رواية طفوف الفصل الثالث 3 بقلم وسام الفراجي

رواية طفوف الفصل الثالث 3 بقلم وسام الفراجي
 

اني والله رغم كل هالضغوط وسوالفه الي مالها داعي بس ماهمني هسة غير شصار ع صور وشسوة حيدر او المدير لان الاشعارات مالت واتساب ملغية .. 

بهاي الدقيقة

 جان يدك عليه تلفون مو مسجل ونهايته 33 💔

التلفون صامت ..

بزاوية الجرباية من الزاوية الثانية .. 

يزن بالزاوية المقابيلها .. 

لازم تلفونه و تلفوني اتصال شغاله الشاشة واتصال رقم وهو مو منتبه اريد بس يخلص اتصاله حتى يروح الاتصال لا ينتبه .. 

منتبه ع عيونه لا تنرفع ع موبايلي .. 

انكطع الاتصال ارتاحيت انتظر تطفي شاشة الموبايل 

طفت يلا اخذت نفس صحيح ..

جان يدك مرة ثانية يبو يحظي متكلي شلزكت يا استاذ حيدر وهو ما مرة دك عليه بس اظن لان الشغلة تخص الصور الي دزيتهن بالغلط للكروب 

ياااارررربي شهالمشاكل هاي وين اصد ووين اغطي وعندي زوج هو وحده عبارة عن مشكلة .. 

ردت اتحرك شوي ع تلفون وارفضه صرت اتحرك ع اساس ماكو شي جان يباوعلي ومن باوعلي انتبه للتلفون الاتصال جان ع سريع مد ايده واخذ التلفون هذا منو ؟ 

ـ شنو ؟ سويت نفسي ما ادري شكو

ـ هذا رقم منو شبيج ثول ؟ 

ـ والله ما ادري رقم غريب غير

ديفتح الاتصال وانكطع .. 

جان يرد يتصل عليه جاوب عليه بس ما اسمع استاذ حيدر شيكول .. 

يزن يحاجي 

منو انتَ ؟ اني لو انتَ ؟ بابا شبيك منو انتَ اني زوج ست طفوف انتَ منو ؟ 

استاذ وياها يعني انتَ ؟ .. اي شتريد متصل عليها 

هو يرد عليه بس ما اسمع شيكول بس من خلال سوالف و ردة فعل يزن اعرفه شديسولف 

كال يزن .. لتتصل بعد معلمات هم عدهم ازواج وعوائل ميصير استحي .. 

سد التلفون بوجهه .. 

باوعلي كلي

ـ حبيبج حيدر اتصل عليج 

ـ حبيبي شنو ؟ معلم هذا بالمدرسة

ـ معلم ويتصل هيج لا احم ولا دستور 

ـ هاي اول مرة يتصل غير تعرف شيريد

ـ لو قايمة القيامة ميتصل عليج ليش يتصل يقبل احد يتصل ع مرته ؟ 

ـ تمام صح كلامك .

ـ لا مالت صح وتنسد السالفة لا عيوني هاي اول معلم الله يعلم بالباقي تعالي تعالي .. 

ـ وين ؟

ـ تعالي تعالي وياي للمطبخ 

ـ ليش المطبخ ؟ 

ـ ليش تلغين جثير تعالي واسكتي 

اجيت وياه .. 

شغل الطباخ وجاي سجينة حطها ع نار حماها جان يكلي تعالي ..

خفت كتله لا بداعة الله الا هاي .. اقترب عليه .. رجعت ليورة وركضت لغرفتي .. 

لحكني واني قفلت الباب 

ـ افتحي الباب 

ـ لتسويلي شي بداعة الله 

ـ افتحييي الباااااااب

ـ اخاف منها اترجاك لتسوي شي ابوس ايدك وراسك

ـ كلما تتأخرين عقوبتج تزداد وبكيفج

فتحته .. وطب عليه يكلي صايرة تسوين حركات وكذا 

كلي اختاري خدك لو ايدج لو رجلج

كتله شنو ليش اختار كلي اختاري ومعليج كتله بيدي 

لزمني ولجعني ع ايدي بالسجينة 

صحت صيحة احس روحي شاطت وجسمي صار نار يبخر منها ولا اكدر احطلها مي لا اكدر اسوي شي .. 

راح هو شمر السجينة واجه ..

كعدت اصيح ولازمة ايدي 

اخ ايدي يايمة ايدي .. صرت ابجي بحركة .. 

شافني ابجي بقوة ومشتعلة من ايدي 

راح جاب مرهم حروق .. وشايلة بيده وشمره عليه كلي حطي عليها ولتعيدين هالسوالف اريد اعيد تربيتج من جديد 

شلته وصرت افتح بالمرهم 

واجه كلي ارفعي ايدج .. شال مرهم وحطه ع مكان ومسح عليه بس شنو اكمز اني احسه جاي يدوس عليه دوس من الوجع 

حطلي المرهم ع مكان واني ابجي 

باوعلي ومسح دمعتي بيده وكلي لتعيديها ثاني مرة ..

قسما بالله الحرك بيدي مشتعل وبالي يم الصور وشصار ع القصة بس مكدر اسوي شي دام موجود يزن ولاطش بالغرفة 

عافني وطلع شوي اسمع تلفونه يدك .. رجع بعد شوي كلي اهلج عزمونه يمهم حضري نفسج وغطي اللجعة الي بيدج وديربالج لسانج من يطلع تعرفين شيصير مو ؟ 

اي اعرف لتخاف ما احجي شي .. 

اي عفية زين تسوي وجيبي موبايلج اضمه كوليلهم خربان ..

اكويلي دشداشتي .. والا اني اكويها عوفيها انتِ .. 

الظاهر تذكر لجعة ايدي وكال اني اكويها .. 

طلع دشداشة البيضة و الاوتي المكواه .. 

وحطها وصار يكوي بيها شفته ميعرف كمت وكتله انطيني اياها اكويها .. 

رفع راسه وباوعلي اكعدي معليج .. 

ـ يابه دنطيني اكويها متعرف .. 

ـ كتلج عوفي اني اكوي عندج عقل براسج يفتهم ؟ 

ـ تمام تمام بس لتعصب رحت .. 

كواها الدشداشة ووكف ع مراية يلبس جراوية 

يعني يلبس لبس خليجي هيج 

وطلع يخبل اكشخ مني .. اني لبست فستان احمر وهيج ترتيب .. اجه باوعلي .. جان يكلي 

ـ ان شاء الله تريدين تطلعين هيج كدام البشر ؟ 

ـ ليش شبي لبسي قابل طالعة مصلخة!

ـ لو طالعة مصلخة اشرفلي ع الاقل اصير ديوث علني

ـ اها 

ـ ووجعا كومي البسي ذيج اللبسة السودة العريضة شوي مو طالعة تفاصيل جسمج لا يشوفج #جلب بيت صالح ويحبج

ـ يزن جبيرة عليه هاي 

ـ بالطلاك بالثلاثة الا تلبسيها ديلا عاد 

ـ يارب دخيلك شكد عنودي لخاطر ربك ..

ـ تريدني اطلك مانروح يلا ترتاح

ـ سكتت يمعود بس لتعصب ..

لبست ع ذوقه وطلعت اييع ذوق سز حيشاكم العب النفس تكول شاحوذة او مجداية وشافني بيها وكال 

ـ اي هسة طلعتي براسج خير لابسة فستان عبالك هي من الفاسشينات مدري الفاتشونات مدري شيسموهن

ـ يلا يزن يلا لبست ع ماتريد شتريد بعد ليش واكف خلينه نروح يلا 

ـ شو اصابعج ؟ 

ـ هاك اصابعي بعد شنو تريد بعد بالله 

ـ كصي اظافرج وامسحي الصبغ الي عليه 

ـ يزن ماريد اروح بطلت شهالمذلة 

ـ جيد اني هم بزعان متحجج ماريد اروح 

كعدت ع جرباية مبولزة انتظره يحس ويكلي كومي يلا بس هالزلمة هذا خبلني لا احساس لا مشاعر لا كلشي صرت اريد بس يكلي يلا نروح ماردت اتنازل اني واكله خلي نروح 

عاد اني شورطني وكتله ماروح وزعلت عبالي ادمي ويراضيني .. 

اباوعله كاعد رجل ع رجل جان يكول صدك ليش خانك نفسي بالدشداشة خلي انزعها ..

كتله لاااااا يزن 

ـ شبيج خرعتيني !

ـ اكص اظافري شسوي امري لله

ـ مو بس اظافرج تمسحين الصبغ الحاطته 

ـ تمام تمام طلعت هالروحه من عيني .. 

كملت الي راده وكلي اوكفي اشوف 

باوعلي من فوك ليجوة وكلي هسة ممتاز 

يلا نطلع 

كتله اهلهل ؟ 

كلي تستهزأين يعني ؟ 

لا يمعود اشاقيك متشاقة شبيك !

رحنه بتكسي وكل شوي يكلي باوعي جوة ع رجليج لترفعين عينج .. 

ومن نزلنه يشمرلي تعليمات ..

امشي وراي .. 

لا ترفعين راسج ..

امشي زين .. 

ديربالج طسة 

ديربالج مي هنا لتوكعين ..

من تشوفين #جلب بيت صالح لتحبينه 

وصلنا للبيت وطب سلم ع ابوي وسلمت وابوي تلكاه بالهلا والمرحبا والنسيب كطعة من الجبد وهالغزل وهالمباوس و الي يشوفه هالزلمة الثكيل والمتكلم ميكول بالغرفة مخبل ومابراسه عقل .. 

كعدت يم اخواتي آمنة ومريم وظلينا نسولف بس محجيت اي شي عن الي صار بية لان خايفة من يزن .. 

اكلنا وكملنا ورحت اساعد اخواتي صرت اغسل بالمواعين ولابسة ملابس البيت اعتيادي واني اغسل بالمواعين بدون ما انتبه واني احرك ب ايدي من اغسل ظهرت اللجعة 

جان تكول آمنة شنو هاي يمصخمة البيدج ؟ 

اني يبست بمكاني شلون انتبهت 💔

              الفصل الرابع من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال