رواية رجل الاحلام الفصل الثالث والاخير بقلم ايمان شلبي
-نعمممم ياخويا خطيبتك !!
هز رأسه ببرود :
-اه
عوجت بوقي بسخرية:
-ده امتي ده خطبتني في المشمش ؟!
-معروفه عندنا البنت لابن عمها من وهما صغيرين
اتعصبت وانا بهبد علي العربيه :
-ده اسمه جهل وانا استحاله اوافق علي حاجه زي كده
رفع أكتافه بلا مبالاه:
-توافقي أو لا كده كده العادات هتتنفذ من غير نقاش
جزيت علي اسناني وانا بتنفس بسرعه وبقول كلامي دفعه واحده
-لا يا استاذ انا مش بهيمه ولا حيوانه عشان انفذ أوامر حد انا بني ادمه وليا حقوق ومن حقي اختار الانسان اللي هكمل معاه حياتي ،العادات بتاعتكم دي تبلوها وتشربوا ميتها
هز رأسه بسخريه :
-تمام تقدري بقي تقولي الكلام ده لابوكي واخواتك؟
-ومقدرش ليه أن شاء الله بقول كلامي اباحي لسمح الله
-تمام براحتك احنا دلوقتي هنروح عند ابوكي وانا هطلب ايدك ووقتها بقي قولي كل الكلام ده
-انت مفيش عندك كرامه يا اخي انا مش عايزاك هو عافيه!!
جز علي أسنانه واخد نفس عميق وهو بيضغط علي الدريكسيون بغيظ
-اللهم طولك ياروح استغفر الله العظيم يارب واتوب إليه
ربعت ايدي وبصيت قدامي وانا بنفخ بضيق :
-حاجه قرف وتفكير جاهل
بصيتله بسخريه:
-بقي انت متعلم انت بتفكيرك المتخلف ده؟؟
وقف مره واحده العربيه وهو بيصرخ بجنون
-اخرسييي ياللي متربتيش
-انا متربيه غصب عنك وعن اللي يتشددلك
صرخ فيا اكتر وهو بيجز علي أسنانه :
-بقولك اخرسي اخررررسي
-لا مش هخرس وهدافع عن حقي ومش هسمح لحد يحركني وراه زي البهيمه
بالرغم من خوفي وبالرغم من علمي التام اني لو زودت في الكلام ممكن يخبطني بحاجه في وشي بس رديت بشجاعه وانا بحاول اثبتله اني مش خايفه منه !
كور كفوف أيده وهو بيغمض عينه وبيجز على أسنانه وعروق رقبته بارزه
وفجأة رفع أيده وهبدها في ازاز العربيه لدرجه اتكسر ميه حته !
صرخت بفزع وانا ببرق عيني وببص علي أيده اللي كانت بتنزف
-يالهووووي انت اتجننت انت ازاي تعمل كده في نفسك
قولتها وانا بسحب أيده بين أيدي وببص عليها بخوف
سحب أيده بغضب :
-ملكيش دعوه
اخدت نفس عميق وانا بقوله بهدوء:
-لو سمحت اطلع علي اي مستشفي عشان ايدك و....
قاطعني بسخريه:
-ايه الحنيه اللي نزلت عليكي مره واحده ديه
-علي فكره اي بني آدم مكاني هيقول كده.!
-والله لا كتر خيرك يابنت عمي انا كويس مش مستاهله مستشفيات
رديت بعصبيه :
-كويس ازاي انت بتنزف يابني
اخد نفس عميق وهو بيكمل سواقه بأيد واحده :
-مش فارقه
حطيت ايدي علي أيده بتلقائية :
-لو سمحت اسمع الكلام وخلينا نتطمن علي ايدك
بصلي لحظه وسكت وبعدها اتنهد وهو بيبص قدامه
-طيب
وصلنا المستشفي ونزل وهو بيقولي بجمود:
-خليكي انتي هنا انا....
فتحت الباب ونزلت وانا بهز راسي بنفي :
-لا طبعا هاجي معاك
شاورلي بأيده من غير ما ينطق حرف ودخلنا وأيده اتخيطت لكن الحمد لله الجرح مكانش كبير اوي
-انت كويس ؟
-الحمد لله
-ا انا اسفه يا آياد بس ب بس هو انت ممكن تسمعني
-سامعك
-هو هو الحب عيب؟
-لا طبعا
-اومال انتوا ليه مش مقتنعين بفكره أن البنت لو بتحب واحد تتجوزه ي يعني يعني ليه البنت تتولد مكتوبه باسم واحد مش من اختيارها
-عشان احنا اتربينا علي كده
-الكلام ده كان زمان لكن دلوقتي مفيش كده ابداً وبعدين انا كبيره وعاقله واقدر احدد إذا كان الشخص اللي قدامي كويس او لا ،واقدر احافظ علي نفسي ،واقدر اخليه يحترمني ،انا مرتكبتش جريمه
بص في عيوني وهو بيسأل بهدوء لاول مره :
-انتي بتحبيه
حطيت وشي في الأرض وانا بفرك ايدي بتوتر :
-ه هو يعني ه هو...
-بتحبيه!
-ايوه يا آياد
هز رأسه وهو بيبتسم ابتسامه باهته :
-يبقي مبروك
ابتسمت ابتسامه واسعه وانا بمسك أيده بتلقائية:
-بجد يا آياد بجد يعني مش هتقول لبابا انك عايز تتجوزني
-لا يابت عمي مش هقوله انتي من حقك تختاري الإنسان المناسب ليكي وانا اكيد مش هفرض عليكي نفسي اصل انا عندي كرامه مش زي ما بتقولي معنديش!
حطيت وشي في الأرض بأحراج :
-ا انا انا اسفه يا آياد
ضحك بسخريه :
-لا ولا يهمك
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بليل كنت قاعده في اوضتي برن علي "مراد" وبحاول أوصله بكل الطرق لكن مفيش فايده
-يارب استر يارب انا خايفه اوي يكون جراله حاجه
فات ساعه اتنين تلاته وانا مش عارفه اوصل ،لا بيرد واتس ولا فيس ولا حتي فون
فكرت ادخل اكلم داليا أخته وفعلا كلمتها بس هي كمان مش بترد
وفجأة نزل استوري فتحتها واول ما شوفت اللي فيها قلبي اتنفض
"الحمد لله الذي بنعمته تتم الصالحات قرينا الفاتحه"
لوهله حسيت قلبي هيقف من الصدمه والوجع
قعدت علي السرير وانا ببص قدامي وعيوني بتلمع بالدموع
مش قادره اصدق !
حاسه اني في حلم
لا لا كابوس
انا في كابوس بشع يارب افوق منه في اقرب وقت
للاسف
للاسف مفوقتش من الكابوس اكتشفت اني في واقع مؤلم اوي ،واقع مكنتش اتخيل في يوم اتعرض لقسوته
دفنت وشي في المخده وانا بصرخ بصوت مكتوم ،بصرخ بكل الوجع اللي جوايا
فضلت اهبد علي السرير وانا بصرخ بهستريه :
-ليييييه ليبيه عملت فيا كده لييييبه حرام عليك انا عملت فيك ايه انا حبيتك انا محبيتش في حياتي قدك ،انا رفضت شخص وكسرت قلبه عشان خاطرك ،انا ضحيت بمشاعري كلها ،انا ضحيت بقلبي ،ليه عملت فيا كده ،حرام عليك ليه انا والله معملتش حاجه وحشه في حياتي ،انا حبيت انا بس حبيت والله اهئ اهئ يارب يارب خدني عندك انا مش قادره اتحمل يارب ،يارب ريحني وخدني عندك يارب ،يارب ارحمني وارحم ضعفي وخدني يارب
من التعب والوجع اللي جوايا نمت من غير ما احس ....
صحيت لقيت نفسي في اوضه غريبه مش شبه اوضتي
بصيت يمين وشمال بتعب لقيت محلول في أيدي
ثواني والباب اتفتح ودخلت واحده لابسه هدوم الممرضين
-حمد لله علي السلامه
رديت بتعب :
-ا ايه اللي حصل ؟
ردت بحزن :
-كنتي جايه هنا من يومين وحالتك صعبه اوي كان عندك اشتباه في جلطه
اتنهدت وانا ببص في السقف وبقول بحزن :
-ليه يارب مخدتنيش عندك ؟
-حرام عليكي ليه بتقولي كده
-الموت راحه
-ومين قال كده ،ياتري انتي مستعده تقابلي ربنا ؟
بصيتلها لحظه وسكتت وانا بفكر في اجابه السؤال وفي الحقيقه كانت الاجابه لا
سحبت كرسي وقعدت قدامي علي السرير وهي بتحط ايديها علي ايدي
-مش معني انك واجهتي مشاكل او صدمات أو وقعات انك تستسلمي أو انك تطلبي من ربنا الموت
الموت راحه اه لكن لو انتي مستعده لده ،لو انتي مستعده تقابلي ربنا ، لسه في حاجات كتير الواحد بيحاول يجتهد فيها عشان يبقي شخص صالح ،لبسك ،الميك اب اللي بتحطيه ،تصرفاتك ،كلها اشياء محتاجه انك تعيدي النظر فيها قبل ما تطلبي من ربنا انك تقابليه وانتي بتعملي كل الحاجات الغلط دي!
وبعدين الحياه مش بشعه اوي للدرجادي ،اه طبعا الحياه متخلاش من شويه صعوبات في نص الطريق بترجعنا لنقطه الصفر لكن كلها ابتلاءات من عند ربنا عشان يختبر بيها قوه صبرك كمؤمنه
ربنا دايما شايف الخير فين وبيحط الشخص فيه ،بيبعد عنك الشر بالرغم أنه بيكون علي هواكي لكن انتي مش شايفه أنه شر
اخدت نفس طويل وانا بهمس بتعب :
-الحمد لله
ابتسمت ابتسامه لطيفه وهي بتضغط علي ايدي :
-ربنا يعوضك خير حبيبتي
ابتسمت ابتسامه باهته :
-يارب شكراً ..ه هو فين اهلي ؟
-برا بس شويه وهدخلهم عشان صحتك اتفقنا
-اتفقنا
خرجت وانا بصيت للسقف وعيوني بتلمع بالدموع وبفتكر اللي حصل وقد ايه حسيت بوجع قلبي
وقتها فعلا سمعت قلبي وهو بيتكسر لمليون حته
وقتها حسيت قد ايه اني مليش لازمه ،قد ايه مشاعري وقلبي مش فارقين مع شخص اديته كل حاجه ،خرجت كل ذره في مشاعري ليه ،اتنازلت عن مبادئ كتير عشانه ،كسرت قلب "اياد" برضو عشانه
وقتها بس عرفت أن المشاعر سهل اوي تبقي مُزيفه ،والنظرات مُزيفه ،حتي كل كلمه خرجت منه كانت مزيفه
وقتها عرفت أن هو شخصياً شخص مُزيف !
دقائق والباب خبط
سمحت للي برا يدخل
اتفتح الباب ودخل "آياد" وهو ماسك في أيده بوكيه ورد الجوري اللي بعشقه
ابتسمت بتعب :
-آياد
قرب مني وحط البوكيه علي الكمود وهو بيسحب كرسي
-حمد لله علي السلامه كده تقلقيني عليكي
-ا الله يسلمك الحمد لله انا كويسه
-الحمد لله ...علي فكره اهلك وأهلي وصحابك والناس كلها برا عايزين يشوفوكي بس انا قولتلهم لا
-طب ليه ؟
-عايزه تعرفي ليه
هزيت راسي بفضول :
-اه
-عشان انا عايز اتكلم معاكي في موضوع مهم
-موضوع ايه
-مراد
غمضت عيني وانا بحاول معيطش :
-ارجوك متجبليش سيره البني آدم ده
-خطب واحده تانيه مش كده
نبضات قلبي بقت اسرع والعرق اتكون فوق جبيني
-ارجوك يا آياد متجبليش سيرته ارجوك
-عموماً هو الخسران !
-ربنا يسهله الحال بعيد عني
-تعرفي أنه جه يزورك
بصيتله بصدمه :
-زارني؟؟
رد بغيظ :
-مخلتهوش يعتب باب اوضتك
رديت بخوف :
-ح حد شافه من العيله
-كلهم
-يالهوي وقولتلهم مين ده ؟
-متقلقيش عرفتهم أنه زميلنا في الشغل
اتنهدت براحه وانا ببصله بأمتنان:
-الحمد لله وبجد يا آياد شكرا اوي علي اللي عملته معايا و وانا اسفه علي اللي حصل في ايدك و
قاطعني بهدوء :
-المهم انك كويسه مش مهم اي حاجه دلوقتي
-الحمد لله
-طب ايه ؟
-ايه
غمزلي بمشاكسه:
-يعني داخل عليكي بورد ولابس بدله وبتاع
رديت ببلاهه:
-مش فاهمه
-ده باينله هيبقي مرار طاااافح
-لا بجد مش فاهمه قصدك ايه ؟
بص في عيوني وهو بيتنهد وبيقولي بحب:
-تتجوزيني يا سيليا ؟
فتحت بوقي وسكتت لحظه وانا برمش بعيني
-هه
-بقولك تتجوزيني
-ا انت بتتكلم بجد
-وهي الحاجات دي فيها هزار
-معقوله يا آياد عايز تتجوزني بعد كل اللي عملته واللي قولته واحد غيرك كان زمانه شمتان فيا ومش طايقني ولا.....
قاطعني:
-مقدرش اشمت فيكي ولا اكرهك
اللي قولتيه صح ومن حقك تختاري الشخص المناسب ليكي ،بالرغم اني مكنتش هبقي مبسوط لو اخدك مني لكن مكنتش هتمنالك الشر بالعكس اللي بيحب بيغفر وبيتمني الخير للي بيحبه حتي لو الخير ده مع شخص تاني
عيوني لمعت بالدموع وانا ببصله بأحراج :
-انا اسفه يا آياد اسفه علي كل كلمه قولتها وجرحت مشاعرك بيها ،انت فعلا انسان جميل وطيب وتستاهل واحده احسن مني ،انا مستاهلش الحب ده كله انا مش كويسه انا شخصيه وحشه اوي و....
-انتي اجمل واحده في عيني انا مش زعلان منك ولا من كلامك انا اصلا نسيته لما شوفتك بخير !
خلينا ناخد فرصه يا سيليا فرصه واحده بس اعبرلك عن حبي ليكي ،فرصه اوعدك انك هتنسي بيها اي حاجه وحشه شوفتها مع مراد ده
هزيت راسي بدموع :
-موافقه موافقه
عدل الجاكيت بتاعه وهو بيقول بمرح :
-حيث كده بقي نعيد المشهد من تاني بس قدام اهلك
مفهمتش هو يقصد ايه غير لما قام من مكانه وفتح الباب ودخل اهلي وأهله وكل اللي كان برا
قرب من بابا وهو بيقوله بجديه:
-عمي انا يشرفني ويسعدني اني اطلب ايد بنتك سيليا
بابا بفرحه وهو بيحط أيده علي كتفه :
-وانا يشرفني ويسعدني انك تبقي جوز بنتي بس الاهم من اى حاجه رأيها
بصولي كلهم ف اتكسفت وانا بخبي وشي في المخده
بابا بابتسامه :
-يبقي علي بركه الله الخطوبه يوم الجمعه اللي جايه وكتب الكتاب بعد شهر أن شاء الله
اياد بمرح :
-ليه بعد شهر ما كفايه خمس دجايج
بابا بحزم :
-عيب ياولد قدامنا كده
-احم انا اسف ياعمي بس...
-حبيبي خليك من ورانا متبقاش غشيم ياواد
-اصلا اللهم صل علي النبي ده حمايا حبيبي حبيبي
ضحكنا كلنا وقرينا الفاتحه وانا علي السرير واخدنا صور بلبس المستشفي وفي الحقيقه مش فاهمه ايه الاستعجال ده فلو حد يقولي طريقه نخلي الشهر اسبوع اكون شاكره جدا ليه
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور عشر سنوات
-ها ياماما وبعدين
اتنهدت وانا بلعب في شعر بنتي وببتسم ابتسامه رقيقه
-وبعدين اتخطبنا وفي الشهر ده ابوكي خلاني انسى اسمي شخصياً
-معقوله؟
-هتصدقيني لو قولتلك في خلال اسبوع مكنتش بفتكر مراد ده ولا بيجي علي بالي
-للدرجادي الحب جميل
-عوض ربنا هو اللي جميل يا "اسيل" جميل لدرجه بتنسيكي كل الوجع اللي شوفتيه في حياتك ، تعرفي اوقات بقعد مع نفسي واقول انا كنت بزعل علي حاجات متستاهلش ،فعلا مراد مكانش يستاهل اني ازعل عشانه
مراد كان شخص واضح من البدايه علي فكره ،كان واضح أنه شخص مش كويس وأنه مش بتاع ارتباط وانه عايز يتسلي وبس
بس زي ما بنقول مرايه الحب عاميه وانا كنت معميه عن كل ده مكنتش شايفه غير حبه واهتمامه وخوفه وغيرته الكذابه كان طبيعي أحبه لانه كان قادر يزيف كل حاجه ويمثل عليا الحب بأتقان شديد
حضنتني وهي بتبوسني من خدي :
-الحمد لله انك اتجوزتي بابا انا بحبه اوي هو مفيش حد جميل زيه اصلا
-فعلا لو لفيت الدنيا مش هلاقي حد في حنيته ولا في جماله وجمال قلبه
-وتلفي ليه بقي أن شاء الله ؟
اتنفضنا بفزع واحنا بنبص ورانا لقينا اياد واقف وهو حاطط أيده في وسطه ورافع حاجبه بغضب مصطنع
-الله جرا اي ياعم حد يخض حد كده
حط أيده علي قلبه بهيام :
-وربنا قلبي اللي اتخض اما شاف جمالك قوليلي ياقلبي
-نعم
-جمالك ده ولا جمال عبد الناصر ؟
-طب ما تقولي انت ياقلبي
-عيوني
-آياد جوزي قدامي ولا الخليل كوميدي!!
حك فروه رأسه بأحراج :
-صحيح ايه ده انا دمي بقي يلطش
انا واسيل في صوت واحد :
-حصل
-اهلك هما جيشك الوحيد فعلا
-بالمناسبه عندي خبر حلو
-خير ياماما
حطيت ايدي علي بطني وانا ببتسم برقه :
-انا حامل
-ايييييبه
-والله حامل وكمان كان شهر هجيب عيل دمه يلطش شبه ابوكي
الاتنين هجموا عليا بفرحه وفضلنا نضحك واحتفلنا وقضينا اجمل يوم
لا بصراحة هو كل يوم في وجود اياد واسيل يوم جميل !
وان كنتي هتحبيه وتكوني ام واب هيكون عشانك وطن وحجات كتير تتحب راجل في وقت الضيق وصديق ما بعده صديق وطريق اذا مشتيه هتلاقي فيه نفسك ❤️
