رواية انا مش عايزه اكمل كامله جميع الفصول بقلم امينه الطحان
_أنا مش عايزة أكمل
_....
قلعت نص الدهب اللى كانت لابسه _ أتفضل
_ انتى بتتكلمى بجد؟
_ طبعا هو فيه هزار فى الحاجات دى،وأنا مش هقدر أسمع الكلمة فياريت ورقتى توصلنى وخلاص
_ هو ايه اللى حصل لكل ده
_ أنت مش حاسس أنه حصل حاجة
_ أيوه مفيش حاجة حصلت لدرجة أنها توصل للطلاق
_ فيها أنك سيبتنى شهر عارف يعنى أيه شهر لا بتكلمنى ولا بتعبرنى وجيت انهاردة لمجرد أنه ماما عزمتك على الغدا
_ طيب وأنتى مسألتيش نفسك أنا جيت ليه انهاردة؟
_ ....
_ جيت؛ عشان وحشتنى
أول مرة يقولها لى أحنا لسه كاتبين كتابنا من ٥ اسابيع كده هو طبيعته مبيقولش كلام حلو غير لما يكون حاسه فعلا فبالتالى مش بيقول كتير كنت مفروض اكون فرحانة بالكلمة بس ده محصلش حسيت أنه بيقولها كده وخلاص
_ مبترديش عليا ليه؟
مكنتش مكسوفة_عايزانى أرد أقولك أيه
_ هو أنا موحتكيش؟
_ ....
_ أنتى هتفضلى ساكتة كده
_ أنا عايزة أطلق
_ ندى أيه اللى حصل لكل ده.. اتخانقنا شوية فبقالنا فترة مش بنتكلم عادى يعنى بتحصل بين كل الناس
مقدرتش أسكت أكتر من كده_بتحصل بين كل الناس!! لا يارب مش قادرة استحمل بجد،هو أيه ده اللى بيحصل بين كل الناس الطبيعى أنك تفضل شهر بحاله مش بتكلمنى لمجرد أننا شدينا مع بعض وحاجة عادية وكمان أنت اللى غلطان فيها،ى سيدى حتى لو أنا الغلطانة هونت عليك تسيبنى كل الفترة دى،سيبتنى لدماغى عشان أنت عارف ومتأكد أنى هأنب نفسى وضميرى وعشان بحبك هجى أعتذر وانت كمان تتقل عليا شوية وتسينى يوم واتنين الكلام على القد لحد ما تتقبل اعتذارى وطبعا فضلت مستنينى أنا اللى أكلمك الأول ولما أنا حلفت بالله بينى وبين نفسى أنى مش مكالمك أستغليت أنه مامتى عزمتك وده لأنى عمرى ما حكيت لها عن مشاكل بينا"ودى كانت غلطتى فى وقت من الأوقات أصل اللى الحاجات اللى كانت بتحصل دى مش حاجات يتسكت عليها أصلا " إنما لو كانت عارفه وحاسه باللى انت عاملته فيا كانت هى اللى قالتلك أننا ننهى العلاقة دى،أنا كنت واحدة ثقتها فى نفسها كبيرة أوى أنت فضلت تقلل منها واحدة واحدة لحد ما قلت خالص عشان أحس إنى محتاجة لوجودك فى حياتى، أنت عملت فيا كل ده قبل ما أجى بيتك أومال لو كنت جيت كنت عملت فيا أيه...بس تعرف أنا بكرهك بجد بالمعنى الحرفي للكلمة
أتعصب _ فيه واحدة محترمة ومتربية تقول لجوزها بكرهك
_ شوفت،عمرك ما هتتغير أبدا،سيبت كل كلامى ومسكت فى دى لمجرد أنك تبان أنك معاك حق وإنى أنا اللى غلطانة...بالمناسبة أخبار آية أختك أيه؟
_ مالها آية كمان
_ لاء مفيش حاجة،يدوبك أنت بتحكى لها كل حاجة بينا بس،بس بسيطة يعنى مش مشكلة،ده أنت ى راجل ضحكت بسخرية _ قولتلها على الحرج اللى فى إيدى اللى مش عاجب سيادتك،بقا عايز تقولى أنى أعمل عملية بالليزر عشان أشيله،مفكرتش للحظه أنه عادى كلنا عندنا جروح وإصابات قديمة بسبب حاجة حصلت لينا فى الطفولة أو وأحنا كبار حتى،طيب وبالنسبة للإصابات اللى فى إيدك أنت دى عادى تفضل إنما أنا لاء لازم أبقى على سنجة عشرة عشان أعجبك
_ أنا راجل عادى إنما أنتى بنت...
قاطعته _ أنا بنت بتكرهك
خرجت ناديت على بابا يكلمه كنت حكيت كل حاجة لبابا قبل كده
سمعته وهو بيقول عنى إنى مش متربية و لا محترمة وأنه أيه يعنى اللى حصل لكل ده!!
محمد كان معايا فى الجامعة أكبر منى وكنت معجبة به من بعيد لبعيد عمرى ما كلمته ولا حصل بينا أى موقف
وأصحابى فى الجامعة كانوا عارفين إنى بحبه
أتفاجأت فى آخر سنة تالتة أنه اتقدملى مجرد سأل على عروسة فالناس قالوا له أنه بابا عنده بنت أسمها كذا ومعاها تعليم كذا فأتقدم.
منكرش أنه الفرحة مكنتش سايعنى لما عرفت،الغرفة مكنتش تتسع لفرحتى زى ما بيقولوا.
ورغم أنه بابا مكنش مقتنع به أوى بس لما لقى إنى موافقة وافق
فضل شوية مزهق بابا ويبعت فى ناس تتوسط له؛عشان نكمل مع بعض تانى وشوية يقول أنه محصلش حاجة لكل ده وشوية أنه هيتغير بس طبعا طلقنى فى الآخر ومجابليش نص مؤخرى زى ما الشرع بيقول "مش مسامحة فيه" وكان زعلان أوى أنه مأخدتش باقى الدهب وقال علينا نصبنا عليه!!
ربنا ينتقم منه ومن أى راجل زيه
_ عاملة أيه ى ندى
_ الحمد لله كويسة اخباركم أنتم
_ الحمد لله كويسين معلش اتاخرنا على ما جينا ليكى بعد أحتا لسه عارفين من قريب انك أطلقتى فقولنا نجى نشوفك
حاولت أبتسم _ فيكى الخير ى سارة،وأنتى عاملة أيه ى إسراء
_ الحمد لله والله بس مترمطة أوى فى الشغل ى بنتى،بلا شغل بلا مرمطة أنا عايزة أبقى ست أفسدها الدلال مش عايزة المرمطة دى
فضلت أنا وإسراء نتكلم شوية لحد ما سارة دخلت فى الكلام _ صحيح أنتى أطلقتى ليه؟
سكت شوية وبعدين رديت _ نصيب
_ أيوه يعنى إيه اللى حصل ده أنتى من زمان وأنتى بتحبيه وهو الشهادة لله كل الناس بتكلم عن أخلاقه وشطارته مهو ى سارة اللى كان فى الدفعة اللى أكبر مننا فاكره
_ اا...ايوه فاكرة أنتى عايزة أيه دلوقتى ى سارة؟
_ مش عايزة حاجة بفكرك بيه بس،مقولتيش ى ندى أيه اللى حصل عشان توصل لدرجة الطلاق
_ بصى ى سارة لما إسراء قالت أنها جاية وأنتى معاها انهاردة قولت تنوروا مع إنى كنت عارفه أنك جاية بس عشان ترضى فضولك وترميلى كلمتين زى قلبك كده بس قولت يمكن أكون غلطانة وأنتى أتغيرتى بس واضح كده أنه مفيش حد بيتغير فى الزمن ده_إلا من رحم ربى_ مش قادرة تدارى كرهك ليا وغيرتك منى لمجرد أنه أتقدملى أنا،وعموما أرتاحى خالص أنا مبقتش موجودة تقدرى تعملى الحاجات اللى كنتى بتعمليها أيام الكلية يمكن تنفع ولو إنى أشك
قامت وسابتنا وفضلنا أنا وإسراء نتكلم وهى قالت إنه المكان اللى هى بتشتغل فيه محتاج موظفين فقولت أقدم مش هخسر حاجة وقدمت الحمد لله وأتقبلت
مش هقول أنى أد أيه قوية ومش متأثرة وموجوعة باللى حصل معايا بس دايما بفكر نفسى أنها دنيا وفيها إبتلاءات بتحصل لينا لازم نرضى بيها؛لأنه معدناش حل تانى غير الرضا،وأنه ربنا حكيم عليم بيعطى لينا الإبتلاء على قد مقدرتنا فبالتالى أنا أقدر استحمل الإبتلاء ده حتى لو باين من بره أنه كبير بس أنا أقدر أستحمله
بحاول فى الشغل مكونش علاقات أو صحوبية مع أى حد علاقتى يدوب مقتصرة على إسراء وبس
فى يوم لقيت واحد زميلى طلب يكلمنى
_ خير ى باش مهندس
_ لو سمحتى كنت محتاج رقم والدك
_ هو حضرتك سألت عنى؟
_عادى يعنى شايف قدامى إنسانة محترمة مهذبة فقولت أتقدملها إلا إذا كان عندك اعتراض عليا
_ لا أنا معرفكش أصلا عشان أعترض أو أقبل بس على الاقل أهلى هيسألوا عليك زى ما أنت مفترض تسأل عنى؛ لأنه مش أى واحدة باين عليها إنها محترمة تنفعك،عن إذنك
مقولتش لبابا عليه لأنى كنت عارفه أنه لما يسأل ويعرف غالبا مش هيحب يتقدم وفعلا متكلمش معايا فى الموضوع ده تانى على الأقل لحد دلوقتى.
أتمنى يعجبكم أنا عارفه أنه واقعى زيادة عن اللزوم بس أحيانا بنحتاج حاجة تفوقنا.
لو أنتى فى مكان ندى كنتى هتصرفى زيها؟
لـ أمنية الطحان
