رواية عهر الرجال الفصل الخامس 5 بقلم وسام الفراجي

رواية عهر الرجال الفصل الخامس 5 بقلم وسام الفراجي 

وليد فتح الباب ..

احساس مختلط .. 

حب ..

عدم ثقة ..

ذكريات ماضي ..

ورقة بيضة مكتوب بيها بقلم الرصاص احبج شمس ..

كثير امور صارت كدامي ..

اضافة لأخر مرة وكفنا بيها واخر جرح جرحته بي ..

شافني تفاجئ .. 

نزل راسه كبل .. 

سلم علينه ومنزل راسه وطلع كبل .. 

عيوني صارت ع حوراء وفقدت وكلت الها مو كلتي مو موجود ! 

ردتلي .. والله هو كال اني رايح لشغلي الليلي ..

مدري ليش اجه هسة يجوز صاير وياه شي ..

عذراء ـ منو وليد وليش هيج مهتمة يجي او ما يجي 

شمس ـ لا لا ما فهمتيني بس قصدي حتى اخذ راحتي ..

حوراء ـ اي بس هيج

عذراء ـ بس عيونكم تكول غير هالشي 

شمس ـ شلون يعني

عذراء ـ مدري اريد افتهم منكم هو سألت حتى افهم 

شمس ـ ماكو شي ثقي بية شنو يريد يصير يعني 

حوراء ـ خلي اجيبلي ببسي واجي .. 

راحت حوراء بس احس عذراء انتبهت للشي الي صار وحرت بين اكللها وبين اغلس .. 

جان تكلي نكدر نطلع ناخذ فرة شوي بالسوك نشتري كم شغلة ونجي ..

كلت الها بالليل خاف ميقبلون اهل حوراء شوي متشددين كالتلي نجرب ونكللهم ..

من اجت ام حوراء كالتها عذراء وردتلها مايقبل وليد نطلع هيج وحدنا وانوب بالليل ..

عذراء ـ بس احنه وياها مو وحدها 

ام حوراء ـ وليد مبلغها اي شي تريده ياخذها بعيونه تشتري الي تريده بس بشرط هو وياها وماتطلع وحدها لازم زلمة وياها ..

عذراء ـ وشلون هيج متحملات 

ام حوراء ـ هو يغار هواي وميقبل ومن حقه هسة السوك كله فتن وشباب طايح حظها تبصبص ..

اني اسمع واعرف كلش زين غيرة وليد ..

تحجي ام حوراء .. 

واني اتخيل ايام كبل شلون جان يغار عليه من الهوى بحيث جنت كلش اضوج من غيرته الزايدة ..

لا تطلعين لا تحجين لا تخلين ابن عمج يشوفج او يسلم عليج هواي قوانين احس نفسي بسجن ...

طلع وليد مدنك وسحب نفسه سحب كبل عالباب يريد يطلع .. واني انتبهتله شلون متغير وتعبان اوف احس هالشي كله من وراي .. 

عيونه العسلية الي تخبل جانت وتسحر و بيها لمعة صايرة تعبانة وبيها هالات جوة عينه .. 

صاير اسمر هواي حاركته الشمس .. 

جان حنطاوي مملوح بس هسة اسمر كلش ضاربته الشمس هاي اكيد كلها من وراي اني الي خليته بهيج وضع .. 

امنيتي يصير مجال دقيقة اكله سامحني على الي سويته بيك ..

بس مستحيل يوكف وياي ويحاجيني اني اعرفه وليد وحافظته حفظ ..

صاحتله امه باجر تطلع مو لشغلك ؟ 

وردلها اكيد ..

باوعلي بنظرة من صار موضوع عن شغله ونزل عينه مثل الي خجل مني ..

وفتح الباب وطلع ..

اوف شجاي يصير وين صافنة اني ووين رجعت خليني اسيطر ع نفسي عالاقل مو كدام عذراء .. 

عذراء حجيت وياها شو متنگة عليه وترد بضوجة .. 

ومدري شفكرت هسة عذراء .. 

مدري افكر بسامر شنو ممكن يسوي ..

مدري بوعد شلون صار وياه 

مدري بية 

مدري بـ وليد الي كل الي يعانيه بسببي .. 

خابرني وعد جان يكلي 

ـ طلعتوا من البيت ذاك 

ـ اي طلعنا بس ليش ماخليتنا نظل بي 

ـ مو وكت اسألتج اجه اخوج وكم ولد وياه يمكن من ولد عمج وصارت عركة وامي اشتكت عليهم وهسة بالسجن سحلناهم كلهم 

ـ وليش سجنته صدك جاي تسولف وعد ؟

ـ سجنته لان مو خوش ادمي .. وهسة مشتكي ع اساس بيوت دعارة واغتصاب واجوا علينا وطلع الجبير مالهم معميلنه يجي كل مرة هنا تعرفه امي وسدينا الموضوع ..

ـ وهسة شنو اسوي ؟

ـ ظلوا بمكانكم لتجون للبيت مغلق حاليا حدما نشوف شلون

ـ بس احنه ببيت صديقتي 

ـ واذا 

ـ مو عيب

ـ صديقتج وعيب شني السالفة

ـ تمام تمام روح .. 

سديت التلفون اجت ام حوراء .. 

كالتنا امشن فوتن للغرف الجوة وليد معدته توجعه و راح يظل بالبيت مايطلع لشغله ..

رحنا للغرف الجوة وكعدنا جان عذراء تكول ..

عذراء ـ خالة وليد ابنج

ام حوراء ـ اي حبيبتي هو الوحيد النا ابوه استشهد وهو صغير تحمل مسؤوليتنا حدما صار شاب بعمر الورد

عذراء ـ الله يخلي متزوج لو لا ؟

ام حوراء ـ جان يحب وحدة و يموت عالتراب التمشي عليه بعدين عافته .. 

عذراء ـ ليش عافته 

ام حوراء ـ سالفة ماتنحجي ..  

اني احس نفسي تورطت واريد الموضوع يتغير .. 

و عذراء جاي تلح بالاسئلة وتريد توصل لشي ..

كلت لخالة .. 

حوراء وينها ..

ردتلي ..

تنظف المواعين وتجي .. 

وفتحت خالتي موضوع زواجها سابقا وشلون تزوجت .. 

وصارت تسولف عن الحصار ..

و اجت حوراء كعدت يمي وراحت خالة ام حوراء وظلينا بس احنه البنات .. 

وصرنا نسولف بيناتنا ..

حدما خالة صاحت حوراء تكللها جيبي براسيتول لوليد راسه يوجعه ..

كالت عذراء عنده العافية اني اعرف ادلك الراس وفروة الراس واخليها تهدأ اذا يحب اني حاضرة.. 

شو اني حسيت عذراء حيل شمرت نفسها عليه ..

حوراء راحت كم دقيقة و اجت كالت يكول لا تسلم هو معقد شوي ومايحب الاختلاط اعذريه 

اني ارتاحيت بالرغم جنت اعرف وليد مايقبل بس شو حسيت بنحاسة او غيرة مدري المهم الي يهمني متتقرب لوليد بشي .. 

ثاني يوم الصبح .. 

دكيت ع وعد حتى افهم اخر الاخبار .. 

وكلي .. 

ـ تحملي هالكم يوم عند بيت صديقتج بينما افض هالسالفة 

ـ زين سامر بعده بالسجن 

ـ اي الا اتنازل عنه اني 

ـ تنازل عنه ليش لهسة مخلي 

ـ مشتكي عليه كايللهم اختي الي هي مرته دا يجبرها عالدعارة

ـ اي وشصار

ـ امي تعرف الضابط وانقلب السحر عالساحر

ـ بس اني اريده يطلع 

ـ اصبري اصبري مراح يطير خلي يتأدب ..

ـ هسة شلون نظل ع كلوب العالم خلينه نروح عالبيت مالك ..

ـ انتظري عندي بي كم شغلة اخذهن عود اخليكم بي .. 

لـ #وسام_الفراجي القصة 

ما جاي اعرف سر هالبيت هذا شنو .. 

خبلني ليش مايخلينه نطب بي او نبات ..

شنو الاشياء للي ياخذهم يلا نكدر نطبله ..

خفت من هالبيت .. 

رحت استفسر من عذراء ..

وكلت الها عذورة فهميني عن عالبيت مالتكم الي طلعنا منه وعد شنو هذا وليش طلعنا .. 

كالتلي هذا البيت هو اغلى بيت ع كلب وعد بس ليش هي منكدر نحجي بيها هنا لازم بغرفة وحدنا مو هيج هوسة وناس طابة وناس طالعة ..

ـ زين احجيلي مو كلبي طك من الفضول 

ـ لا لا هذا البيت الشغل ماله والفلوس التطلع منه عدال اربع بيوت اليمنه كلها بس ليش وشلون ينراد مكان نحجي بي بس وحدنه ..

ـ تمام ولو الفضول قاتل .. 

سكتت ودوختني بالزايد معقولة هذا الحجي صحيح شنو سر هالبيت هذا ..

اندك باب بيتهم .. 

طلعت ام حوراء .. 

واسمع صوتها ترحب ويا هلا وغلا شهالغيبة وصوت ضحكة خالة ام حوراء صارلنا يومين ماسمعناها هيج تضحك .. 

وكعدن بالهول واحنه بالغرفة جوة وصار عندي فضول اعرف منو هاي ..

عذراء عادي عدها طلعت تسلم عليها ..

اني ظليت ..

اجت حوراء وسألتها منو هاي الي ترحب بيها امج 

كالتلي ..

هاي ام #زيد واخته سراب هذولي من خوال امي ..

و زيد يشتغل ويا وليد واجوا يسلمون ع وليد ..

كلت الها 

ـ سراب ما غيرها ؟ 

ـ اي سراب نفسها

ـ استغفر الله العلي العظيم منين تجيني هاي وين ما اروح بوجهي

ـ شلج علاقة بيها ما الج اي حق حاليا تسولفي عن سراب

ـ هااا صارت هيج

ـ اي طبعا سابقا نكول تغار منها لان تعشك وليد وتموت عالتراب الي يمشي عليه وجانت بيناتكم علاقة اما حاليا انتِ متزوجة و مايربطج اي شيء ويا وليد .. 

ـ بس اني اظل اكرهها 

ـ اكرهيها بس مالج حق تدخلي بحياة وليد ..

ـ تمام فهمت فهمت 

انغثيت كلش و كلت اطلع من البيت الاكيلي مكان احسنلي من هالطلابة .. 

اكرهها هاي سراب وبوكت جنت ويا وليد ع علاقة جنت احط براسها كل شغلة اجذب بيها ع وليد الا خليته يكرهها ..

شوي واجت عذراء .. 

جان تكلي عمرج خسارة ما طلعتي ويا هاي الي اجتهم هسة ينحطون عالجرح يطيب

كلت الها اهاا مبسع ما حكمتي 

كالتلي ..

والله هاي سراب كمر اربعطعش صلاوات ع محمد ادب وحشمة وخجل لج جمااال جمال بحيث تصير حمرة من احجي وياها .. 

سألتها ع مواليدها كالت 99 والله فد كتكوتة ..

اني انغثيت وكل لعذراء

ـ شبيج عذورة مشايفة بنات كبل شو كعدتي ربع ساعة جيتي تمدحي ترا هاي تتمسكن وهي تسوي نفسها مسكينة وخجولة والا مليانة عرامة اني اعرفها من زمان .. 

ـ شلون تعرفيها يعني هي هسة اجتي ..

ـ اعرفها هاي كرابة حوراء وصارت مشاكل بيناتنا من فترة 

ـ بس مبينة فقيرة ومن اهل الله 

اني غرت حيل وحاولت بكل الطرق اشوه سراب بعين عذراء بس عذراء قافلة تكلي طيبة وخجولة مستحيل تطلع مو خوش بنية .. 

اني ماريدها تجمل عذراء كدام وليد حرامات وليد ياخذها وليد يستاهل احسن منها .. 

والحمد لله وليد ما يطيقها من زمان بحيث اهلها كم مرة يردونه ياخذها وبس حلقة يكبعها وياخذها .. 

بس وليد جان يحبني اني ومايحب غيري متعلق بية يتخبل عليه يكلي انتِ تراسيمج حلوة تخبل هاي سراب سمرة واني اريد بيضة ..

ايام والله جان بيها يموت عليه .. 

هسة اني وياه بنفس البيت وما رفع عينه وشافني .. 

تعبان ومريض اكيد من ورا فراكي أثر عليه 

 ما جاي يتحمل صدمة اني تزوجت وبعد شي انتهى الله يساعده ..

اجت خالة ام حوراء كالتلي ليش كاعدة وحدج تعالي اكعدي ويا البنات بالهول..

خجلت منها وطلعت وانجبرت اسلم ع سراب وامها وسألت عن احوال ام سراب ..

وباوعت لسراب ..

ـ شلونج شراب اوو اقصد سراب اسفة

ـ ههههه عادي حبيبتي الحمد لله انتِ شلونج اخبارج

ـ بخير ونعمة 

ـ دومج يروحي ..

جان تكول خالة ام حوراء وليد يريد جاي .. 

حفزت سراب كالت اني اسويلكم كلكم وراحت للمطبخ تسوي الجاي وسألت خالة عالهيل 

حطت القوري عالنار و اجت ويانه ..

واني كلت الهم هسة اجي اشاهد وجهي بمي واجي ..

فتت عالمطبخ دورت عالملح بالكاونتر هنا وهنا عالسريع ..

لكيته وحطيت بالقوري ملح ورجعت كلشي لمكانه وطلعت عالسريع و بللت ايدي ووجهي بمي ورجعتلهم .. 

هي كل شوي رايحة للمطبخ تشوفه خدر او لا واني مسوية نفسي طبيعية ماكو شي ..

وكلت لام سراب تعرف بنتج تسوي جاي كالتلي ام بيت هاي بس حظ ماعدها ...

اني تعمدت اسألها هالسؤال كدام الكل حتى الكل يسمع .. 

وبالفعل جابت الجاي وصبت وودت كلاص لوليد ..

وشربناه وانه مالح وطعمه يلعب النفس وجان امها ترزلها كدامنا هاي شنو من جاي ..

ووليد صاح حوراء اخته كايللها هاي منو مسوي الجاي هيج يمعودين ..

واني اول ما شربته كلت يااا شهالجاي هاي كل عقلج سراب هذا حتى الصخول ماتشربه ..

وهي فشلت وتتأسف وما ادري عبالي شكر طلع ملح ..

وصارت هالصغرها كدامنا افففف برد كلبي ارتاحيت من فشلتها حتى انوب ما تسوي هيج حركات ..

شاورتني عذراء انتِ الج علاقة بالملح ؟

بصراحة استغربت شلون استنتجت هالشي .. 

كلت الها انييييي ؟ شلي علاقة هي سوت الجاي شجابني بالنص .. 

جان تكول عذراء بصوت شوي مرتفع ..

عادي يمعودين اني اغلب المرات احط ملح احسبه شكر تصير يمعودة عادي كومي سويلنا جاي مرتب اني متاكدة تعرفين كلش زين ..

كامت سراب وكامت وياها عذراء ..

وبصراحة تصرفات عذراء صايرة ماتعجبني .. 

وكلش اشوفها تميل لهاي سراب الحية وصار لازم اطلع من بيتهم ماريد هيج تقارب يصير. ..

شوي وتجيب جاي طعمه يموت ومهيل وريحته تنفنف ..

كلت بصوت اني ..

هاي اكيد عذراء سوته او علمتها هي متعرف وضحكت ع اساس اشاقيهم هو اني احجي صدك ..

جان تحلف عذراء ما لمسته للجاي كله ..

وضحكت امها لسراب وكالت اي اني اعرف بنتي وشغلها كلش زين ..

كلتلها خالة هي جاي قابل شسوت جان تكلي ام حوراء انتِ شحارك بصلتج ؟ ع كيفج بنفسج صار وجهج اصفر .. 

راحت ام سراب وام حوراء لوليد يسلمون عليه وظلينا احنه البنات وحدة محملة عالثانية .. 

جان عذراء تسأل سراب ..

ـ شعجب لهسة مو متزوجة 

ـ ما صار نصيب زين 

ـ ممم ابدد ابدد

ـ اي

ـ ما حبيتي 

ـ لا

ـ شو مو مصدكة احجي لتستحي 

ـ شوي وراح 

ـ ليش راح وين يلاكي احسن منج ..

ـ ما يريد وحدة سمرة 

كامت عذراء تدعيلها بالنصيب الزين .. 

جان تكلها كلام فاجئنا كلنا ..

كالت سراب ..

ما اريد نصيب زين جنت راضية بي حتى لو جان نصيب مو زين حتلو يضربني حتلو يحجي عليه ..

جنت واثقة شايلة اله كمية حب اكثر من امه اخاف عليه من عيوني اني .. 

حافظة تراسيم وجهه اوقات شغله اوقات الي يفتح بيها نت اوقات اكله ..

كل اكله يحبها كل اكله ما يحبها ..

كلشي يخص حياته جانت مهمة بالنسبة اليه .. 

طلبته من الله هواي لكن للاسف ما استجاب الف الحمد لله ما اعاتب قدر الله بس كرهت وجهي وسماري كرهته لأن هو السبب الي خله وليد يكرهني ..

وليد مايحب السمرة وليد يريد بيضة اعرفه كلش وكالها بوجهي انتِ سمرة اني ماريد هيج لون باجر شنو يكولون عليه هاي الي ماخذها عمت عينك ..

جرحني ..

ووصلت اله سالفة انو اراسل ولد وادزله صوري واني والله ثم والله ما عندي حت فيس او ماسنجر بس ما صدكني كال لأهلي عليه ووكتلوني وسحبوا تلفون مني 7 اشهر بدون تلفون الا امي توسطت اليه وشرطوا عليه احذف كل البرامج بس واتساب اخلي وبي بس العائلة وكم صديقة بموافقتهم ..

تشوهت سمعتي بعينه وهو بالاصل ما يريدني وراح اختار غيري جانت احلى مني .. 

سكتتها عذراء وكالتلي كافي كافي اعتذر ما عبالي هيج متأزمة الامور ..

كلت اني بعدما غثتني بسوالفها بس بصوت شوي عالي ..

 عاد كافي متاثرة كلش بالمسلسلات التركية شهالدراما هاي المالها داعي .. 

اندك الباب بالايد رغم جان مفتوح جان شوي شعري طالع عدلته عالسريع ظميته بالحجاب وكلت منو ..

تقدم واذا وليد واكف عالباب ..

جان يباوعلي وجنت اعتقد مشتاكلي ويريد يشوف عيوني الي دائما يغازلهن وبغازل بياضي كلت اكيد هسة بس يريد يشوفني بس يريد يحاجيني يتحجج بأي شي ..

 كالي جملة ما انساها ابد بحيث الكل يباوعلي بنظرة لهسة متروح عن بالي ..

كالي واني متحضرة يسلم عليه يسأل عني ..

شعندج هنا هذا بيت الزبال خاف يكولون عنج كاعدة ببيت ابن ابو البلدية .. 

تفضلي اطلعي برا البيت وحافظي ع سمعتج مثلما كلتيها سابقا الي .. 

            الفصل السادس من هنا