رواية ملكة الشيخ ضاري الفصل الأول 1 الجزء الثاني بقلم ساره المجيد
..بعد ما ختمنه وياكم الجزء الاول من قصة ابطالنه رجعنه وياكم حتى نكمللكم الجزء الثاني من القصة بعد ما ارتاحت سنارياواستعادت صحتها والحمدلله...
بس اتمنى من البعض عدم التجاوز بحق ابطالي لان حتى اهلهم يتابعون القصة مو بس سناريا وزينة احترام لكبار السن خلي تعليقاتكم لائقه وابدوا رأيكم باحترام وتعليق لائق لان القصة رادت تنحذف بأمر من اهل سناريا واني اتلاحكتلها ونشرت بالبيج والكروب ومن شافوا التعليقات مال الاعضاء يردون التكملة وشافوا الهاشتاك الي سووا لقضية ثائر يطلبون الافراج عنو بالاخير قبلوا يكملون القصة ...ان شاءالله ماتتكرر السب والشتم والدعاوي بعد حتى نبقه نعيش احداث القصة بحذافيرها
طبعا الاحداث الي فاتت صارت من قبل 4 سنوات يعني بنهاية 2014 وقضية ثائر لحد هذا اليوم بيد القانون دتاخذ مجراها .. ومثل متعرفون القضايا القانونيه تتأخر جثيير بالمحاكم وثائر مسجون لحد يومنه هذا ع ذمة القضية ...للاسف مراهق اتورط بجريمة مارتكبها لكن كان ضحية غلطة ومؤامرة دنيئه من صديق السوء
وشفت جثيير يسئلوني بيا سنة صارت لان سناريا جانت بصف ثالث متوسط وهسه هيه حاليا بصف سادس علمي تطبيقي والي سئلوا منو ديتابع القصة من الابطال اكولهم اسمهان ام سناريا وزينة وسناريا وخالاتهم ...
سناريا دزتلي تكملة القصة وسردتها الكم وهذا البارت الاول من الجزء الثاني
وللتذكير اعدت مشهد من البارت الاخير من الجزء الاول ..
❤
سناريا ..لزمت كلبي وجسمي كام يرجف ياربي دخيلك استر علينه من هل مصيبة ..
كلها كامت تدك وتلطم ومافهمنه شي لبسن عبيهن واني ركضت لبست عباتي ورحت ورا امي وخالاتي ركض ورا البستان وطبيت لجوه شفت الدنيا مكلوبة ...
وناس ماتعرف منين جايه جان اول يوم بحياتي اشوف بيها الفصول وناس هيج ..
دخلت لبيت خالة جنان جان اشوفها تدك وتلطم ..
بلا وعي كتلها خاله ثائر وين
جان الكل يصرخ بوجهي اني سكتت وكعدت بزاويه وماعرف عدوي من صاحبي شويه ودخلت زينه وجها مخطوف وتركض الامها تريد تعرف شنو السالفه
البيت كله وكف ع تك رجل وانخبص ودخل انذار
بارت1_الجزء2
زينه ...من دخلت للبيت شفت الكل يدك ويلطم وماعرف ليش كلبي نخطف هيج بسرعه رحت يم امي اريد افهم شي منها ماتكلي ظليت الح بس ماكو فايدة امي فاقده ومو بحال تحجي شي ..
ركضت ع مرت خالو سلام سهى كتلها شكو شصاير جان تكلي اخوج ثائر متورط بجريمة قتل وهسه اهله يريدون فصل اني هنا شهكت شهكة حسيت روحي طلعت من جسمي حطيت ايدي ع حلكي وفتحت عيني ع وسعهن من اثر الصدمة ظليت ادك والطم ماعرف شسوي كمت ورحت للغرفه ..
كمت افتر بخوف وأسمع صوت اصياحهم بسرعه قفلت الباب وكعدت اندب بحظي وحظ اهلي ماعرف شلون خطر ابالي صكر هو ضابط وراح يعرف يسوي شي ..
بسرعه ركضت ع موبايلي اديه ترجف وكلشي بيه يرجف ماعرف ياربي صبرني ماعرف شسوي ياالهي وخرت الحظر ورحت ع رقمه شفته متصل بالنت اووووف صكر ...
احاول ادك بس اديه ترجف رجف مو طبيعي اخاف ادك ويفشلني اخاف كلشي اتوقع منه ..
سمعت صوت جدي وعمامي خوالي بالصاله شمرت الموبايل وطلعت ركض شفتهم معصبين والدنيا محتركة ومسوده بعينهم ...
جنان وهيه تمسح بدموعها الي تنزل مثل الجمر ع خدها ..خويه كلي شنو رايدين منكم فدوة فهمني
عمي عدنان ..الناس يريدون دم بدم ..
الكل بصريخ واحد ...ششششششنو يبوووووو يبوووووو ..
سناريا ..لطمت ع وجهي وصرخت لا مستحيل وكمت ابجي وكلها كاعده وتبجي خلص ثائر رحت من بين ادينه رحت يابن گلبي ولك لااااااااااا شسويت بروحك ثائر شسويت 😭..
كله بسببك كتلك ميت مره عوفه مايفيدك هذا صاحبك هذا انسان نذل وخسيس وصاحب سوء 😭..خليت راسي بين رجليه وبجيت بقهر ..
بالحظتها الدنيا صغرت بعيني صارت هل كدها شنو مصير ثائر شلون راح تصفه هل سالفه اوووف ولكم نار كايده بصدري راح تحركني حرك وين انطي وجهي ولك ثائر بعد روحي ليش هيج سويت بنفسك ليششششش اااااااه ياربي رحمتك الطف بينه من هل كارثة 😭😭😭...
زينه ..مستحيييل شنو دم بالدم
مرت ايام اسود من سواد الليل طحنا كلنا بخبر كان والعشيرة كلها انثبرت ..
سناريا ..ثاني يوم اجه ابوي اخذنا الوضع زاد من سيء الى اسوء ..
صار كلشي يخوف كل ماكعد اذكر ثائر وكلشي بينه علاقتنه ضحكاتنه من احنه اصغار لحد هذا اليوم بيوم جنت كاعده وكاطعه الاكل ..
دخلت امي وشايله بيدها صينة الاكل وهي تكلي كومي يمه كومي اكليلج لكمة محد يفيدج يايمه
سناريا ..ماريد سم عوفوني بحالي
امي ..احجي عدل لا تخليني اكول لبوج يعلمج الحجي
سناريا ..ضربت وجهي بقهر وكتلها كتلج ماريد ليش ماتسمعيني اتريدوني احرك روحي حتى تخلصون مني ليش متحسون بيه ولكم بركان وديتفجر بداخلي ارحموني حرام عليكم 😭
امي ..كومي اكلي لا تخليني اضربج .. استغفر الله ياربي بنتي ولج ابن عمج صار فتره يخطبج مني دوافقي الولد شاريج ومايعيبه شي ليش ترفضي
سناريا ..ماوافق ماريده هل حقير وتحلمون اتزوج ادم وهل حجي خلي يفيدج وكومييييي اطلعيييي بره
اعصابي تلفت واتهسترت كمت دفرت الصينيه وصعدت لسطح وكعدت ابجي بقهر واصرخ ياربي تعبت افراكه دمرني ...
والي ديزيد همي ادم لشوكت ابقى هيج ياربي ساعدني انت ارحم الراحمين ارحمني لشوكت اظل ياربي كعدت واتذكرت كلام ادم ..
من يكول انتي الي وماتصيرين لغيري وابن خالتج انجوم السماء اقرب الج منه ..
كعدت بحزني ماشاركت بي احد ظليت ابجي مرت ايام مثل سواد اليل مابيها نجوم ولا كمر خلصت الامتحانات ..
وصرت جلد ع عظم حيييل ذبلت امي تحاول وياي بس ماكو فايده افراك ثائر أذاني حيييل وهو مختفي ماكو اله أثر ..
يعني لحد هذا اليوم محد لاكي بس لاكين كرار والقوا القبض علي ومعترف ع ثائر بكلشي ....
صار اربعين يوم ماكو اله اثر بيوم كاعدين ع عشاء اتصل خالو محمد بابويه وكاله كعدت الفصل صارت اول ايام شهر الثاني ..
ومدري شنو بس مكال ثائر لازمي عمتي ام حسام جايه بيت جدي ابويه راح وكال لامي ان شاء الله ماعلي شي بس امي كضتها صفنات وحزن ..
اني صعدت للغرفه فتحت الكنتور مالتي وكعدت بي وكمت ابجي هاي العاده من كنت اصغيره من احد يأذيني اشرد للكنتور البد بي مره نمت بالكنتور يوم كامل ويدورون عليه ومن كعدت ونزلت لكيتهم رايحين للبستان يدورون
المهم كعدت وحصلت خوش رزاله من اتذكر ايام طفولتي اضحك عليها حيل جنت وكحه حيل واكثر شخص اخاف منه جدو ضاري ..
مره اتذكر كعدت الفجر الكل نايم جان عدهم عش او كن دجاج وجان اكو ديج خبصنه خبص بصوته ..
وكعدت من ورا رحت يمه وكتله انت ماتستحي ولك تكعد العالم خلينا نام ولك خلينا ناأأأأأأم ..
جان أسمع صوت جدي ضاري يصرخ عليه يكلي ولج ويامن تحجين اني طفرت وكتله وي الديج جدي جان يكول خبال اي قصص وروايات عراقية كرار صلاح والله خبال تعاي انطمري نامي يله ..
رحت ركضت اريد انام بس كل مارفع رأسي الكه جدي كاعد اخاف منه الصراحه جدي ضاري كان رعب بنسبه الي جان قاسي اصلا ماعرف شلون بيبي تحملت عصبيته هاي وخزرته ..
يلا يجي يوم واعرف ضحكت ع ايام طفولتي انفتح باب الكنتور أميره وهي تدور تشيرت مالتها جان تفز وتصرخ ..
أميره ..يييييمه جنييي
سناريا ..جني بعينج هاي اني
كمت وطلعت اعدل بملابسي وكتلها شبيج
اميره ..اني لو انتي ولج يمعوده بطلي هاي سوالفج لخاطر من خلقج خرب بيومج
سناريا ..وخرت منها وفتحت شباج الغرفه شفت ادم وولد عمي لاميهم وكاعدين يصيدون طيور حمام
ماعرف ليش هاي الايام كمت اخاف من ادم بشكل جبير بس صار اكو نوع من كره وقرف لادم ...
ثاني يوم كعدت خالو مخابر ابويه وكاله اليوم الكعده تعال وهيج
كمت ولبست جبه وشال زيتوني وشلت عباتي نزلت شايله جنطتي شفت اميره لابسه وكاعده بين النعسانه وبين الكاعده ضحكت عليها كعدت ع القنفه وحسيت باحد كاعد بصفي اصخام درت وجهي ماكو احد ياربي شبيه اوف ..
شويه ودخل ادم لابس دشداشه سوده وعكال ابيض كال صباح الخير مارديت حسيت بخنكه من شفته ..
صدك حسيت بخنكه عبالك احد اجه وخنكني من ركبتي حسيت بعرك ينزل من جبيني كعد بصفي وهو عينه بالموبايل واني الخنكه ذبحتني ..
كمت احس بشي يمشي ع جسمي بسرعه كمزت صرخت وع صرختي صرخ ادم وأميره فزت عفتهم ورحت يم امي ....
حاولت اخفي خوفي بس كان واضح رفعت راسي للامرايه وجان اشوف كبالي ((الله شاهد ع كلامي كل هذا حقيقي وماكو شي جذب او تلفيق لان السحر الي عليه هلوسة واشوف اشياء مو موجودة ))..شفت مره عجوز لابسه ابيض وكاعده بصفي وشعرها اسود مثل سواد الليل وعيونها بيض وتبجي دم فزيت وصرخت يممممممممممممه
امي ..خير خير يمه شبيج
سناريا ..درت وجهي اباوع ماهيه راحت اختفت
ظليت اردد المعوذات بس كل شويه انسى وارجع اعيد الايه من الخوف كل ماكول قُل اعوذ برب الفلق انسى الايه الي بعدها وارجع اردد ..
صارت عندي خوفه غريبه ياربي شنو البيه ياربي اني مو مخبله ولا ماعندي عقل بس هذا شنو ياربي اكيد داتخيل ..
وضعي مو تمام حالتي اتدهورت ياربيي ظليت ارجف مثل السعفه وامي خطيه تهدي بيه اسمعت صوت هورن سيارة ابوي بسرعه حظرنه نفسنه لبست العباية اكبال الامرايه رجعت شفتها واكفه وراي 😨
درت وجهي وظليت صافنه ماهيه راحت كلبي صار بحضني ياربي شنو هذا الي داشوفه وشنو هذا الاحساس راح اموت ظليت جامدة بمكاني مرعوبة بشكل اذا احجي هسه يكولون فقدت عقلها واتخبلت حقهم اكيد محد يصدكني لان شي مو معقول الي داشوفه ..
طلعت وشفت ادم سمعت صوت مثل همس خفيف مافهمت شنو صعدنا كلنا بالسياره طلعنا كلنا اربع سيارت ...
طريق كله صافنه وماعرف شسوي ياربي عيني ..
شكاعد شيصير وياي ليش هذا احساسي ياربي ليش ماكدر اباوع ع ادم اوف ياربي وصلنا وشفت بيت جدي ضاري مليان ناس وسيارات تارسه الكراج
زينه ...من كالو دم بدم هاهيه انتهت عندي راح اخوي كعدت وسكتت دمعه بعيني جفت بشكل غريب ..
ظليت كاعده وأسمع صريخهم ماتحملت ورحت لغرفتي كاعده موبايل اكبالي طلعت رقمه وكتبتله رسالة كتله ...
((اعرف انته هسه رجال متزوج مو من حقي ابدا احجي وياك
بس هسه صكر اني محتاجتك وكعت بمصيبه واهلي هم ..
اخويه راح يروح من بين ادينه انت رجل قانون وماتقبل بالظلم لخاطر الحب الي بكلبك الي ساعدني محتاجتك اكثر من اي وقت فات )) ..
دزيت ارسال وظليت انتظر رده بس مارد كطعت الامل منه اكيد مستحيل يساعد وحده رفضته اوف ياربي ساعدنا ياربي ...
كل يوم بالليل نسمع طلقات وناس كل يوم جاي هادين علينا وداكين بيتنه ماعرفنا ياربي شرايدين منه مرت اربعين يوم ومارحت للكليه ابويه ماقبل اطلع بعد لان خايف يسون شي الي ..
كعدت بالبيت خلال هاي الاربعين يوم انتظر منه رد بس مارد ولا كلف نفسه قطعت الامل برجعت صكر ..
لحد يوم الكعده العشاير كلها اجت كعدت الصبح لبست دشداشه عاديه ورفعت شعري ذيل احصان ورحت اساعد امي الي حيل ماظل عدها وكاعده ع سجادتها وتتوسل برب العالمين يرجع ثائر سالم غانم ..
ياربي شلون مصيبه ياربي دخيلك نجينه منها يارب ارحمني يارب ...
انتهت كلشي سوينا الجاي والضيافه وكمنا نقدمها للعالم
اجوي ناس هواي ظلت الكعده تقريبا اكثر من ثلاث ساعات خاله اسمهان اجت هي وسناريا كعدو يواسون باهلي ...
نعزلت ع الدنيا كلها وكعدت انتظر شراح يصير شنو منتظرنا .....
.....في الديوان .....
حظروا العشيرتين عشيرة ثائر وعشيرة اهل المقتول وحظروا عشيرة ثالثه حكام صنف محايد بينهم بعد ما فتحوا موضوع الجريمة وصار الحجي كالوا اهل الولد ...
اهل الولد ..احنه رايدين دم بدم ماعدنه غير هذا الشي .. ابنه انقتل بمزرعتكم ولازم ناخذ ثار ابنه بالدم
جدي ضاري عكد حاجبه وخزره لابو الولد بعصبية وكله ..شنييي دم بدم بويه كدامك القانون واخذوا حقكم ....
يابه احنه مانكول ابنه موش غلطان بس دم بدم راح تكثر الوادم الخسرانه وتصير مجزرة .. وابنه ماقتل ابنكم والقانون راح يثبت هذا الشي
الصنف المحايد ..ياجماعة الخير صلوا النبي مايصير هيج ...يا ابو علي استهدي بالرحمن وخلينه نحجي لاتصير الدم للرجاب
ابو علي ..جا 170 مليون وفصليه ...
الكل ..ششنو 😨😨😨😨😨😨
شيخ ضاري ...اسمع داكولك انت زودتها بناتتتتتت الشيوخ ماينعطن لا فصليات ولا ينهدون فهمت ..انت كاعد تلعب بعداد عمرك يابو علي لا تخليني اكلبها كلها ضدك انه عاذرك لانك رجال صاحب حق عندي ولو غير هيج جان عرفت شلون اتصرف وياك
ابو الولد ...ياشيييييخ هذا حق دم ابنيييي ..ابنيي ولد عمره 17 سنه مات موته شنيعه لكوا مشرح وين الحق ياشيخ العالم ماترتاح عني اذا ماخذيت حق ابني
شيخ ضاري ..جا تاخذه بفصليه ياحق هذا التحجي عنه احنه ابنه ماقتل ... صح غلط بس مارتكب هل جريمة
...........
نروح لشيخ صكر ونشوف موقفه بهل حدث مال الكعدة لان صكر هوه الي جان حكم وصنف محايد بين العشيرتين
شيخ صكر ...من رفضتني زينه حسيت كرامتي ورجولتي كلها انهانت وحلفت ميت أمام مارد الها ولا احجي وياها ولا لساني يطخ السانها كافي الي سوته وياي كافي ..
ذلتني بحبها شهور وهي تلعب بمشاعري خلتني اتعلق بضحكه منها وهي شنو قدمتة الي غير الصد والرفض ..
ماكان عدها سبب مقنع خليني اعرف شسوي ماعدها سبب مقنع خليني اعوفها لكن صدها وذلها الي خلاني اعوفها وأمشي ..
بس كلبي ماعافها ظل يحبها ويحب كلشي بيها امي لحت هواي علي بهاي الفتره اخطب بت عمي واصرت هواي هوايييي لدرجه بزعت روحي وكتلها خوش راح اخطب ..
وصارت الخطبه وخطبتها بشهر واحد كرهت ابو ابوي من وراها طلعت وحدة ماديه وماعدها سالفه وكل شي يمها تشتري وموبايل ونت واني لعبت روحي من هيج حاله ..
عفتها وكمت اتجنبها كد ماكدر لكن اخواني طلبت منهم ماينشرون الصور ع الفيس بس اخوي منتظر ناشر كميه كبيره من الصور ..
فتحت الفيس اول مارجعت وشفت التعليقات كلها اتباركلي وكلها تهني بيه بس بالي مو يمهم بالي يم الي سلبت كلبي وعقلي ..
بس هيهات ماتنازل لو تنصاغ ذهب مو الشيخ صكر الي يتنازل عن حقه ..
بس راح اظل وراها وراها بيوم الثاني فتحت الفيس ع رد منها تباركلي ماهتميت ابدآ ردت ارد بس طلعت محظور من ردها عرفت هي ماتحبني ولا راح يجي يوم تحبني ..
ورا فتره شهور مرت ايام عاديه صار يوم الي شفت بي رساله منها تطلب مني المساعده عرفت اخوها ثائر المسوي الجريمه وراح تكولون شلون عرفت خلونه نرجع بالاحداث ليوم الي صارت بي الجريمه ..
بيومها جنت كاعد بالمركز الضابط عدنان الي وياي يصير عمها ...
فا كاعدين جان يجي ابلاغ ع جريمة قتل صاير بمزرعه راجع لشيخ فضل اخو جدها ضاري ..
بسرعه كمت اخذت اسلاحي والضابط عدنان اتفاجأ بس مو اكثر مني لكن لازم اعرف شنو هاي الجريمه كمت رحت ومن وصلت كان بس مجرد جثة طفل مراهق وكميه كبيره من الدم مطشره بالكاع ..
اخذنا البصمات وطلعت لشخصين واحد أسمه ثائر والثاني كرار ..
عدنان اهنا زادت صدماته وشفت معالم وجها ماتتفسر لكن شنو بيدي بس القاء القبض ع المتهمين المهم القيت القبض ع كرار وانشمر بالسجن وبديت التحقيق ويا وظل بس ثائر مختفي مدة اربعين يوم واني احقق بالجريمه
كل يوم افتح الموبايل واتمنى منها رسالة لكن عقلي وكبريائي يمنعي ارد ع مسج مالتها وضربته بعرض الحايط ...
بيوم الكعده مالتهم رحت بمكان ابويه الله يرحمه لبست عكالي ودشداشه نيلي وعبايه سوده بيها خط ذهبي وعكالي ابيض بأطار ذهبي خليت عطر وطلعت رحت اني وعمامي ..
دخلنه للديوان وكعدنه وبدوا يحجون
وبنص الكعده طلبو فصليه وفلوس اني هنا ماظل عندي عقل شنو فصليه شنو فلوس ..
انه كل فكري همه ماعدهم غير زينه وزينه ملكيييي ملكييي الي وبس ماسمح لاي احد يلمسها لو تروح فصلية ع جثتي هل شي والشيخ ضاري نقذني بس ابو اهنا تجاوز وداس بمصاريني ..
مصر ياخذ فصليه كمت وكفت وكتله ..من رخصت عمامي واهلي اني الشيخ صكر اطلب ايد المحروسه بت ابو ثائر ونستر وماتروح فصليه وهيج مالكم حجه
شيخ ضاري ..ونعم منك ومن اصلك بويه اكعد والك هيه وهيج يابو علي مالك عدنا مره
الشيخ صكر ..مشكور عمي خلصت الكعد وصار الفصل 170 مليون وبس ..
سناريا ..وتنازلوا عن ثائر ورا اسبوع تم تسليم ثائر للقانون ....واهنا بلشت اكبر مصايبنه ....
يمكن كلكم ناسين زايد المسؤول السابق الي صارت مشكلة بينه وبين جدي ضاري ببداية القصة وهسه اجه دورة بالقصة وراح ارويلكم شلون دمر عشيرتنه وحطم حياتنه النذل ...
زايد هسه متقاعد كاعد بالفله مالته واجه الخبر ع طبق من ذهب هذا ابتسم بمكر وخبث وكال ..والله واجه يوم اذلك بيها ياشيخ ضاري قصص وروايات عراقية كرار صلاح
..
صكر ..كاعدين اني والضباط اناقش القضيه كلها دخل علينا رجال طويل ومبين علي من اهل الفراش القطني يعني غني كعد طبعا انه ماكمت لان ماحترم هيج اشخاص خله رجل ع رجل وبلش يحجي ..
زايد ..انه المسؤول السابق ...... زايد ال ....
صكر انتجه ع الكرسي مالته وباوع علي وكله ..ونعم اتفضل أمر خدمه ..
زايد ..سلمني ملف قضيه ثائر ..اريده الي
صكر عكدت حاجبي بغضب كتله ..الملف مو بين ايدي لان انرفع للقاضي وي كامل الدلائل ..
زايد بنبرة صوت حادة ..كتلك انطيني الملف
صكر حط ايده ع الميز بقوة وحجه بنبرة تحدي ..بأمر منو لو سمحت انت شخص متقاعد مالك اي سلطه وياي
زايد بغضب ونبرة استهزاء ...انه مالي سلطه ههههههههههههاي انت ماسامع عني يمكن انه ..... صحت ع حضرة الرائد ممكن تتفضل يمنه
صكر دار وجها ع الباب باستغراب منو الي راح يدخل .... دخل الرائد معتز وطلب منه الملف وكان هذا شي بحكم من القاضي مايكدر يرفض ... للاسف زايد كدر يلعبها صح وراح يوكع ثائر بخبر كان ويدمر كل العشيرة بهل مصيبة ...وهل شي ضربة قاضية لشيخ ضاري وتنفيذ الانتقام الي جان شايله من سنين كدر ينفذه هسه برودة اعصاب
صكر ... مكدرت امتنع عن تسليم الملف لان جان جايب حكم من القاضي شخصيا ًوانطيته الملف وتم تسليم القضيه للي ميخافون الله وكلها طلعت من ايدي وصارت بعيده عني اخ ياربي استر بس ........
في مكان اخر....
سناريا ...طبعا هذا الموقف سمعته من خالاتي ..في السجن
جنان ..رحت لثائر اشوفه كبل لا يحولون سجنه من كربلاء لناصريه ..
ثائر بقهر وتوسل وتأنيب ضمير ..يييمه يمه والله ماكتلته صدكيني يمه مواني وغلاتج اني بريء ومالي يد بهل قضية خلي يسئلون كرار هوه راح يكولهم منو القتله والله العظيم ماشتركت بهل جريمة وماقبلت كرار يقتله 😭
جنان منهارة من البجي ومحروك قلبها ع ضناها ..اييي يمه والله مصدكتك والله مصدكتك يابعد كلبي ادري انت متسويها يايمه😭
ثائر ..يمه ابوس ايدج سامحيني يمه اني ماسمعت نصايحج يمه سامحيني يايمه اني غلطان خليت دموعج تنزل انه زعلتج يمه سامحيني يايمه سامحيني والله مجان قصدي والله متندم وغلطت غلطة عمري هاي ادعيلي يايمه دعائج مستجاب ربي يفرج سجني يمه داموت اني داموووووت 😭.. والله لو يرجع بيه الوكت ما اغلط هل غلطة اخخخخ شسويت اني شسويت
نزلت ابوس بيدها ودموعي نزلت وخانتني مكدرت اتحمل الظلم الي وكع عليه
جنان ..يابعد روحي يايمه كافي شلعت كلبي عليك كافي 😭😭..
مثل ماشفنه ثائر متندم وبلش تأنيب الضمير ينهش بحالته والسجن اخذ ما اخذ من صحته ويتمنى لو يرجع بي الزمن مايطاوع الشيطان ولا كرار الي بسببه وكع بالهاوية وهو بعمر المرهقه وماشاف من حياته شي
في مكان اخر....
سناريا ..انتهت سنه كامله مجرد ايام تمر مابيها شي بُعد ثائر عني كان مثل بُعد الام عن ابنها ماكان صاير شي ..
بيوم صادف عيد ميلادي كعدت شفت روحي صايره مثل قلم رصاص بس ينضغط ع خصري انكسر واصير نصين صرت صف ثالث متوسط ..
لبست نفنوف اسود وشعري فتحته ..وخليت كحل ونزلت ع صوت الهلاهل عماتي الي ماعرف ع شنو هاي الهلاهل هو مجرد عيد ميلادي ..
اوف ياربي شهل يوم الاسود اجه بابا وعمامي والكل كاعدين كان يوم أسود بالنسبه لي شفت اموله (امال) لابسه نفنوف طويل مالت محجبات
خلو الكيكه اكبالي ..وكلها تكول كول عام وانتي بخير ويغنون ويصفكون ويهوسون صارت نظرات الكل الي يلا طفي الشمع غمضت عيني واتمنيت شغله وحده (ارجع اعيش مره ثانيه ).....
طفيت الشمعه ونفخت بيها ..وكلها تضحك وتصفك اخذت قطعه اريد اكل بس نفسي مامشتهيه اي اكله ..
باوعت ع عمامي وجدو كلها تضحك ابتسمت ع ابتسامتهم شفت امي واكفه وتبجي مثل كل مره مافهمت ليش تبجي كمت اريد احجي وياها ..
رحت لزمت ايدها وبجيت بحضنها ..رفعت رأسي وكتلها ...يمه لا تبجين الله يخليج
امي ..لا يمه خلص سكتت
سناريا ..لا تقنعيني انتي ماتبجين
امي ..يا شبيج مسحت دموعي وهاي راحت ..
سناريا ..خلصت الحفله وصعدت نزعت ..اريد انزع النفنوف اجت اميره كالتلي ادم اجه وجايب ويا هدية عيد ميلادي ابتسمت ادم خلال هاي السنه يحاول يهتم بيه يحاول يعوضني عن الي خسرته لكن مستحيل الي خسرته مايتعوض لو بكنوز الدنيا ..
لبست دشداشه عاديه لونه جويتي وشال ونزلت شفت علي ومحمد ولد عمي صغار يلعبون بالنفاخات هههه يطكون وحده وينفخون الثانيه ..
درت وجهي وشفته كاعد لابس بنطرون اسود وقميص زيتوني ابتسمت مجامله رحت يمه وكف وكال
ادم ..كل عام وانتي بخير اعذريني ماجيت من وكت
سناريا ..عادي ماصار شي
ادم ..اممم شبيج ضايجه شوفي شنو جبتلج
سناريا ..شنو ترا عادي اذا ماجبت شي
ادم ..اتفضلي افتحي بدون نقاش
سناريا ..اوكي بس لا تتأمر تعرفني اكره الي يتأمر
ادم ..ههههه
سناريا ..اخذت الهديه فتحتها شفته موبايل هواوي ابتسمت وكتله ..شكرا ماقصرت عفته ومشيت جان اسمع جدي يكول ..
الشيخ سالم ..بعد جم يوم نسوي حفل العقد مالت ادم وسناريا
سناريا ..مثل الي اجتني ضربه قاضية ع راسي انسطرت سطر درت وجهي وباوعت لادم ورجعت باوعت لابوي بترجي ماريد هذا العرس ...
والله ماريد هل عرس ليش تحكمون عليه بالموت اني كلبي بغير مكان متعلك وانتوا راح تعدموني بهل زواج باوعت ع ابويه لكن ابويه مايكدر يرفض طلب جدي ..والكل كيفوا وفرحوا شفت امال ماهيه اختفت وينهه المخلوقة ..
وللحكاية بقية ....🌿
🍁هّـــــأدٍئـــونِ جّــــدٍأ ...
ورأضًــــونِ بٍمًـــأ کْتٌـبٍـــهّــ ألَلَهّــ لَنِـــأ ...
حًتٌــــيِ و لَـــو کْــــأنِ وجّـعٌــــأ يِقُتٌـلَنِــــأ ...
فُــــ ألَحًمًـــدٍ لَلَهّ 😔 🍁
بدل ماتدور وتبحث علي الروايات خليها علي تليفونك وحمل تطبيقنا
