 |
اسكريبت جوزك يحبك عفية كامل بقلم الست نور
- جوزك يحبك عفية.
- أديه علقة يعني أموته؟
- لا لا قصدي حماتك تحبك سخية.
- أسلخ جلدها يعني وأشويها في الإير فراير؟
- يابنتي قصدي أهلك يحبوكي غنية.
- أسرق! أنا حساكِ بتشجعيني عالرذيلة، أسرق يعني؟
يعجبني فيا إني لماحة بفهمها وهي طايرة وشوف الكلام أبو معنيين فأنا بسيب المعنى الأول قفاه يقمر عيش والمعنى التاني حبيبي حبيبي ومحبش إلا هووو.
- تفتكري أي حل ثقب الأوزون اللي بيوسع عمال على بطال ده.
- نخيط أمــه.
- أي!
- قصدي نلزقه.
- أنتِ بتقولي أي؟
- خلاص خلاص نلحمه بـ أمير.
- قومي يا نور من وشي قومي.
- عجايب! وأنا اللي حبيت أساعد هو كده شرًا تعمل بحرًا تلقى.
- شرًا! أنتِ أكيد مخك حد لعب في إعداداته.
- أها عمله ضبط مصنع بيو بيو.
خدنا أي من وشك يا معرفة الندامة علشان تديني قفاك، فعلًا صدق اللي قال اطبخي يا جارية وكلف يا سيدي واللي ميشوفش من الغربال يكشف نظر.
- واحد زائد واحد يساوي كام يا نور؟
- يساوي اتنين وهي دي محتاجة فهلوة!
- طيب سيبك من دي، أي هو مبدأك في الحياة؟
- قال وعلى رأي المثل اللي يداديك داديه وحط أيدك في إيده، واللي عاوز يعاديك ابعد عنه روحك مش في أيده.
- الله يفتح على أهلك يستي صحصحي معايا.
- مانا مصحصحة أهو..
- أنا غيرت رأيي قومي شوفي اللي وراكِ.
- خلاص قول..
- لا يستي خلاص زُقي عجلك.
أزُق عجلي؟ قصده أروح بيت أهلي يعني؟ أكيد العجل ده عجل شنطتي، زوجي حبيبي ومحبش إلا هوو.
- أي ده بتلمي شنطتك ورايحة فين؟
- مفيش مش ده اللي أنت عاوزه؟
- مقصدتش كده يا نور، اسمعيني بس.
- أسمع أي أنا خلاص هسمع كلامك.
- بس أنا معنديش مشكلة تقعدي في شقتك.
- لا لا كلمتك سيف على رقبتي متنزلش الأرض أبدًا..
- بس أنا مقولتش تروحي بيت أهلك.
- مقولتش بس قصدتها.
- أمتى ده؟
- لما قولتلي زُقي عجلك.
- فتقومي تزقي عجل شنطتك؟
- عجلي وعجل شنطتي واحد.
- حيث كده بقى آجي أوصلك.
- توصلني! غريبة أول مرة تعملها.
- وأنا أطول يا مراتي يا حبيبتي؟
- مراتي وحبيبتي كمان؟ لا بقى ده أنت وراك مصيبة.
- أنا! ده انا غلبان؟
- اعترف يا غلبان.
- أنا قولت أكمل نص ديني بس وأجيبلك ضُرة تونسك.
- تكمل إيه إيه إيه إيه؟ وهو فين نصك الأولاني علشان تكمل التاني؟
- مانا هجيبها تعينني على ديني ودنياي.
- ودي مين اللي أمها داعية عليها دي؟
- واحدة مقولكيش مش مهم جمالها المهم إنها شايفاني أحسن راجل في الدنيا.
- الخنفسة تشوف ولادها على الحيط تقول ده لولي ملضوم في الخيط.
- بقى أنا خنفسة؟
- اللي على راسه بطحة.
- بقى أنا راسي مبطوحة؟
- وعلى كده اللي متتجوزش بخدودها تتجوز بأصلها وجدودها بنت مين هي ياحبيبي؟
- بنت حسب ونسب.
- طب ابقى اعمل حسابك واسأل قبل ما تناسب يبان للردي والمناسب.
- أنتِ غيرانة منها بس علشان كده بتقولي كده.
- كل فولة مسوسة يخويا وليها كيال يكش هي تقدر تشيل ربع اللي شيلته بس.
- على قلبها زي العسل.
- مبروك عليك يا حبيبي اللي خدته القرعة..
- مش هتزعلي وتقلبيها حداد؟
- لا يا قلبي أنا مقتنعة بمثل الندب بالطار ولا قعدة الراجل في الدار.
- ياباااي ده أنتِ أمه داعية عليه اللي يدخل يتكلم معاكِ ولا يهزر.
- اللي يقول لمراته يا عورة الناس تلعب بيها الكورة واللي يقول لمراته يا هانم تعظم ليها على السلالم.
- تعظيم سلام لمراتي التمام بالأمثال تمام التمام.
- دلوقتي تمام يخويا؟ يلا أنا رايحة بيت أهلي لما تعرف قيمتي ابقى تعالى خدني.
- يستي بهزر والله العظيم بهزر.
سحبت شنطتي وبصتله من فوق لتحت بقرف مع رفعة حاجب:
- ولا ترقع في الدايب ولا تعتب عالعايب، رجالة آخر زمن.
- يا ستي استني بس هفهمك..
- وعلى رأي المثل يا مآمنة للرجال يا مآمنة للميه في الغربال.
"قال وعلى رأي المثل جيت أبيع الحنة كترت الأحزان"😂💗
#الست_نور
لمتابعه اسكريبتات سكيرهوم زورو موقعنا علي التلجرام من هنا
