رواية مشاعر مبعثره الفصل التاسع 9 بقلم دودي
وفعلا.. هضر رضوان مع عائلتي ومعرفتش كيفاش قنعهم.. عندو كاريزما واخا هكاك.. وعجوزتي عجبها الحال حيت غانبقى.. والولد فحضانها كتر ما هو فأحضاني.. ورضوان بدا كيعطيني مبلغ محترم.. مصروفي ومصروف الولد.. زيادة على ذلك هو كل نهار كيجي محمل بالسخرة.. وكيجيب لولدي كل ما تشهى.. وحتى انا معاه.. الصراحة ماخلانا مخصوصين من والو.. ديما كيتسخر الحليب دالولد وليكوش والحوايج ديال البيبي.. مع اني عمري طلبتها منه..بقينا واحد النهار فالكوزينة كنوجدو العشا انا وهند وبدات تهضر..
هند: واحد السيدة مات راجلها.. وخلات كلشي فيد عائلة راجلها.. حتى لواحد النهار.. جراو عليها هي وولدها.. حداو الورث كله.. ومعطاوها فيه والو.. الله يستر من هادشي اللي كيوقع فالدنيا.. الحمد لله رضوان كيخاف الله.. ومكاياكل حق تا واحد..
بديت كنسمع ليها وهي تدخلي الشك.. علاش ميديروهاش ليا.. ويجريو عليا انا وولدي.. نضت بدون شعوور. لبست حوايجي ونزلت للبازار.. دخلت وكان الرواج.. ورضوان كان مركز مع شي ناس.. غا شافني جا مخلوع..
رضوان: شنو واقع.. الدري بيه شي حاجة.. امي طرالها شي حاجة..
اسماء: متخلعش.. انا غا جاية نشوف رزق ولدي..
رضوان: اش هاد الهضرة.. واش ناقصاك شي حاجة؟؟؟
اسماء: لا.. ولكن من حقي نقابل رزقي.. ورزق ولدي..
تغوبش فوجهي..
رضوان: اش غايقولو علينا الناس.. طلعي لفوق وانا غانجيبليك كلشي دفاتر الحسابات تشوفي بعينيك كلشي.. وايلا بغيتي نشعل الكاميرات الفوق اونلاين تراقبينا 24/24h معنديش اشكال..
اسماء: لا انا بغيت نشوف هنا والناس مكيهمونيش.. حيت حتى واحد مكيعطيني شي حاجة..
رضوان: متخلينيش نتعصب.. لحد الان انا راني شاد راسي حداك .. واكراما لخويا الله يرحمو راني صابر على هبالك..
اسماء: شنو غادير ؟؟ غاتضربني وسط الناس؟؟ مالك عاى حالك.. وحدة جاية تقابل رزقها..
تنفس بعمق وزير على راسو...
رضوان: زيدي الالة.. هانتي تفضلي وديري اللي بغيتي..
عجبني الحال نشدها ضد معاه.. بقا غادي مورايا وانا عارفاه غايتطرطق.. كلشي الخدامة كيشوفو فيا.. حتى غوت عليهم
رضوان: كل واحد يتلاها مع خدمتو..
بقيت غادية ورافعة قنانفي للسما.. وباش نعصبو كتر مشيت نهضر مع واحد من الخدامة..ونسولو.. حتى لقيت دراعي تجرات..
رضوان: كمل خدمتك..
واتفت ليا..
رضوان: سوليني انا.. شنو باغية تعرفي..
اسماء: دير بحسابك كل نهار غاتلقاني هنا.. دابا غانطلع لعند ولدي..
خليتو كيغلي.. وطلعت.. مشيت رضعت ولدي.. وبقيت كنفكر.. علاش هبطت عندو اصلا.. وانا مكنحملو مكيحملني..
شوية وهو يطلع.. هادا وقتو باش كيجي.. سمعتو اتاجه لعند امه .. وجاني الفضول نعرف اش غايقول ليها عليا.. مشيت سالتة وبقيت كنتصنت..
الام: من حقها اولدي .. هاداك راه رزقها..
رضوان: امي الله يهديك.. راه عيب وحشومة تجي تخدم وسط الرجال.. اش غايقولو علينا الناس..
الام: اللي بغا يقول شي حاجة يقولها.. واش حنا بزز باش قنعناها تبقى دابا نتحكمو فيها.،
رضوان: لوكان مشات ودات نصيبها ولا هاد الهم...
الام: عفاك اولدي متزيرش عليها.. خليها على راحتها.، مدام مكديرش شي حاجة خايبة.. واللهم تكون بين يدنا.. وقدامنا.. حسن مدير شي حاجة بعيد علينا ويوصل لينا خبارها..
رضوان: نتي اللي كتلوي ليا دراعي امي.. اما انا راه نشدها نربيها.. حتى تعرف حق الله...وتمشي فالطريق مكادة..
سمعتو واستفزني..انا يربيني.. انا.. واخا اسيدي واخا..
مشيت لبيتي وقررت انا اللي غادي نربي السي رضوان.. ونخليه يفكر مزيان قبل ما يجبدني.. عيطولي العشا.. ونضت كنضحك.. جلست وبديت كناكل باستفزاز.. ورضوان كيشوف فيل بنص عين.. كملنا وناض مازاد حتى كلمة.. الغد ليه فقت ورضعت ولدي.. ووكلتو.. وبدلت ليه.. ديتو لجداتو.. اما انا قاديت راسي مزيان.. ونزلت لعند لوسي.. اللي ولينا انا وياه بحال المش والفار..
