قصة رعب قصيرة كاملة
الساعة سبعة وجوزي خرج اهو يروح الشغل وقفل باب الشقة بالمفتاح.
انا المفروض اقوم عشان انزل الشغل انا كمان بس هنام شوية واقوم.
الساعة تمانية اقوم عشان الشغل ولا اعمل ايه انا مش قادرة اقوم خلاص هاخد انهاردة اجازة هنام شوية واكلمهم في الشغل.
ايه ده ايه الصوت طرقعة الصوابع ده بيتهيألي ولا ايه، طيب انا فتحت عيني اهو اركز عشان اعرف في ايه.
ايه صوت الصفارة اللي جاي من ورايا ده بيتهيألي برضو ولا ايه.
طيب انا صاحية وفايقة اهو يعني مش بيتهيألي .
ايه ده مين اللي بيقوم من على السرير ورايا ده ابص ولا اعمل ايه، لا مش عايزة ابص انا سامعاه اهو ماشي ناحية باب الاوضة وقفل الباب.
بس هو كدا خرج اقوم اشوف في ايه؟!..
مفيش حد في الاوضة اهو وباب الاوضة مقفول فعلا
اكلم جوزي اشوف يمكن يكون رجع.
انا: الو انت فين.
جوزي: انا في الشغل لسة واصل.
انا: طيب هو انت قفلت عليا باب الاوضة؟
جوزي: لا سبته موارب كدا.
انا: 😕
لفيت في الشقة كلها دورت في كل مكان ممكن حد يستخبى فيه، حتى دورت في الغسالة والتلاجة مفيش حد.
يعني هو كدا غالبا عفريت طيب انا فوقت اهو البس وانزل الشغل احسن بما انه صحاني كتر خيره.
