 |
اسكريبت شبكني بدبلتو كامل بقلم الست نور
- بقى أنا أوافق على راجل هأوأوأوأو
- طب اقعدي معاه بس.
- أبدًا لو فيها قطع رقبتي.
قال أنا أقعد مع واحد وآخد وأدي في الكلام، وفي الآخر لما أرفض يقولولي منك لله مش عايزة تفرحينا.
- أنا لو آخر جنيه في جيبي هصرفه على ولادي
- جيبك ده من مين؟
- منك، بس مش فلوسك هي فلوسي؟
- أها وماله فلوسنا واحدة.
- قصدك فلوسك فلوسنا، لكن فلوسي هي فلوسي.
- وماله مرتبك ليكِ برضو.
- مرتب؟ أنت عايزني أشتغل وأربيلك عيالك؟
- خلاص بلاها شغل خالص وربي العيال.
- وبعد كده عينك تبص برا وتقول أصل الست العاملة عندها طموح وأنا عندي محشي وبامبرز؟
- خلاص اشتغلي.
- كمان مش هامك تعبي؟
- خلاص اقعدي في البيت.
- وتقتل أحلامي وطموحاتي؟؟
- أي أحلامك بقى؟
- أحبك وأنت تمسك في الكلمة وتديني مساحة أتكلم.
- أعجب؟
- اللاااه! تعجب ونص يا ولااا
- روح قلب الولااا.
- اختشي يا ولاا عيب هتسوق فيها ولا أي!
- خلاص أنا آسف.
- نرجع لموضوعنا بقى...
- ما تسيبك من موضوعنا وقوليلي بس مين اللي عمل البسبوسة اللي جبتهالي دي؟
- عجبتك؟
- إلا عجبتني دي مزجتني.
- دي أنت اللي جايبها وأنت جاي تتقدم.
- بس حاسسها كانت ماسخة مكانتش بالحلاوة دي.
- أنت دوقتها؟
- لأ بس عارف إن أيدك لو حطيتي منهم صُباع في الشاي يبقى سكر.
- ويرضيك صُباعي يتحرق؟
- سلامة صوابعك صُباع صُباع.
- بس أي رأيك بقى في الكنافة؟
- ده أنا عمري ما دوقت زيها في حياتي أي يولااد هتجوز نادية السيد؟
- مهو الكنافة من نفس العلبة اللي أنت جبتها.
- الأمل في صوابع زينب كانت زي الشربات من أيدك.
- بالك أنت ...
- أممم متكمليش نفس العلبة؟
هزيت راسي بأسف ففهم.
- هي العلبة دي فيها أي؟
- فيها حلويات مشكل.
- وأنا اللي كنت فاكر العلبة فيها فيل.
- مهو الاهتمام ميطلبش برضو يا أستاذ جايبلي علبة مش عارف فيها أي؟
- بناغشك يا بت ده أنتِ الحتة الشمال.
- واليمين لمين؟
- لأمي! يرضيكِ الكفة تميل؟
- لأ يا حبيبي كله إلا رضا الأم أومال.
- بس تعرفي إني جبت علبة تانية ليكِ بقى خطيرة.
- علبة! علبة أي؟
- بصي كده؟
كان طلع علبة من جيبه لونها أحمر وفتحها ظهر خاتم دهب.
- سلو عيلتنا العروسة يتقدملها فلوس في الصينية في أول رؤية بس أنا شايف إن الفلوس مش قيمتك، أنتِ اللي زيك قيمته دهب.
- ده ليا؟
- عجبك؟
- إلا عجبني ده خطفني خطف.
- الخاتم اللي خطفك؟
- اللي جاب الخاتم وتحية لأبو لهب اللي هيلبسني الدهب.
- زغرطي يا حماتي زغرطي يامااا.
وشبكني بدبلته وقرينا فاتحته وعند بيت أم فاروق هاي هاي والنخلة طرحت برقوق باي باي باي 😍
لمتابعه اسكريبتات سكيرهوم زورو موقعنا علي التلجرام من هنا
