رواية القاسيان الجزء الثاني الفصل الثاني
=====================
خلص رأفت مع محمد وانطلق للشركة بتاعة يوسف ووصل وقابل سهوة قدام الشركة وسألته عن التحليل وقالها انه عمل التحليل واتكلموا شوية وطلعوا الشركة بس الصدمة سيطرت عليهم اول ما دخلوا لانهم شافوا سما ......
رأفت بعصبية : انتى ايه اللى جابك هنا ؟
سما بدلع : شركتى ، بلاش اجى شركتى !!!
نزلت الصدمة على رأفت وسهوة وعمر اللى دخل وسمع بالصدفة
عمر : شركتك مين يابت انتى ؟
سما : يوسف الله يرحمه باعها ليا
عمر بصدمة : باعها ليكى ازاى ، مستحيل اصلا يبيع الشركة ولو فكر مش هيكون انتى وبعدين يوسف مات ؟
سما : اها بس قبل ما يموت باعها
سهوة بعصبية : اهاا خطفتوه وخلتوه يبيعها غصب ولما باعها قتلتوه، صح !!!
سما : انتى بترمى تهم كدا ليه ، عندك البوليس روحى بلغى وقولى ان احنا خطفناه وقتلناه
سهوة : حد قالك قبل كدا انك بجحة !!
سما ضحكت : اهاا كتير ودلوقتى اتفضلوا انتوا مطرودين
اتصدموا كلهم من كلامها وقرروا يمشوا
عمر : لحظة بس (كلهم وقفوا) فين الاوراق اللى تثبت
سما ابتسمت وجابت الاوراق وورتهالهم وشافوها ومشيوا
رأفت : وهنعمل ايه دول خلوه يبيع الشركة وقتلوه !!
عمر : مش عارف....بس طالما كدا مش ورايا شغل ولا مشغلة وحياة امهم ما هسيبهم واولهم سما دى
سهوة بدموع : ولا انا
عمر : انتى ايه يا سهوة ، ماينفعش...انا هعرف اعمل ايه كويس
سهوة : هعمل اي حاجة
عمر : ربنا يسهل ، بتتصل بمين يا عمى
رأفت : ب محمد....هبلغه باللى حصل
وبالفعل كلمه رأفت وحكاله اللى حصل
محمد : انا عايزكم علشان اقولكم على حاجة كمان
رأفت : حاجة ايه ؟
محمد : مش هينفع فى التليفون ، نتقابل على كافيه ساقية عارفه؟
رأفت : ايوة ، هستناك هناك
محمد : تمام
قفل رأفت مع محمد
عمر : قالك ايه ؟
رأفت : عايز يقابلنا مش عارف ليه ؟
عمر : طب احنا مستنيين ايه، يلا بينا، هو قالك فين ؟
رأفت : ايوة ، يلا هنركب عربيتى
وصلت ولاء فى اللحظة دى وحضنت سهوة وعرفت اللى حصل كله
عمر : روحى انتى يا ولاء لغاية اما نخلص من اللى فيه ده
ولاء : طيب هاجى معاكم
عمر بعصبية : ولاااء مش فايقلك ، قولتلك روحى
ولاء بخوف : حاضر
ومشيت ولاء وركبوا التلاتة عربية رأفت وانطلقوا على الكافيه
استنوا لحظات ووصل محمد وقعد واتنهد
محمد : يوسف باعلهم الارض كمان قبل ما يقتلوه
كلهم اتصدموا
رأفت : يعني الشركة والارض راحوا !!!!
محمد : للأسف والاتنين بأسم سما علشان مانعرفش نوصل للراس الكبيرة ومانخربش وراه وزى ما قولتلك قبل كدا ، دى مافيا اثار وسلاح ومخدرات كمان اما بقا عن حكاية النفق اللى بيودى على اسرائيل اللى فى الارض ده لسة معرفش اي فكرة عنه
عمر : طيب ايه الاجراء اللى هناخده ، ما هو مش معقول هنفضل كدا وسما بردو اكيد عاملة كل احتياطاتها علشان مانعرفش مين اللى شغالة معاه واكيد مش هتتواصل معاهم غير حساب فيسبوك او واتس
محمد شاور بأيده : انت صح ، انا هعين فريق يتابع ويراقب كل حساباتها
سهوة : يا سيادة المقدم هى مش هتتواصل مع المافيا اللى شغالة معاهم بحسابها الشخصى يعنى... اكيد هتكون عاملة 30 اكونت مختلفين ومالهمش علاقة ببعض علشان يتواصلوا
محمد : ما هى هتعمل كدا فعلا بس اللى بيربط ده كله الاى بى بتاع جهازها والاى بى ده سهل نجيبه ولو جبناه هنقدر نراقب كل حساباتها اللى عملاها او اللى هتعملها
عمر : بردو يا سيادة المقدم ماسمعتش عن حاجة اسمها vpn !!!!
ده بيغير الاى بى لمليون اي بى هى عايزاه ومن اى دولة تانية
محمد : دى بقا هتبقى مشكلة لو استخدمت فى بى ان بس هيبقى ليها حلول تانية بأذن الله
روح رأفت وروحت سهوة وروح عمر وكل واحد فيهم حزين بشكل كبير جدا
دخل رأفت البيت بس كان كئيب جدا اكنه حزين على يوسف ، مافيهوش اى صوت غير صوت رباب بتعيط على ابنها وصوت اسماء بتدعى ربنا ان تحليل الDNA يقول ان اللى مات ده مش يوسف وان يوسف عايش
وجودى اللى قاعدة بتعيط وفاتحة اللاب وبتشوف صورها وذكراياتها مع اخوها ....كل لحظة حلوة قضوها مع بعض وكل ضحكة
قرب رأفت من جودى وحسس على شعرها وباس دماغها
رأفت : بتعيطى ليه !
جودى بدموع :علشان يوسف يا بابا ، علشان مش هشوفه تانى ، يوسف كان بيخفف عنى اى حاجة وبيساعدنى فى كل حاجة ، لما ببقى متضايقة كنت بروحله وهو الوحيد اللى كان بيخرجنى من المود ويضحكنى وينسينى انى كنت متضايقة اصلا ، كنت لما ابقى فى مشكلة اروحله وهو بكل بساطة يحلهالى ، دلوقتى لما ابقى متضايقة اروح لمين...لما اقع فى مشكلة مين اول واحد اشتكيله واقوله !!
رأفت بحزن : انا موجود يا جودى ، انسى انى ابوكى ، اعتبرينى اخوكى وصاحبك واحكيلى وفضفضيلى ، ان شاء الله يوسف يطلع عايش ويرجع تانى ويملا البيت هزار وضحك زى عوايده ، المهم انتى دلوقتى تطلعى تذاكرى علشان امتحانات الترم التانى هتبدأ كمان اسبوع واللى فيه الخير ربنا هيقدمه ، ماشى يا جودى !!
جودى : حاضر يا بابا وحضنها رأفت وباسها من دماغها وسابها وطلعت على فوق...
قام رأفت واتجه ناحيه رباب اللى ماسكة صورة يوسف وبتعيط ومش مبطلة عياط نهائى
رأفت : هيفيد بأيه العياط ده كله ؟
رباب بدموع : ابنى مات ، مش عايزنى اعيط ؟
رأفت : حتى لو مات ، هو دلوقتى عايش فى مكان احسن ، مكان مفيهوش ولا ظلم ولا قهر ، مكان مفيهوش دم ومصالح شخصية ، مكان مفيهوش حزن وكل واحد بيصارع على سلطة
زعلانة من ايه بقا !!
رباب بدموع : علشان مش هشوفه تانى ولا هيرجع يهزر معايا تانى
مش هشوف ضحكته تانى ، كان مالى البيت نشاط وهزار،
كان كل حاجة بالنسبالى ، بس ضااااع
رأفت : مش يمكن مايكنش مات !!
رباب بدموع : وجثته دى ايه !!
رأفت : كانت متشوهة ، ومش علشان نفس جسمه وشايل اوراقه يبقى يوسف
رباب : والصورة اللى اتبعتت لسهوة على الموبايل كان مقتول بنفس هدومه ونفس الرصاصتين ، ده بردو مش يوسف !!
رأفت : ممكن يا رباب ، اى حد بيفهم فى الفوتوشوب هيفبرك صورة زى دى ، المهم مانسبقش الاحداث ونستنى لما نتأكد بنفسنا....
.............
كانت ملك رايحة جاية ومتوترة وبتنفخ جامد
يارا : اهدى يابنتى خيلتينى
ملك : بتصل بزفت محمد ومش بيرد عليا
يارا : تلاقيه فى مهمة ومشغول
ملك : مشغول ايه ، احنا متفقين انه هيرجع دلوقتى علشان نروح لرامى المطار
يارا : ماتقلقيش زمانه جاى وبعدين مالك متوترة كدا، هو حبيب القلب وحشك اوى كدا
ملك : بس يابت مش فيقالك
ضحكت يارا عليها وسمعوا صوت عربية
جريت ملك على الشباك علشان تشوف مين ولقته محمد
يارا : اهو جيه
طلعت ملك تجرى على تحت واتخض محمد لما لقاها بتجرى ناحيته
محمد : فيه ايه يا مجنونة خضتينى !!
ملك : اتأخرت كدا ليه ، مش هنلحق رامى
محمد : وهو عيل صغير يعنى مش هيعرف يجى لغاية هنا !!
ملك : لا عايزة استقبله بنفسى
محمد وهو بيقلدها : عايزة استقبله بنفسى ، طب يلا يا حبيبتى اطلعى اتزفتى البسى
ملك : مانا لابسة اهو
محمد : نعممممم ايه البتاع الضيق ده
ملك : معلش بقا
محمد : ولزمتها ايه الحجاب اللى على دماغك ده ، غورى يابت البسى حاجة تانية
ملك وهى مقموصة : حااضر
طلعت ملك تغير هدومها ويارا كانت واقفة بتضحك عليها
قرب محمد ناحيتها وشدها ناحيته وباسها جامد
محمد : انتى حلوة النهاردة كدا ليه
يارا : وانت النهاردة عسول كدا ليه
محمد بغرور : طول عمرى
ضربته يارا على كتفه
يارا : مابحبش الغرور
محمد بإبتسامة : انا مغرور بيكى انتى ، حد يبقى معاه يارا ومايبقاش مغرور
يارا : حبيبى ، ربنا يخليك ليا
حضنها محمد وبص لقى ادهم ابنهم واقف بيضحك
محمد : انت هنا من امتى ياض انت
ادهم : من ساعة البوسة
ضحكت يارا جامد ومحمد راح ناحيته ورفعه بأيد واحدة
محمد : مش هتبطل الصياعة دى ياض
ادهم : انا مث ثايع يا بابى ، مث انت بوست مامى
محمد : اها
ادهم : يبقى مث ثايع
محمد : لما تشوف حاجة كدا تغمض عينك علشان عييب
ادهم : طب مث هو عيب، بتبوسها ليه بقا
ضحكت يارا جامد على ابنها ومحمد مش عارف يرد عليه
محمد : ماشى غلبتنى فى الكلام المرة دى ، يلا علشان هنروح نستقبل عمك رامى الاهبل
ادهم : هيييييه
محمد : مش عارف بتحبه على ايه ، شكلك اهبل
ادهم : بحله علثان بيضحكنى
محمد وهو بيقلده : علثان بيضحكنى ، يلا يا حبيبى يلا ، مش عارف ابنك طالع اهبل لمين
يارا : ابوه
محمد : انا اهبل ، ماشى يا يارا ماشى، اصل انا اللى كنت بصدق المنظمة واروح اجرى وراهم لمجرد انهم بعتولى رسالة انى عندهم
يارا : انا غلطانة انى خوفت عليك وروحت علشان انقذك ، كنت المفروض افكر واقول انشاله يقتلوه
محمد : تنقذينى !!! ، وبعدين لسة ماتخلقش اللى يعرف يقتلنى يا قطة
نزلت ملك
ملك : يلا
محمد : فين ابنك آسر
ملك : نايم فوق
محمد : يارب على الغباااااااء ، انتى هبلة بابت انتى !!! هتسيبى ابنك نايم فى فيلا طويلة عريضة لوحده !!! علشان نرجع نلاقيه مولع فى نفسه وفى البيت ؟
ملك : يعنى اصحيه واخده معايا
محمد : لا سبيه يولع فى نفسه وفى البيت
ضحكت يارا
ملك : حاضر حاضر هصحيه والبسه وانزل
محمد : بسرعة بقا
ملك : حاضر
طلعت ملك وصحته ولبسته ونزلت
محمد : ايه يا عم آسر مش هتبطل النوم اللى على طول ده
اسر : انا !!
محمد : هو فيه آسر تانى معانا غيرك !!
اسر : ايوة ، فيه عفليت صاحبى فى الاوضة اسهيرجعلى
محمد : عفريت فى الاوضة !!!
ملك بخوف ورعب : أسر والنبى ماتقولش كدا تانى علشان بترعب وهخاف اخش اوضتك تانى
اسر : هههههه مث تخافى
ملك : لا اخااف
محمد : يلا بينا هنتأخر
انطلقوا كلهم فى عربية محمد ووصلوا المطار وكانوا فى استقبال رامى
اول ما وصل رامى جرى على حضن ملك
رامى بحب : وحشتينى الاسبوع ده
ملك : وانت وحشتنى اوى
رامى : خليكى اما اسلم على القوم دول
راح رامى ناحية محمد وحضنه
محمد : وحشتنى ووحشنى هبلك ياض
رامى : ايه ده لازم تغلط يعنى ، انت يابنى مايحلاش يوم ليك غير لما تجر شكلى
محمد : معلش يا رامى
رامى : اممممم شكرا بس ماتمعلشتش
محمد : مش مشكلتى
رامى : ادهم الظابط الصغير، عامل ايه ياض
ادهم : اهو ماثية
رامى : ايه الواد ده ، ده انا حسيت انى بكلم حد عنده 40 سنة
محمد : طالع لأبوه ناصح مش ابنك اللى مصاحب عفاريت
رامى : اه صح يا أسر ، ايه اخبار اسر العفريت اللى معاك، ده وحشنى
اسر : بيسلم عليك يا بابى
ملك بخوف : ايه حكاية اسر العفريت ده ؟
رامى : ده عفريت فى سن اسر واسر عرفنى عليه بس ايه ، عفريت سكرة ، بعد ما كنت بخاف منهم بقيت مصاحبهم
محمد : بجد الكلام ده ولا بتهزر
رامى : ههزر ليه يابنى ، بجد طبعا
ملك : لا يبقى مش داخلة اوضتك تانى يا اسر
رامى : ماتخافيش هعرفك عليه وهتحبيه
ملك : لا ياعم مش عايزة اتعرف على حد ، كدا احسن
رامى : براحتك بس معرفة الجن كنوز
ضحكوا كلهم ووصلوا للعربية ورجعوا للفيلا وهم بيهزروا ويضحكوا......
.......
سهوة كانت قاعدة حزينة ومابتفكرش فى حد غير يوسف وبتدعى من قلبها ان يوسف يطلع عايش ومش هو اللى لقوا جثته ده لانها مش حمل فراق
ايوة يوسف دمرها ودمر كل حاجة جواها بس هى متقدرش تعيش فى عالم هو مش موجود فيه لمجرد ان قلبها عشقه وسكنت روحه جواها
بس هى احساس جواها بيقول ان يوسف عايش وهيرجعلها وهيضمها له زى زمان، عندها احساس قوى بكدا
مجرد احساس......
........
عدى يومين...
قام محمد على صوت ادهم
ادهم : بابى بابى اصحى بقا
محمد بنوم : عايز ايه !!
ادهم : قوم بطل كسل
محمد : فيه حد يقول لأبوه بطل كسل
ادهم : لا
محمد : امال بتقولها ليه
ادهم : علشان الفطال جهز وماما اتزحلقت ووقعت جامد على ضهلها
قام محمد بسرعة : بتقول ايه وحصلها حاجة
ادهم ضحك : لا قامت زى القلدة
دخلت يارا : كدا يا ادهم حد يقول على ماما قردة ؟
ادهم : سورى بس مث قصدى ثتيمة
يارا : طيب يلا اجرى صحى اسر يلا
ادهم : حاضل
يارا قربت ناحية محمد
يارا : خفت عليا
محمد لف ايده حواليها : جدا
يارا : انا بقا بخاف عليك كل يوم مليون مرة بسبب شغلك ده
محمد : الاعمار بأيد ربنا يا قلبى وبعدين ربنا بيسترها
يارا : مانا خايفة فى يوم تخش عليا واخد رصاصة فى دماغك
محمد : اعوذ بالله ، ايه التفويل ده وبعدين هخش عليكى وانا مضروب رصاصة فى دماغى ازاى !!
ضحكت يارا وحضنها محمد جامد وهى حست بأمان وراحة فى حضنه
قطع اللحظة دى صوت رامى العالى من تحت
رامى بصوت عالى : انزل يااااعم يالى فوق، الفطار هيحمض من كتر ما هو محطوط
محمد نزله : الله يحرقك بتخش فى لحظات ، همك على كرشك
رامى : انا بردو...ما تردى يا ملك على اخوكى
ملك : مش فضيالكم سيبونى اكل
محمد : بدل ما تستنينى يا واطية
رامى : وبدل ما تستنى جوزها ، فجع بعيد عنك
قعدوا يفطروا ويتكلموا وخلصوا
وقام محمد وراح يجيب تحاليل الDNA
نزل محمد من هناك ولسة هيركب عربيته لقى رأفت جاى ناحيته
رأفت بقلق : نتيجه التحليل طلعت !!
محمد : ايوة
رأفت : وبتقول ايه !!
محمد بحزن : للأسف التحليل خرق كل توقعاتنا....الجثة اللى لقيناها دى تبقى جثة يوسف ابنك يا بشمهندس........
*******★**********★**************★****************
لسة عندكم امل ان يوسف عايش !!!
ياترى ايه اللى هيحصل الحلقة الجاية !!!
