 |
رواية اغتصاب شرعى الجزء الثالث الفصل الثامن بقلم محمد مالك
ويعود يس الي منزله مهموما حزينا شفتاه منتفختان من اثار الضربة التي تلقاها من شهاب وعندما يفتح باب الشقة يجد زينب تقوم بتنظيف الشقة وعندما تنظر اليه تصاب بالصدمه بسبب ما حدث له
زينب .. يا لهوي .. ايه اللي في وشك ده يا يس ؟!! مين اللي عمل فيك كده ؟!
يس لا يرد ويتوجه نحو غرفته
زينب .. رد عليا يا راجل .. قلي ايه اللي عمل فيك كده ؟! وقعت علي وشك ولا ايه ؟!
يس لا يرد ثم يدخل غرفته ويغلق الباب
زينب .. هو في ايه ؟! هو الراجل حصله ايه يا اخواتي ؟!
ثم تخرج سارة من غرفتها حزينة هي الاخري
زينب .. مالك انتي كمان .. كنتي بتعيطي ولا ايه ؟!
سارة .. مش بعيط يا ماما .. بابا جه ؟
زينب .. ايوة جه ودخل اوضته وبسأله مالك ولا عبرني !!
سارة .. ليه .. ماله ؟!
زينب .. شفته وارمه اد كده ؟!!
سارة .. ايه !! .. طب ليه ؟!
زينب .. بقولك سألته معبرنيش .. اهو عندك جوة روحي شوفيه ماله !!
سارة تفكر قليلا ثم تقول .. لا
ثم تعود الي غرفتها مرة اخري
زينب مندهشة ..هو ايه اللي بيحصل ده ؟! الراجل وبته مالهم ؟! اصلح الحال من عندك ياارب
ونذهب الي نور وصديقتها سمر حيث ذهبا الي تلك السيدة التي تريد نور ان تعرف حقيقتها.. السيدة تنظر الي الصورة التي مع نور ثم تقول
السيدة .. مين ده ؟!
نور تنظر ل سمر في دهشة
نور .. ده ممتاز اخويا .. هو حضرتك متعرفهوش؟!
السيدة .. لا معرفوش
نور .. بس حضرتك شايلاه علي ايديكي اهوه .. يبقي ازاي بقي متعرفهوش ؟!
السيدة .. شايلاه ازاي يعني ؟!
نور .. مش حضرتك اللي في الصورة دي ؟!
السيدة .. لا طبعا مش انا
نور .. لا دي حضرتك .. بصي كويس في الصورة
السيدة مرتبكة .. قلتلك مش انا .. ولنفرض انه انا .. دي صورة قديمة اوي .. مر عليها عمر طويل .. ازاي عايزاني افتكر حاجة مر عليها عمر طويل اوي وانا خلاص بقيت ست كبيرة وعيانه كمان !!
نور .. الف سلامه لحضرتك .. طب حضرتك مش عارفة حضرتك مين الشخص ده اللي واقف جمبك ؟!
السيدة .. لا .. وانتي ليه مصرة ان اللي في الصورة دي انا ؟! انتوا مين اصلا وعايزين مني ايه ؟!
نور .. طب انتي تعرفي الظابط شهاب طبعا ؟!
السيدة .. شهاب !! .. ماله شهاب ؟!
نور .. هو الظابط شهاب يقربلك ايه يا طنط ؟!
السيدة .. وانتي مالك يقربلي ايه ؟! انتي مين وعايزة مني ايه ؟!
نور .. انا عايزة اعرف مين حضرتك ؟! اسمحيلي اتعرف عليكي
السيدة .. وتتعرفي عليا بمناسبة ايه ؟! من فضلكم انا تعبانه ولازم ادخل انام
نور .. اوك .. تقريبا كده حضرتك بتطردينا بس بأدب .. مفيش مشكلة .. نستأذن حضرتك واسفين للإزعاج
السيدة .. لا ولا يهمك .. مع السلامة
وبعد خروج نور وسمر
سمر تعاتب نور .. عاجبك كده اهو اتهزقنا بسببك ؟!
نور .. ولا اهتزقنا ولا حاجة متأفوريش انتي بس الموضوع
سمر .. انا نفسي اعرف انتي استفدتي ايه من الزيارة دي ؟! اهي مجاوبتش ولا علي سؤال من اسئلتك ؟! وزي ما رحنا زي ما جينا وما نابنا غير الكسفة بس .. انا غلطانه اني طاوعتك وجيت معاكي يا مجنونة انتي !!
نور .. من فضلك يا سمر اسكتي بقي لأحسن اطلع جناني عليكي بجد
وتقف نور وسمر في انتظار الاسانسير وعندما يأتي الاسانسير وتفتح نور الباب .. تفاجأ بوالدها يخرج من الاسانسير ويحمل بعض الاكياس البلاستيك
نور .. بابا ؟!!
رد فعل علي وجه الاب
ونذهب الي ممتاز
حيث يجلس في غرفته وتدخل اليه الحاجة ام رباب
ام رباب .. كيف حالك يا ولدي؟!
ممتاز .. بخير يا حاجة الحمد لله
ام رباب .. قلي يا ولدي ناوي تعمل ايه مع البنية دي ؟!
ممتاز .. ان كان عليا عايز اقتلها واشرب من دمها !!
ام رباب .. حاسة بيك وبوجعك يا ولدي .. والم الظلم واعر قوي !! بس مش انت اللي تعمل اكده ؟! انت واد ناس وطول عمرك شهم والشهم ياخد حقه بالاصول وبالقانون .. وانت ابو القانون كله ولا ايه يا ممتاز باشا ؟!
رد فعل علي وجه ممتاز
ونذهب الي شهاب حيث ينام في شقته والوقت قد اقترب من الفجر حيث تصعد قوات الشرطة يتقدمهم النقيب سالم الي شقة ممتاز ثم يفتحون باب الشقة ويدخل سالم وخلفة القوة الي غرفة نوم شهاب ويصوبون جميعهم مسدساتهم في وجه شهاب ويقول سالم
سالم .. سلم نفسك يا شهاب ومفيش داعي للمقاومة
شهاب يستيقظ من النوم ليري الكشافات تضاء في عينيه
شهاب .. هو في ايه ؟!
سالم يفاجأ بشئ صادم ؟؟!!
