رواية تزوجت عجوز ولكن كامله جميع الفصول بقلم مريم سمير
_ أنا اتجوزت أمك
° وحيات امك؟ انت عبيط يالا!
_ انا مبهزرش يعبدالله ، انا بحب امك واتجوزتها
° انت فاهم الي بتقوله ؟ ولا شارب وجاي تطلعهم علينا؟
• بس هو مقالش حاجه غلط يعبدالله
° انتي بتقولي اي يماما!
• انا واحمد اتجوزنا ، انت واختك محدش فيكم بيعبرني الا لما تكونوا عاوزين فلوس ، ف اتجوزت
° تتجوزي واحد قد عيالك ؟ تتجوزي صاحب ابنك؟
= ماما اكيد بتهزري! انتي اكيد معملتيش كده
• انا معملتش حاجه عيب ولا حرام ، انا اتجوزت علي سنه الله ورسوله ، عاوزين تفضلوا في البيت اهلا وسهلا ، مش عاوزين براحتكوا ، كده كده مش موجودين الا ساعة النوم وبس ، فتحاها لوكاندة
_ اهدي يحبيبتي عشان صحتك
مسكني من قميصي ° انت تخرس خالص ، انا تعمل معايا كده يا احمد؟ دا انا دخلتك بيتي واعتبرتك صاحبي بجد ، اقسم بالله لأدفعك التمن غالي
_ يعم اهدي علي نفسك ، هو احنا عملنا جريمة؟ اتنين وبيحبوا بعض اي الي مضايقك!
= تتجوز واحدة عندها 60 سنه عشان بتحبها ولا عشان طمعان في فلوسها وعاوز تكوش علي كل حاجه ؟
بصتلها وابتسمت ابتسامة ساذجة
_ كده يمريم؟ دي طريقه تكلمي بيها ابوكي!
= انت يبني متخلف ؟ انت عشت الدور وصدقته وهبت منك علي الاخر
_ زوبة انا مش هعرف اعيش معاهم اتصرفي
= زوبة! جري اييي يماما ، بعد اذن العبط بس الي بيحصل دا لازم يقف وحالا
• يقف ازاي ؟ بقولكم اتجوزنا انتوا مبتفهموش؟
° انا مش هسكت ، وبراحتك يماما انتي الي اختارتي
= اقول اي ل صحابي؟ اقولهم امي متجوزة عيل هلفوت جربوع ؟
_ عيل؟
= وهلفوت جربوع دول عادي؟ ، كنت مصاحب الغبي دا ازاي ، يلا يعبدالله نمشي
• تمشوا؟ طب اعملوا حسابكم الي هيخرج منكم معتش داخلها ، وملوش ورث عندي ، وبدل ما اكتب ل احمد نص الفلوس هكتبهاله كلها
_ هو دا العشم يزوزو ، ايدك ابوسها يغالية
= الكائن دا لما يتكلم بيعصبني ، نص فلوس اييي؟ الفلوس دي فلوس ابونا الله يرحمه ، ازاي عاوزة تعملي كده؟
• ابوكوا ميت بقاله خمس سنين ، وشغلالكم مكنه بتحسبوا منها فلوس ، طول الليل والنهار لوحدي ، محدش فيكم فكر مرة يقولي مالك ؟ فيكي اي؟ اقعد معاكي شويه ؟ محدش فيكم فكر غير في نفسه ، ف عملت زيكم وفكرت فيا ، واتجوزت الحنين عليا
° بقي انا يالا تقرطسني؟ تقولي اروح اقعد مع امك اونسها؟ اروح اقعد مع امك اديها العلاج ؟
_ يعم هو انا عملت حاجه؟ دا انا اتجوزتها يجدعان! هو انا خدتها وضربنا وقتين؟ هربت بيها ؟
° هتطلقها ، ارمي اليمين
_ ولا ارمي شمال؟ احنا نوقف راس حربة ونسمي ونشوط
= دا جاي يستظرف يمعلم ، اخلص يبني عندنا مشاغل
_ الاستاذ عنده الديسكو والبنات وانتي عندك خروجات مع صحابك ؟ لاء مشاغل فعلا
° وانت مال اهلك؟ انا تكة كمان وهفقد اعصابي صدقني رد فعلي مش هيعجبك
• ابقي إلمسه وشوف انا هعمل فيك اييي
_ حبيبتي ربنا يخليكي ليا ، بقولك اييي تعالي ندخل الاوضه ميصحش تبقي صباحيتنا النهارده وقاعدين نتسامر
• علي رأيك ، يلا يحبيبي
مسكت ايدها وحطيتها بين ايديا
_ الرجوع يبقي قبل عشرة ، وتيجي تشربوا اللبن وتغسلوا سنانكم وتناموا يولاد ، اظن كلامي واضح ، عشرة وخمسه هسيب الكلاب علي البوابة وهكهرب السور والي يعيش يفرجني ، انا قولتهالكم
° انت زودتها يالا ، تعالي بقي
امه وقفت قدامي * انت هتعمل اي يحيوان؟
° ماما الي بتعمليه دا غلط ، عشان خاطرنا فكري فينا شويه ، منظرنا هيبقي عامل ازاي قدام الناس؟
* كان حد فيكم فكر فيا ، مكنتش وصلت ل كده ، ميهمنيش الناس بتاعتكم كده كده هيتكلموا ، وحسكم عينكم حد يضايفه ، انتوا سامعين؟
سندتها ودخلت الاوضه قفلنا الباب وضحكنا احنا الاتنين بصوت واطي * تفتكر هيتربوا؟
_ اكيد ، الي حصل دا مش شويه ، وانا من نحيتي هعرف ازاي اظبطهوملك
* متحرمش منك ابدا يبني ، انا مش عارفة من غيرك كنت عملت اييي
_ متقوليش كده انا الي مش عارف ارد جمايلك عليا ازاي ، كفاية انك بتحاوبي تعوضيني غياب امي الله يرحمها
• الله يرحمها ، لو كانت عايشه كان زماني شكرتها علي تربيتها ، ربنا يجعله في ميزان حسناتها يا رب
_ يا رب اللهم امين ، ميعاد الدوا بتاعك
جبت كيس الدوا من علي الكوميدينو وادتهولها ، طنط ذينب يمكن اكتر حد وقف جمبي في حياتي ، لما جيت هنا وشوفتها قد اي هي زعلانه وحكتلي لي ، بقيت اجيلها كل يوم اقعد معاها شويه ، ولما عرفت إني متأخر عن فلوس الكلية دفعتهالي كلها ، برجع البيت بعد ما اروحلها مفيش معايا ولا مليم واحط أيدي في جيبي ألاقي فيها فلوس ، كانت أحن ست في الدنيا بالنسبالي ، ولما طلبت مني نمثل عليهم اللعبة دي عشان يتربوا مكنش ينفع أرفضلها طلب ، ابدا .
_ كوثر ، جهزيلي الحمام
° الله يرحم ما كنت بتستحمي في الطشط
_ والله كنت مرتاح عن هنا ، دا انتوا يساتر
° تاخد كام يا احمد وقصر الدنيا
_ اخد كام ازاي يعني؟
= يعني تاخد كام وتطلقها؟ محتاجة ذكاء يعني ؟
_ صوتك يوطي ، مش عاوز حاجه
° يعني اي مش عاوز؟ الي كنت طمعان فيه هدهولك وعليه بوسه ، وخلينا نخلص من الحوار دا النهارده
_ لو جبتولي مال قارون مش هطلقها ، ريحوا نفسكم بقي
= انت عاوز اييي بالظبط؟
_ الي عاوزه خدته خلاص
= لاء لاء بقولك اييي ، قصه حب الست العجوزة والشاب العشريني ديي متدخلش دماغي ، وصدقني لو كملت معاها مش هتاخد جنيه ، ف انا لو منك اخد قرشين وامشي من غير مشاكل
زعقت _ كوثر ، جهزتي الحمام؟
مشيت من قدامهم وانا سايبهم يغلوا من الغيظ ، بتهيقلي لو حطيت عليهم فشار هيطقطق!
انتعاش يكوتش ، دا الواحد مكنش عايش .
خلصت ودخلت الاوضه لقيتها نايمة ، مسكت كتاب كنت جايبه وقرأت فيه وخلصته ، فتحت الباب عشان اطلع إشم شويه هوا لقيتهم هما الاتنين حاطين ودانهم علي الباب واول مفتحته وقعوا
_ ياه علي الكسفة الي انتوا فيها يحازم! متتفضلوا معانا جوا؟ لاء لاء تعالوا متتكسفوش
= احنا كنا..
_ مش عيب؟ مش دي خصوصيه بين الراجل ومراته؟
بصت لمامتها النايمة ورجعت بصتلي = كنت جايين نشوف ماما
قفلت الباب _ والي يشوف ماما يشوفها بودانه؟ اممم امكم نايمة حاجه تاني؟
= انا خارجة يعبدالله
_ الساعه تمانية ونص ، خليكي فاكرة عشرة تبقي هنا
= انت زودتها اوييي ، ملكش دعوة انشالله ابات برا حتي انت ملكش كلمة عليا انت سامع؟
_ هو انا مقولتلكوش؟ انا بقي ليا التصرف الكامل في فلوس امكم ، يعني مصروفكم تاخدوه مني بعد كده
° ايييي؟؟؟؟
تزوجت عجوز ولكن
مريم سمير 🤍.
