رواية حب في الحجر الصحي الفصل الاول
هى بتجرى بسرعة خلاص الحظر هيبدأ ، وفى عز ما هى بتجرى كعب جزمتها اتكسر
بصتله وقالت يييييه ودا وقته برضه
وبصت حواليها الشارع تقريبا فاضى مفهوش اى حد
الدموع ظهرت فى عينيها وفضلت تعرج برجلها ، لحد ما جالها صوت من وراها : آنسة انسة ، انتى كويسة ، فى مشكلة اقدر احلها
هى: روح يا اخينا الله يكرمك هى مش نقصاك
هو: الحق عليا شوفتك محتاسة وبتعيطى قولت اساعدك بدل ما الحظر يبدأ عليكى وانتى واقفة كده ، وبعدين ايه اللي منزلك الشارع فى وقت زى ده اصلا
هى: على اساس انه مزاجى ، ابو القطاع الخاص على اللي عايزينه ، سيبنى الله لا يسيئك خلينى اشوف هروح ازاى
وكملت مشى وهى بتعرج ، بص عليها لقاها بتعرج وجزمتها مكسورة ، راح نده عليها تانى
هو : انسة انسة
هى: يا ابنى هو حد مسلطك عليا النهاردة
هو : اسمعى بس انا عايز اساعدك واضح كده ان كعب جزمتك اتكسر
هى بتريقة: ما شاء الله شكلك نبيه ، انت كن علمى رياضة؟
هو : من غير تريقة الله يسترك خدى
ومد ايده واداها شنطة ،بصت للشنطة وقالتله: ايه ده
هو: دا شبشبى بلبسه فى الشغل لما بحب اهوى رجلى من الجزمة مطرح القعدة
بصت للشبشب بقرف وقالت : تهوى رجلك وشبشبك ، ييييييع
هو : تصدقى انا غلطان لاهلك ، اتفضلى قضيها عرج لحد بيتكم ان شاء الله يتقبض عليكى
هى: طب خلاص خلاص اظاهر مقداميش غير الحل ده ، الحظر خلاص هيبدا على العموم انا متشكرة اوى
هو : على ايه يا ستى ربنا يستر على ولايانا
هى : ولايانا؟ طب هرجعهولك ازاى ؟
هو : يا ستى مسامحك فيه، دا بسبعة جنيه ونص يعنى
سابها ومشى وهى فاتحة بقها وبتقول : بقى انا يجى عليا اليوم اللي اشحت شبشب بسبعة جنيه ، الله يخربيت الكورونا
لبست الشبشب بسرعة وجريت ع البيت واول ما دخلت لقت امها فى وشها : ايه يا بنتى اتاخرتى ليه دا الحظر بدأ
هى: اسكتى يا ماما مش كعب جزمتى اتكسر مكنتش عارفة اعمل ايه
امها: وبعدين يابنتى عملتى ايه
هى: واحد شحتنى شبشب اروح بيه، انما شخص تحفة تشوفيه من برة تحترميه لابس بدلة وبرفانه واصل ريحته لاخر الشارع ، يفتح بس بقه ويتكلم تحسى عبده موتة ادامك
امها : طب يالا يا اختى يالى مبيعجبكيش حد ،مش كتر خير الجدع، خليكى كده تتريقى ع خلق الله لما هتقعدى فى ارابيزى
دخلت اوضتها تغير هدومها بعد ما مامتها طبعا حمتها بالكلور وخلتها غسلت ايدها ووشها مية مرة ، وبعد ما غيرت بصت للشبشب وافتكرت الوسيم البيئة صاحب الشبشب، واعلن القلب عن بداية قصة حب من أول شبشب
