رواية مشاعر مبعثره الفصل العاشر 10 بقلم دودي

رواية مشاعر مبعثره الفصل العاشر 10 بقلم دودي 

غا شافني وهو يبدل فيه اللون.. وناض عندي.. 

رضوان: محشمتيش.. 

اسماء: مالي.. 

رضوان: اجي معايا.. 

جرني قدامو.. ودخلني للحمام.. 

اسماء: طلق مني اش باغي دير.. 

رضوان: قطعي الحس ولا نعطيك ضربة تسكتك.. واش بنات الاصل هكا كيخرجو.. 

هز الموشوار.. وشدني كيف مبقا عندي منين ندوز.. وبدا يمسح الماكياج وهو معصب.. 

اسماء: طلق مني نمسح لراسي.. 

رضوان: ولاش دايراه من الاول.. 

اسماء:حيت بغيت.. 

مبغاش يتمسح ليه وهو يتعصب.. 

رضوان: مال هاد الزمر لاصق.. غاتمسحيه ولا والله لا عتبتي باب البازار... 

اسماء: هانا غانمسح.. حيد.. طلق يدي.. 

بدا مقابلني.. وانا كنمس بشوية.. وهو مطول صبرو معايا.. وكيتأكد اني كنمسح نيشان .. عندو الحق درت الشوهة فراسي.. بعض المرات معرفتش علاش كنتصرف بالتبرهيش.. حتى مسحتو عاد تهنى.. عطاني الطريق.. ودزت.. عاد خرج وبقا كيشوف فيا بنص عين.. وحاجب واحد اللي طالع ومغوبش.. بقيت كنراقب.. وكنشوف.. ومرك مرة كنشرح للكليان.. عجباتني الخدمة.. ولكن رضوان مامرتاحش ابدا... خصوصا مللي كيدخل شي راجل.. وكيجي يسولني انا.. تما فاش كنحسو كيتفعفع ديال المعقول.. ومكيتهنى حتى يشوفني طلعت عند ولدي.. دازو ايام.. وانا ولفت نمشي للبازار وحتى الخدامة تما ولفوني ودايرين ليا قيمة.. واحد النهار لقيت رضوان جار الشانطة ديالو والجاكيطة على اليد.. باس راس هند.. وداز عند مو.. اما مفهمت والو.. فين غادي هادا.. خليتو حتى خرج من تما.. وداز عندي.. 

رضوان: الى حتاجيتي شي حاجة.. قوليها ليا.. 

اسماء: فين غادي.. 

رضوان: مسافر.. نشوف شي سلعة.. 

اسماء: الله يجيب التيسير.. 

رضوان: اه.. متنزليش بزاف للبازار.. ديري غا شي طليلات وصاف.. متجلسيش بزاف تما.. 

اسماء: غانجلس.. رزقنا هاداك.. 

رضوان: يااا ربي على الضد كيداير،. تهلاو فراسكم.. انا مشيت.. 

اسماء: بالسلامة.. طريق السلامة.. 

سافر وانا الغد ليه نزلت للبازار نشد بلاصتو.. جلست فالبيرو.. وشديت البلاصة.. ولاااكن.. قنطت بزاااف.. خلى بلاصتو المزغوب.. طرالي بحال توم وجيري.. نهار سافر جيري وبقا توم كياكل الهوايش غا بوحدو.. توحش المدابزات معاه..حتى انا توحشت داك المزغوب.. البازار ولى ممل.. وحتى الدار.. جلست ساعة بالحساب.. وطلعت للدار.. بقيت مع ولدي.. الغد ليه نفس الشيء.. نزلت درت غا دورة.. وطلعت تاني.. يوماين دوزهم مسافر.. نهار جا.. كنا انا فاستقباله انا وولدي.. جا ديريكت هز ولدي كان موحشو بزااف.. مشاف فحتى واحد من غيرو.. 

رضوان: حبيب عمو.. توحشتك..، 

اسماء: حتى هو توحشك.. 

شافت فيا هند وهي تمشي عندو عنقاتو.. معرفتش علاش شداتني نغزة فديك اللحظة.. يمكن شدني الفراغ حيت انا ارملة.. ومعندي شكون نعنق.. جلس وبدا يجبد الالعاب اللي جاب لولدي وهو فرحان وكيضحك معاه.. رضوان كان غايكون اب رائع.. وجدنا ليه الماكلة.. وحطينا.. 

هند:اسماء.. شفت علاقتك ولات مزيانة مع رضوان..اسماء: لاا.. غير حسيت بغيابه وباللي مهما كان هو اللي حامينا.. 

هند: امم.. 

اسماء: ولكن عرفتي باينة فيه كايبغيك بزاف.. شفتو كيفاش كيعاملك.. باينة فيه من دوك النوع اللي كيعيش معاك الرومانسية فالخفاء.. 

هند: طبعا هو كيبغيني.. زواجنا قرب يكمل عشرة سنين.. هو معايا حنين بزاف.. 

اسماء: الله يخليكم لبعضياتكم  

حطينا الماكلة وكلينا.. نضت نجمع من الطابلة للكوزينة.. ورضوان ناض يغسل يدو.. 

رضوان: بديتي كتسمعي الهضرة مزيان.. عرفت انك مطولتيش فالبازار.. وكما قلتلك طليتي عليهم وصاف.. 

اسماء: ماشي سميع دالهضرة غا مكان تما مايدار وصاف.. 

رضوان: مزيان.. نتمنى ديما ميكون تما مايدار.. 

اسماء: عارفة ان وجودي فالبازار بالنسبة ليك بحال الشوكة فالحلق.. ولكن.. انا غانبقى نمشي.. ومغايمنعني حتى واحد.. 

رضوان: كيحسابليك راكي شادة معايا الضد.. راكي دايرة الشوهة غا فراسك.. ولدك محتاجك.. ويلا مقديتيش بيه.. هند تقدر تكون ام مثالية.. 

حسيتو استفزني.. وجاوني الدموع حيت اصلا عندو الحق.. هملتو بزاف.. وبقيت تابعة التبرهيش.. خرجت ولاحظت ان هند كانت كتستمع.. جات عندي.. 

هند: متديش عليه.. هو اكيد مقصدش.. نتي ام مثالية بزاف.. 

اسماء: شكرا.. مكرهتش يعطيني بالتيساع..

هند: نتي عيشي حياتك.، وخدمي.. متعرفي يقدر يشوفك شي حد فالبازار وتعجبيه.. علاش غاتدفني شبابك.. 

اسماء: عندك الحق.. 

مشات وانا بقيت كنفكر.. نعجب شي واحد فالبازار!! ولكن انا بغيت نعجبو هو.. مبغيتش شي واحد اخور.. اش هادشي كنقولو.. شكون هو باش نهتم بيه.. وهو كل مرة كيقمعني... 

مشيت لبيتي ونعست.. معقلتش على راسي.. حتى فيقني ولدي الحبيب.. رضعتو.. ومبغاش يجيني النعاس..نضت وخرجت من البيت.. وطلعت للسطح نشم الهوا .. بديت كنشوف الدنيا .. والريح كيطيح شعري.. حتى قفزني صوتو مورايا.. 

اسماء: ايي بسم الله الرحمان الرحيم.. منين خرجتي.. 

رضوان: اش كديري فهاد الوقت هنا..

اسماء: عندي رونديفو.. او جاية نشم الهوا.. تخنقت.. ولى حتى هادي ممنوعة.. 

رضوان: ومخايفاش يقتلك لينا هنا فهاد الليل شي واحد.. 

اسماء: دارنا هادي شكون غايقتلني هنا..

رضوان: انا مثلا.. 

اسماء: تديرها وتفوت لهيه.. ونتا اش كدير فهاد الليل هنا؟؟ 

رضوان: جاي نشم الهوا.. حتى جاتني واحد الخنقة مكنتش داير ليها الحساب كاع.. 

اسماء: تصبح على خير.. ودخل من تما راه كاين البرد.. 

رضوان: هناك الله انا عندي مناعة قوية.. سيري غا نتي.. 

اسماء: ميكروب كيداير

           الفصل الحادي عشر من هنا 

لمتابعة باقي الرواية زوروا قناتنا على التليجرام من هنا