رواية توبه الفصل السادس عشر بقلم ليل ادم
بعد مرور أربع أيام من الزواج
مها : اي ده انت بتلبس ورايح فين كده
توبه : نازل اشوف شغل حلو كده علشان انتي عارفه مصاريف البيت
مها : طب أنا عايزه اعرف انت ناوي تشتغل اي
توبه : اهو هاخد لفه كده اي حاجه تيجي على سكتي أنا ونصيبي
مها : طب ينفع تسمع كلامي للآخر
توبه : لو كلامك ليه علاقه ب أبوكي والفلوس يبقا بلاش تكملي كلام علشان والله العظيم هزعل منك
مها : أنا برضوه هقولك كلمه زاي دي تصدق والله زعلت منك
توبه : يابت بس بقا وانتي قمر كده على الصبح وربنا اقعد ما اروح في حته وكده كده معايا ٨٠٠ جنيه ( وبيضحك)
مها : يا حبيبي انا عايزاك تعرف أن كرامتك من كرامتي وانا عمري ما هقولك حاجه تقل من كرامتك
توبه : ربنا يخليكي ليا يا حبيبتي يارب
مها : المهم بقا اسمع و متقطعش كلامي لحد ما انتهي اتفقنا
توبه : قولي
مها : بدال ما تدور على شغل وانت بتحب شغلك العربية بتاعتي خدها اشتغل عليها و ياعم عايز تعتبر نفسك شغال عليها موفقه عايز تعتبر صاحب العربية ياريت وحتى اكون عملت حاجه بدال عربيتك اللي بسببي باظت
توبه : يا حبيبي افهمي أنا مش ممانع و هعمل معاكي زاي ما بعمل مع عم سراج و تخدي ايجار العربية كل أسبوع بس أنا راضي زمتك حد يشتغل اوبر ب عربيه مرسيدس هل ده يعقل لا واي كمان عربيه مودل السنه ( وبيضحك)
مها : ياعم هو مش كده كده ليه تمن الرحله اللي هيدفعه هو ماله هو العربية نوعها اي امسك المفتاح اهو ياله بقا يا توبه علشان بجد هزعل منك
توبه : بس بشرط
مها : نعم
توبه : كل أسبوع ليكي حق إيجار العربية
مها : طب هو أنا عم سراج
توبه : لا طبعا هو عم سراج قشطه كده وقمر كده يخربيتك على الصبح
مها : بس بس يا توبه انت رايح شغلك
توبه : اعملك اي بس ما بصراحه شفيقه عندها حق مفيش حد يصحى من النوم حلو كده
مها : بكاش بشكل
توبه : ياله سلام
مها : طب استنا اقوم اعملك فطار
توبه: لا خليكي أنا هاخد القهوه من تحت وأنا ماشي
مها : قهوه اي لا افطر الأول
باب الغرفة بيخبط
شفيقه: واد يا توبه هات مها وتعالى أفطر
توبه : (فتح باب غرفته وخد شفيقه بالحضن) عرفتي منين اني نازل أنا مرضيتش أصحي حد منكم
شفيقه: وغلوتك عندي حسيت انك نازل النهارده الشغل
توبه : ربنا يخليكي ليا يا شفيقه
الأم: ويخليك ليا يا حبيبي و يفتحها في وشك يارب وانتي يامها ربنا يرزقك ب الذرية الصالحة اللهم امين
مها : اللهم امين يا حبيبتي
توبه : طب أنا خدت سندوتش انزل أنا بقا
مها : طب كمل فطارك
شفيقه: ده كده فطر هو توبه كده
توبه: سلام
مها : سلام يا حبيبي
شفيقه: كملي أكل يا مها انتي رايحه فين
مها : أكلت والله يا ماما
شفيقه: لا خليكي قاعده نقنقي كده جمبي وانا قاعده
مها : حاضر يا حبيبتي
شفيقه: الوقتي اختك اميره تصحى وتقعد تفطر بدال ما أشيل الأكل و ارجع أحطه تاني خلينا خلينا
مها : (بتضحك) كده الاكل يخلص من كتر النقنقه يا شفيقه
شفيقه: اي يعني اعمل غيره الف هنا وشفا يا حبيبتي
مها : تسلم ايدك يا ماما شفيقه
شفيقه: عارفه يا مها أنا فرحانه بيكي اوي اوي
مها : وأنا والله يا ماما شفيقه حاسه انك امي بجد
شفيقه: أصل أنا طول عمري كان نفسي في بت تانيه تكون صاحبه اميره وكنت مرعوبه من فكره ان توبه ياخد وحده تقوي قلبه على أخته بس بيني وبينك لما دخلتي وسطينا و شوفت فيكي طيبه قلبك و حبك ل اميره تمنيت من ربنا انتي وتوبه تكونوا ل بعض أصل الواد توبه ده غلبان اوي والله بس هيا قفله معاه إنما هو يبان ليكي جامد كده و ناشف بس قلبه حنين واللي في أيده مش ليه يحب يعمل الواجب مع اي حد مهما كان مين اوعي تفتكري يا مها أن احنا ممكن نطمع فيكي يا حبيبتي أو في فلوس والدك
مها : ينهار ابيض لا والله ابدا
شفيقه: من غير ما تحلفي يا حبيبتي بس أنا عايزاكي تكوني متأكدة أننا بنحبك ل شخصك مش علشان اي حاجه تانيه ونفسي تفضلي كده معايا طول عمرك
مها : ( قامت حضنت شفيقه من ضهرها ) ربنا يخليكي لينا يارب يا شفيقه
اميره: اي ده من غيري
شفيقه: مش بقولك أشيل الأكل و ارجع أحطه تاني أديها جت
في جانب آخر
توبه : يا صاحبي بقالك ساعه وقف عمال تبص في العربيه و ترجع تبص في التليفون تبص على العربية وترجع تبص على التليفون هتركب ولا لأ
العميل : هو حضرتك اوبر
توبه : اه والله اركب
العميل : ياعم تاعب نفسك ليه كده ما تبيع العربية وعيش ملك
توبه : والله قولتلها بلاش الموضوع ده محدش هيصدق اني كحيان ومش لاقي أكل
العميل: هيا مين
توبه : ياعم بكلم نفسي اسكت انت
العميل : ياعم خلاص
توبه : عم يعني مركبك عربيه مرسيدس مكنتش تحلم بيها رايح اوديك مشوار ب ٩٠ جنيه وانت مفيش في جيبك ١٠٠ جنيه والآخر تقولي عم
العميل: (بيضحك) ياعم اقولك اي طيب
توبه : ولا تقول ولا تعيد انت توصل مشوارك تحط النجوم بتاعتك وكده حلوه اوي
العميل : ياعم النجوم اهي كلها من قبل ما اوصل
توبه.: هات بقا كمان ٩٠ جنيه و انزل هنا خليك جدع
العميل : طب خش آخر الشارع حتا
توبه : يرضيك ياسطا ادخل الشارع العار ده بالعربيه دي
العميل : طب بص خطيبتي وقفه في البلكونه روح لحد عندها كده و أعملي شكل
توبه : انزل اقعدي جمبي طيب هعملك دخله موت
العميل : بجد والله
توبه : عيب عليك انزل تعالى
العميل: ماشي اهو
توبه : ( دخل بالعربيه و كلاكسات كتير لحد ما دخل تحت البيت ) اسمك اي قبل ما تنزل
العميل : اسمي نور
توبه : سيب الفلوس و انزل ياعم نور
نور : حبيبي والله خد ١٠٠ جنيه اهي مش ٩٠
توبه : ( بصوت عالي) يا نور بيه يا نور بيه
نور : اي يا اسطا ما الفلوس معاك
توبه : ( اسطا اي الله يحرقك أنا برسمك ) اروح أنا على الشركه يا نور بيه
نور: اه روح انت الوقتي
توبه : ياله في داهيه ( وخرج من الشارع وفتح البرنامج من تاني )
توبه : ( يارب زبون حلو وشيك كده في نفسه بدال اخويا نور تعالى انت ياعم )
العميل : انت اوبر
توبه : اه اركب
العميل : بسم الله ماشاء الله عربيتك دي ياسطا
توبه : لا سرقها
العميل: أنا قولت كده برضه
توبه : ( ركن العربيه) انزل ياعم انزل الله يكرمك
العميل : ياعم بهزر معاك خليك رويح
توبه : خلاص خليك بس الشارع اللي انت رايح في ده كله مطبات صح
العميل : لالا أسفلت الوقتي وبتاع
توبه : خلينا نشوف
في جانب آخر
محمد بيه: ألو
مها : بابا عامل اي وحشتني اوي
محمد بيه: انتي عامله اي يا حبيبتي
مها : الحمد لله كده متجيش تقولي مبروك
محمد بيه: حقك عليا أنا فعلاً المفروض كنت جيت
مها : ولا يهمك يا حبيبي
محمد بيه: اي الدوشه دي انتي فين
مها : بتفرج على فيلم أنا و اميره
محمد بيه: فين في السينما ولا اي
مها : لا في البيت هنا
محمد بيه: وتوبه فين
مها : في الشغل اول يوم لي النهارده
محمد بيه: نزل بسرعه ليه كده انتي مضيقا العريس ولا اي
مها : لا والله دا توبه ده حبيبي هو بس قالي هينزل باقي الأسبوع ده كل يوم تلات اربع ساعات ومش هيتاخر علشان مصاريف البيت وكده
مها : ( تسلم ايدك يا ماما شفيقه)
محمد بيه: بتعملك أكل ولا اي
مها : اه كانت بتعملي فشار أنا واميره
محمد بيه: مرتاحة معاهم يا مها
مها : اوي اوي بيحبوني
محمد بيه: هو انتي في حد يعرفك ميحبكيش يا حبيبتي
مها : ربنا يخليك ليا يا حبيبي
محمد بيه: ياله سلام
مها : سلام يا حبيبي صحيح جاي امتا
محمد بيه: خليها ب ظروفها
مها : اوعي تسافر من غير ما اشوفك
محمد بيه: لا طبعا هو أنا أقدر
مها : سلام يا حبيبي
محمد: سلام
في جانب آخر
توبه : هو ده اللي مفيش مطبات
العميل : ياعم احنا وصلنا اهو
توبه : انزل ياعم انزل
تليفون توبه بيرن
توبه : ألو
محمد بيه: انت فين يا توبه
توبه : في طريق مصر اسكندريه
محمد بيه: طب تعالي عايزك
توبه : من عيوني بس هو أنا مش هشوف شغلي بقا هنقعد كل شويه تعالى عايزك ( وبيضحك)
محمد بيه: ياض أخلص وتعالى وجعت قلبي
توبه : سلامه قلبك جاي اهو ضاعت الورديه
