رواية عهر الرجال الفصل الرابع 4 بقلم وسام الفراجي

رواية عهر الرجال الفصل الرابع 4 بقلم وسام الفراجي 

باوعت ع وجهه 

وصدمة عمري الي ما انساها ..

اخوي سامر !

لابس كمامة بس اعرف عيونه حق المعرفة جاي ويا اصدقائه الي ابوي دائما يحذره منهم ..

سبق وكلتلكم جان يبات عند اصدقائه كل اسبوعين برا البيت مرة .. 

طلعنا كلنا غلطانين من نكول يبات تعليلة عند اصدقائه ..

هسة بينت السالفة وعرفت كل اسبوعين يطلعون يوم لهيج اماكن وبنات ..

عيوني طلعن احسهن واني ممصدكة سامر هنا !

مستحيل سامر ماعنده هيج سوالف ..

ضرب ايده ع فخذ رجله و كال سامر اول ما شافني لا يعرضي لا

اجت تركض عذراء تسأل امها اكو ولد لابس قميص ابيض وكمامة سودة طب هنا وينه .. 

كالتلها هناك .. 

اجت تركض جانت تريد تبعده عن هالغرفة بس مالحكت وشافت المنظر ..

اخو يدور بنت ليل وطببوه ع اخته! 

هو انلصم ميعرف شيحجي اصلا .. 

اني حرف ميطلع من لساني .. 

صديقه يصيحه من الغرفة الثانية يكله خايف شبيك ترا بنية مو لغم لتفضحنا طب! 

ما ردله .. 

تقدم عليه 

بكل خطوة يخطيها متوقعة يملخني ..

كعد يمي واني فزيت منه ..

بعدت شوي ..

حط ايده ع رجلي وهزها يقصد اثبتي بمكانج ..

هديت بمكاني ..

حط جعب ايده ع رجله وراسه يباوع عالكاع وكال.. 

ـ و ظهر ابوج ؟

ـ ما لمسني بشر 

ـ ههههههههه انتِ وين ؟

ـ ليش تضحك مو مصدك يعني والله مالمسني بشر غير رجلي 

ـ سالتج انتِ وين ؟

ـ بيت ما اعرف شنو بي دزوني عيالي انظفه 

ضحك ضحكة مال واحد شوي وينفجر ..

ـ بالغرفة شعندج شنو تنتظرين ؟

ـ حماتي علمود ارجع لبيت عيالي ..

لزمني من حجابي ونزعه من راسي و داس عليه برجليه وظل يكمز عليه 

بعدت اني ليورة لان شفته صار خبل .. 

كتله لتظلمني والله اني شريفة بعدني ..

ـ مستحية ؟ هههه مستحية مو تعالي تعالي ..

والله يا جماعة بعمري وبحياتي ما شفت سامر بهيج عصبية وهيج حالة .. 

اني افتريت ورا الجرباية وهو لحكني تحاصرت بس الحايط كدامي ..

صعدت فوك الجرباية ..

لزمني من شعري واخذني للكنتور 

ضرب راسي بالكنتور ..

يضرب يضرب يضرب واني اصيح ..

اسمع ناس اجت ..

صوت وعد منو انتَ لاف وجهه عليه شافه سامر وكله ليش هيج سويت بشمس ومنو طببك هنا ..

سامر ـ و انت شعليك ؟ 

وعد ـ مرتي

سامر ـ اختي واكسر راسها وراسك ..

وعد ـ امشي لك بيك خير كدرت لاختك

سامر ـ امشي للسيارة ركض (يقصدني اني) 

الدم ينزل من راسي من وراه ويريدني اروح حت يذبحني ..

شمس ـ ما اروح وياك ولي منا 

سامر ـ اها صارت هيج تمام

ركض عليه ولطخني بالكاع كعد فوكي وشمر راشديات ما اعرف من تجي .. 

ماحسيت الا وعد جيّت ع سامر وضربه وتضاربوا بيناتهم الا فازعوهم الشباب الي جايين للبيت يتونسون .. 

طلعت ام وعد جان تكول لسامر اذا مارحت هسة ب اتصال واحد اخليهم يشحطوك والله ..

صوت شيماء جان تكول لسامر ..

شيماء ـ انتَ مو اخذت رقمي بعرس وعد وصرنا نتراسل وبعدين وضحتلي شتريد وجبتك هنا انت وجماعتك ..

سامر ـ اسكتي انتِ والله لفضحج كلشي موجود بالموبايل بالدليل 

شيماء ـ اووي خوفتني 

اخذوا الشباب الوياه لسامر وصعدوه بالسيارة وطلع راسه من الجامة جان يصيحني شمس والله لشوفج شي ماشفتي ظلي يم هالمصاليخ هاي ..

يارب شهالورطة هاي ركضت لبيت عيالي لغرفتي عالسريع وصرت الملم بغراضي وهدومي ولحكني وعد وجان يكلي وين وين ..

كتله 

ـ خلي ننهزم هذا اعرفه والله ما يسكت شوفوا شراح يسوي من مصايب ..

ـ ننهزم شنو شمسوين والله بإتصال يشحطوه اكلهم تعدى ع بيتنا ..

ـ بالله عليك طلعني من البيت مؤقت بالله عليك ..

صوت عذراء لحكتنا وصعدت لغرفتنا ..

عذراء ـ خليها تطلع وياي عندي كم شغلة اخلصها و عود نرجع وارجعها وياي 

وعد ـ راح يكولون خاف من هذا الططوة

عذراء ـ و انت تمشي حسب الي يكولوه كتلك محتاجتها وياي عندي شغلة

وعد ـ اخذيها بس ديربالج تنهزم منج 

كتله ليش انهزم مو اخوي بلحمه و شحمه كلي امشي وكتله لا كدامك

جان يردلي .. 

روحي روحي وياها بس اياج اياج تلعبين وياي ترا اني ما ينلعب وياي وبكيفج 

كالتله عذراء ..

شدعوة شدعوة رايحة وياي قابل وحدها ..

كالتلي عاد عذراء تحجبي وامشي ..

سمعتها شيماء جان تكول لوعد باوع تعلمها تتحجب العوبة بنت العوبة ..

يااا تغلط ع امها عادي .. 

ماردينا اثنينه

كملت عالسريع لفيت الشال بحيث احس نفسي شاحوذة هيج عالسريع .. اخذتني وصعدتنه تكسي..

وابو التكسي خلص الطريق يباوع لعذراء بالمراية جان يكلها 

التكسي ـ وين شايفج احس اعرفج

عذراء ـ وين شايفني ؟ 

شمس ـ سوق اخوية وعوف التعارف ..

التكسي ـ بس شايفها ..

شمس ـ اخوي نزلنا هنا وصلنا 

التكسي ـ ع كيفج شكلنا

شمس ـ نزلنا نزلنا 

للتكسي ـ سكتت معودة ..

عذراء تعجبت شلون مانطيت مجال للولد وكلت الها قبل ماتصلين المكان خلي يوكف ونروح مشي ..

هي استغربت بس نفذت الي كلته ونزلنا قبل المكان الي تريد توديني عليه ..

وكالتلي ليش نزلتينه هنا ..

كلت الها من تشوفي مو خوش ادمي لتخلي يندل مكانك الدنيا مو امان .. 

عذراء ـ تدرين شنو امنيتي اصير مثلج بشغلة

شمس ـ بشنو ؟ 

عذراء ـ من واحد يباوعلي بتحرش او يشمرلي كلمة قبل جنت عادي اكيف ليش الجذب بس هسة اتمنى اكدر اكله واسكته واوكفه عند حده

شمس ـ ميخالف تجربين مرة مرتين تصير عادية بس كوليلي وين ماخذتني .. 

عذراء ـ عدنا هنا شقة مرات نحتاجها بشغلنا ..

شمس ـ ممم خير خيرر بس ما فهمت شلون تحتاجوها 

عذراء ـ بعدين افهمج هسة مو وكتها .. 

بالي مشغول سامر وين راح وشصار هسة وشنو الي مفروض اسوي ..

وصلنا للفرع شايفته هالفرع ..

طبيت وصلنا للباب تذكرته هاي الشقة الي تزوجت بيها وظليت كم يوم اني ووعد .. 

كلت الها هاي غرفة زواجنا هنا صارت ..

كالتلي اي وعد حب تكونون وحدكم بعيد عن ضجة العزيمة والعرس وكذلك ماحب ياخذج هناك تعرفين مشبوهين ..

كلت الها اهااا فهمت .. 

طبيت وانعاد عليه شريط زواجي شلون جنت فرحانة وشلون جنت طايرة من الفرح لان اختاريت الاختيار الصح ..

الله شعور الانتصار وقتها شعور متتخيلة .. 

طبيت سبحت وبنفس ملابسي لبست ..

وكعدت بس جدا جدا قلقانة 

كلشي ممكن يسوي سامر 

وكلشي ممكن يسوون ذولي لان ما يخافون الله ..

اشتاقيت لـ #حوراء صديقتي ..

كلت اراسلها محتاجة دعم نفسي منها ..

راسلتها وحجيتلها الي جاي يصير 

شو طكت بوجهي وكالتلي 

ـ شعندج لهسة باقية لو حاليلج المكان ..

ـ انجبي مكدر اروح لان جاي يهددني واني ما ادري شنو الشي اليقصده بالتهديد .. 

ـ هاي حوبة #وليد

ـ اهووو هم جابت سيرة صخام بالقصة متكوليلي شذبحتيني بي كلشي وليد وليد .. 

ـ لأنج ضيعتي وهو ما يتضيع .. 

ـ كافي حوراء كافي راح اسد عود كلت اراسلج اغير مودي شوي انوب عكرتي بالزايد 

ياربي كل البشر صايرة تقهر .. 

اندك التلفون .. 

وعد يتصل .. 

يارب سترك شصاير ..

ـ ها وعد 

ـ انتِ وين ؟

ـ اني بالبيت الي تزوجنه بي

ـ اها شمعرفج بمكانه 

ـ اخذتني عذراء .. 

ـ وشكو تاخذج بهذا المكان بالتحديد 

ـ والله ما ادري اصلا ما اعرف المكان ولا حافظته الا وكفنا عنده يلا عرفته 

ـ اطلعوا منه لتباتون بي ..

ـ زين ليش 

ـ بدون ليش اطلعوا منه عالسريع ..

غلق التلفون بوجهي .. 

استغربت الصراحة ليش هيج من سمع احنه بهذا البيت الي عرست بي انزعج حيل ..

صحت عذراء وكلت الها ترا وعد اتصل ومن عرف احنه بهذا البيت زعل وكال اطلعوا منه .. 

جان تكول اهاا لازم عنده شغل بي بالليل ..

كلت الها شنو الشغل كالت عود افهمك بس نطلع ..

اهووو ماظل عندي صبر اني متت فضول اريد اعرف ليش هالبيت هذا شنو بي ليش هيج جاي يحسسوني هالبيت هذا هالكد خطير او بي شي مهم .. 

اندك تلفون عذراء واسمعها تكول ..

.. هلا وعد 

.. اي بالبيت 

.. يلا يلا هسة نطلع شبيك كمت تقسم

.. والله بعدنا توة طابين 

.. طلعنا يمعود شبيك ..

سد التلفون بوجهها .. شهالعصبية هاي تكول قابل كفرنا ..

اخذنا جنطنا والله اني ما شايلة ربع بس موبايلي فقط .. 

كالتلي عذراء هسة وين نروح ماعدنا مكان نروحله ..

كلت الها عندي صديقتي اسمها #حوراء نكدر نبات يمها اليوم بس مانطول اكثر من يوم لأن اهلها شوي متشددين .. 

كالت وين هاي كلت الها هسة اراسلها واحدد مكانها بالضبط هو اني رايحتلها بس اني مصيبتي ما احفظ الاماكن .. 

وراسلتها ومو فاتحة ..

وكالتلي عذراء دخابريها كلت الها ماعندي رصيد والله .. 

كالت دنطيني رقمها اخابرها من يمي .. 

سجلت رقمها وخابرتها وفتحت خط

ـ الو 

ـ هلا حبيبتي حوراء شلونج

ـ زينة منو وياي

ـ شمس شبيج

ـ شو رقم غريب

ـ اي مو رقمي المهم اريد اجي يمج اليوم

ـ الف هلا بيج حياتي هم مشتاقتلج من القصة القديمة ماتلاقينه 

ـ خوما #الشسمة موجود

ـ لا لا بشغله 

ـ تمام اجيتج اني وصديقتي وياي

ـ عين فراش وعين غطه ..

وكلت الها خوما #شسمة موجود ذمة بركبتج؟ 

كالت لا بشغله ميجي اليوم المبيت عليه 

كلت الها خوش ..

عذراء انتبهت كالتلي منو تقصدين كلت الها ابوها شوي معقد واخاف منه دا اشاقيها يعني لحوراء 

طبعا فريت السالفة عليها ..

واخذنا تكسي ورحنه الها ووصلنا وطبيت سلمنا وعرفت عذراء ع حوراء والعكس كذلك وكعدنا كعدة كلش جنت محتاجتها رغم دائما اغمز لحوراء لتحجي شي من اسرارنا القديمة واخاف تجفص ومن راحت عذراء تغسل وجهها كعدت عند حوراء وشاورتها ترى هاي اخت رجلي يعني انتبهي مو كلشي تحجين ..

اجت عذراء وكعدنا نسولف وسؤال وجواب عن الاحوال والبيت والشغل وسوالف نسوان يعني .. 

اجت ام حوراء وسلمت علينه وكعدنا نسولف جان تكلي ..

ـ تزوجتي ؟

ـ اي خالة وهاي اخت زوجي (حجيت هيج حتى تنتبه ماريد تكول شي كدام عذراء)

ـ هاا الله يسعدكم 

شو ام حوراء بسرعة تغير اسلوبها وياية وصارت سوالفها كلها بسامير واني ماجنت اريد السر الي بيناتنا يطلع لعذراء ..

وكالت ..

ام حوراء ـ والله ياعيني الزواج ستر بس كون ماتضحك ع كلب شاب وتتزوج نظيفة .. 

شمس ـ اي والله يا عمة او ممكن مجبورة او ما يناسبها يعني شتسوي البنت

ام حوراء ـ اي تنسحب من البداية 

شمس ـ اي صحيح ..

صار الحجي شوي ثخين .. 

حدما تدخلت حوراء وصاحت امها وكالتلها تعالي كلمتين وياج ...

وشاورتني عذراء .. 

اني مو مفتهمة شي شديصير 

كلت الها ..

لا حبيبتي ماكو شي مجرد نقاش ..

مثل الصدكت والما صدكت عذراء بس سدت الموضوع .. 

سووا عشا وتعشينا وغسلنا وكعدنا نشرب جاي بالهول .. 

سمعنا صوت زلمة ..

كبل لزمت شالي عالسريع وشمرته ع راسي 

و عذراء شي اعتيادي يعني هي سافرة ..

انفتح الباب الداخلي عود احنه بالهول يعني كبل نشوفه 

باوعتله وهو باوعلي وانصدمنا اثنينه ..

وليد فتح الباب ..

                الفصل الخامس من هنا