السيرة النبوية الجزء الثاني
حد عنده طفل صغير ناخده معانا البادية !؟
= وهياخدوه معاهم البادية ليه!!؟🤔
هياخدوه عشان يرضعوه ..☺️
= وهياخدوه أد إيه !؟
هياخدوه لحد ما يبقي عنده سنتين ..😳
إزاي ؟!
إزاي واحدة ترضى إن ابنها يبقى بعيد عنها ومتشفوش إلا بعد سنتين وواحدة تانية هي اللي ترضعه !!!؟😬
لان دى كانت عادة من عادات قريش ،، إنهم لما يتولد لهم مولود مكنوش بيربوه في مكة ،، وكانوا بيبعتوه للبادية يرضع ويتربى هناك أول سنتين ..
وايه السبب إن الأطفال تخرج من مكة وتروح البادية !؟🤔
لأن مكة بيزورها ناس كتير جدا من كل مكان ،، فوارد جدا يكون في أمراض وممكن تتنقل للأطفال ،،
بعكس الصحراء :
مكان واسع ،، و هواها نظيف جدا ،، فبيكون نادر فيهم المرض وعندهم صحة 💪
فكانت بتيجي مرضعات ياخدوا معاهم الأطفال للبادية ، ويرضعوهم لحد ما يكبروا شوية ..💪
ودة اللي حصل لما سيدنا محمد ﷺ إتولد ..
السيده آمنة بنت وهب " أم سيدنا محمد "ﷺ رضعته سبعة أيام ..
مكنش لسه في مرضعات جت مكة عشان تاخد الأطفال ،،
ف ثويبة " مولاة عمه " أبو لهب " عم النبي ﷺ ،، خدت " محمد ﷺ" وارضعته ،، لحد ما جت مرضعات عشان ياخدوا الأطفال البادية ..
جت مرضعات كتير ،، ووقفوا يسألوا الناس ،،
حد عنده طفل صغير ناخده معانا البادية !؟🤔
الناس يقولولهم أيوة ، احنا عند طفل اهو ، خدوه معاكم للبادية ..
فياخدوه معاهم !
السيده آمنة بنت وهب قالتلهم أيوة ، أنا عندي طفل لسه مولود..
المرضعات سألوها : فين والده لأن هو اللي هيدفعلنا فلوس !!؟
فتقولهم إنه يتيم ،، والده مات ..
فيرفضوا المرضعات إنهم ياخدوه ..
= وليه بيرفضوا ياخدوه !!؟
لأنهم هياخدوا فلوس مقابل رعايتهم للأطفال،، فمين اللي هيديهم فلوس ووالده متوفي !
= هما كانوا بياخدوا مبلغ معين !؟
لأ خالص ،، مكنوش بيطلبوا مبلغ معين ،، هما بياخدوا فلوس كدة زي مكافأة ليهم ..
ف جده " عبد المطلب " قالهم خلاص انا هديكم فلوس ..!
لكن برضو المرضعات مرضيوش .!
كان فيه مرضعه بقي من ضمن المرضعات إسمها حليمة " حليمة السعدية " ،،
وكان معاها جوزها وابنها الصغير ..
كانت فقيرة جدااا ،،
وكانت معندهاش لبن في صدرها يكفي ابنها..
وكانت هي واسرتها راكبين حمارة ضعيفة ، وبتمشي براحة جدا ،، وبتأخر اللي راكب عليها ،، لأنها مش قادرة تمشي ..
وعندهم ناقة ، بتديهم لبن ، كانوا بيحبلوها زي البقره كدة ..
بس كانت بتجيب لبن شوية صغيرين جدا..
كانت حليمة بتدور علي طفل تاخده معاها البادية
بس مكنتش لاقية ولا طفل تاخده معاها ..
ماهو كل المرضعات التانيين أخدوا كل الأطفال إلا سيدنا محمد ..
حليمة مكنتش عايزة ترجع من غير رضيع ،، واصحابها كلهم معاهم رضيع،،
فقالت أنا هروح آخذ اليتيم ده..
راحت لآمنة و عبد المطلب قالتلهم انا هاخد سيدنا محمد ﷺ معايا ❤..
وبعد ما خدته حصلت حاجة عجيبة !!!
لقت صدرها اتملى لبن فرضعته وشبع ورضعت ابنها كمان وشبع..
لقت الناقة الضعيفة بتاعتها اللي مكنتش بتجيب غير شوية لبن صغيرين ،، بقت قوية وبتجيب لبن كتير 💪
جت تركب الحمارة الضعيفة بتاعتها عشان تروح بيها البادية ،، لقتها بقت قووية وبقت تمشي بسرعة جدا 💪
المرضعات التانيين اللي معاها فضلوا مستغربين ، ويقولوا ازاي الحمارة البطيئة دى بقي قوية كدة !!؟
إزاي بيحصل مع حليمة كدة !؟؟
فضلوا ماشيين بالحمارة بتاعتهم لحد ما وصلوا البادية ..
حليمة كانت عايشة في بيت ، في مكان اسمه " ديار بني سعد "
وكانت عندها أرض ،، بس السنة دى الأرض مكنش فيها لا زرع ولا مياة ..
ايه اللي حصل بقي ؟!
أول ما وصلت حليمة و معاها سيدنا محمد ﷺ الدنيا مطرت 🌧 والزرع الجميل بدأ يطلع 🌴وبقت أرضها جميلة جدا ❤️
الناس كانوا مستغربين أوي ،، اشمعنى حليمة يعني!!
فكانوا بيقولوا للغلمان بتوعهم روحوا ارعوا مع غنم حليمة،،
حليمة قعدت تفكر بقي ،، وتقول لنفسها :
أنا أول ما جبت سيدنا محمد ﷺ معايا حصل حاجات حلوة كتير ..
الطفل دة معاه خير وبركة من ربنا بيخلي.كل.حاجه حواليه جميلة ❤️
ف بقت حليمة فرحانة أوي بسيدنا محمد ﷺ
وكبر سيدنا محمد ﷺ في البادية ،، كان بيكبر بسرعة ،، لحد ما بقي عنده سنتين ..
يعني لما كان وصل عمره سنتين كأن عمره ست سنين، ،، وكان بيتكلم كلام واضح جدا وهو عمره سنتين ،،
وبقي جسمه قوي ،، واقوي كمان من الأطفال اللي قده 💪
بعد ما بتخلص السنتين بتوع الرضاع ،،
الناس بترجع الأطفال لأهلها بعد ما يكونوا فطموهم ويشوفوا إللي عايز يسترجع أبناؤه أو يخليهم مع البدو مدة أطول،،
كدة خلاص بقي كبر ولازم حليمة ترجعه لأمه ..
بس حليمة كانت بتحب سيدنا محمد وعايزاه يقعد معاها وقت أطول ..
ف راحت حليمة السعدية لآمنة " ام سيدنا محمد قالتها : ممكن تسيبي محمد يقعد معايا شوية كمان ؟؟
البادية مكان جميل وجوها حلو ولو رجع ممكن يتعب ، خليه معايا شوية كمان ...
قعدت تقنعها إنها ترجع بمحمد مرة تانية ،، وتخليه عندها عشان خايفة عليه من أمراض مكة،،
فإقتنعت آمنة ،، وافقت
ورجع سيدنا محمد مع حليمة في بيتها للبادية ..
بعد ما حليمة رجعت بسيدنا محمد ﷺ للبادية ،، حصل اللي مكنش متوقع !!!
ياتري إيه اللي حصل 😱
❤️❤️❤️صلوا على النبي ❤️❤️❤️
السيدة حليمة السعدية بعد ما رجعت للبادية و معاها سيدنا محمد ﷺ
كانت فرحانة إن سيدنا محمد ﷺ رجع معاها تاني ،،
الأطفال بقي في البادية كانوا بيحبوا يلعبوا مع بعض ،، وبيحبوا يلعبوا مع سيدنا محمد ﷺ ..
في يوم من الايام راحوا الأطفال كلهم و معاهم سيدنا محمد ﷺ يلعبوا ورا باب البيت ،،
فدخل عليهم رجلان ،، شكلهم جميل اوي ،،
لابسين ملابس بيضاء ونضيفة جدااا ،،
فواحد منهم راح لسيدنا محمد ﷺ ، ووقعه علي الأرض ،، وشق صدره وطلع قلبه ،،
وأخرج من قلبه عَلَقة سوداء وقاله:
هذا حظ الشيطان منك ،،
يعني دخل ايده براحه جوة صدره ،، وخرج قلبه وأخد حاجه من قلبه ..
وبعدين خد قلبه وغسله في طبق كبير من ذهب ،، مليان بمياة زمزم ،،
وبعدين رجع قلبه مكانه وخيّط صدره وسابوه ومشيوا !!
وايه العَلقة السوداء دي !؟
حاجة صغيرة أوي زي البذرة السوداء ،،
وقالوا لسيدنا محمد ﷺ: انا أخدت الحاجه دي من قلبك عشان قلبك يبقي أطيب وأطهر قلب ،،
والشيطان ميقدرش يضايقك أبدا ولا يقدر يخليك تعمل اي شر أبداً ،،
وهي دي بقي الحادثة المشهوره
(شق صدر سيدنا محمد رسول الله ﷺ ❤️)
وإللي شق صدر رسول الله ﷺ كان جبريل عليه السلام بأمر من الله ،،
طبعاً ربنا عزوجل قادر إنه يخلق سيدنا محمد ﷺ من غير ما تحصل القصة دي كلها أصلا ،،
لكن ربنا سبحانه وتعالى كان بيمهد لسيدنا محمد ﷺ من صغره إنه مش إنسان عادي ،،
ربنا بيهيئه من صغره لحاجات غريبة و مختلفة. ،، عشان يستعد 💪
عشان كدة لازم سيدنا محمد ﷺ لحد ما يكبر ميعملش اى حاجة غلط ،،
فربنا سبحانه وتعالى خلي قلب سيدنا محمد ﷺ أطهر وأطيب قلب ،،
مليان خير ومفيهوش اى شر ،، وميقدرش الشيطان أبداً يوسوس لسيدنا محمد ﷺ ❤
* أنس بن مالك قال إنه شاف أثر الخياطة في صدر رسول الله ﷺ ،، *
سيدنا محمد ﷺ
كان لسه صغير بقي جداً لما حصل شق الصدر ،، فكان مخضوض اوي من اللي حصل وخايف ،،
بس الولاد التانيين اللي كانوا بيلعبوا معاه هما كمان خافوا اوي ،،
فطلعوا يجروا بسرعة وهما خايفين علي السيدة حليمة قالولها : الحقي .. الحقي
محمد اتقتل ... محمد اتقتل !!
حليمة خافت اوي علي سيدنا محمد ﷺ ،، وطلعت تجري بسرعة تدور عليه ، وتشوف ايه اللي حصل !
أول ما وصلوا لقوا محمد الطفل إللي عمره سنتين وكم شهر واقف وشه خايف ،، ومصدوم ،، ومخضوض من إللي حصل له!
فسألته إيه اللي حصل !؟
فحكالها اللي حصل معاه ..
قالته : متخافش .. متخافش
فقالت حليمة لزوجها اللي حصل ، وقرروا يرجعوه لأمه " آمنة بنت وهب " ،،
طب مش هي كانت بتحبه إزاي هتسيبه كدة ؟!
عشان هى خافت عليه ،،
وافتكرت الراجل اللي جاله دة كان جاي عشان يأذية ،، جن يعني ،،
ماهي متعرفش انه ملاك بقي ❤️
حليمة خدت سيدنا محمد ﷺ وراحت تديه لأمه ،،
ف آمنة بنت وهب استغربت أوي !!
الله ،، إيه اللي حصل !؟
ماهي كانت لسه من كام شهر بتتحايل عليها ان سيدنا محمد ﷺ يقعد معاهم ،، جاية ترجعه ليه بقي !؟
فحليمة حكيتلها اللي حصل وقالتها انا رجعته عشان خايفة عليه ،،
ف آمنة بنت وهب قعدت تحكي لحليمة إللي حصل معاها يوم ما اتولد سيدنا محمد ﷺ ،،
وحكت لها على النور إللي شافته يوم ما اتولد ،،
ورجع سيدنا محمد ﷺ عشان يعيش مع أمه وجده " عبد المطلب " تاني ،،
بعد ما سيدنا محمد ﷺ رجع لأمه وجده هيعيش معاهم لحد ما يبقي عنده ست سنين ،،، وبعدين هيحصل حاجة تااااااني غير متوقعة 😱
ياتري إيه اللي هيحصل تاني !؟ 🤔
يتبع ان شاء الله ❤️..
💢 💢 💢 💢 💢 💢 💢 💢 💢 💢 💢
