رواية زهرة البنفسج الفصل الثالث 3 بقلم لولو طارق

لا حول ولا قوة إلا بالله العلى العظيم 

سبحان الله وبحمده وسبحان الله العظيم 

اللهم أتنا فى الدنيا حسنه وفى الأخره حسنه وقنى عذاب النار 

أعوذ بكلمات الله التامه من كل شيطان وهامه ومن كل عين لامه 

💗💗💗💗💙💙💙💙💚💚💚💚💚💚

زهره جن جنونها وبتدور فى كل حته فى الشقه وبدأت تنهار ... زياد .. زيزو حبيب ماما زهره اخرج ياله .. انت بتلعب معايا زياد  وبتجرى على برا من غير تفكير فتحت  باب الشقه  وخارجه لقت تامر معاه زياد ولسا ها ينزل بيه على تحت .. ومسكته من رقبته 

زهره بصوووويت : حرامى .. حرامى الاطفال اهوو  .. هو دا الا بيتاجر فى الاعضاء البشريه يالهوووووى الحقونى يا اناس 

تامر بيشد ايدها من على رقبته : وسعى يا مجنونه انتى حرامى مين يا متخلفه اوعى الولد اتخبط 

زهره ماسكه فيه أكتر وتنط وتديلو بالرجل ومره تانيه تنط وتديلو براسها .. ومسكت راسها .. اعاااااا راسى يا متوحش وتلف ايدها فى الهوا وتضربه فى صدره وتامر بيحاول يبعد زياد عن جنونها ورافعه لفوووق والولد عمال يضحك 

تامر : بطلى يا غبيه انتى فاكره نفسك بتحدفى طووووب وبتضربينى وانتى الا بتعيطى 

سميحه خرجت مخضوضه : ايه فى ايه .. مالك يا زهره .. مالك يا تامر 

تامر : سميحه انقذينى من المتخلفه دى عشان لو ادتها قلم ها أكومها مكانها 

زهره مستمره فى ضربه : انا متخلفه يا حرامى الاطفال .. طب خد وتديله فى صدره 

سميحه شدت زهره اهدى يا بنتى حرامى ايه يا زهره عيب 

زهره : سرق زياد وواخده بيهرب طنط سعاد سايبه زيزو معايا الحرامى دا خطفه من البلكونه 

سميحه كشرت مش فاهمه حاجه وبتتكلم بعفويه : اب ها يخطف ابنه ازاى يعنى 

زهره بصت لها وتنحت : بتقولى ايه مين دا الا ابوه يا سميحه جرالك حاجه 

سميحه : ايه يابنتى ماتعرفيش ان تامر يبقى ابن طنط سعاد وزياد ابنه 

تامر : عرفتى الا فيها هواينا بقى وعلى الله اشوفك ماسكه ابنى تانى 

زهره : مسكته من دراعه لا انا واخده من طنط وطنط إلا تاخده منى هات الولد واه انت حرامى 

سعاد طالعه بتنهج : مالكو يا ولاد صوتكم جايب لاخر الشارع 

زهره : البنى ادم دا خطف زياد من البلكونه وواخده ونازل 

تامر ناول زياد لامه : وبيكلم زهره اتلمى بقى بدال ما اشرب من دمك  دا انتى مستفزه

سميحه : 😂😂😂 اتصرفى مع الاتنين المجانين دول انا تعبت 

سعاد : ادخلى انتى سميحه .. وانت وهى تعالو ادخلو ورايا بلاش فضايح ودخلت شقتها حطت زياد فى الارض .. ها بقى ايه حكايتكو انتو الاتنين 

تامر : انا خدت ابنى فيها ايه 

سعاد ؛ بعلمها 

تامر : ليه ها استأذن منها عشان اخده.... ابنى مرمى فى ارض البلكونه عندها .. نطيت وخدته ابنى وانا حر 

زهره بتلف ايدها فى الهوا وبتضربه تانى .. عشان حرامى .. حرامى ..  حرررررررامى افرد الولد وقع ياغبى ها افرح بيك 

تامر مسك ايديها : بطلى غباوه انا مستحملك من بدرى 

سعاد : ملكش حق يابنى .  عيب وحرام عليك توقع قلب الست غير حرمة البيت الا انت انتهكته .. هى صدقت يا تامر كدا 

تامر بيزعق لدرجه انه فزع زياد : انتى بتقولى ايه يا أما وليه تودى ابنى عند واحده زى دى اصلا 

زياد اتفزع جااامد وعيط 

زهره جريت عليه وهى مغيبه حضنته جاااامد بتضمه كانها ها تدخله جواها من الخوف عليه وبتبوس فى وشه بالهفه وجنون .. لا يا حبيب ماما زهره ما تعيطش ماتخافش يا زيزو يا زيزو انت فى حضن ماما زهره وواخداه وماشيه راحه على شقتها تحت نظرات سعاد وتامر الا واقفين متنحين 

تامر راح وراها وشد ابنه خده : هاتى ابنى يا مجنونه انتى 

زهره اتصدمت وبصت فى عيون تامر وهى رافعه ايديها كانها لسا شايله زياد ودموعها نزلت .. دخلت شقتها وقفلت الباب بقوتها واترمت ورا باب الشقه وكأنها حست هى عملت ايه او محرومه من ايه وبتعيط بوجع مكتفها ورابط احساسها وغريزة الامومه عندها .. ليه الدنيا بتعمل معاها كدا وليه  ليه وليه ومية الف ليه اتفتحت قدام عيونها الا بتنطر حزنها والمها من كل إلا ظلمها بكلمه او بفعل صوتها وصوت وجعها وقف تامر قصاد باب شقتها .. لاول مره يحس انه جاحد وغبى وكل ما يسمع شنهفتها وعيطها بيبقى نفسه يكسر الباب ويدخل يقول لها انا اسف مش قصدى اد ايه شكلها موجوعه وانا دوست على وجعها كله خد زياد ودخل لامه 

سعاد بعصبيه : يرضى ربنا الا عملته فى الغلابنه المكسوره دى .. ليه يابنى .. ليه حرام عليك 

تامر : انا عملت ايه انا خدت ابنى ثم كمان هى مالها كدا وبتعيط وبتعمل كدا ليه 

سعاد : عشان ربنا كرمك بنعمه هى محرومه منها ومجروحه .. عارف يعنى ايه محرومه انها تكون أم مكسوره يا قلب أمها 

تامر بعصبيه : ليه وايه الا يكسرها .. ما كلنا محرومين ودموعه نزلت .. منا اتحرمت من مراتى  ماتت وسابت ابنها وسابتنى .. وبيشاور على ابنه دا قوليلى يا أما مش محروم من أمه .. انتى مش محرمه من جوزك .. هاتيلى واحد فى الدنيا دى كلها مش محروم من حاجه هاتيلى واحد فى الدنيا مش بيعانى من حاجه كلنا بنعانى وكلنا تعبانين .  فهميها وعرفيها ان كسرة البنى ادم بتيجى من نفسه وعدم رضاااه با الا ربنا عطاهالو .. فهميها انها ممكن يبقى معاها كل حاجه وتعيش حياتها حاسه بالنقص والحرمان والقفص الكبير الا فصلته لنفسها .. قوليلها اننا كلنا بنكمل بعض ربنا خلقنا كدا نكمل بعض وساب امه ودخل شقته .. وانهار هو كمان  على قلبه وحياته الا فقدها من يوووم ما ماتت فعلا الدنيا قاسيه بس احنا الا بنزود قساوتها دى على نفسنا  

ليه بنجرح نفسنا وليه الناس بتجرحنا يارب هون 

سعاد شالت زياد من الارض وراحت لزهره .. فضلت كتيررر تخبط عليها بس مفيش رد .. يا زهره يابنتى افتحيلى انا طنط سعاد الا بتحبيها زهره 

سميحه : ايه مقدرتيش عليهم 

سعاد : زهره زعلت من ابنى المدب وقافله على نفسها مش عايزا تفتح 

سميحه : طيب سبيها بس انهارده وبكرا ها تلاقيها زى الفل انتى عارفها 

سعاد : يابنتى ها نبقى احنا والزمن عليها مش عايزاها تزعل والله ابنى ما يقصد حاجه ولا كان يعرفها ما انتى عارفه يا سميحه كان مشغول لشوسته فى الورشه دا حتى اتفاجئ ان فى حد سكن فى الشقه 

سميحه : معلش يا سوسو بكرا تهدى صدقينى  وها تطلع ولا كأن فى اى حاجه هاتى زياد وروحى شوفى الباشا دا  وهديه شويه 

سعاد : بعد ما ادت زياد لسميحه انا غلبت معاه غلبت يارب اعمل ايه تانى 

سميحه : معلش ربنا يهديه .. وبتبسم لزياد .. ياله يا استاذ يا إلا عملتلنا مشاكل مع ابوك ابو مخ تخين وزهوره الا ما بتصدق تزعل .. وخدته ودخلت على جواااااا  

.............

زهره لسا مكانها .. وجعها والكلام قلب عليها الا فاااات الا مش قادره تنساه ابدا 

فلاااااش بااااك 

***********

بعد ما حسام مشى قعدت تفكر ياترى القرار الا خدته صح والا غلط .. طيب ها تقدر تعيش من غيره ازاى وهى بقت شبه ميته انسان عايش من غير روح .. وفجأه سمعت خبط تانى على الباب مسحت دموعها وقامت تفتح 

ابوها بعصبيه زقها ودخل ودخلت وراه أمها  .. انتى ايه يا بت أنتى عايزا تجبيلى جلطه .. انا عمال اجرى فى الشوارع زى المجنون وادور عليكى هنا وهنا وانتى ولا عندك دم 

زهره بتوهان : يا بابا انا 

ابوها شدها من دراعها : انتى ايه .. قوليلى بقالك 3 تيام فين انطقى 

أمها : سيبها يا ناجى واهدى شويه وخدت زهره فى حضنها كنتى فين يا حبيبتى احنا قلبنا عليكى الدنيا 

زهره : والله كنت هنا نايمه ما خرجتش وماحستش بأى حاجه ولا أى حد حتى حسام لسا ماشى وهو الا قالى وكنت ها البس واجيلكم 

ناجى : نايمه بقالك 3 تيام .. وعملتى ايه مع جوزك صلحتى الدنيا بينك وبينه والا لاء 

زهره : يا بابا هو كان جااااى عشان ال .. وقصت كل شئ 

ناجى قام وشياطين الدنيا بتتنطط قدام وشه .. انا قولتك ايه انا خرجتك من بيتى عشان ترجعى وتستسمحى جوزك .. فيها ايه لما تعيشى مع ضره فيها ايه الدنيا ها تخرب شرع ربنا وكمان انتى ما بتخلفيش وهو استحمل كام سنه الراجل يعيش عمره ويموت من غير عيل .. اطلقتى وعايزا تبقى حره وسيرتك على كل لسان دا لو العيب مش فيكى لسان الناس ها يجيبه فيكى الناس ما بترحمش

زهره بعياط : كفايه حرام عليكو كفايه .. كل دا عشان الناس وكلامها اعمل ايه خدنى اقتلنى وادفنى بايدك يمكن الناس تبطل كلام وانت ترتاح .  متجوزه الناس بتتكلم ما خلفتش الناس بتتكلم مطلقه  الناس بتتكلم خلاص شلونى من حياتكم انسونى كلكم قول بنتى ماتت .  والا اروح اترمى تحت رجله وابقى خدامه لصحبتى الا غدرت بيا وطعنتنى استنى لما تولد واربى عيالها بقهر وذول عشان خاطركو 

ناجى : انتى الا خايبه وماعرفتيش تحافظى على بيتك ما تلمويش غير نفسك تدخلى الحيه بيتك ولما تلف على حياتك وتقضى عليها تبكى وتنوحى .. اتفضلى قدامى 

زهره : انا ها اقعد فى شقتى مش ها اقعد عند حد 

ناجى : لا دا انتى اتجننتى عقلى بنتك يا أمل بدال ما اوريها الجنان 

أمل : براحه ياناجى هى مش حمل كل الا بيحصل قومى يا حبيبتى تعالى ياله معانا 

زهره : ارجوكى يا أمى سبونى براحتى انا مش ها اعيش غير في بيتى 

ناجى : وبالنسبه للبيه الا جاى ياخد الشقه وانتى بغابوتك بتديهالو بدال ما تخليه يحفى ويلف على كعوب رجله قولتليه خد شيل وحمل 

زهره : انا ها اعيش فى شقه  على قدى مش لازمنى حاجه منه 

ناجى :  قدامى يابت انتى ما بتجيش بالذوق قدامى 

امل فصلت بينهم : خلاص انا ها اقعد معاها لحد ما نرسى على بر .. وها اكلمها براحه روح انت دلوووقت 

باااااك 

قامت هربت ورمت نفسها على السرير وغمضت عيونها بتعب 

***************

مر يومان وزهره ولا حس ولا خبر .. وكلهم تخيلو انها راحت لأهلها قاعده معاهم . 

تامر واقف فى البلكونه وسعاد جمبه .. 

تامر : هى لسا ما ظهرتش بردو 

سعاد : لا يابنى سميحه بتقولى اكيد عند اهلها 

تامر : معقول ومحدش ها يشوفها ما انتى حكاتيلى ان فى مشاكل بينها وبين اهلها ومابترتحش معاهم 

سعاد : مش عارفه يابنى والله ربنا يطمنا عليها يارب 

تامر بزعل : اكيد مش طايقانى .. وكمان الورد بتاعها ها يموت لازم نسقيه 

سعاد : اجبلك قزازة ميه تسقيه 

تامر : هاتى يا أمى .. وجابت الازازه ونط فى بلكونة زهره وسقى الورد كله الا فى البلكونه ورجع تانى مكانه 

سعاد : ربنا يهديك ويحنن قلبك يابنى 

تامر : 😂😂 ها تشحتى عليا يا أما والله عليكو حاجات غريبه انا نازل  الورشه عايزا حاجه 

سعاد : ربنا يوسعها عليك يابنى مع الف سلامه يا حبيبى 

***********

سميحه زى عادتها : قبل ما تنزل خبطت على زهره وفضلت تخبط تخبط .. لحد ما زهره فتحت الباب وشعرها منكوش ومنظرها يخض ..

سميحه شهقت وخدتها ودخلت على جوا وقفلت الباب .. ايه الا انتى عاملاه فى نفسك انتى اتجننتى يا زهره 

زهره سندت راسها على سميحه : انا تعبانه يا سميحه 

سميحه : اقعدى هنا مالك حاسه بإيه انتى كنتى فين روحتى لاهلك 

زهره بتعجب : أهلى لا انا ماتحركتش من هنا كنت نايمه 

سميحه بعصبيه : تلت تيام با ليلتين نايمه ليه وعشان ايه بتعملى فى نفسك كدا قومى قدامى خدى شاور على ما اعمل لقمه تأكليها وساعدتها  وزهره خدت شاور وفطرت مع سميحه بقلم : لبنى طارق.. وسميحه قاعده واخدها زى الاطفال فى حضنها وبتسرح لها شعرها 

زهره بتضحك : انا بحبك يا سميحه انتى احسن من كل الا كانو فى حياتى 

سميحه : ياحبيبتى الناس لبعضيها .  مش جايلى قلب اسيبك كدا واروح العياده 

زهره : لازم تروحى فى ناااس تعبانه ومحتجاكى أكتر منى بس ما تروحيش الجمعيه  وتعالى اقعدى معايا 

سميحه : حاضر ياقلبى .. ها اسيبك انا بقى وانزل .. وقامت وعدت على سعاد وقالت لها ماتسبش زهره وتفضل جمبها وفعلا سعاد خدت زياد وراحت لزهره على طول 

*********** 

اسماعيل : مالك يا بشمهندس بقالك كام يوم مزاجك وحش

تامر : مفيش ياعم أسماعيل .وبيعلى صوته ايه يا شباب اجى اساعد 

احد الشاب : ياريت يا بشمهندس العربيه دى تعبتنا 

تامر دخل ليهم جوا الورشه وبدئو يشتغلو مع بعض .. وفكره مشغول بزهره ولهفتها على ابنه إلا ما تقلش ابدا عن لهفة أم لابنها . زعلان من نفسه وخايف يكون جرالها حاجه بسببه  

اسماعيل بصريخ : حااااسب .. حاسب 

الشباب اتلمت على العربيه وساندنها لانها وقعت من على الكوريك وتامر تحت العربيه وخرجوه واتصاب فى راسه وحس انه دايخ  وخدوه طلعوه على فوووق