رواية مابين النسر والشيخه الفصل الاول
بعض الشخصيات نسرد لكم ما يدور بداخلها من خلال الاحداث والتصرفات التي تصدر منهم فلا تتعجبو اذا اكثر من شخصية تحدثت في القصة ..
يقين
جنت داكه اغنية تامر حسني
قرب حبيبي قرب كمان ليه سايبني بنار ياحبيبي
واني اتذكر شكل محسن بأخر مرة شفته بيها وبس ريحة عطرة تارسة المجمع ااااخ يا جماله
شفت الباب انفتحت واعيون عمتي عليه متوجهة
خازرتني
ابسرعة غيرتها على قدك المياس
قدك المياس يا عمري يا غصين البان كاليسر
أنت أحلى الناس في نظري جل من سواك يا قمري
نظراتها اتغيرت وكعدت كبالي على سريرها الفخم صوت اسواراتها الذهب يرن رن من فلت شعرها الحرير الاسود ...
وكأنها تتأمل الأغنية وهي تلعب بشعرها
من وصلت الاغنية لمقطع
قدك المياس مد مالا لحظك الفتان قتالا
هل لواصل خلد لا لا لا لا فاقطع الآمال و انتظري
وكفت كدام مراية الكتنور اللي على خانه منه وبطولة
شعرها نازل جوة وركها وهي اتحرك براسها على جوانبها تتفحص شكلها
انا و حبيبي في جنينة و الورد مخيم علينا
إن طلب مني وصالو يا رب تستر علينا
عيونك سود يا محلاهم قلبي تلوع بهواهم
صار لي سنتين بستناهم حيرت العالم في أمري
دارت وجها علية وكالت
-من جنت ازغيرة اتمنى لون عيوني زرك ..
اهه غبية يا عمة جنت ما ادري عيوني السود هي مثل المغارة الظلمة اللي يدخلها يتيه بيها
ضحكت واخذت المشط ورجعت شدته مثل اول رغم هو مجان محتاج ... بس هي من تسمع هاي الاغنية تتغير احوالها ...
**
محسن
باحد الصبحيات المشرقة بالنسبة الي ولأي فرد من عائلتنا .... رحت لغرفة اخوي حسين دخلت شفته نايم وساعده على اعيونه
حسين اصحى
ابسرعة فتح ....
شتريد من صباحيات الله
ههههه بعدك حقنة اول ماتكعد من النوم ... دكوم يخيوي اليوم اريد السنتر ينور بجيتك
كام طلع لبرة للحمام يغسل ..واني غيرت
راح وياي حسين وصلنا اختنا رغدة للكلية ورحنا للجزائر وكفت السيارة كدام سنتر طابقين بناء حديث وتصميم اغرب بالنسبة للمجمعات المجاورة .. كان من تصميم اخوية حسين صممة ورسله الي من جان ببريطانيا هاي مو اول مرة يدخل المحل اخوي بس من يدخله استبشر بخير لأن بالحقيقة كله من خير ومن خير ذكائه من بعد رب العالمين لو لا هو مهندس ناجح وتباع تصاميمة بمبالغ مبالغة مجان وصلنا للي وصلنا اله
العاملين فاتحين السنتر اللي هو عبارة عن الطابق ارضي للعطور والاكسسورات والثاني مكياج وملابس داخلية نسائية يعني كوزمتك كبير
والثالث مخزن
**
يقين
رجعت من الكلية ب 3 ونص ورة الضهر لكيت مرت عمي اتلاعب ببنها بالصالة الجبيرة
- هلووو
باوعتلي وهزت ايدها
-وعليكم الهلو ورحمة الله وبركاته
ههههه ضاهر الشيخة اليوم هازة جذعها ومخليتها هيج ما طايقتني ههههههه
عفتها ورحت لغرفة عمتي
لكيتها كاعده على الجرباية ورجليها على الكاع ..
مبينه من شكلها توها كاعدة ..
فركت اعيونها وكالت
- ها يقين توج اجيتي
- اي والله عمة فد هلكانه .... اووف المدرسة جانت اهون على الاقل قريبة مو هاي ساعة ادك بيه السيارة
كامت غسلت وجها ورتبت شعرها ... عادت تمشيطه كدامي واني ابدل ...
كملت ظفيرتها اللي توصل لجوة خصرها
جانت ثخينه شعرها مال نسوان كبل ثخين واسود فحم يسرسح اسرسح يكول جدي عمتج تشبه جدتج يقصد امه . حيل بشموخها و شكلها وحتى صوتها يكول هاي من نسوان كبل بطيبة كلبها و قوتها وحزمها
عمتي الارملة من سبع سنوات رافضة الزواج رغم اولاد الحمولة اللي يتقدمون الها حتى البعض منهم ممزوجين عزاب يتقدمون
اظن هو وفاء لزوجها المرحوم ..
نزلت اتغدة لكيت امي خطية دزاة اللي غده من عدهم تبقى گلب والدة رغم ان بيت جدي هو بيت الخير ...
كعدت اكل بالمطبخ وجانت الساعة داكه الاربعة .
دخلت علينا امي شفتها من الممر اللي يطل على المطبخ .. اخوية الصغير يمشي وراها عمرة سنة ونص ..
- يقونه يمه اكلتي ..
لكفتني بالجرم المشهود
-يا ولج ليش ما تاكلين من غدانا هااا مو دزيت الج
-يوم حاطة كشمش على البرياني ما احبة
غمتني وراحت ...خلصت رحت وراها ...
اليوم امي مسيرة خير انشالله ..
لكيتها بغرفة مرت عمي الوسطاني ..
يسولفن .. اربعتهن چنات بيت ابو عزيز ... و ثمرة الحديث هي كالعادة عمتي ماسة ...
امي كالت بدم محترك
-ولجن الرجال ما يتعيب وما ماخذ مرة من قبل وهي ثيب وما قبلت بيه هاي حماتجن صدك شاخت
ردت عليها مرت عمي حوراء
-اي عيني سبع احظوظ والوجه سماوي
سمر
- اوف يابة ظاله امرمرة عيشتنا ومتسلطنة علينا بت الاوادم
والثانية اترد وتحجي على عمتي على انها ما اتريد رجال يشكمها اتريد اظل اهنا مدللة وتتامر حتى على مرت ابوها
مكدرت اتحمل اكثر من كالت عليها عايبة وشايخة من يكلبها هي لو ما عمي الشيخ
- يوم ترة عمتي الف من يتمناها بعدها اصغيرة
و معدلة مشهورة بين النسوان بقيافتها واخلاقها الطيبة
خزرتني امي
-امشي انت خو ولا يكلك بت بطني وثول والله ثول
سمر
- انت اسكتي بعدج ازغيره .. ما اتعرفين شي
هي الي سابق الها زواج وين تلكه اللي يجوها عمتج هاي البطرانة
عفتهن بالناقص كعدتهن اللي كلها حش
يمكن هذا الشي اللي مخليني اشوف تناقض امي ما اكدر اكول نفاق لأنها امي .. بس هيج من تكعد ويه نسوان عمامي او مرت جدي
بس بحضور عمتي تتغير مية و80 درجة ..
اني يقين عمري 19 طالبة كلية حقوق عندي عندي خمس اخوان ولد جبير قيس و اخت اكبر مني مرام
والباقين اصغر مني عقيل و حنين و حمودي من وعيت واني بحضن عمتي اتعس ايام طفولتي قضيتها من عمتي تزوجت جان عمري 9 سنوات .. ورة ثلاث سنوات رجعت عمتي لبيت جدي ارملة ..
بصراحة كعقل طفلة حيل فرحت برجوعها وما فكرت بحجم مصيبتها بوقتها ..
اني ماعندي شي يستحق يروي بنية عايشه حياة عادية وكلش واضحة مابيها شي ملفت او متخبي .. عكس عمتي اللي اراقب الها اقل تفصيله بيها لهذا راح يسعدني القاء قصتها.وقصتي العادية
عمتي جواهر ... الارملة الحسناء او شيخة ال علوان مثل ما يصيحها جدي .. من ابوية بنى بيت وحده وعزل ... هو بنفس المنطقة يم بيت جدي بس عمتي ما قبلت ياخذوني وخلتني يمها بصراحة اني بت عمتي جنت اموت عليها هي امي وابوية و دنيتي الي دوم تدعمني ..لولاها ما جنت احلم ادخل كلية لأن ابوي جان رافض بس هي قنعت جدي وادخل و خلاني ...
جواهر عمرها 30 سنة حاليا . طويلة جاثمة و بيضة مثل الغيوم بسما صافية واعيونها السود الواسعة تزين وجها المدور الابيض لو كصيبتها المتينة عود مثل شعري مهلس ..
جسمها متروس مثل الساعة الرملية خصرها ينحلف بيه ..
يمكن ابالغ لأن بصراحة اذا تحب شخص ما اشوف بيه عيب وشكلة يصير كامل حتى عيوبه اجمله !!
جنت اقرة بالهول واسمع بأمي اشلون تطري بعمتي من نزلت من غرفتها واتكول الها والله يا جواهر اجيت اشوفج حيل اشتاقيت الج !!
ما سمعت رد منها واجتني ..
- يقين شفتي عمج قحطان ؟؟
- اي بالحديقة ...
عافتني وراحت اله..
واني وراها
- اشعندك كاعد اهنا بالحر والبك
- جواهر الله عليج حاجي ابووي والله النفس ضاك ... اذا ما قبل اعوفلكم البيت واهج ..
- يااوثل عوفها ... بت فيصل اتفيدنك اكثر ابوها عنده نفوذ
قحطان
- اني اريد وحده احبها يا نفوذ لخاطر ربج جواهر انت مثل ابوج عوفيني بحالي
وانتي اشعندج اهنا واكفة
خزرني ...
- هاا شعليك بيه شمسوية اني
عمي قحطان الابن الاصغر والعام تخرج .. يحب وحده بالكلية وياه وجدي ما قابل صارله اشهر يتوسل وعمتي بس تتفرج ..
ردت اروح لفيت بس وكفت بمكاني من سمعت عمي يكول
- والعباس ابو فاضل اذا ما اخذت رغدة اهج للسويد والجواز حاضر ترة بس افيز
وهذا اخر كلام عندي لو هي لو اسافر عاد اشوف الدنيا
ردت عمتي
- لا حول ولا قوة الا باله ..
....
امي زوجة الابن الجبير للشيخ .. ابوية عزيز.... و عمي عايد الوسط زوج سمر وعمي علوان مزوج حوارء وعمي احمد مزوج رسل .وعمتي قبل الاخير و قحطان اصغر واحد .. الوحيد بيهم من مواليد التسعينات الباقين من جيل الثمانين والسبعين ...
وبيبي متوفية من سنوات .. وجدي مزوج بعد وفاتها واللي زوجه عمتي جواهر!!!!!
....
ع العشا هم فتح الموضوع عمي قحطان وانتهى بزعلة عمي وما اتعشة ..
جنت ارسم وامارس هوايتي ..
- هم اشخبطين ولج شنهاي النسوان اللي اترسميهن لازم احلوكهن عوجه
ضحكت على تعليق عمتي ما فديوم شجعتني ع الرسم .. نزلت واني وراها مثل ظلها ..
-عمة خل انشوف فلم ..
- ولي ولج .. طلعت برة ...شافت اخوية عقيل كاعد مكنك يمنا
- ولك تعال عمة ..
اجاها يركض
-امري
- اوليدي السباعي باجرمن الصبح اتروح تسأل عن بيت ابو حسن ... ناس جدد حاطين بالشارع اللي ورانه قريبين ع المخبز ...
-هااا صار عمة . تم
-اشوفلي اصلهم وفصلهم
- اووك
طلعت خمسة وحطتها بجيب اخوية المراهق عمره 14 سنة ..وراحت واني اتبعها
-عمة عمة منو ذولة هاااخطابة الج
وكفت وخزرتني
وراحت
-عممممة حبابة ردي ...شنو خطابة اللي لعد
بصوت هادئ
السانج طولان بت عزيز .. روحي ارسمي سعالوا وكفي شرج عني
تركتني الفضول ينهش بيه ...
طلعت عمتي ثاني يوم الصبح للسوك .. اتوسلت اروح وياها مقبلت كالت عشر ساعات ما اتخلصين انتي اكتبي اللي ترديه اني اجيبه ..
**
حسين
دا البس و محسن فوك راسي ..
-يلا دخلص ..
- دقيقة
لبست ساعتي ورحنا ..
للسوك
- جيد همزين غيرت الرف .
- اي كلة من خيرك
- خيري خيرك اخيي
حط ايده على متني وكال
-والله يا خويي احنه من غير مساعدتك ما جنا ننحسب عايشين انت الخير والبركة ..من مجهودك تشتغل وادز النا طلعتنا من البيت اللي كعدنا بيه ابوك و رجعتنا لمنطقتنا ..
ابتسمت واني اذكر طيف الماضي .. اشلون ابوية انذل ما ظل زغير ولا جبير ما نخاه يساعده ويقرضة كم فلس يعوض خسارته ويفك بيته عن الرهن .... صفينه ببيت تجاوز بعد ما جانا مستورين جنت اني توني طالب سادس ما شايل من الحمل شي اخوية حسن الجبير وابوي تعذبوا حيل ... خالي الوحيد اللي وكف ويانا وهو ببلاد الغرب دز مبلغ سد شي من الدين ودز عليه اخذني ...
كملت دراسات لكن احوالي ما دوبها تطور و اجاني خبر ابوي وحسن شلني شل رجعني للعراق دموعي بعيني على فقدهم اثر انفجار وجانت منيتهم ودتهم لبغداد وما رجعوا الا وهمه بالتابوت .. ظليت حاير باهلي و بروحي واني بعدني طالب .. تاليها سافرت شفت حالي وتزوجت وحصلت على الجنسية بعد معاناة و ظليت ادز لهلي منا من الله وفقني بمجالي وصرت اطلب بالاسم عند اكبر الشركات المعمارية ...
بنيت نفسي بنفسي وما انكر مساعده خالي الله يرحمة
اما باقي الاقارب داسونا دووووس على روسنا من وكفوا لأبويه على الدين ولا يكلك ابن عمهم من كسروا گلب حسن وما انطوه المرة اللي نفسه بيها بسبب فقرنا ..
قاطع افكاري وتألمي محسن
-حسين وين رحت
- وياك وياك ...بس وداعتك يا حسون اذا ما اخلي اكبر واحد ياخذلك تحية ما اسمى حسين
ضحك محسن وكال
-تصدك ابن عم ابوي البارحة دك يسأل عني ومسوي نفسه حيل مشتاق النا ومقصر
ضحكت وياه وكمل
-وتدري حسن من الله غير أحوالنا لهسة الناس تغيرت احس نظراتهم النا تغيرت
-شوف يا خوي الفلوس هي اللي اتغير النفوس وداعتي تشتري اكبر واحد ...
بين ما احنه نسولف والعاملين اللي يستقبلون الزبائن
الطابق الارضي بيه اثنين واحد واكف على جهة العطور والثاني على الاكسسوارات
والطابق الثاني بيه ثنين بنات من عمر غدير اختي
جنا كاعدين ونسولف ورة الميز الفضي من فوك وزجاجي من اسفل اللي بيه تحفيات وانتيكات بجانب العطور ..
انسحبت الباب ودخلت مرة بعباية تهفي بأيدها
والعرك يضخ من وجها احجي ويه اخوي وعيني عليها جنها داخيه اعيون محسن اتبعت نظراتي وشافها وكف الها رغم هو مكان مهتم للزبائن العاملين يتولوهم
-يا اهلا وسهلا ..
-السلام عليكم
-وعليكم السلام يا اهلا وسهلا نورتي اختي
اني طلعت تلفوني و اكلب بيه .. بس رفعت راسي عليها من طلبت كرسي من اخوي وكعدت عليه
- اشوية برة الحر يموت ب
اكولك جبت طلبي ..
-قصدك تركيبة العطر اي اي جهزتها الج
ابتسم الها وهي دارت وجهه عنه اتباوع لعطور ثانية ...
- وصدك جبت العطر اللي طلبته يقين
خزرته بنظرها
وهو مثل اللي ارتبك وتلعثم
-اقصد بت اخوج
برر
ههه عرفت اسمها من صحتيها
-ما شاء الله ذاكرتك قوية
شنو طلبت شو ما اذكر اني ؟؟
تلعثم بالزايد وكال لا اشلون هي طلبت ودفعت افلوس هم بس جان ماعندي العطر
راح طلع الها ماركة ما يشتريها الا الناس الواصلة والمقتدرة ...
راقبته بصمت
ابتسمت المرة برزت وجناتها الريانه
اشكد شايف شكر و بيض بحياتي لحد الزهك بس هاي بيه ملح ملامحها حادة واعيونها سود هي اللي مخلية بياضها يضوي ونظراتها احد من السيف كالت
-ها بيها الخير
كامت للدرج وهو مثل المهتلف يريد يروح وراها
وكفته
وين رايح يالنجر
ابتسم واجه يمي وكال
-هاي عمة الحب
-هااا وهذا العطر للحب هدية
-اي والله
ابتسم واعيونه تلمع لمع والله ما الومة اذا العمة هيج كمر بت اخوها الصغيرة اشلونها !!؟؟
-بس دربالك اذا اظل اتوزع هدايا للحب مالتك نفلس
ضحك وحك لحيته ...نزلت اللبوة اي احنه الزلم تهوينا حيل الثلاثينية المربربة وخاصة اني صارلي ثلاث اشهر من تارك النسوان شصاير بحالي يعني !!
فخيلت على المرة بصراحة، عين على التلفون والثانية عليها ....
بيدها اكياس و الوصول
اجت يمنا وكالت
-اكولك ذني مراح اكطع وصلهن
دفعت الحساب يقين
وابتسمت اله بكيد.
خلته صافن عليها ما يعرف شنو يجاوب
بيدها كيسين ما نعرف اصلا شبيهن !!؟
واتكول يقين دفعت و موصية عليهن خرب بفصولك يا محسن طلعت من ذولة اللي يستغلون اشكد احتقرتها .. ابتسمت واخذت العطور وراحت للحساب ...
وباوعت لاخوية من حطت العطور والاكياس كدام المحاسب وكالت
- اكطع ذني وياك احنه ما ندفع قبل لا نستلم الشي ...
اخوية طب بنص ملابسة بعد ما يعرف شنو يكول كام ينطي وجهه الوان ..
واني بصراحه اتعجبت على نچارتها و وكاحتها رزلت اخوي و حرجته ودفعت وراحت ..
**
يقين ظليت ارجف رجف من محسن دزلي مسج. وعرفت شنو صخم ...
دزيت اله مسج
خرب خرب محسن اشبيك انت ويامن علكت هاي جواهر محد يكدر يعلب من وراها وربي اليوم راح اتكطع اتكطع
ظليت اضرب على خدي
شسوي ياربي
شسوي كشفتني ورب الكعبة اصلا هي من زمان شاكه بيه وماتقبل اروح وياها من اخر مرة نسينا نفسنا واحد يباوع للثاني بهيام هي شكت بينا ..
عزة العزاج يا يقين ...لميت ملابسي شمرتهن بجنطة و لبست عباتي ... ودا اريد انزل من الدرج واشوفلك عمتي دا تصعد وصارت عينها بعيني
اشرد للسطح لو اشمر نفسي وانتحر عززه نظراتها اكلتني اكل وبيدها اكياس ماركة
الله يسامحك يا محسن عليمن تضحك انت ومكيف اتريد اتوصل الي هدية وبيد منو جووواهر !؟؟؟؟؟؟؟؟؟؟؟؟
لفيت ردت اروح
كالت بهدوء مخيف يتوعد اللي
وين يا ست الحسن
واتباوع لجنطة مالتي مالحكت اشرد.لبيتنا
بدل ماتدور وتبحث علي الروايات خليها علي تليفونك وحمل تطبيقنا
