رواية ملكة الشيخ ضاري الفصل الثالث 3 الجزء الثاني بقلم ساره المجيد
زينه ..بابا اني رافضه كول هذا الزواج ومستحيل اقبل بي ..
كمت وعفت ابويه والدمعه بعيني انه جبته لروحي انه لو قابله بصكر من سنه جان هسه انه ويا مزوجين ومصار كول هذا بس ااأأأأأأأأأه 😭ميت سجينه بكلبي تضرب واعاتب نفسي شسويت بروحي ..
طلعت وانضربت بعمي اعتذرت منه ومشيت ضايعه ومتشتته افكاري ميت فكره وفكره بالي صعدت بالخط بس مكلت شي كان حجي هوايه بداخلي اوف ياربي شسويت بروحي ماكدر ارفض كلام جدي او ابويه وهسه صار كول هذا غصب عني ..
وصلت للكليه بسرعه رحت لمروه شفتها كاعده وي كروب بنات لزمتها من ايدها وسحبتها ومشيت بيها
مروه ..اوف ولج هاي شبيج شصاير اصبري اصبري وين ماخذتني اوكفي
زينه بدمعه ..مروه اني انتهيت انتهييييييت
مروه بخوف ..ششنو شصاير ولج احجي خوفتيني شكو
زينه ..اي والله انتهيت كلشي بيه انتهى اتدمرت وماعاد اعرف شسوي 😭
مروه ..خرررب ولج شكو احجي
زينه ...حجيت كولشي الها من دك الباب لحد السلام عليكم ...
مروه ..اممممم والله انتي غبيه انتي رفستي نعمتج مو كالج اريد اتقدم بس انتي كمتي تماطلين علي بشغله لج عزيزتي انتي الغلطانه
زينه ..وهسه شسوي منو كال هذا عريس الغفله يقبل اكمل دراسه ..
مروه ..انتي وحظج بعد
زينه ..اي وهو انه اعرف حظي مجسي ..
مروه ..اوف هسه منين تجيبيها من الدروس الصعبه لو من المشاكل استغفر الله ياربي ..
زينه ..اوكي لازم ابين قويه احسن شي
مروه ..بكيفج بس انطيج نصيحه اتصلي ع النقيب وخلي يرجع يحجي وياج
زينه ..شلون ماتصل وليش اتصل حتى ينغر ويتكبر ويكول اي من جنت اريدها تصد بيه ومن صارت مشكله تعال صكر لا عيني لو اموت
مروه ..منو كالج هو هيج راح يكول
زينه ..ماعرف بس حاسه هيج يكول
مروه ..هو انتي محد مخرب عقليتج غير هذا الاحساس ...
زينه ..خلص اليوم ورجعت للبيت ضايجه ومقهوره حيل من اهلي ومن نفسي ماحجيت شي وياهم ..
كبل رحت لغرفتي شمرت نفسي بسريري وظليت اباوع ع الشباك شويه واخذت موبايلي دخلت ع قوائم الحظر الي عندي ..
شفت رقمه سويت ازالة الرقم ودخلته بالواتساب شفته عنده اتصال بالنت من 5دقايق ظليت صافنه بنفسي اتصل لو مارد خفت وكمت ارجف يارب كون يطلع كول هذا حلم وارجع لنقطة الصفر ماعرف لا صكر ولا عشت هذا الشعور يارب سويت اتصال وسمعت صوت يرررن يرررن 😣....
في مكان اخر....
سناريا ..كعدت ثاني يوم نشيطه والحمدالله من صليت ارتاحيت شويه لالا هوايه ...نزلت اتريكت وي اهلي وصبحت عليهم بابا راح لشغل وكان يوم جمعه أميره لسه نايمه وهم اخواني بس اني وامي ..
ظليت صافنه شويه وخطر بالي فكره رحت لأمي جانت تلبس عبايتها كتلا يوم وين رايحه
امي ..رايحه اشوف عمتج علمود تحفلي بعد اسبوعين عرس بت خالج
سناريا ..يعني هي وافقت
امي ..اي اكيد لعد شنو تنتظر شعدها كبرت بت خالج متصغر ..وانتي هم بس يجي نصيبج هم ازوجج
سناريا ..هههههههه يمه اني مازوج اظل يمج (ضحكت بألم واتذكرت ثائر اكيد هسه هو يتألم ع افراكي مو هم مشتاقلي هم يفكر بيه شنو اكل شنو شرب ياربي راح اموت من الشوق احس نفسي خلص انتيهت ..يارب عيني ..)
مسحت دمعتي ورحت يمها وكتلها ..يلا يمه روحي
امي ..وانتي اغسلي الاماعين ماشي
سناريا ..اوكيييي.
خلال هاي السنه كبرت وبلش جسمي يتغير مره سمعت عمتي اخت ابويه تكول جسمي يشبه الساعه الرمليه مافهمت وتكول خصري مثل محبس هههه وهم مافهمت وهي خياطه وجانت اتخيطلي دشداشه وتتفنن بجسمي اووووف ..
رفعت دشداشتي شكلتها بملابسي الداخليه وشغلت اغنيه وخليت السماعات بذاني اسمع اغنية أليسا احب احساسها بالاغاني فد شي ..
كمت اغسل واتفنن واضحك طبع بيه اغير مزاجي بهيج شغلات ورا دقايق حسيت بشخص وراي استغفرت الله هاي شبيه درت وجهي ماكو احد اوف كمت اتعوذ من الشيطان ..
بعدين حسيت باللمسه ع خصري وشي خشن يمشي ع ضهري من ورا باوعت هاي ادين ردت اصرخ خل ادي ع حلكي وسحبني وهو يهمس بذاني ..
ادم ..اششش انه حبيبج ادم شبيج ولج مو كافي لوعتي كلبي
سناريا بخوف ورجفه ..
عوفني عوفنييي ادم ابوس ايدك ..كمت احس بشي خنكني كمت لعبت نفسي قرفت حيييل من قربه صارت بوساته جريئه ولمساته هم ..
هو اهنا ماظل عندي عقل وهو يشيلني ويدخلني غرفة اهلي كمت اصرخ هو يخلي ايده ع حلكي ويكتم صرخاتي ..
تخبلت حيييل بعد ماتحمل احد يخنكني ونفسي ضاق بعد ماكدر اتحمل جسمي انشل شل اريد احرك ايدي ماكدر كمت مثل وحده مبنجه بس دموعي صارت الي وسيله اعبر عن حزني كمت اصرخ اريد بس لساني ينطق صرختي ماتوصل صرختي ..
هو مستمر يبوسني بركبتي ونزل ع صدري غمضت عيني ونخيت علي ابن ابي طالب يجي احد يخلصني اول ماغمضت عيني حسيت بشخص زرع ادينه بركبتي فزيت مرعوبه ع صوت ادم هو يكلي ..
ادم ..اششششش سناريا حبيبتي اسف والله اسف ماعرف شصارلي اول ماسمعت صوت صرخت ..
بس جسمي ميت ميت ..
سناريا ...عوفننييييييييبي كمت ابجي بهستيريه وصوت اشباح برأسي وناس تحجي كمت ماشوف ولا اسمع اريد ارفع اديه ماكدر ادم يحجي بس مو وياي ..
اجت اميره مفزوعه طلع ادم يركض واميره اجت تركض جسمي انشل مايتحرك غمضت عيني وهم نفس الشي احساس شخص خنكني ويهمس بشي مو طبيعي كام نفسي كوه يطلع كوه اريد اتنفس ماكدر نطقت كلمه والله بكلبي ثائر وينك😭
شويه ودخلت امي تركض علي حضنتني وتبجي وبيبي وعماتي ادم بسرعه صرخ لبسوها شي خلي اخذها للمستشفى لبستني امي صايه والحجاب ولا بس ابجي ماريد ادم ماريد اشوفه ولا أسمع صوته كرهته حيييييل 💔💔..
اشمأزت نفسي منه اتمنيت اقتله بيدي واشرب من دمه الكره الي بداخلي ناحيته مو طبيعي اشوفه شيطان كدامي مو بشر
بهاي اللحظه اتذكرت ثائر راحت روحي ياحبيبي رحت بيها ...تعال شوف حبيبة كلبك شديصير بيها عكب عينك ...وينك عنها وينك 😭😭
نمت وكعدت بعد مرور يومين كنت تحت البنج ..
كاعده بالمستشفى نايمه ماكو صوت حسيت بناس داير مدايري ..
ادم ..من اتقربت الها وبستها مدري شصار بيه شيطان اتربع برأسي اريد ارجع واوخر عنها بس ماكدر عطرها سطرني سطر لو جسمها عفتها هاي الفتره كل ماتكبر تحله وجسمها يصير احلا واخرب ع هيج شي ..
صار عمري 30 سنه ولسه افكر بطفله اريد ابعد عنها هواي تأذيت لكن ماكدر انه حبيتها من اول مانخلقت ع هاي الدنيا وكالوا ادم ال سناريا وسناريا لادم ...احنه ماعدنا بنات هواي هنه بس 4 اسياء وامال وسناريا وأميره وباقي كلها زلم مشوربه ...
عرفت انو هيه هاي الي الي كانت لبوه مفترسه ماتتروض حاولت وياها بكل الطرق ..بس مانجحت ولا فاد بيها
شكد اجيتها من الدروب الي هي بيها تفلت كنت دائما استخدم اسلوب العنف وياها والعين الحمره بس لكيت شخص ثاني سالب كلبها ابن خالتها صح كرهته واريد انتقم منه بس من شفتها ذبلت ع غيابه عرفت مالي مكان بكلبها ...
بس من انسجن وصار حكمه حكم اجباري انطاني القدر فرصه اكمل وياها هي بت عمي وهي الي واني اولى بيها منه جنت بيوم جاي ع عمي انطي الفلوس الشغل دخلت وسمعت صوتها تدندن دخلت وياريت مادخلت وشفتها ..
وكتلكم بهاي اللحظه لا كلبي حكمني ولا عقلي ...
اخذتها واني اوزع بوساتي ع كلشي بجسمها واديه تمشي عليها بجرائة ..
اخذتها لغرفه فارغه نومتها واني فاصل عقلي وكلبي ينبهني اريد ابعد حسيت بشخص يجرني الها ..
وحسيت شيطان كاعد مو ادم كمت وخرت بعد ماسمعت اخر كلمه منها شفت وجها انكلب اصفر وشفتها يبست وبس دموعها ع خدها جسمها انشل ميته عبالك ..
كانت كبالي بس بالداخليات ركضت لبستها دشداشه خاف يشكون وطلعت انصدمت باميره جنت ميت من الخوف عليها دفعت اميره ورحت ركض ع عمتي وبيبي كتلهن وجبتهن سحل دخلت وشفتها متهستره بالبجي وجها مثل وحده اجت منيتها .....
شلتها بعد مالبسوها وطلعت اركض بيها صعدت بالسياره امها وعمتي وطلعت كبل للمستشفى الحسيني الاهلي ..
وصلت بسرعه دخلوها للطورائ ورا ساعه طلعت الدكتورة وكالت ...
الدكتوره ..المريضه مابيها شي
ادم ..تخبلت شنو مابيها شي شنو مابيها ششيييي والي صار انشلت اعظامها كمت اباوع بوجهم وهيه تباوعلي ..
ظلت يومين وهي نايمه عايشه ع المغذي سووا تحاليل وكالوا عدها رمل بالمثانه مالتها وباقي التحاليل سليمه كولشي مابيها ..
عمي حسين صارت عند شكوك تجاهي وخاصه من شافوا اثار الركبه مالتها بس طمطمت السالفه بس عمي حيييل ضايج مني ...
خلصن اليومين وطلعنا من المستشفى بالباب كانت نايمه بحضن ابوها صعدها وكتله عمي خلي اوصلكم ..
عمي ..مشكور تعبناك ماكو داعي تكدر تروح
ادم ..حسيت بطرده اخذت نفس تنهدت وطلعت بسيارتي لمكان ارتاح بي ماكو ظليت افتر واتذكر شلون تقربت منها ليش سويت هيج احساس غريب ياربي ......
بعد مرور اسبوعين
سناريا ..كعدت اخذت علاج وحضرت ملابسي وصيت امي راحت هي واميره لسوك يشترن ملابس لعرس زينه فرحت هوايه من عرفت زينو راح تزوج بس هم لسه مكالو الي شصار بيه من رحت للمستشفى اوف ماسألت هوايه ولا همني شي ...
كانت الدنيا شتاء شويه الجو بروده حلو ..قريت امتحاني حتى من اروح للعرس ماهتم لدرس ..
حضرت ملابسي وملابس اخواني ..
دخلت امال وجها يبجي وكوه كاتمه ضحكتها مدري ..شبيها
سناريا ..خير ولج شبيج
امال ..ادم اددددددم سناريا ادم 😳
سناريا ..اهووووو بس ذكرت أسمه حسيت نفسي انقطع وارتبكت حيل كتلها بخوف ..خير شبي ادم
امال ..ادم خطبني من جدي والاسبوع الجاي زواجنا....
كانت صدمه بنسبه الي ظليت صافنه بوجها وكتلها
انتي تحجين صدك لو
بعدني مامكمله كلامي حضنتني وكالت اي اي والله احجي صدك ماصدك بعد هذا الصبر كله اخيرآ اني وادم راح نتزوج حضنتها وكتلها الف الف مبروك حبيبتي ...
راحت امال واني فصلت معقوله ادم خطب امال شنو الغيره ماصدك اخيرا راح اخلص منه الف الحمدلله والشكر
في مكان اخر ...
زينه ...وكفت اكبال الامرايه وكنت لابسه فستان ذهبي ضيك يسمو فستان الحوريه من فوك ضيك وبعدين يعرض وبي ذيل طويل ومابي اردانات شعري بارمته ورافعته كان شكلي مختلف اسمع هلاهل اهل العريس واهلي ..جانت دمعه بوسط عيني اتذكرت اخر مكالمه بيني وبين صكر .....
خلونه نرجع بالاحداث شوية
زينه ...سويت اتصال وسمعت جهازه يررررن يررررن ..سمعت صوته هو يكول.
صكر ..الو احم الووو متحجين
زينه ..ظليت ساكته ماعرف شنو اكله او شنو أبرر عضيت ع صبعي بقهر غمضت عيني واله بدموعي تنزل ع خدي رجع كال الوووو شهكت بعد ماتحمل كمية الضغط الي دا اواجها سديت الخط خليت اديه ع وجهي وكمت ابجي بقهر اسنين ع ثائر اخويةمابجيت
هيج ياربي امتحانك صعب
رجع اتصل ظل يتصل وكل مايتصل تزيد دموعي اكثر واكثر اخر شي وصلتني رساله منه كاتب بيها ...
((خسرانه رجعتي بس شيفيد بعد خلص الحب انتهى ؟؟))
زينة ... انتهى ؟! اي صح انتهى والله انتهى ليش اجذب ع نفسي خلاص كوولشي انتهى وصكر ضاااع من ايدي وكوولشي بلحظة ضااااع ...
ضعت حبيبي من بين اديه ويا اكبر وجعي ويأكبر احزاني ..خسرتك وانه ممنونه منك اتحملتني
خلص انتهى مو خلص هاي هيه حضرت النقيب كمت حذفت كولشي وفرمتت جهازي طلعت السيم كارت كسرته وكلت انه خسرانه لعد شوف ..
كمت طلعت ورحت لحسين كتله يجبيلي سيم كارت جديد كال اي ماشي ..
رجعت لغرفتي طلعت اتراك بيت ليموني بس عريض لبسته ومددت وحاولت انام بس ماكدرت كول ماغمض تجي بالي رسالته فا صعب عليه النوم ....
مر كم يوم وتم تحديد كولشي اجت ام العريس وياها الشفيه لبست فستان عادي ساده لونه زيتوني من تحت وكريمي من فوك مطرز قدمت الهن العصاير وكنت مجبوره اجامل بيهم خلصت الكعده كالو الولد يريد يشوفها او الشيخ كمت لبست عباتي وشالي وكعدت انتظره ..
شويه ودخل هو وابويه احساسي كنت جامده ماعندي اي ردت فعل مجرد خطبه انفرض عليه ولازم اجامل حتى الطفل الصغير ..
مرات اتمنى لو ميته ولا هيج اتزوج ظليت مدنكه وماحجيت شي وبس ساكته ..
سمعت امه تكله ..هاك شوفها
بس من ورا خشمها هه هم مثلي متعرف تجامل من عرفتها وتحجي كله من ورا خشمها زوجته او خطيبته لسه مشفتها ولا اجت ماسمعت صوته او حتى شفته ...
شويه وكامو ..
رفعت رأسي شفت ظهره لابس بنطرون وقميص وستره سوده وشعره مرتبه بس امبين عسكري لان شعره خفيف اول ماطلعوا ركضت لغرفتي وكعدت ع اعصابي كلها دخلت بنات خالو وبنات عمي يريدن يعرف شلون شكله والله مارفعت راسي او حتى حاولت لان شي بداخلي رافض يشوفه ..
خلصت منهن بعد صعوبه كبيره سديت الباب وشمرت عباتي ..وكعدت اباوع لنفسي اوف شوكت ارتاح
في مكان اخر.....
سناريا ...مرات احسد امال ع حياتها مو مثل حياتي بس ارجع واكول الحمدالله ع كولشي كمت عنها وكتلها وهسه اموله
امال ..اوووف سناريا ماعرف شكلج بس شعوري مثل عصفور كان بقفص وبعدها حرروا..
سناريا ..شعور بداخلي يكلي احسن خلي يتزوج واخلص منه ادم مستحيل احبه وهيه خطية تحبه خلي يرتاح مني او اني ارتاح المهم الله يوفقهم ..
كمت كملت تعزيل وهي تحجيلي عن ادم حسيت نفسي اني الخسرانه بالاخير خسرت ثائر وهسه ادم بعدين وكفت ع التفكير شنو الي دا يصير وياي ياربي ارحمني ..
رفعت راسي باﻷمرايه جان اشوف نفس المراة العجوز كاعده بصف امال بس هيه متشوفها ابتسمت هه بقهر ونفس الوقت الخوف صار شي عادي ماكمت اخاف منها او من الاشياء الي اشوفها او أسمعها كانت تمشي وراي وين ماروح ..
خلصت امال كلام وراحت نزلت للمطبخ بعد ماقفلت الباب وكعدت اسوي غدا لاخواني غمضت عيني واتذكرت ثائر وابتسمت من مره كالي ...
ثائر ..شوفي حبيبتي لازم تتعلمين الطبخ ماشي
سناريا ..وليش اتعلم خاله موجوده وهي تطبخ🤔
ثائر ..شششنو شنو لا عيني امي من نتزوج تصير هي الملكه
سناريا ..اييي يممه واني الجاريه مال ابنها مو 😕
ثائر ..ههههه لا انتي اميرة حياتي
سناريا ..امممم اي كمل
ثائر .. بله سؤال صريح انتي شنو شالعين منج الاحساس حبيبتي🤔🤔
سناريا ..لا والله بس ماعرف اعبر عن احساسي بالكلام ولا بالفعل يعني من اريد اكلك احبك استحي وتطلع شي ثاني 😆
ثائر ..هههههه خررب حظي زين كتيلي حتى من هسه ازرع بيج الاحساس ..
سناريا ...ههههههه
ثائر ..شوكت نخلص من النهوه هاي
سناريا ..اوووووف
ثائر ..اذا اجه يوم وربج ما ..
سناريا ..قاطعته وكتله لا تكولها ان شاءالله اني وياك مقسومين لبعض
ثائر ..خايف من الغدر
سناريا ..حياتي لا تخاف اني وياك للموت محد يكدر يفرقنه
ثائر ..احبج
سناريا .. 🙈🙈يلا باي
ثائر ..ههههه بايات
سناريا ... رفعت راسي ذكريات اخر شي ظلت منك ياثأوري شوكت ترجع مو متت شوق ولهفه عليك بس لو اسمع صوتك ...
في مكان اخر.....
....ثائر ....
كاعد بالسجن ومنتجي ع الحايط وافكر بيها وبأمي انظلمت ياعالم انظلمت بعد ماظل عندي عقل كلشي بيه خلص انتهى ﻷ حبيبتي ظلت ولا مستقبل ولا حياة مثل باقي البشر كل يوم تعذيب شكل دنكت وخليت رأسي بين رجليه وكمت اذكر مواقفي وياها ..
ثائر ..يمه اني اشتريت هاي الحاسبة مو احد يلعب بيها
امي ..لا يمه محد يلعب بيها يلا تعال وصلني
ثائر ..هو اني هم اريد اشوف محمود
امي ..ولك شوكت تكول خالي محمود
ثائر ..هههه شبيج يمه ترا الفرق بيني وبينه هي خمس سنوات مدري اقل
امي ..اوف منك امشي
ثائر ...مشيت وصلت شفتها منتجيه ع جذع النخله وتضفر وتفتح بالضفيره مالتها راحت امي دخلت ورحت كعدت بصفها هي عدلت شالها سوت نفسها زعلانه
كتلها شبيها الهبله مالتي
سناريا ..محد خبل غيرك
ثائر ..ليش ولج شمسوي انه والله عاقل
سناريا ..عاقل ع نفسك بس مو عليه ذاك اليوم اتصل وماترد ليش بالله
ثائر ..غير عندي شغل وداعتج
سناريا ..يعني الشغل اهم مني 😒
ثائر ..كلشي يهون عندي اله زعلج يلا عاقبيني واني الممنون
سناريا ..اممممم خلي افكر🤔
ثائر ..هههه يلا فكري
سناريا ..شايف ذيج النبكه
ثائر ..اي شبيها 🤔
سناريا ..روح جيبلي منها نبك😁
ثائر ..هههه انتي خبله من صدك بس يلا تعاي وياي اخذتها من ايدها وصعدت لنبكه جدي ضاري اذا عرف يحرك شيب الخلفوني مايقبل ع نبكة جدي ذيب هاي تراثيه هاي النبكه ....
اخذت كم نبكاية ونزلت وكتلها هاج حب
سناريا ..شوووكرآ هههه
ثائر ..سامحتيني
سناريا ..يعني 😋
ثائر ..قربت وهمست بذانها احببببببج
سناريا ..عفته ومشيت وكتله من بعيد .. ثائر شايف السمجه الي بلا ماي اني هيج بلياك 🙈
ثائر ..ههههه فديت السمجة مالتي حياتي انتي وزفرج
سناريا ..هههههه عابببببببببببت
ثائر ..عاب ع كلبي
ابتسمت بقهر ورفعت رأسي ومسحت وجهي واتنهدت بحسرة نزلت دمعه ماعرف اتصرف اخ اخ .شويه ودخل شرطي ناده بأسمي كمت طلعت ومشيت ويا بعد ماخلوا كلبجات بيدي طلعت اخذوني لغرفة التحقيق ..
وبلش يحقق وياي كلشي اعرفه حجيته بعدين رجعوني لسجن بطريقي شفت كرار ماظل عقل برأسي هجمت علي واضرب بيه هو يريد يخلص من ايدي مايكدر اجه الشرطي بسرعه حولني لسجني ...
دخلت ورجعت كعدت ..
اخذت نفس بضيك ..
((هم تشتاكَلي...؟؟؟
تذكرني تالي الليل؟
لو تغفــه بــهدوء وراحــه نفسيــه؟
غزاني الشوكَ وانذليت
وعلى جــر النفس كــل حيل مابيه 😔))
في مكان اخر ....
امال ...رجعت للبيت اول مادخلت صار ادم اكبالي دنكت ومشيت بخجل ابتسمت وحسيت بشعور حلو وكفني صوته هو يكول
ادم ..احم امال
امال ..حجيت بخجل ..ها
ادم ..هففففف ماكو شي روحي
امال ..هزيت رأسي وردت امشي رجع صاحني ورجعت كتله ..ها
ادم ..احم ردت اكلج مو هذا الاسبوع الزفه بس خطبه يعني تعرفين ضروفي بعد اسبوع لازم ارجع للانبار ماكدر اظل
امال ...دنكت راسي كتله بكيفك
ادم ..ها يعني مزعلين
امال ..لا ليش ازعل
ادم ..خوش انه رايح محتاجه شي
امال ..لا سلامتك
ادم ..يلا باي
امال ..مشه واني اباوع ع طوله وهيبته اوف صدك فرحت بهذا الشي ..
رجعت لغرفتي دخلت امي تضحك وتصفك وتهلهل ..
متت من الخجل بس كالت شي صدمني ..
ام امال ..اي والله وفلح السحر😏
امال .. اصخام ياسحر يمه 😳
ام امال ..غير الي سويته الادم سحر محبه وبت عمج سويتلها سحر العوذ منه التخيل والكراهيه لادم يعني ضربت عصفورين بحجر واحد
امال ..يعني كلشي سوته سناريا وكل هذا يصير وحب ادم المفاجئ كله سحر سسسسسحر ضليت واكفه وساكته وبس صافنه ع امي نزلت من عيني هواي ردت اطلع اكول لبيبي لزمتني وكالت
ام امال ..انتييي غبيه اذا كلتي او فضحتي هذا السر راح يروح ادم من بين اديج بعدين يرجع لسناريا وهي تزوجه وترتاح وانتي تبقين اهنا بحسرتج هي ماتحبه ولا راح اتحبه بس هو راح ياخذها غصب خلي يحبج ومن يشوفج راح ينسى شي أسمه سناريا ..
امال ..قنعنتي امي بهاي الكلمتين وضليت ساكته بس من اشوفها او اشوف ادم ضميري يعذبي بس سكتت انه ماعولت ع الله ادم خطبني ارجع وافصخ الخطبه مستحيل ....
في مكان اخر .....
زينه ..اجه أمير اخذنا طول الطريق ساكته ماحجيت شي مجرد التعبير عن مشاعري صعب اكتفيت بسكوت هو احسن شي وعفته ع الله وصلت لبيت لكيت الكول موجود شفت سناريا متغيره من وكت ثائر لحد هذا اليوم ..
هيه ماجت لبيت جدو او حتى زارتهم بس خاله اسمهان تجي واخوانها لابسه فستان احمر مطرز بذهبي واسود قصير وفاتحه شعرها ومامخليه مكياج ذبلانه حيل مو نفسها ذيج ام الضحكه الحلوة احس سناريا صوره معاكسه لمعاناتي الي اعيشها اني وياها نفس الشي كعدت ع الكرسي وصحت لها تجي اجت وكعدت بصفي لزمت ايدها وكتلها شلونج حبيبتي وين هاي الغيبه ..
سناريا بابتسامه حزينه ..
اهنايه بس بنفس الوقت ماموجوده
زينه ..اوووفففف
سناريا ..اسم الله عليج من الاووف ..دقيقه امي تصيحلي هسه اجيج ..
زينة ..مشت سناريا وظليت اباوع ع الكول ماعرف مارتاحيت ..ساعات من ضيكت الخلك ع كولت خاله نيران شبيج معبسه ..
هيه متعرف الي بيه مصايب وين وعدك ياصكر وييين ..
بس يلا الفات مات .. وانتهى كوولشي لازم اتقبل الواقع الي انفرض عليه ..
مرت كم ساعه واجه الشفيه اقصد العريس ..هو واهله سمعت صوت الاطفال تكول اجه اجه اليوم العقد لو عقد ع روحي مو عقد زواج ظليت ساكته وكميه من الحزن وألم موتني شويه ودخلت مروه تركض خطيه متاخره ضحكت ع شكلها وتكول ..
مروه ..ولج طالعه كمر
زينه ..ههه شكرا وينج ولج
مروه ..ولج اسكتي غير شفتلج شوفه انتي مو كلتي العريس متعرفي
زينه ..اي 🤔
مروه ..خرب بحظج ولج العريس هو .....
وللحكاية بقية ....🌿
🍁يكولها ..
مثل شوك النوارس
للبحر مشتاك
ومثل شوك السفن
من تعشك المرسه
اذا ينسه الفجر خيط الشمس انساك
وابطل كل حزن
واتعمد الونسه
بس اعرفها روحي
شما تمر ايام
تضل تبجي اعله طيفك
وابد ماتنسه
تكله ...
انا نجمة وبالسماا
وغيرك ابد ميلوحها..🍁
باجر العروس راح تنصدم بحبيب الگلب وانشوف ردة فعلها شلون راح تكون 😏
بدل ماتدور وتبحث علي الروايات خليها علي تليفونك وحمل تطبيقنا
