقيت بشوف واحده ضعيفه مربوطه بواحد مش بيحبها
انا بحس ان وانت معايا وفي حضني بتتخيلها هي مش انا وبيبقى فاضل بس تقول اسمها
سكت ومبقاش عارف يدافع عن نفسه
وبقى واقف مصدوم من انفجارها فيه
قارن اول مره يشوفها بدلوقت ولقى انه حولها من بنت مرحه بتحب الحياة لزوجه مجروحة ومقهورة وعلى وشك الانتحا.ر
اتكلم بصعوبة ودموع بدأت تظهر في عنيه
_قولي اللي انتِ عايزاني اعمله يا اميره وانا هريحك
مسحت دموعها واتكلمت بقوة
_تطلقني..ورقة طلاقي منك توصلي
وتبعد عني وعن حياتي وكفاية كده
هز دماغه بموافقه
_حاضر يا اميره
رغم ان حياتي هتتدمر من بعدك بس انا مش هبقى اناني معاكي زي ما اتهمتيني وهعمل اللي هيريحك
وعايزك تعرفي اني اقسم بالله ما استغليتك علشان اتخطى ندى بيكي
واني من اول يوم شوفتك وانتِ اخدتي مكان في قلبي وبقيتي حاجه كبيره عندي ومستعد اخسر اي حد علشانك
اسف اني عملت فيكي كده وعمري ما هقدر اسامح نفسي
بعد ما خلص كلامه شالت شنطتها ومشيت من قدامه بإنكسا.ر وانهزام وخطوات بطيئة
وحسيت ان الدنيا كلها بتلف بيها ومش شايفه غير سواد قدامها وآخر حاجه سمعتها قبل ما يغم عليها صوته وهو بيصرخ بإسمها
