 |
رواية ليلة الحنة الفصل الثامن عشر بقلم بسمة البياتي
شوية شوية رجعت الحركة الاطرافي صرخت من اعماق روحي لكن هالمره صرختي طلعت رجت زواية الغرفة امجد فز مرعوب أجه يمي لزمت تشيرته ورجعت اصرخ بعلوا صووتي.
أمجد مايعرف شيسوي يضرب على خدي يحرك بيه يريدني اصحى عباله مو بوعيي اخير شي خله أيده على حلگي
أمجد... زلال اصحييييي باوعي بعيوني وتنفسي من شنو خايفة هياني يمج بطلي صراخ حتى الميت بگبرة راح يفز من صوتج
.. دفعت ايده اناششغ دموعي شلالات اندگت باب الغرفة صوت وليد ووصال
... خرررب غيرتج بس لا عبالهم سويتلج شي
.. راح فتحلهم الباب فاتت وصال تركض ووليد
لزم امجد يحقق ويا
وليد...ششبيها احجي شسويت للبنية
وصال... هاي تاليها امجد تأذيها هاي عود انت العاقل مع الأسف عليك
أمجد.. يابة على كيفكم هاي گدامكم سألوها اذا واصل يمها گعدت حلمانة وتصرخ لا ماد أيدي
ولا طاخها
وليد.. أبوية ديصيح روح حاجي خطية نهبطوا
زلال... طلع امجد يحاجي خالي بقيت حاضنة وصال وأبجي
وصال...ياعمري بسس فهمينا شبيج من ششنو هلگد خايفة
... ما ادري ماجاي أگدر انام عفيييية وصال أريد ماما
... دبطلي بجي بالأول هسه ماما نايمة وين تروحيلها صبري منا للصبح واذا خايفة اني أبقى يمج
.. هزيت رأسي بمعنى ما أريد انطتني مي اشرب من هدءت عافوني وطلعوا رجع امجد
... شلون صرتي بعدج خايفة
.. هزيت رأسي ورجعت ابجي
.. أستغفر الله على شنو هالبجي
.. أريد ماما الله عليك وديني البيتنا
.. زلال باوعي للساعة وين أخذج
اذا رحتيلهم تخوفيهم ابقي والصبح روحي
... معلييييه أريد ماماااا
.. طفله خوما طفلة شششششلون ورطه هاي انعل ابو الزواج لابو اليزوج ويورط نفسه
... خفت من عصبيته جريت البطانية النص وجهي وأبجي بشهگة وصوت مكتوم
... كافي بجي لا ابتلي بيج خلي اخابر أخوج النذل بلكي يجاوب
... عرفت يقصد علاء هما اصلاً ميتحاجون
شال التلفون بعصبية اتصل
امجد ظل ينافخ بغضب لان ميجاوبه
الظاهر علاء جاوب ومدري شگاله
عاط بي امجد
... ديني گامز لاتخليني أسسسب اجدادك امششي أفتح الباب
طبگة بوجهة نتر بيه يلا گومي
شلت البطانية گمت على السريع امشي واتعثر دايخة وحيل مابيه
ردت اوگع من الدرج لزمني
خفت لا يرجع يرزلني لان صاير بارود هم زين سكت
طلعنا من بيتهم دخلنا البيتنا علاء فاتح باب المطبخ وواگف
صرت گدامة شكله مايقل عن شكل امجد بالعصبية لكن من شافني وعيني أجت بعينه
طلع ايده من جيب التراكسود صفن عليه صارله هواي مشايفني اخير لقاء بينا بيوم الضربني وخلع كتفي
درت راسي ما اريد أشوفة هو واركان سبب أذيتي
علاء... ششنو هذا حالها لك سساقط شمسويلها
امجد.. امششي فوتي
علاء... ***مو جاي احاجيك
... كلمة زايده اطلع ضيم گلبي بيك واحفرلك گبر اهنا بالحديقة
... شوية ويتلازمون من الياخة
نترت كافيييي ترى مليييت من المششاكل
امجد ارجع للبيت اني رايحة يم ماما
ماسمعت شحجوا عفتهم وطبيت جوة
فتحت بابا الغرفة على كيف ماما وبابا نايمين وحسوني ابن عادل بنصهم
گلبي مانطاني اگعدهم ادري راح يخافون
ردت اطلع بابا حس رفع رأسة
بعينه النوم عباله ليال
گال هاا بابا رايده شي
مجرد سمعت صوتة الدافي بجيت بصوت دفر الغطى اجه عليه
.. بابا زلال هاي أنتي ششبيج يابة صاير شي
...ماما هم گعدت ونخبصوا بيه
بقيت اروح من حضن الحضن وابجي بصوت عالي
حورية.. مو حرگتي گلبي حاجيني منو وياج ليش تبجين امجد مسويلج شي
.. هزيت رأسي بالنفي
محمد.. لعد ششبيج
... نعسانة وما اگدر انام بس اغمض شي يخنگني أريد ابقى يمكم
نمت بحضن ماما وبابا مخلي ايده على رأسي ويقرأ قرآن
ليال.. غرفتي قريبة من غرفة اهلي سمعت صوتهم عفت فراشي طلعت اشوف شكو لگيت زلال بحضن ماما العيون دم من البجي
سألتهم شبيها گالوا خايفة ما جاي تگدر تنام
زلال.. شلت رأسي من صدر ماما
عفية ليال روحي شوفي امجد وعلاء وينهم
اخاف لايتضاربون لان عالگة بينهم
محمد.. امششي شوفي الخبل وينه واذا صاير شي صيحيني
ليال.. اي تمام رايحة
طلعت ادورلهم مو بالمطبخ وكفت ومديت راسي من الباب لگيتهم گاعدين بالحديقة بهالبرد
يا الله بلكي ترجع المياه المجاريها بينهم
امجد شافني سألني زلال شلونها
.. الحمدلله شوية احسن
... رحمه الأهلج تگدرين تسويلي كوب جاي رأسي راح يطك من خبال اخوانج
علاء... ليش ماتنجب ماعاجبينك شجابك علينا
... قسمتي السودة خلتني اعاشر نذل مثلك
وكملتها اختك
ليال.. زلال جبانة من زمان هيج حتى لو تشوف حلم عادية وشوية تخاف عياطها يوصل السابع جار
... هاك استلم تالي متخبل من ورأكم
علاء.. طبك طوب
.. ومحمد راح ادفرك
ليال.. ابتسمت المناگرهم اشگد احب صداقتهم
ربي يصلح بينهم حرامات يضيعون عشرة عمر بسبب الحقد والمشاكل
خليت القوري على النار ورجعت للغرفة
بلغت بابا وزلال علاء وامجد بالحديقة ومن شكلهم الظاهر متراضين
محمد...الله يهديهم ويرجع العلاء عقله
. رجعت صبيت الجاي انطيتة الهم
زلال الحمدلله وأخيراً گدرت تنام
اني هم رجعت نمت لان عندي دوام
زلال... فزيت الفجر عطشانة ريگي ناشف
عفت حضن ماما گمت على كيف
امشي واستند على الحيطان طلعت من الغرفة فتت للمطبخ اخذت گلاص أريد اترسة مي
الدوخة عمتني گمت ما أشوف بعيوني
گعدت بالگاع استندت على الكاونتر
لا اگدر أرجع أگوم ولا اگدر اصيح جسمي يرجف مثل السعفة روحي ساحت
صحت بصوت خافت ليال لييال
ما اعتقد راح تسمعني
يمكن علاء بعده لهسه منايم سمعني وأجه
شافني بالگاع راد يگومني ما اگدر اتحرك
الثقل البجسمي مو طبيعي
غمضت عيني حسيتة شالني داحس بكل هذا بس ما اگدر اتواصل ويا كلش فقدت
ليال.. اجه علاء گعدني گال گومي زلال متخربطة
تعالي وياي
فزيت ششنو شبيها
.. اششش نصي صوتج لايسمعون
ما اعرف لگيتها واگعة بالمطبخ
... لأزم ماما تعرف اذا گعدت وملگتها تتخبل
...دروحي گعديها بين ما اجيب السويج
.... طلعت اركض ندهت ماما على كيف خطية صايرة بيها خوفة فزت مرعوبة باوعن المكان زلال ملگتها
... زلال وين
... على كيفج لاتخافين شوية متخربطة راح ناخذها اني وعلاء للمستشفى
ماما عاطت وفززت بابا وصارت هوسه
ماقبلت تبقى لبست العباية وطلعت تركض
بابا راد يجي علاء بالگوة قنعة يبقى
حرت وين اخلي غزل اضطريت ادك باب غرفة عماد ورغد ابقيها يمهم
انوب عماد هم راد يجي وعلاء گالة ميحتاج
طلعنا للمستشفى وزلال مثل العجينة بيدنا
لاحس ولا نفس. ماما خبصتنا بالبجي
علاء كم مره راد يصعد على الرصيف
وصلنا للمستشفى شالها ونزلها فحص وروحوا وتعالوا طلع دمها حيل قليل تحتاج دم
رحنا اني وعلاء تبرعنا كل واحد بطل
اثناء ما دا اتبرع علاء گال
شوصل اختج الهاي الحالة ماتريده ليش اخذتة ليشش
... تريد الحق لو أبن عمه
... الغي شكو
... انت دفعت زلال الهذا المصير
.. اني؟!
.. اي انت شفت حالك شلون صرت ووين وصلت شغلك الشاغل تلگي أركان وتحاسبة
.. هااا يعني غلطان لأن أريد اخذ حقها
بسسسبب الگو*** الي خلى اليسوى والمايسوى يحجي عليها لج خلييييني بضييمي
.. اششش يمعود ششو نسيت نفسك ترى احنا بمستشفى
سكتنا اثنينا الفاس وكع بالراس العتب والملامة ميغيرن الواقع
التلفون احترك من الأتصالات كل شوية احد يتصل يطمئن للظهر يلا رجعنا للبيت
مهدود حيلنا من التعب وهي سودة عليه شحالها
بس نومناها بالفراش راحت بسابع نومة
سمعت من وصال وخالة كوثر أمجد زعل يگول هاي ثاني مره محد ينطيني خبر لو بيتنا بعيد بيها مجال مو حايط على حايط بالكذب تلفون مايرفعون ويگولون راح نأخذها
من رجعنا حتى جية ما اجه اطمئن عليها
بابا انطاه الحق گال المفروض تبلغوا زلال على. ذمتة اذا تطلع منا لهنا لأزم بعلمه
حورية...يارجال قابل ماخذيها تتونس ماشفت حالها منو بينا بساعتها عقلة برأسه ويفكر
بالواجب وحلال وحرام
محمد..الحق يبقى ويا
بعدين احاجي واطيب خاطره
ليال... علاء رجع يحجي ويا بابا وماما
فعلاً رب ضارة نافعة
العصر خالة كوثر جابت زوج اختها يقرأ على زلال
زوج اختها سيد
خالة گالت ما شاء الله أيده بيها شفاء هواي مجربينا
من بده يقرأ كل شوية تجفل وجها صار أصفر
ماتحملت ظلت تبجي
بالگوة خلته يكمل
گال هاي خايفة لو هامليها تتعرض للمس
اخذ مي قرأ عليه وگال راح اسويلها حجاب ادزة الها
سودة عليه هواي تأذت هم تعب جسدي ونفسي
حقها تخاف الصار بيها مو قليل كل يوم والثاني متعرضة الهبطة
باليل وره ما صار البيت هدوء اخذت ملابس رحت سبحت طلعت الجو بارد اطك سن بسن غزل نايمة ما أگدر أشغل الشسوار انشف شعري اخاف تگعد
لفيته بالمنشفة ودخلت للفراش
زلال نايمة يم أهلي قبل لا اغفى اهتز تلفوني
وصل مسج تفتحة مكتوب ( ممكن نحجي)
صفنت منو هذا؟ ركزت بالرقم اعتقد شايفتة
حاولت اذكر مگدرت
غلست مجاوبت رجع دز (ليال اني رائد)
گعدت لحيلي عززا بعينه منين جاب رقمي وشرايد مني بهاليل
كتبت
( منين جبت الرقم وما اعتقد اكو كلام بينا ممكن ينحجي)
.. ( منين جبتة الشغله مو صعبه وميحتاجلها روحه للقاضي
ليال بطلي انانية على الأقل سمعيني)
.. (عندي دوام من الصبح والاهم من هذا اني بنت عمك يعني عرضك وعرض عمك وولده
تعتقد حلوة بحقي وبحقهم مراسلني ساعة وحده وتريد نحجي؟)
(محد يخاف عليج بگدي ماطلبت منج موعد ولا متغزل بيج كل الرايده اجوبة على كم سؤال يحفرن بگلبي أدري كفرت خوما كفرت)
... تنفست بعمق ( تفضل اسأل)
.. ( ليش رافضتني؟ شنو عيبي شاريج بعمري أحبج اكثر من نفسي فهميني شنو البيه ما عاجبج
اريد اعرف يجوز أصلح عيوبي واذا مگدرت بلكي اقتنع وانساج)
.. ياربي هذا شجاوبه منين طلعلي رائد بهاليل ( مابيك اي عيب والف وحده تتمناك وهنيالها التأخذك ولو يرجع الزمن بيه من اول مره تطلبني اوافق عليك لكن كلشي قسمة)
... ( لعد ليششش رافضة مو راح اتخبل)
.. (الوضع اختلف اني مو ليال القديمة صارت عندي عقدة من الزواج ما أريد اظلمك وأظلم نفسي والأهم من كلشي هي بنتي اريد ابقى الها وبس)
.. ( وحق كل لوعة لعتها عليج وحق حبج العاميني ومخلي گلبي مايشوف غيرج
بنتج اخليها بعيوني اصيرلها اب وسند اعوضج وأعوضها عن كل اذية شفتيها وعشتيها)
... عيوني دمعت لعد شگد متأذي بسببي رائد ما استاهل حبه فضلت ليث عليه ولهسه اعض اصابعي ندم
بحياتي مراح اگدر اقبل بي وامه رافضتني
(أسفة الكلام ممنه فائدة انساني وعيش حياتك اخذ وداد البنية تحبك تستاهلك وانت تستاهلها)
قبل لايجاوب انطيتة حظر اخذت غزل الحضني وغمضت عيني گلبي نار ومختنگة اكابر حتى دموعي متنزل
من القهر يمكن للفجر ظليت گاعدة
زلال.. شهر واني من طبيب الطبيب العلاج قوي خصوصاً الأبر من اضربهن اتبرغث بالگاع من الوجع
شوية شوية بديت استرد عافيتي نومتي تعدلت
امجد قليل أشوفة يجي يسأل شمحتاجة ممحتاجة ويروح من اذكر ورايه رجعة البيت خالي وهم راح ننجمع بنفس الغرفة امووت
خالة من سمعت بيه مريضة اجت اطمئنت عليه لهسه ما أگدر ارفع عيني بعينها ولا اجرئ، اسألها عن لمى
حورية.. حجي ريسان سمع بيج مريضة واجه يسأل عليج
.. وينه
.. گاعد ويا محمد وخالج تطلعيلة لو مابيج حيل
... بلي اطلع تصدگين مشتاقتلة بس هو شلون عرف اني اهنا؟!
.. سأل احمد گايله بيت أهلها
.. هاا اي زين
طلعت ويا ماما فتت للأستقبال من شافني وگف لحيلة وجهة يضحك
رحت عليه باسني من راسي اخذني من ايدي گعدني بصفه
حجي ريسان... شلونج يابة
... الحمدلله على كل حال انت شلونك
... ناقصني أسمع اخبارج الحلوة وأصير بخير
... فدوة العمرك حجي أصيل من يوم يومك
.. يلا يابة شدي حيلج وتعافي أريد ترجعين مثل قبل ساطرتني بسوالفج
... أبتسمت بيأس ايام قبل ماترجع
...منو الجاي تحجي وين راحت زلزال الأعرفها
من أشوفها ادعي الله حفيادتي يصيرن مثلها وبقوتها
.. عيوني دمعت لا والله ابد مو قوية بالعكس اني اضعف خلق الله
محمد.. رجعنا النفس الحجي زلال ليش تزعليني منج
ريسان... شنو الضعفج حجي جم واحد هتلي بنطرونة يريد يوگع منه وشعرة غراب يعشش بي
ليش تخلين هالنماذج تأثر عليج
من راحت الخدمة العسكرية طاح حظ الشباب
شايفتلج زلمة اخو خيتة يگعد يذم غيره
لا ماكو
وشكو واحد حجة اساسه نگس وتربيتة سگط
ومن يوم الأخذتي امجد محد طلعلة صوت
كافي انسي والصار ذبي وره ظهرج
... اول مره أشوف حجي ريسان يحجي بهدوء كلام مرتب بدون سب وغلط
خطية عباله هذا سبب مرضي مايدري مصيبتي اكبر التمت عليه من كل الجهات وأكثر شي كسر. واهسي بالدنيا هو زواجي
حبيبت الكلام ويا واجه على بالي افضفض
سألتة
زين اذا أذيت شخص بدون قصد وجنت السبب بتعاستة وخسرتة للأبد بهاي الحالة شراح تسوي
... راح احجيلج هاي السالفة
بوكتها جان عمري ماعابر العشرين رحنا اني واخوية الجبير الله يرحمه ويرحم موتاكم
للشط نسبح
اني بالسباحة احسن منه ردت اعلمة
مندار أبدل ملابسي سمعت طبة بالمي
انداريت لگيت اخوية نازل للشط ماطالع منه غير رأسة من حلات روحه يبلبط بالمي وعينه عليه يريد انقذه
زلال.. عزززززا خوما مات
.. دصبري خلي اكمل
.. اي كمل
...اهنا احتاريت اجيت وراه لو انتظر
.. كل عقلك تحجي شتنتظر هذا اخوك هي مال تفكير
.. والحمزة أبو احزامين اذا ماسكتي اضربج على حلگج وفلا اكملج
خالد... ههههههه بابا زلال سكتي
.. اي خالو سكتت
ريسان... انتظرتة شوية من حركتة قلت وتعب جيتت سحبتة من المي
تعبان ومختنك شابع مي لوين يلا رجع الوضعة
دار رأسة وبجة من گلبه اول مره بحياتي أشوف أخوي الجبير يبجي ردت احاجي اشرلي اسكت
گال يگولون الأخ احزام ظهر وسند خصوصاً وكت الشدة والعازة من تنخاه يفديك بعمره
واني اليوم احزام ظهري يشوفني اغرك واگف يتفرج عليه لهنا حدي وياك لا انت أخوي ولا اعرفك
راح وعافني كلما اروحله يسد بابه ومايستقبلني
بيوم اخذت ولد عمامي وأخواني ورحتلة
الخاطرهم گعد ومافشلني واضطر يسمعني
سامعة المثل اليگول الغرگان يتعلگ بگشاية
.. اي سامعتة
.. هذا المثل مانگال بوش بلاش
اخوية طول وضخامة لا اني بقوتة ولاجسمي نفس جسمه
لو من البداية جيتت وراه بالحظتها لا اني اطلع ولا هو
من حلات روحه راح يسحبني ويا
.. لا ما اعتقد يسويها هو يريد يطلع
.. يابنتي هذا مي غدار تخيلي نفسج بنصه ما الج ولا حول ولاقوة ونفسج مگطوع بساعتها ماراح تفكرين كل همج تجلبين بأحد بلكي تحصلين نفس
من جحيت والولد كلهم ايدوا كلامي خجل من نفسه واخذني الحضنه
مربط سالفتي اذا الشخص التحجين عنه اذيتي بدون قصد مثل ماگلتي حاجي وصلحي غلطج الكلمة الطيبة تجبر الكسر وتلين الحجر
... تصدك مصدومة بيك طلع عندك سوالف حلوة وحكم لعد شبيك جنت مشبعني صجمات
.. مو صوجج صوج الجاي وموقرج
.. ضحكت لالا وين رايح والله اشاقى
راح حجي ريسان ظليت گاعدة اجت ماما يمي شافتني صافنة
. هاا يمه يوجعج شي
.. ماما أريد احجي شي بس اخاف
... من منو تخافين
.. من كلشي
.. احجي ولاتخافين
.. اريد ابقى اهنا بس اخاف علاء يرجع يتخبل وانتوا تتمرضون والناس هم تحجي
.. ابقي بمكانج شوية واجيج
.. مدري وين راحت وره شوية رجعت وياها بابا بگت طن هوا
محمد... صدك يابة تريدين تتطلگين
.. فكيت عيني عززززا سمجة اني وين گتلج أريد اطلگ
... لج منو گال اريد ابقى اهنا
.. اي ابقى شجاب الطلاگ بالنص
محمد.. . ورجلج؟!
.. فركت ايد بيد استحيت اجاوب
حورية.. أبوج يدري زواجكم على الورق احجي لاتستحين
... دمعت عيني حجيت بغصة والله ماجاي اگدر اتقبل عيشتي اهناك وهو هم ممرتاح
ما أريد شي بس ابقى فترة اعتبروها فترة خطوبة بلكي اتعود عليه
محمد... لاتكملين الصار بيج وجاي يصير بسببنا
سكتي الناس وأخوج وظلمتي روحج
ابقي بابا وامجد اني احاجي وعهد عليه بيوم التجين وتگولين اريد اطلگ منه
اخلي يطلگج وابقي اهنا حالج حال اختج وبوكتها محد راح يحجي
.... يمكن هذا احلى كلام سمعتة من بعد ليلة الحنة المصخمة
محمد.. زلال أريد انبهج على شغلة
.. شنو هي
... دام انتي على ذمتة حتى لو عايشة اهنا ماتسوين شي ولاتتصرفين اي تصرف بدون علمه يبقى أمرج بيده مو بيدي ولا بيد أخوانج
... ماشي
.. خوش
... عافني وراح ظليت ابوس بخد ماما بعدين تذكرت علاء عززززا اخاف يحجي ويرجع يدور لركان
... معليج لاتخافين شيدورله السالفة انسدت وراحت
المغرب گاعدة بالغرفة بيدي غزولة صارلي كومة ملاعبة وياها جاعصتها بحضني وابوس بخدودها والمسكينة ترافس
من فات امجد راحت ضحكتي نزلتها من أيدي
أجه گعد گدامي
.. اذا عندج شي ليش ماتجين تگولي بنفسج شكو دازة عمي؟!
.. مو شسمه غير لأزم اخذ رأيهم بالأول
.. اهاا رأيهم بالأول ورأيي اني طز بي
.. امجد ششبيك اليسمعك يگول جان عايش أحلى عيشة وياي ترى أدري وجودي خانگك ومقيدك
... تعرفين اكثر شي اكره شنو؟!
.. شنو
.. الي يستصغرني ويقلل من قيمتي
رايده شي معاجبتج حياتج وياي أول واحد يكونله علم هو اني مو تخليني گاعد گدام أبوج مثل الاطرش بالزفة وأسمع محاضرات طويلة عريضة
وبـ ختام الكلام والله البرنسيسة زلال تريد ترجع البيتنا واعتبروها فترة تعارف بلكي بمرور الوقت تتعود عليها وتتعود عليك
ههههه رب الحلو شنو بحياتي مشايفج واحتاج فترة اتعود عليج
... وهسه شسوي
.. أگدر بهاللحظة اخذج وأرجعج للبيت وماكو بشر يمنعني
لهذا أرجع واگلج تريدين شي تحاجيني بالأول
.. اوك وهسه خوما راح ترجعني
... لا ابقي بس خلي بالج انتي على ذمتي يعني محسوبة عليه سوالف قبل وحركات الزعاطيط ما أريدهن
اقل تصرف منج مراح يذموج راح يذموني
طلعة طبه بعلمي مفهوم
... اعرف حتى بابا گالي هالكلام
... زلال راح ارجع ابن خالج وبس الشي الوحيد اليتغير تحترميني وماتقللين من قيمتي وبالمقابل مقامج محفوظ عندي
وبيوم التجيني وتگليلي امجد اريد حريتي تأكدي مراح أوگف بطريقج
... اشكرك السويتة علمودي محد يسوي خسرت هواي في سبيل تحميني وترجعلي كرامتي وثقتي بنفسي
... لاتعيدين هالكلام مامسوي شي ولامتفضل عليج بشي الي لأزم يعتذر هو احنا مو أنتي
... زين دراستي سنة التجي أريد اكمل عادي لو هم اكو اشكال
... عادي بابا هذا مستقبلج
وشغلة ثاني مصاريفج عليه لا تأخذين شي من أهلج
.. هاا أي زين
كمل كلامة عافني وراح اوووف احس حمل ونزاح من گلبي
ظليت بيت اهلي محد من الأقارب ولا الجيران يعرفون شي لان بيت بصف بيت وبينا باب مشترك خوما عايشين ويانة ويعرفون اني وين ويم منو
بقت عندي شغلة وحده اتمنى احلها
گابلت ماما وكعدت
سسمجتي عندي طلب
... من تگولين سمجة الزم گلبي
.. ماما أريدج تحاجين خالة
.. بخصوصيش؟
... لمى وأمجد
جانت دتلف كبة ذبتها من ايدها وباوعتلي بستغراب
.. شبيهم لمى وامجد؟
... أريدهم يرجعون سوى
.... گومي من گبالي
... لحظة وين اگوم الله عليج سسمعيني
اني بيها وبلايها اطلگ منه بس تمر سنه على الأقل خطية هما شنو ذنبهم يفترقون بسببي على خلي ينخطبون حتى لو بس بين أهلها واهله الى ان نطلگ
... يمه بيج شي مسخنة واعيه الحجيج
حايتني تريد تخطبين الرجلج
.. ششنو رجلي هو شكو بينا
ديلا الله عليج احجي ويا خالة وقنعيها لان هي معاندة ماتنطيها أدري بخالة مترفضلج طلب
يومين واني ازن براس ماما الى أن جزعت مني حتى تخلص شالت التلفون حجت ويا خالة
... فرودس بدون لف ودوران رايده اخطب لمى الأمجد
.فردوس...هههههههههه نكتة هاي لوشنو
.. لاتضحكين الولد يحبها وهي تحبه ليش نوگف بقسمتهم
.. حورية ششجاج من كل عقلج تحجين اكو وحده تسوي سوايتك بنفسها تخطب الزوج بنتها
.... فردوس لاتغشمين روحج احسن مني تدرين زواج زلال وامجد ورق وبس وكلها سنه وينتهي وابوج الله يرحمه
.. لا عذريني ما اگدر امجد ميفيدها
... شبي شناقصة وين تلگين احسن منه يحبها وتحبه ياخذها يخليها بعيونه
.. صدگي موبيدي الموضوع بيد عاطف وهو قافل ماينطي
.. فردوسة تعلميني بيج ادري بكلمة منج تگدرين تقنعي شو من يوم يومه يباوع الحلگج ومايرفضلج طلب
ماعليه بيج ولا بابوها صيحي لمى اريد أسمع جوابها
...الله عليج لاتخليني بهذا الموقف
.. وتالي وياج امشي صيحيها وامانة الله ورسوله لاتجبريها تگول لا
... هذا هو وروحه الأبوي ماعليه اذا گالت اريده راح احاجي عاطف واقنعة
... ديلا وينها
زلال... من سمعت صوتها گلبي ظل يدك مشتاقتلها ماما عاتبتها لان گاطعة رجلها ماتجي
لمى ظلت ساكتة
حورية... لمى حاجيت امج وقنعتها وبقى قرارج اذا وافقتي هي تساعدج وتقنع ابوج
لمى. مافهمت بشنو قنعتيها
.. نجي نخطبج الامجد هاا يمه شگلتي.....
