 |
اسكريبت وحيد امه نعمله اي كامل بقلم الست نور
- وحيد أمه بنعمله أي؟
- بنسيبه لأمه.
- ده إذا كان الجيش سابهولها هناخده منها إحنا؟
ده ردي والمبدأ اللي ماشية بيه في حياتي لأجل متجيش واحدة ست كبيرة تحاربني علشان أخدت ابنها! أصل الحياة لحظة يا تعيشها في سلام يا تفضل في صراع في الوادي هه!
- عندك كام أخ وأخت؟
- أخت وحيدة وولدين غيري.
- ماشاء الله ربنا يحفظكم، هي دي أختك؟
- أيوة.
- مالها مش على بعضها ليه؟
- أي مالها؟
- أصل مرضتش تشرب من أيدي الميه اللي جبتهالها.
- أصل هي بتشرب ميه معدنية بس.
- أمممم طب والعصير؟
- أصلها بتشربه بشاليمو.
- والحلويات؟
- مبتاكلش من حلويات البيت.
- والهواء بقى؟
- ماله؟
- مش بتتنفس هيليوم بداله؟
- لأ بتقعد في التكييف.
- يوه يقطعني افتكرتها بتقعد تحت المروحة.
- لأ.
- طيب وأخواتك؟
- مالهم؟
- هم على عيني وعلى راسي بس تعاملكم بيمشي إزاي مع بعض؟
- لأ إحنا التلاتة بنشتغل في شغلنا الخاص ونيجي آخر الشهر بناخد مرتباتنا من أخونا الكبير.
- يعني لو حصل بيني وبينك نصيب واحتجت فلوس أطلب من مين؟
- من أخويا الكبير لأنه ماسك الميزانية.
- طيب مانا ملزمة منك هطلب من أخوك ليه؟
- وأي المشكلة أنا وأخويا واحد.
- خلاص أتجوزه هو بدالك ليه نلف اللفة دي كلها وودنك منين يا جحا.
أنا بنت مش مؤدبة ولساني متبري مني وهفضل طول عمري في بيت أهلي بلساني ده ومش هعمر في بيت، ده كل اللي سمعته بعد ما العريس مشي هو وأهله، اللاااه طب مش هم اللي خرجوني عن شعوري وأنا ست مؤدبة يدوبك رد فعل ليهم فقط!
- عريس رقم تلاتة معندهوش أخوات ولاد والبنات متجوزين ومعاهم عيالهم يعني اطمني.
- أنا لحقت أفوق من الأولاني علشان أقعد مع التاني!
- اسمعي مني بس من أختك العريس ده لُقطة؟
- ثقة يعني؟
- عيب عليكِ ثقة ثقة يعني.
دخلت بالعصير ولقيت واحد بسم الله ماشاء الله على رجله عيال وفي قفاه عيال وفي دراعه عيال تانية هو أكل مال اليتيم قبل ما ييجي هنا ولا أي!
- تعالي يا عروسة تعالي جنبي.
لقيت أخته قعدتني جنبها وأختها التانية قربت وقعدت جنبي وحطت ابنها على رجلي وقالتلي:
- شيلي شيلي بكرة تتعودي.
- أتعود ليه هبقى أجيبلهم دادة تقعد بيهم!
خير اللهمّ اجعله خير العريس وأخواته وعيال أخواته فص ملح وداب وكأنّي قولتلهم إني لا إنجابية، الغريبة إني بحب العيال وتربيتهم بس مبحبش حد يفرضهم عليا وأنا أول مرة أتعامل معاهم فلما أهزر ويقوموا يمشوا بالشكل ده يبقى ربنا نجدها نوسة.
- عريس رقم أربعة وحيد ولا ليه أب ولا أم ولا أخوات، مقطوع من شجرة وأبوه شغله وأمه دراعه، لا ليه في المشي البطال ولا في سيجارة تدخل بوقه.
- حلو ده.
خدنا أي من اللي عنده عزوة وسند نشوف الوحيد يمكن أكونله كل دنيته.
- بصي بقى أنا لا وحيد أمي ولا عندي أخوات ولا عيالهم هيرازوا فيكِ ولا جاي ومستعد للرفض.
- طب خد نفسك طيب.
- لأ أنا برسيكي على الحوار واللي هيحصل.
ضحكت وهو شاركني الضحك أصل نبرته وثقته عجبتني، ببص لقيت أختي زغرطت من الصالة وبعد كده سكتت وكأن شيئًا لم يكن.
- ده أنت متابع بقى.
- أوي أوي طبعت بوستاتك في ورق وبقيت أعرف كل أسباب رفضك.
- اللاااه ده أنت مذاكر بقى.
- وتوب فان وحياتك.
- وعلى كده جاي هنا تعمل أي بقى يا توب فان؟
- أترقى بدل التوب فان لكلوز فريند.
- طب والله كريتيڤ.
وقومت ضاحكة تاني قامت أختي رازعة زغروطة كمان مرة من الصالة وبعد كده سكتت وكأن شيئًا لم يكن.
- أنا وحيد.
- اتشرفت بيك يا وحيد.
- لأ وحيد دي صفة، لكن اسمي ونس.
- تعرف إن الأُنس عكس الوحدة!
- أهو أنا بقى فيا الشيء ونقيضه، وحيد لكن اسمي ونس، فاقد كل الأهل، لكن تلاقيني معطاء في حنيتي وأُلفتي، جد أوي بس بحب الهزار وأكره الإنسان الإتم اللي دمه تقيل.
- بتقولّي ده ليه؟
- لأنك آخر أمل ليا في العلاقات ويا تكوني عوض ليا وأكون ونس ليكِ يا هتحكمي عليا بالوحدة لباقي عمري.
في الحقيقة أنا سكت على أثر جملته لأنها كبيرة وتقيلة على استيعابي، هو بيور أوي من جواه بيدور على مشاعر حنينة ودافية أوي فقراري هيبقى يا أوافق وأبقى قادرة أمنحها ليه يا أرفض وأسيبه لواحدة تستاهله.
- أنا مش بضغطك ولا بحطك في زون إنك لازم تبقي بشكل محدد علشان تعوضيني، أنا كل اللي طالبه إني يوم ما أقول ااه ألاقي أيد تطبطب عليا وتقولي سلامتك، لما ربنا يكرمني وأكسب في شغلي ألاقي ست أشاركها نجاحنا سوا لأن نجاحي هيبقى بسبب إنها معايا وفي ضهري، مش عايز صوتي يبقى بيتردد في الشقة من الفراغ عايزك تملي حياتي وبيتي عليا وتاخدي بـ حِسي في الدنيا مش عايز أعيش وحيد وأموت وحيد.
تاخدي بـ حِسي في الدنيا! جملة دافية أوي، مش عايز أعيش وحيد وأموت وحيد! جملة قاسية بتعبر عن قساوة الدنيا اللي لما بتاخد مبتديش مبررات وبتعيشك في حرمان.
- لكنها لما بتدي بتنسي مرارة الفقد.
- وأنت الدنيا إدتك أي؟
- نصيبي وقسمتي الحلوة ونور عيني أنتِ.
- حاسس إن الدنيا راضتك؟
- راضتني أوي والحمدلله، لكن أنتِ أي مرضية؟
- عارف لما تبقى متعلق بأمل وخلاص كنت على هاوية فقده؟
- وفقدتيه؟
- لأ لَقيته.
- فين؟
- في صالة بيتنا ببوكيه ورد جميل وعلبة حلويات شهية ولكن الأهم كان ...
- كان أي؟
- طَلته البَهية وريحته الذكية ونبرته الواثقة القوية وقعتني على جدور رقبتي.
- وقاومتيه؟
- انصغت ليه.
- والست اللي تنصاغ بالكلام أحط راسي على كتفها وأنام.
- واشمعنا اللي تنصاغ؟
- لأنها هتسمعني وهسمعها، هتحترمني وأحترمها لا هتبقى راسها براسي ولا نِد بـ نِد وتعيش معايا بالعند.
- هترضى معاك بالوَرد أو بالوِد يا صاحب الوِد.
"صالحت بيكِ أيامي، وآنست بيكِ وحدتي يا نور عيني وكل دنيتي"💗
#الست_نور
