رواية من عالم اخر (كاملة جميع الفصول) بقلم عمرو راشد

 رواية من عالم اخر الفصل الاول

مساء الخير ، احب اقول ل حضرتك ان جوزك بيخونك ، اه والله بيخونك ، ولو حابة تتأكدي هقولك على عنوانه

= انت كداب وحيوان ، جوزي بيحبني ومستحيل يخوني

براحتك ، انا قولت اقولك عشان ضميري يبقا مرتاح

" من وسط مغامراتي على النت كنت قاعد ببحث عن حاجة جديدة فيها اثارة ومتعة بدل الملل اللي انا فيه ، لحد ما لقيت موبايل معروض للبيع في احدى المواقع المشبوهة ، قديم شوية ، نوعه مش معروف ، وكان تمنه 1000 جنيه ، شكله كان مميز وشدني ، طلبته ، الغريبة اني اول ما طلبته لقيت جرس باب الشقة بيرن ، فتحت ملقتش حد لكن لقيت علبة مققولة ، خدتها و دخلت وفتحتها ، استغربت جدا لما لقيته ، ايوا لقيت الموبايل ، كان تقيل شويه ، لقيت حروف مكتوبة عليه ، بحثت عنها لكن ملقتش اي تفسير ليها ، اللي كان شاغلني هو اني ازاي هدفع الفلوس ، حاولت افتح الموبايل بس مش بيفتح ، بدوس على الزرار بتاعه وبرضو مفيش نتيجة ، كلمت سامح صاحبي اللي قالي

ياعم احمد ربنا انك مدفعتش الفلوس ، ارمي الزبالة دا ،  دا اكيد بايظ

= بس انا مش حاسس كدا

هتلاقيها اشتغالة يا مازن ، سيب التليفون دا أو ارميه 

= ماشي

" اعمل ايه ، اسيبه فعلا ولا لا ، عندي فضول غريب ناحيته ، الساعة كآخر

 لسة 9 ، لبست بسرعة ونزلت وخدت معايا التليفون ، عرضته على اكتر من محل عشان يشوفه وكان ردهم

• ايه يا أستاذ دا ، انت جايبه منين دا باين عليه قديم جدا يستحسن ترميه

• مش عارف الصراحة ماله ، حتى ماركته مش معروفة وبصراحة مش هقدر اعملك حاجة

" كنت يائس من كل محل اروحله ويقولي نفس الكلام ، قررت اروح بعد ساعتين في الشارع ، طلعت الشقة وقررت انام عشان شغلي ، بالفعل نمت ، لكن قلقت في نص الليل ، ولسة هحاول انام تاني لمحت نور جاي من على الكوميدينو اللي قدامي ، كنت قلقان خصوصا اني عارف ان موبايلي جنبي ومفيش اي مصدر للضوء على الكوميدينو ، قومت براحة من على السرير ، افتكرت اني سايب التليفون هنا ، لقيته منور ومكتوب رسالة واحدة 

" لست الشخص المناسب ، عليك ايجاد الشخص المناسب لكي تدخل هذا العالم ، عليك ايجاد شخص برئ لا يتغير مع مرور الزمن ولا يتحكم به المال والجاه " 

" يعني ايه الكلام دا ، الخوف بدأت احس بيه تدريجيا ، سيبت الموبايل من ايدي ، والرسالة اختفت والموبايل قفل لوحده زي ما فتح لوحده ، فضلت صاحي لحد معاد الشغل ، نزلت وخدت معايا التليفون ، روحت الشغل ، دخلت ، قعدت على مكتبي من غير سلام ولا كلام على عكس عادتي ، بدا زمايلي يلاحظو اني قاعد سرحان ، بدأو يسألو

• مالك

• هي مش عايزة ترد عليك ولا ايه

• مش من عوايدك تبقا زي الصنم كدا

" وسط كلامهم اللطيف اللي انا مش طايقه ، جاتلي فكرة وقررت انفذها 

بقولكو ايه ، عندي موبايل مش عارف افتحه ، اللي هيعرف يفتحه هديله 200 جنيه

" نظرة لمعان ظهرت في عنيهم ، بدأ كل واحد يجرب التليفون ولكن برضو مفيش فايدة ، كدا مش هعرف افتحه أبدا 

خلاص راحت عليك الفلوس

= تتعوض يا مازن ، جرب مع ناس تانية ، انت جربت مع كله هنا

لسة مش كله ، ناقص واحدة 

= مين

سلمى

= دي مش بتنطق كلمة مع حد وعلطول قاعدة في حالها ، ملهاش دعوة بينا

هجرب مش هخسر حاجة

" اخيرا الفرصة بقت موجودة عشان اعرف اكلمها ، سلمى هي الكراش بتاعي اللي بحلم أكلمه و اهو الحلم هيتحقق ، روحتلها 

صباح الخير يا سلمى

= صباح النور يا مازن

ممكن اطلب منك طلب 

= اتفضل

عندي موبايل عايزك تفتحيه لانه مش بيفتح معايا خالص

= ماشي

" ردودها بسيطة وعلى قد الكلام ، بنت غريبة جدا ، ومش بعرف اكلمها دقيقة على بعض ومنكرش ان هو دا اللي شدني ناحيتها ، كمية طيبة وهدوء مشوفتش زيها قبل كدا ، اديتها التليفون ، بدأت تفتحه ، وفعلا فتح ، لقيت جملة ظهرت

" اهلا بك في عالمك الخاص "

ايه التليفون دا ، جايبه منين

= بتاع واحد صاحبي ، شكرا جدا يا سلمى

العفو يا مازن ، انا معملتش حاجة

= تحبي....

" الكلمة وقفت على لساني ، كنت هطلب اني اعزمها نشرب حاجة مع بعض لكن خوفت ترفض

احب ايه

= هااا ، لا ولا حاجة

 خدت منها التليفون ، كنت فرحان وحتى مش عارف انا فرحان ليه ، التليفون فاضي ، مفيهوش حاجة ، قررت اني هنقل كل حاجتي على التليفون دا ، فتحت التليفون عشان اركب الخط اتفاجئت ان التليفون اصلا فيه خط ، بس شركة مش معروفة نهائي ، قولت يمكن شركة من برا مصر عادي ، بحاول اطمن نفسي بأي شكل ، قولت اجرب اكلم حد منه ،  كلمت هيثم اعز صحابي

الو

= ايوا مين معايا

انا مازن يلااا

= ازيك يا مازن ، انا والد هيثم 

الحمدلله ، هو هيثم مش موجود ولا ايه

" حسيت بصوته بيترعش 

هيثم توفى يا ابني من شهرين

= مين اللي توفى ، ازاي ، هيثم مات ازاي ، انا لسة شايفه امبارح ، مين دا اللي مات ، انت مش ابو هيثم

" المكالمة فصلت ، مكنتش مصدق اللي سمعته بعدت التليفون عني تلقائي ، لكن لقيت لوكيشن ظهر وتقريبا دا لوكيشن الشخص اللي انا كلمته ، بس دا مش بيت هيثم ، هيثم مش ساكن في أكتوبر ، دا ساكن في الشارع اللي قدامي ، كدا اتأكدت ان اللي بيكلمني نصاب ، واكيد تليفون هيثم اتسرق او حد بارد بيعمل مقلب ، لكن ثواني 

فلاش باك

خلاص يا هيثم عايز تمشي

= هروح مكان احسن بكتير ، انا زهقت من الحارة هنا ، عايز اشوف مكان جديد بقا

وهتعزلو فين 

= أكتوبر 

بااك

" الكلام دا كان في اخر مرة شوفت فيها هيثم ، يعني كدا الراجل مش بيكدب بس ازاي ، هيثم قالي انه قدامه شهر عشان يمشي وينقل للبيت الجديد ، اكيد فيه حاجة غلط وهعرفها ، لمحت بالصدفة التاريخ في التليفون وكان

20/11/2040

" ظبطت التاريخ على 18/7/2023 ، بس كان لازم اتأكد تاني ، اتصلت ب هيثم

الو

= ايه يا مازن فينك

انا في البيت

= طب تعالى ننزل نقعد شوية مع بعض

طيب هكلمك كمان شوية

" تقريبا انا فهمت اللغز ، كان ينقصني محاولة اخيرة عشان اكون قادر افهم أكتر ، رجعت التليفون بنفس التاريخ بتاعه على 2040 ، كلمت هيثم

ايوا يا هيثم

= انت غبي ، قولتلك هيثم مات!!

          الفصل الثاني من هنا