 |
رواية اغتصاب شرعى الجزء الثاني الفصل الرابع
النقيب سالم .. معالي الباشا .. خبر غير مؤسف غير متوقع !!
مازن .. خير يا سيادة النقيب ؟!
سالم .. لقينا جثة سيد جوز ساره مرميه في الطريق الصحراوي .. تقريبا مقتول برصاصة في دماغة ؟!!
مازن .. معقول ؟! مين اللي قتله ؟!
سالم .. لسة منعرفش يا فندم .. بس احنا بدأنا تحريات للكشف عن ملابسات الحادث
مازن .. غريبة !! ودا مين اللي قتله ؟! وقتله ليه ؟!
سالم .. للأسف لسة الغموض بيحيط بالقضية !! منتظرين معاينة سعتك يا باشا
مازن .. انا جاي معاك يا سيادة النقيب
ونذهب الي سجن النساء حيث تُفتح الزنزانه التي تمكث بها سارة وتدخل الصول رضا الي الزنزانه متوجهه نحو سارة
رضا .. قومي معايا
سارة .. اقوم معاكي فين ؟!
رضا .. الباشا عايزك .. يلا تعالي
سارة .. طب بالراحة عليا انا لسة تعبانه !!
رضا .. بطلي لماضة يابت وامشي معايا من سكات !!
وتذهب سارة مع الصول رضا الي مكتب الضابط شهاب وعند وصولهما الي المكتب تندهش سارة
سارة .. ايه دا !! انتي جايباني هنا ليه ؟!
رضا .. ما هو شهاب باشا اللي عاوزك
سارة .. انا افتكرت سيادة المأمور هو اللي عايزني !!
رضا بسخرية .. هههه .. لا يا ماما المأمور مش فاضي للأشكال اللي زيك !! يلا انجري قدامي
وتطرق رضا باب المكتب ثم تدخل
رضا .. المتهمه اللي طلبتها يا فندم
شهاب مبتسما .. طيب روحي انتي يا رضا
شهاب .. تعالي يا سارة اقعدي عايزك في كلمتين
سارة .. خير يا فندم ؟!
شهاب .. ايه هاتكلم وانتي واقفة كدا ولا ايه ؟! تعالي اقعدي هنا قدامي
سارة مترددة
شهاب .. ايه مالك ؟! ماسمعتيش قلت ايه ؟!
سارة تقترب في حذر وقلق شديد نحو مكتب شهاب ثم تجلس امامه
سارة .. ممكن اعرف سعتك عايزني في ايه ؟!
شهاب .. يابنتي مالك كدا قاعدة مش علي بعضك ليه ؟! هو انتي لسة خايفة مني ولا ايه ؟!
سارة .. لا ابدا .. بس انا لسة تعبانه شوية
شهاب .. اها .. لا الف سلامة عليكي
سارة .. الله يسلمك
شهاب .. بصي يا سارة من الاخر كدا في خبر عايز اقولهولك بس مش عارف هل هو محزن بالنسبة لك ولا لا ؟!
سارة .. خبر ايه يا فندم ؟! ماما او بابا جري لهم حاجة ؟!
شهاب .. لا لا .. بابا وماما كويسين الحمد لله
سارة .. طب فيه ايه حضرتك ؟!
شهاب .. سيد جوزك لقيوه مقتول ع الطريق الصحراوي
سارة .. ايه ؟!
شهاب .. اها .. لقيوه مقتول برصاصة في دماغة ؟!
سارة تتنفس الصعداء ثم تبتسم فرحا وكأنها تقول في سرها الحمد لله
شهاب .. باين عليه خبر مفرح مش محزن بالنسبة لك ؟!
سارة .. عايز الصراحة ؟!
شهاب .. اكيد
سارة .. اه .. دا اول كابوس بالنسبة لي وربنا خلصني منه الحمد لله .. عقبال الكابوس التاني بقي
شهاب .. اللي هو ؟!
سارة .. انه تظهر برآتي واخرج من هنا
شهاب .. يعني افهم من كدا انه سيد دا مش فارق معاكي خالص ؟!
سارة .. اطلاقا .. دا انسان انا اُجبرت علي الجواز منه ومفيش بيني وبينه اي تكافئ خالص .. يلا بقي ربنا يرحمه ويسامحه ع اللي عمله فيا هو وابنه !! ومعرفوش مين اللي قتله ؟!
شهاب .. لسة التحريات شغالة .. قليلي هو كان ليه اعداء ؟!
سارة .. الله اعلم .. انا ملحقتش اعرفه عشان اعرف اذا كان ليه اعداء او لا !! بس اللي انا متأكدة منه ان شخصية زي شخصية سيد دي اكيد ليه اعداء كتير!!
شهاب .. طيب بما ان الخبر دا طلع مفرح بالنسبة لك .. تحبي اطلبلك عصير ولا نشرب شربات احسن ؟
سارة مندهشة .. شربات !! انا فرحانه اه اني خلصت من كابوس مزعج جدا .. بس مش لدرجة اني اشرب شربات علي روحه !! .. مهما كان سيد كان جوزي في يوم من الايام .. حتي لو انا مش طايقاه واتجوزته غصب عني وملحقناش حتي نعاشر بعض الفتره اللي تخليني احزن علي فراقه.. بس برضوا اسمه كان جوزي في يوم من الايام ولازم علي الاقل احترم قدسية الموت
شهاب .. انتي اصيلة اوي يا سارة !!
سارة .. مرسي لحضرتك
شهاب .. ع العموم الشربات هايجي وقته ان شاء الله .. بقلك ايه انا ابتديت احس انك فعلا مظلومة
سارة .. بجد ؟!
شهاب .. ايوا .. بقي عندي احساس كدا بيقلي انك مظلومة وانك مقتلتيش اللي اسمه قاسم دا ؟!
سارة .. غريبة !!مع ان سيادتك من فتره قريبة بس كنت مقتنع تماما اني قتلته فعلا ؟!
شهاب .. مش عارف ايه اللي غير احساسي كدا فجأة وخلي عندي شبه يقين انك بريئة !! عامةً انا فيا حاجات كتير اتلخبطت لما شفتك يا سارة !! سارة .. انتي فيكي سحر غريب .. شدني ناحيتك اول ما شفتك !! انتي شقلبتي كياني يا بنت الايه انتي ؟!
سارة مندهشة .. انا مش مصدقة الكلام اللي انا بسمعه دا ؟! هو فيه ايه بالظبط يا فندم ؟!
شهاب .. فيه اني انا بحبك يا سارة .. وعايزك جداا كمان
سارة .. عايزني ازاي بالظبط ؟!
شهاب .. لا متفهمنيش غلط .. انا قصدي عايز ارتبط بيكي
سارة .. هو حضرتك واعي للكلام اللي انت بتقوله دا ؟!
شهاب .. طبعا يا سارة .. انتي مش مصدقاني ولا ايه ؟!
سارة .. انا مستغربة الكلام اللي انا بسمعه دا بصراحة ؟!
شهاب .. لا متستغربيش يا سارة .. وصدقيني هي دي الحقيقة .. عشان كدا انا قررت اساعدك عشان تخرجي من هنا
سارة .. تساعدني مقابل ايه ؟!
شهاب .. مقابل انك تحبيني زي ما انا بحبك واننا نكون لبعض بعد كدا
سارة .. بس انا بعد ما اخرج من هنا ان شاء الله عمري ما هفكر في الجواز دا تاني خالص .. انا هكمل تعليمي وهحقق حلمي اللي طول عمري كنت بحلم بيه
شهاب .. وماله .. نحققة واحنا مع بعض .. بصي انا مش عايز اسمع ردك دلوقتي.. اجلي كل حاجة لبعد ما تخرجي من هنا ان شاء الله .. وانا اوعدك اني هساعدك بكل ما املك من قوة عشان احررك من سجنك دا ..
ونذهب الي العسكري فارس الذي ذهب مسرعا الي المستشفي للأطمئنان علي زوجته وبعد ان خرج الطبيب من غرفة الكشف ويبدوا عليه الحزن الشديد .. يذهب اليه فارس ليسأله عن زوجته
فارس قلقا بشدة .. طمني يا دكتور سماح مالها ؟!
الطبيب .. للأسف جالها تسمم حمل ومقدرناش نعمل حاجة .. شد حيلك
فارس .. ماتت ؟!
الطبيب .. للأسف اتوفت هي والجنين اللي في بطنها .. البقاء لله.. ربنا يصبرك ويعوض عليك
كوثر مصدومة .. لا اله الا الله .. الله يرحمك يا سماح .. شد حيلك يا اخويا
فارس حزينا ويبكي متألماً.. لا حول ولا قوة الا بالله ياربي .. بقي طول عمري احلم بالواد اللي هيشيل اسمي ونهار ما ربنا يديهوني .. يروح كدا في غمضة عين من قبل حتي ما اشوفه ولا اشيله علي ايديا !!
كوثر .. استغفر ربك يا فارس .. دي حكمته ياخويا .. وملناش حق نعترض علي قضاء ربنا .. ربنا يصبر قلبك يا فارس ويعوضك خير يا حبيبي
فارس .. طب كانت استنت لحد ما ولدت وبعد كدا كانت ماتت ولا غارت في ستين داهية هي حرة !! ليه تموت وتاخد ولدي معاها ؟!
كوثر .. استغفر الله العظيم يارب .. بلاش الكلام دا يا فارس ارجوك !! انت كدا بتكفر بقضاء ربنا !!
فارس .. استغفر الله العظيم من كل ذنب .. سامحني يارب .. انا عارف انك بتعاقبني علي اللي انا عملته .. بس انا هكفر عن ذنبي ..
ثم يترك كوثر اخته وينصرف وكوثر تنادي عليه
كوثر .. رايح فين يا فارس ؟! لا حول ولا قوة الا بالله .. ربنا يصبر قلبك علي ما بالاك يا اخويا
ونذهب الي الزنزانه التي تمكث بها عواطف النمر حيث تدخل فيفي اليهم لتخبرهم بوفاة عواطف
فيفي .. يابنات .. عواطف النمر ماتت
هرج ومرج داخل الزنزانه بعد سماع هذا الخبر فالجميع لا يصدق حدوث ذلك
فيفي .. هس .. اسكتوا واسمعوني .. دلوقتي عرفوا ان عواطف ماتت بجرعة مخدرات زيادة وهيجوا عشان يفتشوا العنبر ويقلبوا عاليه واطيه .. اللي معاها حاجة كدا ولا كدا تتخلص منها بسرعة .. سامعين ؟! .. الله يرحمك يا عواطف .. كنتي سند وضهر لينا هنا .. بعدك هنشوف ايام سودا !!
السيدة التي كانت دائما تعارض عواطف النمر في افعالها تقول لنفسها ..
السيدة .. لا حول ولا قوة الا بالله .. كانت فاكره نفسها انها اقوي من ربنا واهوه راحت عنده عشان تتحاسب علي كل اعمالها السودا !! سبحانك يارب .. يمهل ولا يهمل .. ذنبك يا سارة والله !! وربنا انتقملك يا حبيبتي
ونذهب الي النقيب سالم الذي بجلس في مكتب مازن وكيل النيابة
مازن .. ياتري مين اللي وري قتل سيد ؟!
سالم .. التحريات المبدئية بتقول انه فيه خلافات بينه وبين بعض التجار في السوق
مازن .. ودا دافع انهم يقتلوه ؟!
سالم .. اكيد يا فندم ودافع قوي كمان .. اي انسان بيبقي ليه منافس قوي في اي مجال .. بيبقي عايز يزيحه من طريقة بأي تمن !! والنفوس دلوقتي بقت ضعيفة جدا !! وفي ناس عندها القتل اسهل حاجة ممكن تعملها عشان تخلص بيها من واحد بيهدد مستقبلها او وجودها في السوق !! دا احتمال .. الاحتمال التاني بقي .. ان سيد فيه خلافات كتير بينه وبين كل زوجاته السابقين تقريبا.. دا طبعا بسبب زواجه الكتير وفيه منهم رافع عليه قضايا في المحكمة بيطالبوه بعقود وشيكات سيد مضاها ليهم ومنفذهاش !!
مازن .. عايزك تكثف التحريات يا سالم وتوصلي للجاني في اقرب وقت
سالم .. تمام حاضر .. وعلي فكرة يا فندم حضرتك لما طلبت قبل كدا اني اعمل تحريات عن سيد اكتشفت انه كان بيتردد علي شقة البت اللي اسمها بثينه !!
مازن .. وكان بيتردد عليها ليه ؟!
سالم .. واضح ان فيه بينهم وبين بعض علاقة غير شرعية .. البت بثينه دي انا مش مرتحالها خالص وحاسس ان وراها سر كبير .. وحسن كمان ابن سيد راحلها مره وبعد كدا اختفي !!
مازن .. اختفي ازاي يعني ؟!
سالم .. مالوش اثر خالص !! حتي لما جم عشان يستلموا جثة سيد من المشرحة .. مكنش موجود مع الناس اللي جت ؟! وعلي فكرة ام حسن امبارح عملت بلاغ بأختفاء ابنها !! قالت فيه ان ابنها مرجعش البيت بقاله كام يوم !!
مازن .. وهيكون راح فين الجدع دا ؟!
سالم .. مش عارف صدقني يا فندم؟!
مازن .. واضح كدا ان البت بثينه دي وراها سر خطير فعلا !! عايز تحطهالي تحت المراقبة المستمره
سالم .. تمام يا فندم .. وعلي فكره فيه حاجة كمان
مازن .. ايه هي ؟!
سالم .. البنت دي لما جت عندنا المديرية عشان تقول اقوالها ساعة ما قاسم ابن خالتها اتقتل .. قالت وقتها انها غلطت معاه وانها حامل منه وانه وعدها انه يتجوزها عشان يصلح غلطته !!
مازن .. ايوا وقالت نفس الكلام في محضر النيابة !! طب وايه المشكلة في دا ؟!
سالم .. يا باشا البنت دي مطلعتش حامل ولا حاجة ؟!
مازن .. ايه ؟!
ونذهب الي الصول انصاف التي ذهبت لمقابلة المأمور لتخبره بالحقيقة
المأمور .. تعالي يا انصاف .. ابنك عامل ايه دلوقتي ؟
انصاف حزينة وباكية .. ابني بين الحياه والموت يا فندم !!
المأمور .. لا حول ولا قوة الا بالله .. ربنا يلطف بيه يا انصاف .. طب انتي جاية ليه دلوقتي ؟! روحي خليكي جنب ابنك
انصاف .. انا جاية عشان اخلص ذمتي قدام ربنا .. يمكن لما اقول الحقيقة ربنا يلطف بيه وينجيه من اللي هو فيه !!
المأمور .. حقيقة !! حقيقة ايه يا انصاف ؟!
انصاف.. انا هاقول لسعتك اللي حصل يا فندم .. ومستعدة لأي عقاب تشوفه سعتك .. لأني استاهل بجد
المأمور .. في ايه يا انصاف .. اتكلمي ؟!
انصاف .. انا هاتكلم اهوه
وفجأة تشعر انصاف بألم شديد في بطنها فتصرخ من الوجع
انصاف .. اه
المأمور .. مالك يا انصاف ؟!
انصاف .. الم شديد في بطني يا فندم !!
المأمور .. طب اقعدي ارتاحي
انصاف .. حاضر
واثناء اقتراب انصاف نحو الكنبه لكي تجلس عليها يشتد عليها الالم في تلك اللحظة ويبدوا عليها التعب الشديد ثم تجلس علي الكنبة وهي تضع يدها علي بطنها التي تعتصر الما ثم بعدها تلقي بظهرها الي الوراء وتغيب عن الوعي ؟!!..
ثم نذهب الي بثينه في شقتها وفجأة واثناء عودتها من الحمام بعد ان اخذت شاور ودخلت غرفة النوم لتضغط علي مفتاح الاناره لتضاء الغرفة اذ بها تلمح ممتاز يجلس علي السرير وعيناه تشع غضبا فترتجف عند رؤيته ؟!
