رواية غويشه صينى الفصل الثالث بقلم شهد محمد موسى
*الثالث والأخير
_أدهم هو إي اللون الأحمر إللي علي قميصك دا!!؟"همست بيها بإستغراب لما جه قعد جمبي "
_بَص علي القميص ورجع بَص ليا ورد بلا مبالاه: معرفش ممكن يكون بيتادين ولا حاجة لاني لسة خابط في ممرضة بره
_رديت بغيرة و غيظ: وهي عامية للدرجة دي!!؟
_ضِحك وشد خدودي وإتكلم: أموت أنا في حبيبي الغيران دا يا ناس
_شِلت إيده من علي خدي وإتكلمت بغيظ: لو سَمحت متجيش ناحية خدودي تاني!! ثم مين قال أني غيرانه أصلا!!؟أنا بس إضايقت مِن حَولها المفروض كانت تاخد بالها أكتر مِن كدا
_قَرب وشه مِن وشي وهمس : والله يعني إنتِ مِش غيرانة؟
_بَلعت ريقي بصعوبة وأنا ببص في عينيه ورديت بتوتر: لاء مِش غيرانه"كملت وأنا بحط إيدي علي كتفه وببعده" وبعدين إبعد كدا شوية و متاخدنيش في دوكة الدكتور قالك أي؟
_ اتنهد ورد بإبتسامة: قالي إنك بقيتي كويسة الحمدلله وتقدري تقومي
_ إتكلمت بفرحة وحماس: طَب الحمدلله كويس أوي كدا أقدر أروح أشوف سما بقي..
_حَسيت وشه قلب أول ما جبت إسمها و لَقيته إتكلم بضيق: روميساء أنا قولتلك إنسي البت دي خالص ومش عايز أسمع سيرتها تاني نهائي!!!
_إتكلمت بغيظ وأنا بربع إيدي: يووه بقي يا أدهم قولتلك هي مكانتش تقصد !! هنفضل نغنيها كُل شوية!!
_ بصلي بغضب وكَمل بِحده وإنفعال: مكانتش تقصد أي بالضبط؟ مكانتش تقصد تِسرقك وتبقي عايزة توقع بينا وتبعدنا عن بعض ؟ ولا مكانتش تقصد تزقك ؟ إنتِ كان ممكن تِروحي فيها!! إنتِ مستوعبة دا!!؟ مستوعبة إنك كان ممكن في لحظة تخلف وإنفعال منها تضيعي مني للأبد ومشوفكيش تاني!!! مُجرد التخيل بس مخليني عايز أقتـ لها والله!
إتنهدت ومِسكت إيده بإيديا الأتنين و رَديت بحنان وأنا مبتسمة: صَدقني أنا مقدرة شعورك جدا والله وعارفة إنتَ بتحبني أد إي بس يا حبيبي ويا نور عيني من جوا هي فعلا كان غصب عنها ومكانتش تقصد أي حاجة من إللي هي عملتها!! أنا معاك وعارفة إنه كُل إللي عملته غلط في غلط بس ليه منحاولش نلتمسلها الأعذار!!؟
_رد بسخرية: وهو الحقد علي الناس وكُره الخير ليهم بقي ليه عُذر كمان يا حلاوة يا ولاد واخدانا علي فين تاني يا بلد!!؟
_كَملت بإبتسامة وأنا بضغط علي إيده: أه يا أدهم أحيانا بيكون له أعذار!! مِش دايما أه بس أحيانا بيكونله زي البيئة مثلا إللي هو إتربي فيها ودا مِش كلامي دا كلام الدكاترة والفلاسفة البيئة إللي إحنا عايشين فيها بتلعب بنفسيتنا بِشكل بشع في مننا إللي بيقدر يقاوم وبيحاول ميتأثرش أوي وفيه الضعيف إللي أقل حاجة ممكن تأثر فيه خلاصة الكلام يا أدهم سما مِن وهي طِفلة لسة بتطلع للدنيا وبتتعرف عليها إتربت في بيئة وحشة غير سوية أهلها بينهم مشاكل وباباها كُل شوية يتجوز علي مامتها ومامتها مِش مهتمه بيها فعلا ومش مديها الحُب والإحتواء إللي هي محتاجاه إتبهدلت وهي صُغيرة فكل دي أعذار أنا ألتمسهالها للي هي فيه!! لكن عارف لو واحده أنا عارفة إنها متربية في بيئة سوية وعملت إللي عملته سما دي بقي تستحق تتلام علي كُل حاجة لانه دي معندهاش أعذار بس هتفق علي شئ وهو سواء كانت متربية في بيئة سوية أو لاء فَـ دول بيبقوا ناس مَرضي!! ومحتاجين يتعالجوا وفوق دا كُله وبعيدا عن سما وأعذارها بس أنا كمان غلطانه!! وغلطي مِش أقل منها أبدا!؛ أنا إللي مسمعتش كلامك وحكيت حاجات مينفعش أي حد يعرفها حتي لو كانت صاحبتي!! فأنا كمان غلطانة "إتنهدت وكَملت بإبتسامة حزينة" وأنا بقولك إني هشوفها و هطمن عليها بس ومتقلقش يا أدهم حتي لو هتفضل صاحبتي بس أكيد في حاجات كتير أوي هتتغير غصب عني حتي لو أنا مِش عايزة دا!!
_بَص ليا بهدوء وإتكلم بإستغراب: بصراحة أنا مِش عارف إنتِ مخلوقة من إي!!؟ عايزة تشوفيها وتتطمني عليها وهي أصلا معبرتكيش ولا فكرت تسأل عليكي علي الرغم إنها هي السبب في حالتك!!! "إتنهد وكمل بسخرية وهو بيبصلي بغموض" بس علي العموم هي مِش موجودة أصلا يا حبيبتي!!
_كَشرت وكَملت بتساؤل: يعني إي مِش موجودة!؟ أنتم مش قايللي إنها هنا!!
_كَمل بنبرة غريبة: كانت هنا!! الدكتور إللي كان متابع حالتها يبقي صاحبي ولما قابلته قبل ما أجيلك قالي إنه هي خرجت من المستشفي إمبارح "كَمل وهو بيأكد علي الكلام" ومن غير ما تشوفك!! ولا تسأل فيكي فياريت بقي تطلعيها من دماغك خالص ونقفل صفحتها للأبد!!"كَمل بحنان وهو بيحط إيده علي خدي" وأنا عند وعدي ليكي مِش هقول لأهلك حاجة عشان متشوهيش صورتها قدامهم زي ما طلبتي مني بس عشان خاطري إمحيها من دماغك وانا أوعدك هغنيكي عنها و هكون ليكي الصاحب والأخ والأب والزوج وكُل إللي إنتِ عايزاه ماشي يا حبيبي
هَزيت دماغي بحاضر وأنا بحاول أبتسم "وهو كَمل بمرح" يلا شدي حيلك كدا عشان نِشغل كَتبوا كِتابك يا نقاوة عيني "قرب وشه مني وهمس في ودني بنبرة خلت جسمي كُله يقشعر" و نِشغل "خليني في حُضنك يا حبيبي " عشان أعرف أحضنك بضمير كدا وكمان أبوس الحُفرتين إللي همـ وت وأبوسهم دول بس مِش عايز أول ذكري ليا معاهم تكون في المستشفي كدا وسط المحاليل!!!
قلبي الصغير لا يحتمل يا جُدعان!! ممكن يغمي عليا دلوقت وأنا أصلا أصلا تعبانه لوحدي!!
_______________________________________________
_هي عاملة إي دلوقت يا خالد؟
_خالد إتنهد ورد: الحمدلله بقت أحسن إنت أصلا لولا كَلمتني في الوقت المناسب كان زمان دمها كُله إتصفي!!
_إتنهد ورد : طب الحمدلله ولو إني مش طايقها بس ربنا يعفي عنها "كَمل وهو بيحط إيده تحت دقنه"هتعمل معاها إي بقي؟
_خالد حط إيده تحت دقنه ورد بحيرة: والله مِش عارف يا أدهم أنا بفكر أحولها علي مستشفي الأمراض العقلية عشان بعد محاولة الإنتحار دي فهي كدا بقت بتشكل خطر كمان علي نفسها!!
_أدهم خد نفس طويل وإتكلم بضيق: بُص أعمل إللي إنت شايفة صح ليها بس بالله عليك إبعدها عن روميساء وعني ومتخليش حد يعرف مكانها ولا أوضتها أنا ما صدقت أقنع روميساء أنه هي مشيت من المستشفي وستر ربنا عِرفت أهرب من سؤالها لما شافت دم المهببة دي علي القميص
_خالد ضِحك غصب عنه وإتكلم: بس حلوة صراحة حكاية البيتادين دي كيريتيڤ
_أدهم بصله بغيظ وكَمل وهو بيقوم : تِصدق بالله إنت معندكش دم!! أنا ماشي
_خالد بَطل ضِحك و شده يقعده وإتكلم بمرح: خلاص متبقاش قموصة كدا إترزع بحاول أفرفش الجو المكهرب دا
أدهم بغيظ: وماله فرفشه علي قفا أمي أنا!!!!
_______________________________________________
_الحمدلله دلوقت بقيتي كويسة وأقدر أتكلم معاكي بقي
_إبتسمت وإتكلمت: وحتي لو مكنتش كويسة يا ماما إنتِ تتكلمي معايا في أي وقت "كَملت بمرح" ها يا ستي إشجيني!؟
_إتنهدت وكَملت بهدوء: عَملتي إي في موضوع الغويشة؟ إتلهيت الفترة إللي فاتت بتعبك ونسيت أسألك خالص..
_حاولت أبتسم ورديت بتوتر: لاء ما خلاص أدهم حل الموضوع! طِلع الراجل بتاع الدهب كان تقريبا حد من إللي شغالين معاه سرقه فمبدل الدهب الحقيقي بالدهب الصيني ومن حظي أنه الغويشة إللي عجبتني كانت من إللي متبدل دا..فالراجل إعتذر لأدهم جدا وإداله واحده بدالها أنا حطيتها في الدولاب من ساعة ما إداهاني!!
_رَفعت حاجبها وبصتلي بشك وكَملت : مِش عارفة ليه قلبي مش مصدقك!؟ ومش داخل عقلي إللي بتقوليه د!!
_إتكلمت بغيظ مصطنع في محاولة مني إني أخفي توتري : هألف عليكي يعني يا ماما!! هو دا إللي حصل !! ولو مش مصدقاني روحي افتحي علبة الدهب هتلاقي الغويشة فيه!
_فضلت بصه ليا شوية بهدوء مريب لدرجة إني كُنت حاسه نفسي هعترف فوري بَس لقتها فجأة أتنهدت وكَملت بغيظ: ماشي يا روميساء هعمل نفسي صدقت إللي قولتيه دا لأنه مقداميش حل تاني غير إني أصدق و الحمدلله إنه الموضوع خلص علي خير !!
_حاولت أبتسم وإتكلمت: الحمدلله فعلا يلا بقي هسيبك وأقوم أنام شوية تصبحي علي خير
_ماما بغيظ: أستني متهربيش أنا فهماكي يا أختي!! ليه مبتكلميش سما ؟ وهي كمان مسألتش عليكي حتي!!؟
_إتنهدت ورديت بحزن: ماما أنا وسما شِيه قطعنا علاقتنا ببعض!! أنا معرفش عنها اي حاجة من ساعة ما دخلت المستشفي ولا هي تعرف عني حاجة أكيد!! وقبل ما تتكلمي وتسألي عن السبب هقولك إعذريني إنتِ عارفة إني مشاكلي مع صحابي مبشاركهاش معاكي!! فأنا مِش هقدر أقولك يا ماما !! عن أذنك أنا هدخل أوضتي
وخدت بعضي وجريت علي أوضتي قبل ما ماما تحطني تحت الضغط وأنا مِش حمل ضغط أصلا يكفيني شعوري بالذنب إني كذبت عليها!!
أنا عارفة إنه بعضكم ان مكانش كلكم مستغرب رد فعلي وبتسألوا نفسكم ليه مقولتش لماما علي سما وإللي عملته؟
بس الحقيقية أنا لازم أعمل كدا عشان صورتها متبقاش وحشة قدام أهلي!! لأنه لو هما بنوا صورة وحشة عُمرها ما هتتصلح أبدا ولو ولو فيه فرصة إنه نرجع أصحاب تاني حتي لو من بعيد أهلي مش هيسمحوا بده لأنهم خلاص الصورة إللي عندهم بقت سيئة أوي وهيكرهوها كمان وأنا مِش عايزة دا يحصل أنا عايزة أسيب باب الود موارب محدش عارف الزمن مخبي لينا إي؟
_______________________________________________
_وقابلتك إنتَ.....لقيتك بتغير كُل حياااتي معرفش إزاي حبيتك..معرفش إزاي يا حيااتي مِن همسة حُب لقتني بحب..لقتني بحب وأدوب في الحُب
_مكنتش أعرف إنك صوتك حلو كدا!!
_لَفيت بسرعة لما سمعت صوته و إبتسمت جامد و هتفت بفرحة وحماس: أدهوميي
شدني لِحضنه وحاوطني بإيديه وهمس بحب: قلب أدهومك وحشتيني أوي
_لَفيت إيديا حواليه أنا كمان وهمست بحب: وإنت كمان وحشتني جدا مقولتليش ليه إنك جاي؟
_ بعدني عن حُضنه شوية و باس خدي وقال بحب: حبيت أعملهالك مفاجأة
_إبتسمت وكَملت بحب: أحلي مفاجأة دي ولا إيه!؟
_كمل بخبث وهو بيهمس في ودني:وفي مفاجأة تاني!
_هَمست بمرح : إي هي؟
_ضِحك وبص في عنيا وقالت بمرح وهو بيغمزلي: مِش رقصتي علي كتبوا كتابك يا نقاوة عيني هَنرقص أخر الشهر دا أنا وإنتِ علي " كَمل بمرح وهو بيطبل بأيده علي سور البلكونة " دُقّوا المزاهر ياالله يااهل البيت تعالوا.....جمّع ووفّق والله وصدقوا اللي قالوا.... عين الحسود فيها عود يا حلاوة "كَمل بفخر مصطنع وهو مازال بيطبل" عريس قمر .. وعروسته نقاوة
ضِحكت جامد علي طريقته وفي نفس الوقت كُنت فرحانة جدا وفرحتي مِش سايعاني ولقيت نفسي برمي نفسي في حُضنه وإتكلمت بسعادة وحماس: أنا فرحانة أوي هنبقي أنا وإنت في بيت لوحدنا أخيرا
_بادلني الحُضن ورد بنبرة كلها حب وفرح: وأنا فرحان أكتر منك بحبك يا روميسائي
_خرجت من حُضنه و بصيت في عينيه بِكل حُب وهمست : وانا بعشقك يا أدهومي...
_لَقيته بدأ يتمايل معايا ويغني بمرح وحب أغنيه لفريد لأطرش: أنا وانت وبس
انا وانت ولا حد ثالثنا.... انا وانت وبس ياحلاوتنا ...انا وانت وبس ....
_شاركته الغناء وأنا بضحك وبتمايل معاه: نسبق ليالينا بخطوينا ونقرب اجمل مواعيدنا ......ونعيش م الجمعة سبعة ايام زادنا و زوادنا غرام في غرام والحب غطانا وفرشتنا وخدود الورد مخدتنا انا وانت وبس
ضِحكنا سوا ودخلنا من البلكونة مهو ميصحش بردوا نفضل واقفين كُل دا إحنا مؤدبين بردوا
___________________________________________
_بقول إي ما تيجي نسيب الناس دي ونمشي!!؟
_بَصتله بإستنكار ورديت: إنت عايز تحرمني من فرحي كمان يا أدهم!!؟ مش كفاية كتبت كتابي وانا نايمة!!
_رَد بغيظ: كُل شوية بقي هتفضلي تقوليلي كدا!!؟ ما عملتلك كتب كتاب تاني إنتِ عندك زهايمر !؟
_رديت بغيظ: ولو بردوا !! بس مِش هنسهالك فأسكت بقي و يلا نقوم نرقص سوا مع الناس إللي بترقص دي!!"
بصلي بغيظ وكان لسة هيتكلم بس لقيت فجأة بانت علي وشه ملامح الصدمة وعينيه بتبص علي حاجة فلفيت زشي عاشن أشوف إيه إللي صدمه كدا!! فشوفت روميساء!!! بتقرب مننا عيني دَمعت غصب عني لأنه أنا حبيتها بجد و كان نفسي تكوني معايا في يوم زي دا
_سما بإبتسامة وهي بتقرب تحضني : ألف مليون مبروك يا روميساء
أنا فضلت مصدومة وعقلي مأسعفنيش إني حتي أبادلها الحضن!
بِعدت عني وكَملت بأسف وندم: وهي دموعها بتنزل أنا عارفة إنك مصدومة من من وجودي هنا دلوقت بس حقيقي أنا كان لازم أجي النهاردة وأعتذرلك عن كُل الأذي إللي سببتهولك واللي كنت هسببهولك أنا بجد أسفة أوي وعارفة إني غلطي كبير و ميتغفرش! بس أنا عارفة إنك مش زيي عارفة انه قلبك كبير أوي وطيبة أوي وجميلة قلبا وقالبا وهتحاولي تسامحيني "بصت لأدهم وكَملت بإبتسامة وهي بتمسح دموعها " اسفة إني كنت هبعد حبيبتك عنك عشان شوية هواجس في دماغي و شكرا ليك يا أدهم إنك مسبتنيش أموت علي الرغم إنه كان في إيدك دا!! و سمحتلي إنه يكون ليا فرصة تاني أعيش وأتعالج من أمراضي وهواجسي إللي كانت مسيطرة دماغي شُكرا ليك أنا مديونالك بحياتي "رجعت بصتلي تاني وإبتسمتلي بصفا ولقيتها بتخرج الغويشة من شنطتها وبتمسك إيدي تلبسهالي وإتكلمت" دي غويشتك وحقك من ساعة اللي حصل وهي فضلت في البيت ألف مليون مبروك ليكم وربنا يسعدكم يارب دايما
إبتسمت ولفت عشان تمشي بس أنا شَدتها وحضنتها جامد و بَكيت وهمست : أنا مسمحاكي ..مسمحاكي علي كُل حاجة "كَملت بحب" وحشتيني أوي يا سما وكُنت عايزاكي تكوني جمبي النهاردة وأهو ربنا حققلي إللي كان في نفسي وإنتِ هنا جمبي دلوقت!!
بَكت هي كمان و بادلتني الحُضن وهمست: وإنتِ كمان كُنتِ وحشاني أوي
فِضلنا حاضنين بعض شوية لحد ما لقيت خالد صاحب أدهم جه جمبنا وأتكلم بصوت عالي مَرح: خلاص يا عروسة سيبيها شوية الناس هتفهمكم غلط كدا!!
_ضِحكت ورديت وأنا لسة حَضناها: يفهموا غلط عادي ولا يهمنا مَلكش دعوة إنتَ بس !!
_خالد رد بغيظ: طَب سيبيها شوية وشوفي الغلبان إللي واقف يتفرج دا!! أنا عاوزها في موضوع في السريع كدا و هرجعهالك متخافيش
بِعدنا عن بعض أنا وهي بس مسبتش إيدها و قولتلها بمرح: عايزة تروحي تسمعيه ولا هتنفضيله؟
_ضِحكت وبصت له وإتكلمت بمرح: إنتِ أي رأيك!؟
_أدهم شَدني عليه ورد بغيظ: هي رأيها تروحي تسمعي الموضوع أكيد دكتور خالد عايزك في موضوع مهم!! مِش كدا بردوا!!
_خالد رد بسرعة وهو بيبص لسما بحب: أه طبعا مهم جدا جدا!!
سما هربت من نظرته ليها وبصت لروميساء وردت بإبتسامة : هروح أعرف أي الموضوع المهم دا وهرجعلك
هَزيت دماغي بهدوي وأنا مبتسمة و هي مشيت مع خالد
_ بصيت لأدهم بضيق وإتكلمت: ياريت بقي تفهمني هي تـقصد إي بإنك أنقذتها من الموت!!؟ ودا حصل إمتي أصلا!!؟ وعلاج أي اللي هي إتعالجته !!؟ عشان أنا مِش فاهمه أي حاجة
_ حاوطني بكتفه و إتكلم بإبتسامة: هفهمك أول ما نروح بيتنا والله بس متبصليش كدا!!
_بَصتله بضيق وكَملت بإستنكار: أومال عايزني أبصلك إزاي!؟ وأنا بكتشف دلوقت إنك مخبي عليا حاجات كتير
_ضمني اكتر له وقال بحب : سواء سما كانت جت النهاردة أو لاء أنا أصلا كُنت هقولك والله لما نروح لاني مكنتش عايز أبدأ حياتي الجديدة معاكي وأنا مخبي عنك أي حاجة وأنا لما خبيت عليكي خبيت أنانية مني لاني مِش عايز أشوفك مِضايقة وزعلانه ولا حتي تُحطي أي حد في دماغك!! أنا اسف إني خبيت عليك حقيقي
_خدت نفس طويل ورديت بغيظ: أسفة مِش مقبول ولازم تتعاقب!!
_إبتسم ورد : وأنا جاهز للعقاب يا سينيوريتا
_ رديت وأنا ببتسم بإستفزاز: بعد لما نروح وتحكيلي إللي مخبية ههتتحزم وترقصلي!!
_ضِحك وغمزلي: طَب مينفعش ترقصيلي إنتِ النهاردة وبكره أرقصلك زي ما إنتِ عايزة
_رَديت بغيظ : بقولك أي أنا مبهزرش علي فكرة !! دا عقابي نفذته يبقي خير وبركة وهسامحك منفذتوش يبقي متلومش غير نفسك بقي!!
_ضِحك ورد بقلة حيلة: وعلي إي الطيب أحسن عينيا حاضر هرقصلك
_إبتسمت جامد و سقفت بإيدي و إتكلمت بحماس: أشطر كتكوت يا ناس...
_ضِحك بخفة وقال : مجنـ ونة"كَمل بحب وهو بيحاوطني بإيده" بس بحبك عارفة علي الرغم من كُل إللي سما عملته بس لازم أشكرها صراحة "بصتله بإستغراب وتساؤل فكمل" عشان لولا إللي عملته مكنتش كتبت الكتاب بسرعة ونتيجة لكتب الكتاب وإني مِش قادر تبقي مراتي وملكي ومقربش منك فالفرح كمان إتعمل بسرعة وخلاص أهو هتبقي في بيتي ومعايا فهي تستحق الشكر صراحة هي والغويشة الصيني إللي بهدلتنا دي!!
_بصتله بحب وسندت دماغي علي كتفه ورديت بحب: معاك حق "ضِحكت بخفه وكَملت" شكرا لسما والغويشة الصيني
فِركش😂🫣
صراحة كنت ناوية أنهيها نهاية تاني بس حَصلت ظروف بقي فسامحوني وأوعدكم إني هعوضكم الإسكريبت الجاي ان شاء الله بحاجة حلوة🥹♥️ يارب تكون النهاية عجبتكم شوية🥹♥️
رأيكم هنتظره🌚♥️
#إسكريبت_غويشة_صيني🙊
#شهد_محمد_موسي🦋
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
