رواية شايفه نفسك فين بعد سنه الفصل السابع بقلم مريم سمير
_ طلقني
= صباح الخير يحبيبتي ، انتي عبيطة ولا اي؟
_ طلقني يا احمد ، أنا بتكلم بجد
= أطلقك علي معدة فاضيه؟ دا حتي ميرضيش ربنا يعني!
_ يعني لما تفطر هتطلقني؟
= اه روحي اعملي الفطار بقي ، واصطبحي ها ، اصطبحي يمريم
روحت المطبخ وعملت فطار ، أنا لازم اتطلق! هو مبيفهمش ولا اييي!
_ ها هتطلقني أمتي ؟
= طفحونا اللقمة بقي ، بقولك ايييي
_ انت بتزعقلي؟ طب طلقني
= اعمليلي قهوة مصدع
_ وبعدها ه..
= اه ، روحي بقي
عملت القهوة وحطيتها علي السفرة ، كان بيلبس عشان يروح الشغل ، خرج من الاوضه ف ابتسمت غصب عني ، عمري ما بطلت اعجب بيه اول مشوفه بلبس هينطق عليه ، عمري ما بطلت اشوفه احلي واطيب راجل في الدنيا ، وعمري ما بطلت احبه من اول معرفته ، من ايام ثانوي .
= ولما اتكسف دلوقتي من نظراتك ؟
_ ها! ، احمد أنا..
= تسلم ايدك يحبيبتي
شديت أيدي قبل ما يبوسها = والله ما يحصل ، هاتي أيدك بقولك
_ احمد أنا مبهزرش!
شرب بوء من الفنجان = عاوزة أي يمريم ؟
_ عوزاك تطلقني
= افرضي طلعت مغفل وسمعت كلامك ، انتي هتعرفي تعيشي من بعدي عادي؟
_ اه هو انت ال O2 ؟
= بلاش فزلكة الله يخليكي ، انتي شايلة ملحق كيميا في اولي ثانوي
_ شوف بردو هيغير الموضوع!
= موضوع عبيط يمريم ومش عاوز اتكلم فيه!
_ عبيط أي! بقولك عاوزة اتطلق! اه مهو أنت مش شايف غير نفسك وبس وعاوز كل حاجة ليك لوحدك أما رغبتي انا؟ اولع عادي
= بعد الشر عليكي ، انتي مقتنعة ب كلامك دا؟ اني مش شايف غير نفسي ؟
_ أيوة ومش عاوزة اكمل معاك
= طب ما ليا حق اشوف نفسي ، ب الأمانة فيه حد بالحلاوة دييي؟
_ احمد استني
= مينفعش والله لو اتأخرت هاخد جزي ، وجزي ورا جزي هطرد وهنشحت
_ احمد أنا كنت عاوزة اتكلم معاك في موضوع ال..
= طلاق ، حاضر يست الكل هنتكلم بليل علي رواقة ، ابقي اعملينا كوبايتين شاي بالنعناع
غمز = هتوحشيني ، مش عارف عملالي عمل ولا سحرالي ولا اييي!!
مشي وقفل باب الشقه وراه ، قعدت علي الركنة وانا قاعدة ادرب هقوله أي بالظبط بعد ما يجي ، لازم اخليه هو الي عاوز يبعد عني ، هو الي عاوز يسيبني ف موضوع الطلاق هيبقي سهل بعدها
= السلام عليكم ، ها عملالنا غدا أي النهارده ؟
_ بس كده عنيا
= بسرعة يمريم الله يكرمك اصل واقع من الجوع
دخلت المطبخ وحضرت الاكل في الأطباق وطلعت
بص علي الاكل = الاكل يفتح النفس ، تسلم ايدك
كل اول معلقة من البسلة ووشه كرمش
= ايدا يمريم؟
_ اصل الملح فلت مني وانا بطبخ
= طب واللحمة نست تستوي ولا اي؟
_ مهو..
= والرز عجن لوحده؟
_ مهي..
= أنا جعان يمريم بجد ، طلع عيني في الشغل النهارده
_ أنا هريحك مني ، طلقني يا احمد
= تريحيني منك؟ ، مريم مالك النهارده ؟ من اول اليوم طلقني طلقني وكأنها لبانة في بوقك أو سهله عليكي تقوليها!
_ أيوة سهله
= سهله الي هو ازاي يعني؟
_ عادي ، مش عاوزة اكمل ، مش كنا اتفقنا يا احمد أننا هناخد كل قراراتنا سوا؟ وانك هتسمعني دايما؟
مسك أيدي وقعدنا علي الركنة = أنا جمبك وسامعك ، مالك في ايي؟
سحبت أيدي وبصيت قدامي _ أنا معتش مرتاحة
= معتيش مرتاحة معايا؟
_ أيوة
= لي؟ حصل مني حاجة زعلتك؟
_ معتش مرتاحة وخلاص ، حاسه اني بدأت اتخنق ، معتش حاسه ب أي حاجة تفرح
= لي يحبيبتي ؟ طب اقولك ، اخد إجازة من الشغل ونسافر يومين اي حته تختاريها عشان تفكي
_ لاء ، الاحساس دا هيفضل ملازمني علي طول
= ولي تحكمي أنه ابدي مش مؤقت؟
_ عشان ، عشان أنا معتش بحبك
= نعم؟
_..
كان باصصلي ، نظراته كلها اتحولت ل صدمة وزعل ، مش عارف يترجم أو يستوعب أنا قولت الكلمة دي ازاي اصلا .
= مريم بصيلي كده
_ مش عاوزة
= مريم بصيلي
_ قولتلك مش عاوزة
مسك كتافي الاتنين ب أيده وقرب وشه من وشي وبص في عنيا = قولي تاني الي قولتيه
_ أنا..
= كملي
_ أنا مش بحبك
سابني وخد نفس ب اريحيه _ في أي ؟ مالك! بقولك مش بحبك!
= انتي كدابة ، حتي مش بتعرفي تكدبي ، عيونك فضحاكي يهانم ، عشقانة ومش عارفه تخبي ، أنا جامد خلي بالك
عيطت _ بس انا مش مرتاحة ، وعاوزة اسيبك ، مش عاوزة افضل هنا
حضني!
هيفضل الحضن ألذ طريقه للمواساة ، وهيفضل هو ألذ حد مر علي قلبي ، دايما بيعرف يحتويني ، مش شرط يتكلم ، شافني مضغوطة يحضني ، زعلانة ، مضايقه ، متعصبة ، متوترة ، كانت دايما دي ال love language الخاصة بينا ، كان بالنسبالي البيت! ويبخت الي يلاقي بيته في شخص ، كنت من الناس المحظوظة اني لقيت أحمد .
= اهدي ، خلاص بطلي عياط ، أنا معاكي يمريم ، هنعدي ب أي حاجة سوا
_ بس انا معتش عاوزة نبقي سوا
= طب ممكن تهدي دلوقتي وانا هعملك الي انتي عوزاه؟
حط أيده علي وشي عشان يمسح عياطي
= اعمال سفليه دي بقي أنا كشفتك ، حتي وانتي بتعيطي زي القمر والله
بعدت عنه وانا بحاول اخد نفسي كويس
= مفيش اي غدا عملتيه كده ولا كده؟
بصتله ب طرف عيني = دليفري ، هو الدليفري
قام طلب غدا ليا وليه _ وانا قولتلك اني مش عاوزة اكل
= مريم انتي مكلتيش حاجة من الصبح!
_ أنا حرة ، مش جعانة
ربع أيده = خلاص انا كمان مش واكل
_ كل يا احمد انت جاي تعبان ، ملكش دعوة بيا وكل
دور وشه =..
_ احمد! خلاص كل بقي! انت جعان يبني مينفعش تفضل من غير اكل! ، طيب طيب هاكل
بصلي = كنت عارف اني مش ههون عليك يجميل
_ اتلم وكل!
كلنا احنا الاتنين وعملت كوبايتين شاي بالنعناع زي كل يوم وطلعتهم في البلكونة
= وكان فيه ضغط كبير اوي بس الحمد لله عرفت اخلص الشغل كله النهارده ، وكمان فيه ترقيه جايه في الطريق
_ ربنا يوفقك دايما
= يارب يمريم ، ها مش ناوية تنزلي انتي كمان شغلك؟
_ قريب
= طب كويس اوي ، الصراحة مش حابب قعدتك كده ، عاوزك ترجعي زي زمان ، فاكرة ؟
_ نفسي كل حاجة ترجع زي زمان ، بس ساعات حاجات بتحصل بتخلي الي جاي كله شايفه ب عين سودة غير الحياة الوردي الي كنت عايش فيها
= حصل أي كفالله الشر؟
_ ها؟ لا مفيش ، أنا بتكلم في العموم
= الدنيا مش دايما حلوة ومش دايما وحشه ، يوم تبقي وردي ويوم تبقي كحلي ، عشان كده اسمها دنيا
_ وانا عوزاك دايما مبسوط وكويس
= طول منتي معايا انا مبسوط اخر انبساط والله
_ بتهيقألك ، مش يمكن اكون انا سبب تعاستك وشقاك؟
= انتي؟ انتي مستحيل تبقي سبب في أي حاجة وحشه ممكن تحصلي يمريم
_ صدقني هبقي سببها ، عشان كده لازم نسيب بعض
= عاوزة تسيبي يمريم ؟ دا انا مليش غيرك ، أنا عايش في الدنيا عشانك
_ مش انا الزوجة الي تستاهلك يا احمد
= اييي! ، انتي عارفة كويس أنا بحبك قد أي ، دا انتي كنتي بالنسبالي حلم بعيد ولما بقيتي معايا مكنتش مصدق نفسي ، دا انا ساعات بحس انك تستاهلي احسن مني بكتير ، واني مش الزوج المثالي احيانا بس بحاول ليكي ، عمري ما كنت هحاول عشان خاطر حد غيرك ، اوعي تقولي كده تاني
_ أنا مستهلش كل دا ، أنت مش مجبر تكمل معايا ، عشان كده عوزاك تطلقني ، انت..
خد نفس وطلعه بالراحة = أنا بحبك ، اوييي يمريم ، مش هعرف اعمل الي انتي عوزاه ، انتي لو مشيتي هبقي تايهه
_ هتتعود ، انت قد أي حاجة
= الا دي ، هو انتي بجد هتعرفي تبعدي عادي؟
_..
= طب بصي قوليلي أنا عملت اي وهنحله سوا ولو ملوش حل أنا ممكن اعوضك عن اي حاجة سببتهالك وحشه من غير قصدي ، أنا اخر حاجة اقصدها اني ازعلك
_ انت مش هتفهم اني..
= انك ايي؟
روحت علي الاوضه وقفلت الباب ، كان بيخبط بس مفتحتش ، فجرت كل الكبت الي كان جوايا بالعياط ، هقوله ازاي السبب الحقيقي؟ هيجيلي جرأة ازاي اقوله! ، مش عاوزة إبان قدامه وانا فيا حاجة غلط .
= صباح الخير يحبيبي
_..
= عجبك انتي نومتي علي الكنبة؟ ولما يجيلي تسك هتروحي تخلصي الشغل بدالي ولا اي مش فاهم؟
_ الفطار عندك علي السفرة ، أفطر وانا هعملك القهوة
= وانتي مش هتفطري؟
_ أنا مشغولة في المطبخ يا احمد ، افطر انت
خرج من المطبخ وسمعت صوت باب الشقه بتقفل ف عرفت أنه مشي ، طلعت الصالة لقيت الاكل زي مهو ، كنت بحاول اعمل اي حاجة عشان هو الي يبعد ، من خناقات كل يوم علي حاجات تافهة لا تذكر ، وأننا معندناش بنتجمع في البلكونة ويحكيلي أي حاجه عن شغله ، اننا عايشين في نفس الشقه ولا الغربا ، كان دايما بيحاول يتكلم معايا بس انا كنت يا ساكتة يا بزعق ، كنت أسوأ نسخة مني ، واحدة مكنتش عاوزة ابقي هي في يوم .
طلعت من الاوضه بليل عشان اشرب ، سمعت صوت تنهيده في البلكونة
_ انت كويس؟
بص قدامه وهو بيهز في رجله قربت شويه _ احمد؟ فيه حاجة ؟
= لا مفيش أنا بعرف اتصرف
_ تتصرف في اي؟
= يهمك اوي تعرفي؟ منتي بقالك شهر متعرفيش عني حاجة
_..
= أنا باصصلك ومش عارف انتي مين ، أنا عاوز مراتي ، حبيبتي ، لكن انتي مين؟
_ حصل حاجة في الشغل ؟
= أنا بهدلت الشغل ، معتش مركز من كتر التفكير ف أنا عملت أي عشان يحصلي كل دا ؟
_ انت ملكش ذنب
قام ووقف قدامي = مدام مليش ذنب ، مخلياني افكر اليوم كله لي؟ مخلياني حتي مش عارف انام ولا أكل ولا اشتغل ، ليي يمريم لييي ردي عليا ؟
_ مش لازم تعرف
زعق = أنا من حقي اعرف ، من حقي ودلوقتي ، قولي ليييي؟
عيطت _ عشان أنا مبخلفش ، ارتحت؟
=..
_ كنت بروح للدكتور كل شهر ، تحليل في التاني في التالت والنتيجه كلها واحدة! ، لحد ما صارحني وقالي اني مبخبلفش وصعب اوييي اخلف ، كل الدنيا اسودت في وشي ، انت ملكش ذنب في دا ، انت تستاهل تبقي اب وتعمل عيلة ، أنا مينفعش ابقي أنانية مع اكتر واحد عمره ما شال عني حاجة ، مكنش ينفع اكمل عادي بعد ما عرفت ، مينفعش مختارش ابعد عنك حتي لو مش بمزاجي
= وقدرتي؟ قدرتي تعملي فيا كده؟ تشوفيني بيحصل فيا كده وعارفه اني محتاجلك؟ ، أنا كنت عاوزك جمبي زي ما كنا علي طول ، أنا بصيت جمبي ملقتكيش يمريم!
_ كان غصب عني
= يعني شايفه الي بيربطنا ببعض العيال وبس!
_ يا احمد افهمني
= جايه تحكمي علي علاقتنا عشان ربنا مأمرش أننا نخلف لسه؟
_ أنا عوزاك تعمل عيلة و..
= يستي تولع العيلة ، المفروض كنتي تيجي تقوليلي ، حصل واحد اتنين تلاتة وناخد قراراتنا سوا زي ما بتقولي! ، اختارتي تخليني اعيش في بيتي ولا الغريب ، مش عارف اكلم مراتي ولو كلمتها ميت خناقه تقوم في الساعة ، انتي طلعتي انانيه معايا فعلا يمريم! انتي اختارتي تخبي عليا حاجة زي دي لمجرد اني اعمل عيلة؟ عيلة أي الي انا عاوزها؟ أنا مكنتش حاسس اني ناقصني حاجة وانا معاكي ، مكنتش عاوز اكتر من كده
_ بس انا عاوزة ، احنا الاتنين عارفين اني عاوزة ابقي ام
= وربنا لسه مأردش ، هتوقفي حياتنا ؟ هنموت ؟
_..
= أنا الي سيبهالك ، مش انتي عاوزة كده؟ عاوزة نبعد ؟ وانا هعملك الي انتي عوزاه
سابني وخرج ، مشي! ، حاولت اكلمه بعدها علي التليفون بس مكنش بيرد عليا ، دماغي كانت هتموتني ، طب أنا غلطانة ولا صح؟ كنت قاسيه ووحشه اوي للدرجاتي ولا كنت بعمل كده عشان اضحي ؟ ، كنت انانية ولا كنت محبة ؟ ... ، أسئلة كتير كنت بسألها لنفسي بس مكنتش عارفه الإجابة ، كان هو دايما الي بيجاوبني بس هو فين ؟ ضيعته؟ ، بسبب تفكير غلط؟ أو يمكن كنت مقتنعة أنه صح ؟ ، أنا كنت فعلا عوزاه يبعد بس بعد ما بعد طلع بعده اوحش من الخبر الي عرفته ، هزاره
وضحكه وحضنه وكلامه ، كل دا فين؟
_ احمد أنا اسفه ، عشان خاطري سامحني
بعتله مسدج واتس وشافها ف كتبت بسرعة
_ أنا مش عارفه انام
قفلت الفون وحطيت أيدي علي دماغي ، حاسه انها هتنفجر ، الباب خبطت وفتحت لقيته هو
_ احمد؟ انت بجد جيت؟
= مش عاوز اسيبك ل دماغك
_ أنا اسفه ، والله اسفه ، حقك عليا يحبيبي
حضني = كل حاجة هتبقي كويسه ، أنا جمبك
والحياة بينا رجعت زي الاول ، كنا بنحاول احنا الاتنين ننسي الفترة الي فاتت الي يعتبر أسوأ فترة من يوم ما عرفنا بعض
_ طب هات احاول أنا كده
= متعقدة يمريم بجد مش عارف اعمل اي
_ طب بص ، انت فهمتني إن المنتج دا في الشركة مش بيتباع وبيخسر في السوق ، لي متفكروش في السبب؟
= واي السبب؟
_ انت شوفت الاعلان الي انتوا عملينه؟ دا ضحك يحبيبي والله ، أنا فضلت تلت ايام اضحك
= ممل؟
_ ومفهوش أي حاجة تشد الناس ، الناس عاوزة اعلان تحب تتفرج عليه مش يقلبوا التليفزيون اول ما يتعرض ، غيروا الاعلان بدل ما افجر الشركة
ضحك = تفتكري لما نغيره هيتباع؟
_ إن شاء الله ، مدام ربنا عارف انت بتتعب قد أي في شغلك هيكرمك
= يارب يمريم يارب
كنت دايما متعودة اساعده ، عوزاه اعلي واشطر راجل في أي مكان ، وهو بصراحة بيطلع عينه عشان يعمل كده وعشان يخليني دايما فخورة بيه وفخورة بنجاحه
= مريم ، مريم
_ عامل دوشه لي؟
= تعالي اقولك
_ ولما الرز يتحرق أو يعجن تزعل
= اطفي عليه وتعالي
_ ها ، قول في اي؟
= الفكرة بتاعتك نجحت ، والمبيعات ذادت اوييي ، وكمان عشان أنا الي قايلهم هناك علي الفكرة المدير رقاني والمرتب ذاد
_ الف الف مبروك يحبيبي ، تستاهل كل خير والله
طلع علبه من جيبه = انتي السبب بعد ربنا في أنا فيه ، مش بس دلوقتي دا من اول ما اشتغلت ، امسكي
فتحت العلبه لقيت فيها خاتم دهب _ بس دا شكله غالي اوي يا احمد!
لبسهولي = مفيش حاجة تغلي عليكي ، انتي احسن ست في الدنيا
_ في الدنيا!
= في الدنيا والله
بعدها هو الي اقنعني نروح نتابع حالتي والي الموانع الي عندي مانعة الحمل عشان كان اكتر واحد عارف اني نفسي ابقي ام ، كان مشوار صعب اوييي ، علاج وتحاليل وحقن ، كان لما يلاقيني بتوجع يقولي طب نوقف؟ اقوله لاء ، عاوزة اكمل وابقي ام واعمل عيلة واجيبله ولد يشيل اسمه ، خصوصا بعد ما باباه اتوفي ودا عامله فجوة كبيرة ، فجوة بحاول اصغرها بقدر الإمكان ، كنت بروح للدكتور كل فترة بس مكنش فيه جديد ، لحد ما..
_ انت بتتكلم بجد يدكتور ؟ أنا حامل ؟
° الف مبروك يمدام ، تحليل الحمل طالع عندي بوزيتف ، انتي من الحالات الصعبة الي جت هنا بس الحمد لله مفيش حاجة كبيرة علي ربنا
كنت حاسه إن الأرض من شيلاني ، روحت بسرعة البيت واتصلت بيه ميتأخرش في الشغل
= حصل حاجة ؟ انتي كويسه
_ اهدي اهدي ، أنا كويسه
= أنا جاي علي ملا وشي ، الحمد لله انك بخير ، طب أي مش هنغدي ولا اي؟
_ احمد عاوزة اقولك حاجة
= حاجة اي؟
_ شكرا علي كل حاجة ، شكرا انك مسبتنيش ومشيت وكملت معايا وحاولت عشاني ، أنا عمري مهلاقي زيك ابدا
= ولما اتكسف دلوقتي ؟
ضحكت _ وعندي ليك مفاجأة ، بس ياريت تختار اسم حلو!
= مفاجأة أي واسم اي؟
_ اسم الي جاي بقي ، إن شاء الله يبقي ولد
= هو اي؟
_ دا انت جعان فعلا! ، انت لسه مفهمتش؟
= مريم انتي حامل؟
_ أيوة
= الحاجات دي مفيهاش هزار
_ والله حامل
ساعتها ملامح وشه اتغيرت ، عمري ما شوفته فرحان زي دلوقتي ، كان دايما بيساعدني في شغل البيت ويطبخ ساعات لما مكنش قادرة ، يستحمل تقلباتي واني ساعات مبكنش طيقاه بجد!
= هرمونات الحمل هابة عليا أنا بس؟
_ الجو ريحته محشي
= اه انتي اتهبلتي في الحمل يعني ولا اي؟
_ لا بتوحم
= عاوزة محشي؟
_ اه ولا يرضيك الواد يطلع شبه الكرنبة؟
قاعدة بطبق هدومه وهدوم نوح
' سرحانه في أي يماما؟
_ ولا حاجة يحبيبي أنا معاك اهو
حضني ' طب أي مش هتجيلي البونبوني الي قولتيلي عليه؟
_ طالع كلك ل ابوك ، أنا جبت احمد تاني ، مطمرش فيك التسع شهور
= طب ولي الغلط يحبيبتي؟ دا الواد اوسم واحد في الحضانة
_ نوح يحبيبي روح خد البنبوني من علي المكتب
جري قدامي ف بصتله وانا ببتسم
= مبسوطة؟
_ بقي عندنا عيلة يا احمد!
= ربنا كبير وعمره ما يكسر بخاطرنا ابدا ، بس كل حاجة بوقتها منستعجلش ونقول اشمعنا أنا معنديش كذه ، ربنا مقسمها بس الي يفهم بقي
_ قصدك أي بالكلام دا؟
= لا يحبيبتي ابدا
_ انت تعبت معايا اويي يا احمد ، حقك عليا يحبيبي
= وانتي تستاهلي يمريم ، دا انتي احسن ست في الدنيا
_ في الدنيا!
= في الدنيا والله
مريم سمير 🤍.
