رواية همسة وجع الفصل التاسع والعشرون 29 بقلم اسماء العذب

 

رواية همسة وجع الفصل التاسع والعشرون بقلم اسماء العذب

لايك الاول يا شطار 

29 

#همسه_وجع

صلوا علي الحبيب المصطفى 

♡_______________♡ 

عمر في سره :حسابك تقل معايا اوي يا هشام..انا مش طايقك من يوم ما شوفتك وما صدقت انك تبعد عننا دلوقتي عاوز ترجع لحياتنا تاني وتضحك علينا ..لا ده انت بتحلم وقريب هنتحاسب والحساب يجمع 

سعيد بأستغراب: انت بتكلم نفسك وتقول ايه يابني 

عمر فاق من شروده: هاا يابابا بتقول ايه

سعيد: لا ده انت في عالم تاني خالص 

سكت شويه وهو بيبص لعمر بعتاب باين من عيونه واتنهد وهو بيقول :عمر

عمر بانتباه: نعم يا بابا 

سعيد برجاء: بالراحه يابني علي عيال اختك ..العيال كانوا هيموتوا من الخوف منك وانت بتزعق ..حرام اللي انت بتعمله فيهم ده بجد

عمر بأرتباك: يابابا انا بس ك....

قاطعه سعيد وهو بيتكلم بجمود:انا عارف يا عمر 

عمر بعدم فهم: عارف ايه يا حج

سعيد بتنهيده ألم: عارف انت بتعمل كده ليه ..انت زعلان لحد دلوقتي من اختك وفاكر ان عيالها دول غلطه..عاذرك يابني من اللي في دماغك وعارف انه علي قد حبك للشخص علي قد زعلك منه وقت خناقك معاه 

انت كنت بتحب همسه أوي واعتبرها بنتك مع انها هي اللي اكبر منك 

لكن لو اختك غلطت عيالها 

عمر بتهرب :لو سمحت يابابا مش عاوز اتكلم في الموضوع ده 

سعيد :بحده ليه دايما بتهرب من اي حاجه تخص العواطف وكأنك مش بتحس ..لا انا عارف انك بتحس وعندك مشاعر وطيب لكن بتحاول تداري ده كله تحت وش العصبيه والغضب اللي انت لابسه 

لكن فوق ياعمر انت لابس الوش للناس الغلط 

لابسه لاختك الخيانه اللي مفكراش حتي اسمها عيالها الصغيرين اللي مش فاهمين حاجه من برأتهم وصغر سنهم ..فوق 

بعدها اتحرك بكرسي ناحيه اوضه مازن وساب عمر وهو بيفكر في كلامه 

في الاوضة وعد ووليد كانوا بيعيطوا جامد 

ومازن بيحاول يهديهم ويسكتهم 

دخل سعيد لاقي الوضع ده ..قرب بسرعه عليهم 

سعيد: بس بس يا حبايبي بتعيطوا ليه 

وليد ببكاء: احنا مش عاوزين نجي هنا تاني يا جدو

خالو عمر كل ما يشوفنا علي طول يزعق فينا 

وعد بعياط:انا مش بحب خالو عمر ده خالص 

سعيد طبطب عليهم وهو بيقول: لا يا حبايبي متقولوش كده خالكم عمر ده طيب خالص ..هو بس بتعصب بسرعه لكنه طيوب خالص

وعد:بس ده اخد مننا الألعاب بتاعتنا وزعق فينا جامد واحنا خوفنا منه اوي 

سعيد :لا ده هو بس كان صاحي من النوم وهو لما بيصحي من النوم بيكون متعصب ..وعشان اثبت بس ليكم انا هناديه دلوقتي وهو هيتأسف ليكم وينزل يجيب ليكم ايس كريم من تحت 

بعدها نادي علي عمر اللي دخل بسرعه 

عمر :نعم يا بابا 

سعيد بنظره وعيد:اتأسف لوعد ووليد علي اللي عملته معاهم من شويه

عمر بأستنكار: نعم انت بتقول ايه يا بابا 

سعيد بغضب مكبوت قرب عليه واتكلم بهمس: اعمل زي ما بقولك وإلا والله هتشوف مني وش تاني ..العيال عمالين يعيطوا ومش عاوزين يجوا البيت تاني بسبب اللي عملته ..اعتذر يلا

عمر بطاعه: ماشي يابابا 

بعدها قرب علي الاولاد اللي كرد فعل طبيعي منهم رجعوا ورا بخوف 

لكنه مهتمش وقرب تاني واتكلم بطريقه عاديه:انا ..متزعلوش مني وحقكم عليا 

بص لابوه وهو بيقول:مرضي كده 

سعيد انتهد بيأس من ابنه لكنه ابتسم وكلم الاولاد

:شفتوا اهو اعتذر لانه غلطان ودلوقتي هنفطر كلنا وبعدها عمر هيجيب ايس كريم احنا ونازلين 

عمر يتشنج: نعم عمر مين اللي هيجيب

مازن بأستفزاز: عمر انت يا قلبي ..انا بحب الايس كريم بتاعي بالشوكولاته عشان تبقي عارف 

سعيد: يلا روح حضر الفطار مش هنقعد كده قصاد كلامك ده ..اتحرك يلى عاوزين نروح لأمك واختك 

بعدها اتحرك وفتح الباب وهو بيشاور لمازن 

:مازن هات وعد ووليد وتعال نتفرج علي التلفزيون علي بال الفطار ما يجهز 

بعدها الكل خرج من الاوضه تحت نظرات عمر اللي قال :انا قولت اني بقيت الداده بتاعه البيت محدش صدقني 

♡_______________♡

البياع:شايفه البجحه قال ايه نازله الشغل وهي بتنزل تقابل شبان وعامله فيها بنت الحسب والنسب كل ما حد يكلمها ..ناس يتدب في عينها رصا.صة

الست وهي بتمصمص شفايفها وبتبص لسمر بقرف: ربنا يستر علي ولايانا يارب

سمر قربت من الاتنين وهي بتتكلم بعدم فهم

سمر :نعم انتوا بتقولوا ايه هي مين دي وانتوا بتتكلموا علي مين 

البياع بتهكم :بنتكلم عن واحده كده ماشيه علي حل شعرها 

الست بقرف وهي بتبص علي سمر :ربنا يستر علي ولايانا يارب 

سمر مره واحده اتحولت وكأنها بقت واحده تانيه 

وبقت تصقف بأيديها وتردح: لا اتكلمي علي المكشوف ياختي وقولي قصدك وبلاش حركات الغمز دي 

الست بردح: بتكلم عن واحده خارجه عن طوع أهلها وماشيه علي حل شعرها وملهاش كبير 

سمر بترقب :ايوه ومين بقي دي اللي انتي بتقطعي في فروتها علي وش الصبح

الست بسخرية: منتيش عارفه هي مين ..صحيح البجاحه ملهاش حل يا خواتي ..بقي يا ناقصه مفهمه اهلك انك رايحه الشغل وانتي رايحه تقابلي الشبان وتخرجي معاهم ..ايه فاكره ما حدش عارف ولا واخد باله وكأن الناس اتعمت 

سمر ببسمه مختله :لا متعمتش بس خرفت بدري بدري 

مره واحده قربت من الست ومسكتها من ايدها وجرتها لنص الشارع وهي بتنادي علي البياع هو التاني عشان يجي وراهم وصوتها وشكلها كله اتحول وكأنها بقت واحده تاني ..لا دي بقت كائن تاني لو كان لعشماوي اسم مؤنث فاهيبقي سمر في اللحظه.دي 

سمر وقفت وهي بتتكلم بعيون بتطق شرار 

:بقي انا بجحه وخارجه عن طوع اهلي يا ست يا ناقصه ..

بعدها اتكلمت بصوت عالي وهي بتكلم الناس الملمومه حواليها وقالت 

سمر:الست الناقصه 

دي هي والراجل البجح ده بيقولو عليا اني ماشيه علي حل شعري وبروح اقابل الشبان من ورا اهلي ..عاوزه اسأل سؤال ليكم يا أهل الحته يا اللي اعتبرتكم عيلتي التانيه وانا وأهلي كنا معاكم في حزنكم قبل فرحكم وجمايلنا مغرقه الكل ..عمر حد منكم شاف عليا حاجه بطاله أو مش كويسه

الناس اللي واقفه الكل هز راسه بلا وهم بيبصوا في الارض بخجل وسمر كملت 

:طب عمر حد منكم سمع عليا اني خرجت اقابل راجل ولا شافني بركب مواصله مع حد غير عيلتي سواء اخويا أو ابويا 

الناس كلها هزت راسها ب لا تاني 

التفت سمر للراجل والست وهي بتشاور عليهم

سمر :اومال الاتنين دول قالوا عني كده ليه ..قالوا اني بقابل شبان من ورا اهلي واتبلوا عليا عشان يخلوا سمعتي وسمعه اهلي في الارض ..عارفين ربنا سمي ده ايه في القرآن..قال عنه رمي محصنات الاتنين دول بيجيبوا سمعه بنات الناس بالباطل عشان يوقفوا حالهم هم واللي زيهم واللي اكيد عارفين نفسهم واحنا كمان عارفينهم 

في الوقت ده كان اهل سمر نزلوا واللي كانوا امها واختها وجدتها وسمر كانت لسه هتتكلم لكن قاطعها البياع وهو بيتكلم بهدير من بين سنانه 

البياع:ومين قال اننا بنتبلي عليكي ..انا امبارح شفتك بعيوني دول وانتي واقفه مع عمر ابن سعيد من وش الصبح وبتتكلموا مع بعض علي جنب وكأن في ما بينكم سر

سمر ضحكت بعلو صوتها وهي بتقول :ولأن سيادتك شفتني واقفه مع عمر ابن عم سعيد الفت قصه بقي وحوارات واني بخرج اقابل شبان واتصرمح يمين وشمال ومش عامله ليا كبير ..ياخي ده لولا انك قد ابويا لا كنت قليت منك دلوقتي قدام الناس الواقفه دي كلها ..اختشي علي شيبتك بقي ده انت عندك ولايا 

الست بغضب :وايه اللي يخلي بنت توقف مع شاب علي جنب في الشارع وكأنهم خايفين الناس تشوفهم 

سمر بأستفزاز وهي من جواها هينفجر من الغضب:وانتي مال اهلك يا ست يا حشريه انتي ..وعلي العموم هريح بالك واقولك..كنت بسأل علي مازن اخو عمر بأمر من امي لانه كان عامل حادثه ولما لاقيت عمر خارج لشغله سألته وطمني وقالي أن أمي تقدر تزور البيت بعدين لأن طنط وفاء مش موجوده حاليا عند جماعه قرايبها ..عرفتي بقي واتبطيتي وسكتي 

الست بغضب وصوت عالي :وهو ابوكي ولا اخوكي ميعرفوش يروحوا هم يسألو باعتينك انتي لبيت فيه اتنين شباب 

سمر كانت هترد لكن جه صوت من ورا الكل وهو بيقول

:وفيها ايه لمل تسأل هي بنفسها واحد وخطيبته عادي لما تسألني 

الكل التفت وشاف عمر اللي الشرار بيطير من عيونه بالمعنى الحرفي 

الستات شهقت بدهشه من كلام عمر ولسان سمر اتعقد من اللي اتقال 

عمر قرب ووقف جنبا وهو بيطمنها بعيونه 

:ايه هو انتوا ما تعرفوش أني انا وسمر اتقرت فاتحتنا بس الموضوع كان علي الضيق اوي وما قولنا لحد عشان كنا ناويين نعمل شبكه وكنب كتاب بعد كام شهر 

قربت جده سمر وهي بتمسك ايد سمر وقالت:بس الظاهر إن الظروف هتجبرنا نغير خططنا عشان العالم الموبؤه دي ترتاح 

الراجل بعصبيه: اومال مقولتوش لحد ليه 

الجده بأستفزاز: اصلنا بنخاف من الحسد مهو علس رأي المثل ضربه سك.ين ولا ضربه عين 

بعدها التفت للست وهي بتقول بصوت عالي 

:جرا ايه يا فايزه يا حبيبتي..مالك داخله علي البنت علي الحامي كده ليه وعامله فيها مخلفه مشايخ وصحابه..هو انتي مش بنتك قفشها اخوها من شهرين في مطعم مع صاحبه ومن ساعتها مش بتخرج من البيت وخطبتوهم لبعض عشان تداري علي خيبتها بعد ما اتشهرت وبقت سيرتها علي كل لسان 

ولا لاقيت حفيدتي ميعبهاش حاجه قولتي هي أحسن من بنتي في ايه وقولتي تخليها زي بنتك قليله الربايه 

لا مش احنا يا حبيبتي..مش احنا 

بعدها التفتت للبياع وهي بتصقف بأيديها بردح:وانت 

يأبو عادل يا راجل يا شايب يا عايب ياللي كل من هب ودب حاطط نقرك من نقره ونازل تريقه وتقطيع في قروه الناس وانت بيتك من ازاز 

هو مش انت ياراجل بنتك اتطلقت عشان جوزها قفشها بتكلم راجل تاني عليه واداها علقه موت وبقت في المستشفى اسبوع علي بال ما نطقت 

مالك بقي فارد نفسك علي الخلق وكأنك إمام مسجد 

بعدها قربت منه واتكلمت بصوت واطي 

:اسمه ياراجل انت.. انت كل ورقك معايا لو فكرت بس تتعرض لبنت ابني ولا تحاول تشوه سمعتها لا كل الي عرفاه الناس كلها هتعرفه ..ها تحب الناس كلها تعرف ان مراتك خانتك وانت مقدرتش تتلكم ولا تعمل حاجه لأنك.....ها اكلم ولا ايه 

الراجل بص في الارض وهو بيتكلم بخزي وخوف

:حقك عليا يا ست فاطمه والله ما هجيب سيره الست سمر فس اي حاجه ولا هتكلم عليها نص كلمه بس بلاش اللي في دماغك ده ابوس ايدك 

علت صوتها وهي بتقول:لا متبوسش ايدي روح واطلب السماح من سمر ولو لزم الأمر بوس ايدها هي

الراجل بسرعه راح عند سمر وهو بيستسمح فيهالكن سمر في عالم تاني وهي بتبص لعمر بزهول وصد مه واللي كان بيتحاشي النظر ليها بعد اللي قاله 

لدرجه أنها متعرفش إمتي كل حاجه اتفضل وبقت لوحدها في الشارع بعد ما الكل مشي وما فضلش غير أهلها وعمر وابوه وأخوه والطفلين بس وامها بتحب فيها لفوق بينما جدتها قربت علي سعيد وراحوا علي جنب ومعاهم عمر وبقوا قريب تلت ساعه وهم بيتكلموا وجده سمر باين عليها الغضب الشديد

♡_______________♡ 

الكل كان موجود عند همسه علي العصر ووفاء بتتكلم بفرحه

:عندي خبر الكل لما يسمعه هيطير من الفرح

مشعل ببسمه:وش الخبر ام عمر 

وفاء بفرح :الدكتور قال إن همسه ممكن تخرج بعد يومين وتروح معانا همسه ابتسمت بحب وفرحه وهي بتراقب فرحه امها وعيالها اللي صفقوا من الفرح وإن امهم هترجع معاهم البيت تاني 

مشعل:والله تستاهلين جايزه علي هالخبر ام عمر ..سمعتي همسه قريب بترجعين معي عالبيت ونتجمع سوا متل ايام زمان 

وفاء لاحظت ان أولادها وجوزها ما اتكلموش ولا علقوا علي كلامها 

وفاء بأستغراب: مالك يا سعيد 

سعيد بشرود :مالي يا وفاء 

وفاء: شكلك مش كويس ده انت حتي ما فرحتش للي انا قولته

سعيد :وانتي قولتي ايه 

وفاء في اللحظه دي عرفت ان فيه حاجه كبيره حصلت عشان جوزها يكون سرحان وشارد كده 

وجهت كلامها لعمر:مالكم يا عمر ايه فيه

عمر ما ردش وبص في الأرض 

وفاء بدأت تقلق وبصت لمازن اللي هو كمان نزل راسه في الارض عشان يتحاشي النظر معاها 

قبل ما وفاء ترد الباب خبط ولما سمحوا بالدخول دخلت واحده ست مشعل وقف اول ما شافها ووشه جاب الوان 

ووعد ووليد صرخوا بصوت واحد بفرحه:زييييييد 

بعدها جريوا علي الطفل اللي كان معاها

وفاء: نعم مين حضرتك وعاوزه مين 

هي بغرور: انا هند زوجه مشعل وأم ابنه 

بعدها ضغطت علي حروفها وهي بتقول :ابنه الحقيقي

باااااااااااااااااااااس 

النهارده رحت عشان اعمل باقه منفصله لتلفون بتاعي لكن الراجل المسؤول عن الموضوع مرضيه بحجه أن الخط بأسم جدتي ولازم هي اللي تجي بنفسها عشان تعمل كده وجدتي للأسف اتوفت من عشر شهور الله يرحمها 

يعني بجد يا جماعه حاولت فا متزعليش لو اتأخرت في التنزيل لان ده بيكون خارج إرادتي بجد 

سامحوني 😞😞 

وتفاعل بقي عشان تعبت والدنيا معنداني 

يلا كل واحد قرأ الفصل يعمل لايك وعشر كومنتات 

يلا 

أستودعكم الله 

اسماء العذب(كروان)

الفصل الثلاثون من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال