.jpeg)
رواية انا وابن خالتي الفصل الثاني بقلم عمرو راشد
انت بتضر*بني يا مروان.. بتضر*بني يوم فرحي
= اه بضر*بك وهكسر عضمك كمان يا بنت الكل*
انت اتجننت.. انت بتشت*مني!
= وكمان بتردي عليا.. دا أنتي ليلة ابوكي سودا
لا لا دا انت مش طبيعي.. انت شكلك شارب حاجة،، انطق قول شارب ايه؟
= انا اسف يا هند،، اقسم بالله انا ما عارف عملت كدا ازاي
يعني ايه
= انا مش متحكم في نفسي
ازاي انا مش فاهمة
" ملامح وشه اتبدلت تاني للغضب وضر*بني قلم أقوى من اللي فات لدرجة ان ودني كانت بتصفر
وأنتي تفهمي ليه.. أنتي ملكيش انك تفهمي
= حرام عليك يا مروان كفاية.. قولي بس أنا عملت ايه غلط
" صوته رجع هادي من تاني
انا اسف.. مش انا والله،، والله العظيم في حاجة بتحركني يا هند
= طب لو سمحت ممكن تطلع برا وتسيبني النهاردة
حاضر هطلع بس عشان خاطري متزعليش مني
= مش زعلانة اطلع بس
" مشي لحد الباب وفتحه وكان لسة هيخرج بس فجأه قفل الباب بقوة و رجع بص ليا
هو انتي عايزة تطرديني من بيتي يا زبا*لة يا بنت الزبا*لة
= يا مروان بقا كفاية
كفاية!!،، وهو أنتي لسة شوفتي حاجة دا انا هخلي ايامك الجاية كلها سواد
" كنت قاعد جنب امي بعد ما حطت عروسة الفودو جنبها وبصت ليا وهي بتضحك وقالت
كفاية كدا عليها النهاردة
= انتي عايزة تفهميني ان اللعبة دي هتعمل كل اللي أنتي بتقوليه دا
بكرا تشوف يا بودي.. وبكرا ليه يا حبيبي،، الصبح مش بعيد.. اول ما النهار هيطلع هنروحلهم
= بس انا خايف اوي على هند
متخافش يا حبيبي و بعدين هو انا بعمل كل دا ليه.. ماهو عشان هند تبقا ليك
= انتي أصلا جبتي العروسة دي منين؟
دا موضوع طويل
فلاش باك
" مكنتش عارفة ازاي امنع الجوازة دي.. حاولت كتير وفي كل مرة كنت بفشل لان البت باين عليها بتحبه اوى.. مكنش عندي غير الشيخ قاسم.. راجل بركة وكل الناس بتشكر فيه.. صحابي كانو بيروحو عنده ومفيش واحدة مشيت من عنده الا وهي محققة اللي هي عايزاه فقررت اروحله وعلى عكس ما كنت متوقعة.. لقيت راجل لابس بدلة وماسك سبحة في ايده وجنبه بخور مش زي ما بنشوف في الافلام،، قعدت قدامه وقولتله
انا عايزة حاجة تمنع جوازة بنت اختي بأي شكل
= ليه.. هو العريس مالو؟
انا بصراحة عايزاها ل ابني.. مش عايزاها تخرج برا عيلتنا اصل هي و ابني متربيين سوا وانا خايفة عليها من الغريب
= وهي بتحب ابنك؟
انا ابني بودي مفيهوش عيوب واي بنت تتمناه
= اي بنت غير بنت اختك صح
بصراحة اه هي بتعتبره اخوها
= طيب ماهو بالشكل دا حتى لو العريس سابها فهي برضو مش هتحب ابنك لانها بالبلدي كدا مش شايفاه أصلا
سيب دي عليا انا.. انا هخليها تحبه
= الحب مش بالعافية يا صفاء ولا انتي رأيك ايه
هو حضرتك عرفت اسمي منين؟
= مش مهم عرفته منين.. المهم انتي عايزة ايه؟
انا مش عايزة الجوازة تتم وخلاص
= ممكن نعملها عمل ونكرهها فيه.. الموضوع بسيط
لا بلاش انا اخاف على البت ممكن تتأ*ذي
= الموضوع مفيهوش اي حاجة وبسيط زي ما قولتلك يعني متخافيش
لا برضو اخاف اصلها غالية عليا أوي
= طالما غالية عليكي سبيها تتجوز اللي هي اختارته ولو ليها نصيب مع ابنك هيحصل حتى لو بعد 10 سنين
اومال انا جيالك ليه ياعم الشيخ؟ ماهو عشان اخليها من نصيبه
= النصيب دا حاجة بتاعت ربنا ملناش دخل فيها
بس يعني انتو.. اقصد الشيوخ يعني اللي زي حضرتك بيعرفو يتحكمو في الحاجات دي
= مفيش بشر يقدر يخالف إرادة ربنا ولا انتي مش مؤمنة يا ست صفاء
لا مؤمنة والحمدلله بس انا مش عايزة اكسر قلب ابني
= ف تكسري قلب بنت اختك
ياعم الشيخ انا مش جاية عشان آاخد منك نصايح.. هتقدر تساعدني ولا لا؟
= من ناحية هقدر ف انا اكيد اقدر ان شاء الله ولكن انا دايما احب أقدم النصيحة قبل ما اعمل اي حاجة ولكن دايما البني ادم بيكون مصمم على الشر سبحان الله،، بصي يا صفاء حلك عندي بس هتدفعي كتير
مش مشكلة هدفع اللي انت عايزه بس من غير ما البت تتأ*ذي
= اسمه ايه عريس بنت اختك
مروان محمد عبدالرحمن و امه اسمها زينب حسن السيد
= هرجعلك تاني
" لقيته قام من مكانه و دخل اوضة كانت موجودة جوا الأوضة اللي احنا فيها وقفل الباب عليه،، فضلت قاعدة مستنية أكتر من عشر دقايق لحد ما خرج تاني وقعد قدامي و مد ايده ليا وكان فيها عروسة فودو
دي ايه دي
= دي تقولي عليها ان عريس هند في ايدك
يعني ايه مش فاهمة
= يعني بالعروسة دي أنتي متحكمة في مروان بشكل كامل.. كل اللي أنتي هتعمليه انك تقولي عايزاه يعمل ايه وهيعمله فورا
= انت بتتكلم بجد يا شيخنا
جربي
= يعني اعمل بالظبط
هتمسكي العروسة وتبدأي تقولي الحاجات اللي أنتي عايزاه يعملها و هيعملها زي مثلا لو قولتي دلوقتي " اضر*ب هند بالقلم " هيضر*بها حالا
" ابتسامة الانتصار اترسمت على وشي
يعني مروان بقا في ايدي كدا خلاص
= اه بس خدي بالك.. دي كدا فيها خطر على هند بشكل كبير عشان كدا بنصحك انك متستعمليهاش كتير
خطر عليها ازاي يعني؟
= مش شرط تفهمي،، اسمعي النصيحة ومتنسيهاش.. متستعمليش العروسة كتير يا صفاء
باااك
#بقلم : #عمرو راشد
وهو كان قصده ب انك متستعمليش العروسة كتير
= معرفش ولحد دلوقتي عايزة افهم
خلاص مش مهم.. المهم دلوقتي اننا نقدر نعمل اللي احنا عايزينه يعني خمني مثلا الجوازة دي ممكن تستمر قد ايه بعد لا اللي حصل دلوقتي دا
= اربع ساعات بالكتير
" ضحكت انا وامي وبعدها قومنا احنا الاتنين وكل واحد دخل اوضته،، غيرت هدومي ونمت.. لما صحيت كانت الساعة 10 الصبح خرجت من الأوضة لقيت امي قاعدة في الصالة
ايه يا ماما انتي ايه اللي مصحيكي بدري كدا
= صحيت على تليفون خالتك منى.. كانت عايزاني اروح معاها ل هند عشان الصباحية بتاعتها
وانتي مروحتيش معاها ليه يا ماما؟
= افهم يا واد.. احنا مينفعش نروح دلوقتي،، احنا دورنا لسة جاي
جاي ازاي يعني؟
= اقعد افطر وهفهمك
" مكنتش نمت من امبارح بعد اللي حصل و مروان نزل ومعرفش راح فين،، لقيت الجرس بيرن.. قومت فتحت الباب لقيتها امي،، كانت بتزغرط وداخلة بتحضني
صباحية مباركة يا عروسة
= صباح الخير يا ماما
مالك يا هند.. أنتي منمتيش ولا ايه
= لا نمت
ولا مروان هو اللي منيمكيش
" كانت بتقولها وهي بتضحك.. ابتسمت عشان مبينش اي حاجة
لا عادي احنا نمنا من التعب
= طب اقعدي احكيلي حصل ايه امبارح،، بس استني هو جوزك فين؟
مروان جاله تليفون شغل مهم ونزل
= يا مصيبتي!!!،، نزل يوم الصباحية
يا ماما هو مش رايح يشتغل.. دي مشكلة هيحلها وهيرجع تاني
= حاجة غريبة والله المهم قوليلي حصل ايه
محصلش يا ماما.. قولتلك كنا تعبانين ونمنا
= يعني مقربش منك خالص
خالص
= وانتي سبتيه عادي كدا
هعمل ايه يعني.. هخليه يقربلي بالعافية و بعدين احنا تعبنا جدا من الفرح
= ايوا يا بنتي بس برضو يعني
متقلقيش يا ماما كل حاجة هتكون كويسة و بعدين احنا لسة العمر قدامنا طويل،، اطمني
" كنت بحاول اطمنها بأي شكل ولكن في الحقيقة انا اللي محتاجة حد يطمني.. انا مش فاهمة ايه اللي حصل امبارح دا وخايفة،، خايفة يحصل تاني ومش عارفة حتى هتعامل تاني ازاي.. امي قعدت معايا ساعة ومشيت وانا فضلت قاعدة لوحدي.. مكنش ليا نفس للاكل،، عملت نسكافيه وفضلت قاعدة حتى مش عارفة افتح الموبايل لان مفيش عروسة بتفتح تليفونها يوم صباحيتها لحد ما سمعت العصر بيأذن.. بعدها ب ربع ساعة لقيت جرس الباب بيرن،، قومت بصيت من العين السحرية لقيته بودي.. دخلت غيرت هدومي ولبست بيچامة وخرجت فتحت
ايه يا هند كل دا،، انتو نايمين ولا ايه
= لا كنت في البلكونة ومش سامعة،، اومال فين خالتي مجتش معاك ليه
تعبانة والله يا هند.. تعبت بعد الفرح ونايمة في السرير
= الف سلامة عليها
" دخل قعد على الكنبة وانا روحت قعدت جنبه
بصي بقا عشان مكدبش عليكي.. امك اتصلت ب امي وقالتلها على اللي حصل
= وهو ايه اللي حصل؟
امك شايفاكي مش مبسوطة يا هند
= عادي يا جماعة في ايه.. محصلش حاجة لكل دا
طب قوليلي هو عمل حاجة تزعلك؟
= مش عارفة يا بودي.. بص اللي هقوله دا متقولوش لحد،، مروان امبارح كان غريب أوي،، تصدق انه شت*مني وضر*بني
دا اتجنن دا ولا ايه؟
= اه والله.. كان كويس معايا وفجأة لقيته عمل كدا وبدون سبب
لا دا لازم حد يكلمه.. هو فاكر انك معندكيش رجالة ترد عليه ولا ايه
= عشان خاطري يا بودي بلاش.. انا مش عايزة الموضوع يكبر،، هو اكيد حصل حاجة ضايقته بس ايه هي الحاجة دي نفسي اعرف
وهو عشان مضايق يضر*بك يا هند.. أنتي بتهزري؟
= انا منمتش من امبارح.. مش عارفة انام من التفكير
طب سبيلي انا الموضوع دا
= هتعمل ايه؟
هتصرف انا ملكيش دعوة
= عشان خاطري يا بودي بلاش حد يعرف
متقلقيش
" فجأه لقيت باب الشقة اتفتح و مروان دخل
هو الواد دا بيعمل ايه هنا؟
= عادي يا مروان.. ابن خالتي وجاي يطمن عليا
ازاي يدخل البيت وانا مش موجود
" كنت لسة هرد ولكن بودي رد مكاني
وفيها ايه يا مروان انا وهند اخوات و اظن انت عارف دا
= بس هند دلوقتي متجوزة يا حبيبي يعني مينفعش تدخل الشقة و راجل البيت مش موجود
انا كنت فاكر اننا بقينا اهل يعني
= طبعا اهل بس دي اصول
معاك حق.. بس برضو كويس اني جيت النهاردة عشان اشوف اللي انت عملته مع هند
= عملت ايه
انت ضر*بت هند ليه؟
= بص والله انا،،، ايه دا انت مالك اصلا
مالي ازاي يا مروان،، هند دي أختي لو مش هتعرف تحافظ عليها وتشيلها جوا عينك يبقا تطلقها
= اطلقها!!
اه تطلقها،، انت أساسا مكنتش تحلم تتجوزها
" لقيته فجأه قرب مني وضر*بني بالبوكس.. وقعت على الأرض بعدها هند جريت عليه
انت ايه اللي بتعمله دا؟
= والله العظيم مش انا.. انا معملتش كدا
" لكن قرب مني تاني وكمل ضر*ب لحد ما حسيت ب د*م بينزل من وشي.. هند كانت بتصرخ
سيبه يا مروان عشان خاطري
" بعدها قام وقف وهو مستغرب و باصص لنفسه و ل ايده بعدها بص ل هند اللي اتكلمت وقالت
لا انت مبقتش طبيعي.. انت اكيد مجنون
= صدقيني يا هند انا معملتش كدا.. انا مش قاصد اعمل دا والله
طلقني يا مروان!!
بدل ماتدور وتبحث علي الروايات خليها علي تليفونك وحمل تطبيقنا
