رواية عهر الرجال الفصل السابع 7 والأخير بقلم وسام الفراجي
" اني لا اصلي ولا اصوم ولا ساجد سجدة وحدة صارلي 20 سنة ولا اخاف ع عرضي ولا اهتم لأحد كلشي بحياتي عبارة عن فلوس حلال حرام ما اسأل وهذا فيديو كصيت الك 10 ثواني لليلة العرس بالبيت الي اخذتها بي و دزيتلك 10 خاف تستحي تكمل الفيديو يعني راعيت مشاعرك ..
بالنهاية كاتب هيج يوصل ابوج بعدج راكبة راسج ؟
والله يا جماعة مستحيل ينوصف خوف ذيج الثواني الرسالة وصلتني اني ..
فتحت الفيديو ..
جاي يحمل!
شهالنت التعبان هذا كلبي راح يوكف
صورة الفيديو كامرة عالية والغرفة غرفة عرسنا وبيها اني وهو يم باب الغرفة ..
دفتح يمعود اهوو يربي والله ما ظلت اعصاب ..
فتح اول ثانيتين طبيت اني وياه للغرفة ..
وجاي يحمل. ..
حمل 5 ثواني ..
بالتصوير جاي يسد بالباب ..
كملت 10 ثواني وعدته اشوفه من جديد ..
فستان العرس اني وهو بالقاط مالته ..
لحظة فتنا للغرفة وقفل الغرفة ووكف يحجي وياي والحمد لله 10 ثواني مابيها شي خادش مجرد مقدمات ..
كتله
ـ شنو هاي وعد ؟
ـ ليلة العرس
ـ اعرف ليلة العرس بس شنو هاي التصوير
ـ مصورتها الكامرات كل الليلة وسحبتها ..
ـ بس فهمني ليش هيج سويت وياي
ـ ماسويت شي صورتها للامان
ـ امان شنو
ـ خاف يجي يوم مثل هيج يوم تتمردين عليه او تنهزمي يصير وقت نشر هيج فيديو او
ـ او شنو
ـ او ترجعين عندي وتسوين الاريده بدون مايدرون اهلج وتكوليلهم اريد ارجعله هو زين وياي...
ـ اما اجي وتستغلني او تنشر ؟
ـ عفية الفهمانة
ـ وعد ليش هيج تغيرت عليه اني شمس الي عفت اهلي علمودك هيج تجازيني فكر زين
ـ الي تعوف اهلها علمود زلمة يجي يوم تعوف الزلمة علمود زلمة ثاني
ـ ما راح تنشرها اكيد متاكدة متكدر تدزها لاحد لان تخاف عليه وتحبني
ـ تجين ؟
ـ اجي بس ما اشتغل شغلك الي تريده ..
ـ بس ياس
ـ بس ؟
ـ اي والله وعد رجل بس ياس
ـ وتحذفه ؟
ـ اي والله
ـ شنو يضمن الي هالشي
ـ ضمان مليار بالمية تباتين وياه يوم واحد بالبيت الي تزوجنه بي
ـ زين ليش الا هالبيت
ـ هذا البيت اشتغل بي فلوس خير من الله
ـ زين شلون غير تفهمني
ـ هذا البيت كله كامرات مخفية اورط الضحية ويا بنت ليل والزم عليه مستمسك فيديو للي سواه وكلهم ناس اهل عوائل لو الهم منصب وابتزهم تنطوني لو انشر .. وهيج يدفع شكد الرقم الي اريده بس في سبيل ما انشر شي ..
ـ زين ما يسوولك شي
ـ لا لان مبلغهم اي شي يصير الي مقطع موجودة عند جماعة وياي عبارة عن شبكة وتصير بلسان كل العراف وتعرف العراقيين يموتون عالفضيحة بسرعة يصير ترند
ـ بس وحدك ؟
ـ مرات اشخاص ينطوني حتى اسوي شخص عدو الهم ضحية واسويلهم بس فلوس خير من الله اشتريت 4 بيوت الي عدنا هناك وهذا البيت وكيعان جبيرة ومعرض سيارات ومحلات ايجار وعايش ملك هي ونسة وهي فلوس
ـ زين اني مرتك ليش تخليني وياهم وتبتزني
ـ ما ابتزيت بس من شفتج هيج سويتي كلت لازم اعرفج اني محد يلعب عليه
ـ هسة شسوي اني ..
ـ ترتبين وضعج وتنهزمين من اهلج ونسويلنا ليلة ويا ياس بهالبيت انت وياه اريد الزمه من ايده التوجعه مليان فلوس هذا واريد اسويلي مقطع اله دام واثق بية ..
ـ بس ياس ؟
ـ اي والله بس ياس
ـ تمام بس متنشر شي
ـ اي والله كتلج كلام ثقة
ـ اتفقنا ..
الحمد لله كدرت اخلي يأجل المقطع ماريد احد من اهلي يشوفه رغم هو بالحلال بس شنو وجهي منهم ورا مايشوفوني ..
وكعدت صفنت اروح واستسلم اله افضل من الي يصير الي ..
طب سامر للبيت وشافني كاعدة عالموبايل جان يكلي شبي موبايل انطيني اياه ..
كتله مابي شي ..
كلي انطيني اشوفه
كتله امشي للغرفة احاجيك ..
كلي شتريدين
كتله انت اخوي واريدك تكون بظهري واريد احجيلك كلشي احس بي هسة ..
اخذته للغرفة وكعدت احجي وياه حدما كام وكتلني كتلة خلاني اشاهق ..
اجت امي تركض تفزعلي وكلت الها عوفي خلي يبرد كلبه عووفي تعااال اضرب سوي الي يعجبك ..
راح لـ برا شوي واجه شايل بيده عود مال سعفة رفيع شوي ..
امي وكفتله عالباب وكالتله احلفك بالله لا تضربها كلت لامي عوفي يمة عوفي خلي يسوي اليعجبه ..
فات ولزمني بالسعفة خلاني اشوف الموت بعيني من الضرب مارحمني دك ضرب حدما سمعنا صوت ابوية يكله يابشر عوووفها عووفها عوووفها
سامر ابتعد عني وهو طب كوة يمشي ومريض ولزم ايدي وكلي كومي كوومي ..
ابجي واني اكوم وكلي اكعدي هنا وباوع لسامر كاله لحد يضربها كدامي مااتحمل اشوفها تبجي
احس شي حار دا ينزل ع خدي حطيت ايدي باوعت لكيته دم من حاجبي مدري عيني ..
بعد كل الي سويته ابوي بعده ميتحمل يشوفني انضرب شكد حنين لعد ..
كلي روحي طلعي هدوم واسبحي وغسلي وجهج زين ..
طلعت بس غسلت وجهي و رحت لغرفة اختي شروق طبعا هاي شروق فد خوااافة وجبانة وما تدخل ابد بأي شي واذا تصير عركة او اي صوت تروح لغرفتنا تكعد خايفة ..
طبيت جان تكلي ..
شروق ـ هاي الي ماتطيع اهلها
شمس ـ بله اسكتي مو ناقصة نصايحج
شروق ـ اذا ما يجيني هو وعمامه ويتباهى بية كدام الجميع ويدك الباب ويطلبني من ابوي ما اتزوج من النت وعلاقة حب ماتعرفين مصيرها شنو ومتعرفين شنو طبعه بالواقع لان مراسلات تختلف عن الواقع كل الي يستخدمون النت يتصنعون اغلب شخصياتهم ومختلفة جذريا عن الواقع وبالاخير راح تنصدمين من تتزوجين وتشوفين الواقع غير عن كلام المحادثات ..
شمس ـ شكد حجيتي لخاطر الله
شروق ـ انتِ انسانة متعترفين بغلطج بعد كل الي صار
شمس ـ عيني توجعني اليمين ومشوشة مدري شبيها
شروق ـ اليحجي وياج مثلما يحجي ويا الحايط ..
دزيت رسالة لحوراء وكلت الها بعدج زعلانة عليه ترا اني مو قصدي الكلام الي ضوجج تعرفين بية شكد احبج وما اكدر بدونج يلا كافي زعل وتعالي نسولف واحجيلي شصار وراي
.. بصراحة لوما عندي فضول اعرف شصار واريد افهم التفاصيل الي صارت وراي فلا اراسلها بس مجبورة لازم افهم شجاي يصير ماريد اخلي وليد وسراب يتزوجون لو اعرف اسحرهم ..
ماخلي هاي الزركة تاخذ واحد مثل وليد ما تستاهله يروح يتزوج اي وحدة الا سراب ..
المهم ردتلي كالتلي مو زعلانة منج عتب بسيط وراح وهاي امي جاي تدور لوليد بنية وكلما تكله ع وحدة يرفضها ويطلع الف علة بيها ..
كلت الها ..
ـ طبعا وين يلاكي وحدة مثلي كاملة مكملة ..
ـ فدوة للصاك اروح
ـ وهاي العوبة بعدها يمكم
ـ قصدج سراب وامها لا راحوا
ـ من طردني شكالوا
ـ تريدين الصراحة سراب كالت ليش خطية يجوز هسة تغيرت
ـ شوف شوف شلون تتنغوج جدام وليد حتى تبين مسكينة
اخذت منها كل المعلومات الي اريدها تقريبا الا شغلة وحدة كالتلي حلفني وليد ما اسولف ابد عنها الا تصير
متت ردت بس اعرف شنو هالشغلة ماقبلت تحجيها ..
بس كوليلي تخص شنو ماحجتلي متت فضول ..
كملنا حجي واجه سامر صاحني وكلي الحگيني يمة شيريد مني ..
لحكته ورجل ورة ورجل كدام خايفة منه لا يكتلني مرة ثانية ..
فوتني بالغرفة وكلي عندي كم سؤال جاوبيني بكل صراحة .. وصار يستفسر ويسأل ويسأل حدما دك تلفونه ..
فتحه واسمعه يكول ..
.. عليكم السلام تفضلي ..
.. هلا بيج شرايدة
.. اي عرفتج شرايدة
.. ليش ؟
.. لا ممنوع تجين وتقربين هنا
.. واحنه شعلينه خيتي ماناقصنا مشاكل
سد التلفون بوجهها ..
شمس ـ منو هاي ؟
سامر ـ عذراء تريد تجي افندية عالبيت
شمس ـ ليش تجي ؟
سامر ـ تكول مكدر اعيش بهيج بيئة بعد وهسة وعيت ع نفسي
شمس ـ اي شكلت الها
سامر ـ مثلما سمعتي ممنوع تجين
شمس ـ زين ليش ؟ يجوز تتوب ع ايدك اجرك عظيم
سامر ـ وما فكرتي بأهلها شنو ممكن يسوون ؟ وشمدرينه صحيح مو لعبة شغلي عقلج
شمس ـ لان اني حاسة بيها تريد تعوف هالطريق
سامر ـ الي يهمني اخذتج من هالعائلة وبعد عندي ثارات وياهم ونشيل فد نوب من هنا لا من سمع ولا من عرف
شمس ـ بعدك مقرر تسوي الي كلته
سامر ـ هواي حيل جدا
شمس ـ متخاف ظهرها قوي وممكن تنقلب عليك
سامر ـ اذا نظل خايفين نموت افضل
عفته وخايفة من الي يريد يسوي وسولفلي اياه ..
اتصل عليه وعد وسامر بعده يمي ..
ماجاوبته ..
من كمل سامر خابرته
كلي ايمت تجين موعدنا بالليل ويا ياس واخذته للبيت بس ننتظرج
كتله ساعة 12 اني يمك ..
الساعة 11 لابسة مكملة وصورتله نفسي وكلت اله اني جايتك بالطريق ..
جان يردلي اوف شكمر طالعة هنيالك يا ياس اليوم ..
طلعت بدون ما تدري لا امي ولا شروق ولا ابوي ..
بخلسة طلعت ..
قفلت تلفوني
طالعة لبيت وعد!
التكسي اعرفه ..
سامر اعرف مكانه ..
جاي اتخيل السيناريو الي يصير بس لا يصير قتل او ينصاب احد وتصير سالفة جبيرة ..
رحت وصلنا لنهاية الفرع ..
نزلت من التكسي ووكف ابو التكسي بنهاية الفرع يراقبني ..
توتر فظيع مو طبيعي ..
خايفة يفشل كلشي ..
دكيت الباب ..
فتحه وعد .. لزمني حضني وكلي ..
واخيرا صرت تفهمين شغلي لو هيج الزوجة لو بلا ..
كتله فدوة حبيبي وينه صديقك ياس ..
صوت سيارات طبكن عالباب ..
لزمني حط ايده ع رقبتي و صد عالباب ..
انضرب الباب وصار صياح ارفع ايدك ارفع ايدك لك ..
وهو يكلهم اذبحها والله اذا تقربتوا ..
ما جان شايل شي بس بيده خانكني وصار يرص ع رقبتي اكثر ويكلي ..
سويتيها يولي سويتيها ..
والله الا اندمج ..
طفر عليه واحد من الجنود ووكعنا اني وياه والجندي وفك ايده عن رقبتي وكمت ركضت ادور سامر
سامر واكف ع باب البيت ..
حضنته وكلي امشي روحي ويا ابو تكسي ارجعي طبعا متفقين وياه هو من جماعتنا يصير ابن عن ابوية ..
مشيت جان يصيحني تعالي تعالي ..
اخذني من ايدي كلي طبي كوليلي ياغرفة ..
كلبجوا ايد وعد طبعا وهو بين اثنين من الامن كمز عليه سامر و دفره ببطنه وصار يضرب بي والامن فكوه من ايده
جان يكوللهم تلفونه اخذوه منه بي كلشي ويبتز بالعالم ..
اخذوا تلفونات اثنين عنده وتلفون صرصر ..
وصعدوا للبيت تفتيش ..
ولكوا هذا ياس وهم كتلوه متلة زينة وصعدوه
وفككوا الكامرات المخفية الي بالبيت كله ..
واخذوا ياس للسيارة
واخذوا وعد للسجن واخذوا سامر وياهم مدري ليش ..
اجيت اني ويا ابو التكسي كرابتنا ..
فتت للبيت واني ما ادري شسويت وشنو صار ..
وليش هيج وصلنا لهذا الحد ..
فتت لكيت كدامي ابوي حاط كرسي وكاعد ينتظرني ..
من شافني وكف ..
شايل صوندة بيده
ـ وين جنتي ؟
ـ طلعت اني وسامر بشغلة
ـ تعلمتي ع طلعة الليل ؟
ـ ها يابه بعدني ترباتك
ـ وين جنتي ؟
ـ اتفقت اني وسامر نشتكي عند الامن الوطني ومحاربة الابتزاز ونطلعهم ويانه ونسويلهم فخ ويشوفون شجاي يسوي من مصايب وبلغونه نستدرجه بالجرم المشهود وهالشي مايصير الا بوجودي ..
ـ هسة عرفتي الي مايطيع ابوه وامه يضيع ؟
ـ اي عرفت
صوت سيارة شرطة وطوط طوووط واندك الباب ..
امي عالصوت طلعت متدري شصاير ..
طلع ابوي عالباب طلعوا يريدوني ..
وياهم سيارة قسم النسائي ..
اخذوني وامشي اشوفها من جامة السيارة تصيح ..
طلعوا يريدون مني اعترافات ومن الألف للياء
وطلعت الهم حتى المحادثات والتهديدات عن الفيديو وشافوا كل كلامه وسجلت ايفاد مالتي واقوالي
سامر طلع ثاني نهار وياس يومين وطلع
واما وعد فلازم يتحاكم بقضية ابتزاز وتشهير ..
طلع القاضي شريف ابن 16 شريف يكول اجتني واسطات ليوم الواسطات عليه وكلها ثكيلة ومبالغ حتى ما احاكمه بس رفضت مثل هيج واحد لازم يتحاسب ونخلص المجتمع منه ..
تصادرت موبايلاته وانحكم 5 سنين وبالفلوس والواسطة انحكم سنتين وطبعا بعدما شلعوا كلوبنا ..
استنسخ و هويتك و تعال و روح و سجل اقوال و استفسارات و الخ ..
هنا ابوي بعد مايحترمني ابد ولا يقدرني ..
واشوفه شلون ويا اختي شروق يفرق بيناتنا ..
تطلكت منه وافتكيت هم بعد الف روحة وجية ومعاملات وقال وقيل ..
جان سامر يكول لازم نبيع ونشيل من هنا لان صار البيت معرض للخطر لان اوراق تهديد كثرت علينا و سامر ميكدر يطلع براحته لان ذولي اهل شر ..
اخر شي دزوا رسالة كاتبين بيها الكم اسبوع اذا وعد ظل بالسجن احسبوا سامر ميت ..
هنا قرر ابوية يعوف كل هالمشاكل ونلملم جناسينه والتموينية وبطاقة السكن والمستمسكات كلها حطها بجنطة واتفق ويا كرايبة ابو تكسي ياخذنا لخواله جدتي هناك بغير محافظة نروح بليل اظلم وعفنا البيت كله الجمل بما حمل
اجرنا عند بيت خوال ابوي ببيت وكعدنا وخلصنا منهم وهسة كلت يا الله لازم ابدي حياة جديدة واعيش بشخصية جديدة واعتبر من الي صار...
اسمع كلام اهلي ..
اترك العلاقات المتعددة بالنت ..
ما اثق بأحد ..
اترك الحسد والانانية ..
سامر اشتغل .. وعد انسجن ام وعد وبناتها حسب ماعرفت رايحات للشمال خايفات يجيهن السرة ..
وصلتني رسالة ليلة الاربعاء من حوراء خلتني اشتعل نار وشرار وتأكدت من بعدها مهما حاولنا وجاهدنا حتى نشوه احد ونبعده عن طرف ثاني اذا الله كاتبله نصيبها حيكون نصيبها لو الف عثرة ..
المهم الرسالة الي دمرتني وعيشتني بحزن وندم عضيت بيها اصابعي ندم ..
كاتبة بيها
" معزومين باجر انتِ والاهل كلهم ع عرس وليد وسراب"
نهاية_القصة
تركت لكم العبرة من القصة اكتبها بأسطر وسيختار الاشراف اقرب وصف للقصة والعبرة منها لنشرها في يوميات الصفحة ..
