رواية غاليتي الفصل الثالث
غاليه : لا مادخلش بيا انا هكي ومش عاجبه يخبط راسه في الساس .....
ولقت ورقه في شكارة الخبزه 😳
انصدمت ودستها قبل ماا امها اتشوفها
وطلعت تجري لدارها : داير روحه واعر و شخصيه وطايح فيا حاطلي الرقم في الخبره وعلى اساس جو خويا وخايف عليا عليك طروح !! 😏
تي والله انرن نمسح بيه الارض ونمسح كبدي
وطلعت تليفونها و تطلب في الرقم
الخط يضرب ..... و رد
غاليه متعصبه : ألووو
الراجل : ايوه
غالية : انت شن تحساب روحك اتحطلي الرقم في شكارة الخبزه ؟؟ 😡
الراجل ضحك : انتي عجبتيني من اول ماخشيتي و انتي الي كنتي تضحكيلي وتوقعتك اترني ورنيتي
غاليه استغربت : شنوووو شن تحكي انت 😨
الراجل ضحك : حطيتلك حتى ورقه في شكارة التن والهريسه مش مصدق انك رنيتي 😍
غاليه قلبها يدق و انصدمت
سكرت الخط بسرعه ونزلت التليفون : حي على امي شن درت طلع مش هو ! شن اندير توا 😫
وتليفونها رن لقاته نفس الرقم : حي على امك ياغاليه
انحطه في الحظر احسن حاجه
سعاد : غاااااليه
غالية حطت التليفون ع الطاوله فم الدار : هيااا جايا
وطلعت تجري
___________________
المنجي يتغدى مع هله : شن جو عمتي سعاد نظيفه في الوكال ؟
امينه اتغمس في الفاصولياء : والله نظيفه كان هضا ماناكلو منها
هناء تاكل : ديما وكالها فايح
المنجي ضحك : نفسياً مانتريحش ناكل من حد غير امي
هناء تاكل : ماهو تاكل في وكال المطاعم
المنجي بحت فيها : ازمطي لي في فمك بعدها ادوي مش لازم اتورينا شن فيه جوا 😒
رجب ياكل : خليها عنك ياراجل مالك ومالها
هناء ضحكت : شفته ياباتي شن يدير امس خش ضربني في الليل
المنجي : الحق علياا الي نبي انضحكك
الباب دق ✊🏼 ✊🏼
امينه استغربت : من الي جاينا ع القوايل وجت تبي اتصبي
المنجي صبا : قعمزي توا نفتح
ومشى يفتح في الباب وهو ياكل ..
لقاه وسام : اووووو الْوِس
( الوس هذا دلع اسم وسام عند الشباب )
وسام : ان شاء الله غير ماتغدو يامنجا ؟
المنجي ضحك : طالعلك باللحم والدهان
وسام : عليك تزليطه ياراجل مع هلك
المنجي : تي فكنااا من طروح الصبايا من امتى انت اتحشم
وسام : لا والله غير امخطم قلت خليني انشوفك بلكي انترافقو
المنجي مافهمش : باهي خش خش تغدا معايا وتوا نفهم منك جوا
وسام : لا ياراجل هلك ايتغدو عيب
المنجي خش وسيبه : خش وسكر الباب وراك فكني من حركات الدرايق
وسام ضحك وخش
المنجي فتح الصالون : خش تعال
وسام يسلح في كاويشه : السلام عليكم
المنجي : تي ماحد يسمع فيك ياراجل خش .. متغدي ؟
وسام : اها متغدي
المنجي ضحك : علي اليمين كذاب 😂
وطلع لدار المقعد : امي في غداء زايد ولا كمل
امينه صبت مالسفره : في ياوليدي الخير واجد
المنجي : باهي انتعبك ياحويجه اتحطيلنا مقعد هذا وسام جاني
امينه : مزال ساخن كولوه خير مايطوح توا نغرفلك
هناء : عليك قلة ذوق جاي ع القايله
المنجي تعصب
ويحكي وهو مسكر سنونه : وطي صوتك ياحيوانه
هناء كشخت عليه : تي باهي وانت عندك عقده مع الصوت
رجب فنص فيها : معش اتردي على خوك يابت 😡
هناء صبت وخذت سلة الخبزه : باهي ياباتي
المنجي رفع السفره وشالها للمطبخ ومشى لِـ وسام
خش للصالون : منور يالوس
وسام : بوجودك يامانجا
المنجي قمعز : باهي شنو موضوع انترافقو هذا
وسام : حصلت فيلتين في طلميثه لاصقات في بعضهن ع البحر دغري ومانلقى خير منك ومن هلك رفقه معانا
المنجي حك شعره : والله ماني عارف
امينه قدام الباب ماسكه السفره : المنجي
المنجي صبا خدا منها السفره : خشي ياامي
امينه خشت : السلام عليكم
وسام صبا : عمتي شنو حالك
امينه : الحمدلله بخير كيف حال امك
وسام ضحك : طيبه اتسلم عليك جتكم في الفرح هي
امينه : عارفه جتني عرفت بروحها سلمها جيايا
المنجي : وسام قالي محصل فيلتين في طلميثه وماشي هو وهله ويبينا نمشو معاهم
امينه ابتسمت : والله مافي مشكله
وسام ضحك : الحق مالقيت حد خير مالمنجي انوده بيها
امينه : سلمك ان شاء الله مايفقدك
بحتت في المنجي : انت شن رايك
رجب خش : السلام عليكم
وسام صبا سلم عليه : عمي كيف حال صحتك شن داير
رجب : بخير الحمدلله شن حال هلك
وسام : الحمدلله بخير والله
المنجي : والله الراي الاول والاخير لباتي
امينه : تمشي طلميثه ياحاج ؟ وسام هدا فيلا ايجار على المنجي
رجب ضحك : نمشو للبحر ليش لا الواحد يغير جو ويشم هواء نظيف
المنجي ضحك : خلاص وانت طيب نمشو معناها
__________________________
5:00 م
غالية تقرا في الرسائل الي يدز فيهن لها الراجل ابتاع الرقم
( ردي ياسمحه )
( مادام تبي تحظريني من قالك رني عليا )
( تستشرفي عليا توا؟ وانتي رنيتي اول ماعطيتك الرقم ردي خلينا انتفاهموا )
حي علي امي عليك عمله درتها
كيف انطفشه 😔
عمري مادرتها ورنيت على راجل
ولما انديرها وانرن انطيح في هضا !!
الباب يدق ✊🏼
مختار في الدار : ياصفااااء الباب .... يامروه .....
غاليه طلعت تجري مالمطبخ
وتلبس في طرحة الصلاة : هياا جايا
صبت عند الباب : من
المنجي مصبي قدام الباب : عمي مختار قاعد
غاليه بينها وبين روحها قالت الصوت هذا نعرفه : باهي من انقوله ؟
المنجي : قوليله المٌنجي
غالية في عقلها ياناعليا باهي الي ضميت الحوش ..
وفتحت الباب : خش تفضل
المنجي خش : السلام عليكم
غاليه : وعليكم السلام ... وسكرت الباب
المنجي يسلح في كندرته : وين المربوعه
غاليه ابتسمت : خشله جوا في الدار
المنجي : باهي عطيه علم اني جيت
غاليه : باهي شويا بس ..
وتمشي ورافعه طرحة الصلاة تقول فيلو
المنجي يبحت فيها و زراته الضحكه 😬
غاليه فتحت الدار : باتي هذا المنجي
مختار مقعمز في السرير ومتغطي فرح : خليه يتفضل فيش ترجي ياغاليه
غاليه : هو قالي قوليله قبل ..
وطلعت للباب : خش تفضل
المنجي كح بصوت عالي
وخش للدار : السلام عليكم
مختار فرح : مرحبتين باش مهندس ماشاءالله
المنجي سلم عليه وحب على راسه : كيف حال صحتك عمي مختار شن داير
مختار ابتسم : الله يرضى عليك ؛ الحمدلله بخير .. شن اخبار الحقول
المنجي ضحك : سيباهن خلاص حصلنا واسطه ونقلت في شركة الخليج
مختار : عطاك الله خير مالبعد ..
وقعدو يهدرزو ..
____
غاليه ادير في قهوه
سمعت الباب يدق بالقوه : ياساتر
وطلعت تجري وصبت عند الباب : من ؟
خالد سكران : افتححححي
غاليه 😱 : شن جابه توا عليك فضايح .. وفتحت
دف الباب ودفها ع الساس : سااااعه عشان تفتحيييي الباب
__
مختار سمع صوت ولده قالب الحوش : شكله جا شن جابه هذا ولد الكلب
المنجي : لا حول ولا قوة الا بالله .. وسع بالك بالك عمي مختار
__
غالية خشت للمطبخ اتصب في القهوه
لحقها وفتح التلاجه : شن في غداااء
غاليه : درنا فاصولياء وكملت
خالد كشخ : وجوه فقررر ..
ولقى تليفون غاليه ع الدولاب : افتحيه ليا ناخد رصيد
غاليه قلبها يدق اذكرت المسجات
خبطها على كتفها : افتحيه قتلك
غاليه : ماعندش رصيد .... وطلعت شايله السفره
خالد يعيط وكرها بالقوه : تعاااالي
طاحت منها السفره وعيطت : باتك عنده ضيف سيبني
طيحها وخبطها ع الارض : اففففتحيه توا التليفون
غاليه تبكي : قتلك ماعندش
خالد خنقها ويفنص فيها : افتحيه ولا تموتي توا
غاليه تبكي و وفتحاته
صفاء ومروه خافن قعدن يبكن
وسكرن على روحهن الباب بالمفتاح
صفاء ترعش : امسحي كان عندك حاجه
مروه اتخبط في وجها : حي على امك ياغاليه انظر شن لقى عندها
خالد خذا الرصيد و قعد يفتش
خش ع السجل وع الرسائل شاف رسائل الراجل مسكها من شعرها وقطع طرحة الصلاة وقعد يضرب فيها : ياساااقطه ياصايعه تبي اتجيبيلنا العااار
غاليه اتعيط : والله مانعرفه والله مانحكي معاه
مختار يعيط : ياخااااالد سيب اختك .. وقعد يكح
المنجي يسمع في عياطها وقلبه يتقطع
صبا يجري وطلع مالدار
خالد يخبطلها في راسها ع الدولاب : ياحقيره يا ...... جبتيلنا العار
غاليه تبكي واتعيط : ووووه عليااا سييييبني والله مانعرفه
المنجي خش يجري ومسكه من ماليته : كنك انت فيش اتحس
خالد انصدم وبرم بحت فيه : من انت يا ......
المنجي يكر فيه : اطلعلي برااا اطلع
غاليه طاحت ع الارض وتبكي
خالد تعصب ويفك فيه : يا....... ويعيط بصوت عالي
: ويييين يامختاااار تجيب في رجاله لبناتك في الحوش
المنجي معش تحمل وخش فيه بدماغ : يامسخ يا......
وقعدو يضاربو وغاليه اتعيط
المنجي فتح الباب ويكر فيه برااا : اطلع معايا يا.....
خالد يضرب فيه : والله انوريك منتهك حرمة الحوش وخاش على خواتي يا........ والله نحبسك
جو جيران الشارع ويفكو فيهم من بعضهم
ركبو خالد في سيارته : ولع واربح وانت ماجايب لهلك غير الهم
المنجي ايتحزز عليه وماسكينه الجيران
خالد ماشي يحرق في العجل ويتحلف في المنجي : والله نعرف كيف انجيبك يا.......
صفاء ومروه طلعن يجرن لباتهن قعدن يهدن فيه
مختار يكح : وين اختكن
مروه : في المطبخ عديلها ياصفاء
صفاء طلعت نجري
و غاليه طايحه في المطبخ وتبكي
المنجي خش وسيب الباب مفتوح
مشى للمطبخ لقاها تبكي ع الارض
ويحكي وهو داهش : انتي كويسه ؟
غاليه ماتبش اترد وتبكي
المنجي : شن الي لقاه في تليفونك ؟؟؟؟
غالية رفعت راسها بحتت فيه وردت تبكي
المنجي تعصب
ولقى تليفونها طايح وشاشته مشقوقه : أفتحيه
غاليه تبكي : مش من حقك اتفتش تليفوني
المنجي : افتحييييه 😤
غاليه تبكي وفتحاته له
المنجي داهش ويقرا في الرسائل
حط التليفون ع الدولاب
و مسكها من يدها من فوق : صبي
غاليه متزلطه بكل : حول خليني
المنجي يرفع فيها : صبي هيا
غاليه صبت ويادوب قادره نمشي
خشت صفاء للمطبخ لقاته يرفع فيها
المنجي بحت فيها : جيبيلي كرسي كذا
صفاء مشت تجري جابت كرسي وحطاته له احدا غاليه
المنجي بحت في غاليه : قعمزي
غاليه قعمزت ومنزله راسها منحرجه منه بكل وتبكي
المنجي بحت في صفاء : ارفعيلها شعرها وامسحيلها فمها
ينزف
صفاء هزت راسها بمعنى به
المنجي : كان في حاجه تبوها مالصيدليه قوليلي
ومشى خش لمختار في الدار
مختار : حسبي الله ونعم الوكيل حسبي الله ونعم الوكيل
المنجي قمعز ع الكرسي : صار خير ان شاء الله
مختار بحت فيه : شن صارلك ياباش مهندس
المنجي ابتسم : لا جو تمام ..
وبحت في مروه : انتعبك جيبيلي طاسة اميه
مروه طلعت : هيا لحظه بس
المنجي مسك التليفون ويتصل بأمه
امينه ادير في كيكه : الو
المنجي : امي تعالي لحوش عمي مختار
امينه انشغلت : شن في ؟؟
المنجي يمسح في عرقه : لا غاليه تعبانه شويا وعمتي سعاد مش قاعده تعالي
امينه : هياا نلبس جلبابي وانجي
وطلعت تجري : يارجب نوض معايا نمشو لعيت مختار
رجب يقرا في قرآن : شن في
امينه تلبس في محرمتها : غاليه تعبانه والمنجي صوته مش مريحني نوض نمشولهم
رجب حط المصحف ع الطاوله وصبا : ان شاء الله خير
________________
سعاد روحت مالعزاء لقت باب الحوش مردود
خشت مستغربه لقت مروه اتنشف في الارض واتلم في القزاز : شن في ؟
مروه اتنشف : خالد جا ضرب غاليه وتعارك مع منجي
سعاد شهقت : المرزي شن دار للراجل ؟
مروه : المنجي قاعد جوا مع بابا وغاليه في المطبخ تبكي
سعاد خشت تجري للدار : السلام عليكم شن في
مختار : شفتي ولدك شن دار فينا وعيونه دمعن
المنجي حط يده على كتفه : ماهناك الا الخير عمي مختار وسع بالك
سعاد اتبحت في المنجي : امسحها في وجي يامنجي يانااااعلي سوريتك تقطعت
المنجي ابتسم : انا مافيا شي غير شوفي غاليه شن صار فيها
رجب يدق ع الباب
امينه : قلبي مش مطمن
مروه فتحت الباب : اهلين عمو رجب
رجب خش : مرحبتين وين بوك يابنت
مروه : جوا في دار المقعد في سريره تفضلو
امينه : وين امك
مروه اتسكر في الباب : جوا معاهم في الدار
وخشو لدار المقعد
امينه شافت المنجي سوريته مقطعه شهقت : حي عليااا كنك شن في
المنجي فنص فيها : مافي شي كنك
مختار يحكي لرجب : ياراجل خالد جا رد دار نفس الجو لولا المنجي راهو قتل البنت وجاب عمرها
امينه اتحبت في المنجي وتمسك في وجه : شن دارلك ياناعلي
المنجي يدف في ايديها : شوفي غاليه بس
امينه : وين غاليه
المنجي : في المطبخ خليتها
___________________
أحمد قاعد ع التلفزيون : وعليش لا خلينا نمشو معاهم
اميره متكيه ع الكنبه : عشان تقعد اتهزب فيا قدامهن شريني راني واعر وحاكم فيها
احمد ضحك : يعني كارهتيها المشيه للبحر والعومه ع الفجر
اميره ضحكت بصوت عالي : حتى العوامه في البانيو يشكرو فيها
احمد ضحك : بااااهي به
اميره : ومنها يفضالنا الحوش شويا وننزل براحتي لوطه بلا مانلبس و اتغمني بالكم و الجاكات
احمد : انا حتى المحرمه مانخليش فيك تلبسيها ع المنجي
اميره : لكن نص كم لا واستيرتش لا وكل حاجه لا
احمد : باهي نطلعوا انلفو شويا
اميره قمعزت : بشرط انتعشو برا
احمد : صبي البسي باه انخش اندير حمام ونطلعو
________________
7:00 م
امينه : خلاص الرجاله قالو كلمتهم تمشو معانا يعني تمشو معانا
سعاد متضايقه : مصاريف و الله مانا في قبالهن توا
المنجي بحت فيها : عيب عمتي سعاد مش تقوليلي انت ولدي ! طلع كله كلام توا ؟
سعاد : لاااا والله وليدي ونص غير مانبو انكيدو عليك
المنجي : كان ع الايجار جتني هديه وكان ع الاكل الشرب الي بينا بيكم والجود في الموجود
مختار : والله كان خليتنا يارجب خير
رجب : ياراجل كم لك ماطلعت مالحوش شهور وانت راقد في هالسرير خلينا نمشو ع البحر انردو ايام زمان
مختار ضحك : خلاص نمشو
سعاد : باهي معناها شن انديرو ياامينه شن ناخدو معانا
امينه : الدنيا مزال ضي برا نمشو اندبو وحيده وحيده انجيبو الي ناقصنا
سعاد : هياا انشوف البنات شن صار فيهن ونعدو
المنجي صبا طلع : تبو شي ؟
مختار : سلامتك بدري يالمنجي
المنجي : من عمرك عمي مختار والله عندي شغل
امينه صبت اتوصل فيه
المنجي ماسك سوريته بيده وقرب من امه : اللحم توا انجيبه انا الصبح غير قوليلي عشان نتفق مع الجزار من توا
امينه : كم كيلو اتجيب
المنجي : سقيطه كويس ؟
امينه : لااااا وااااجد 😱
المنجي : غادي لا رز لا مكرونه نبو شوايات سقيطه و 10 دجاجات كويس ؟
امينه : اتحط الي عندك كله معناته 😒
المنجي تعصب : قوليلي كويس ؟؟ 😤
امينه : بزياده اخرى
المنجي: خلاص جيبن جو البهارات والخضره والحبارك هذينا و اللحم والمشروب خليه عليا وتوا انجيب فحم
امينه اتسكر وراه في الباب : وانت طيب
______________________
10:00 م
احمد فتح الباب
لقى المنجي في الجنان ايدخن : اووووي
المنجي هزله حواجبه
اميره : شن الجو
المنجي طفا الدخان : تمام الحمدلله
اميره : ماشيين بكرا ؟
المنجي بحت في احمد : كيف انتو مش ماشيين
احمد : لالا مايصير شي
اميره : انا قتله فكنا خلينا في الحوش
المنجي يبحت في احمد : مازلت عريس مش هتاخد راحتك اصلا غادي
احمد ضحك : مع ان والله جو بحر
المنجي : ماشيين معانا عيت عمي مختار
اميره : كيييف يعني غاليه ماشيا ؟
المنجي بحت في احمد : عرفت يااحمد 😑
احمد : باهي والله فكرتو الي خديتوهم هما لا طلعه لا خشه
اميره قلبت وجها وخشت جوا
لقت هناء في المطبخ : هااي
هناء : اهلين 😊 ..
امينه خشت من باب المطبخ الي يفتح ع الجنان جايبه قصع و سفره : خيرات يااميره
اميره : اهلين ياعميمه .. شنو بديتو اتوّتُو لبكرا
امينه ابتسمت : اها بدينا طالعين صبح بدري
اميره بحتت في هناء : فرحانه ياهناء معاك حبيبتك
هناء ضحكت ضحكه صفراء : طااايره مالفرحه الله لا يغيبها
اميره شقلبت عيونها : باهي تمام
_______________
8:30 ص
المنجي ركب مختار قدام في سيارة رجب
مختار : الله يربحك يامنجي
رجب بحت في المنجي : طبق الكروسه حطها في ذيل الشنطه
سعاد اتسكر في الحوش : مش ناسيات شي يابنات
مروه : لالا
صفاء ماسكه تليفونها : بسرعه انصور سناب قبل مانمشو
مروه جت للمنجي لقاته يحط في الكروسه
مروه : اسمع نبو نركبو معاك مش معاهم
المنجي ضحك : توا تركبن معايا اصلا سيارة باتي يادوب اتسد امي وعمتي سعاد والطنجره الكبيره في الوسط
مروه مشت تجري : صفاء هيااا نركبو معاه توا يديرلنا جوو 😍
صفاء : بعدك سيارته خيااال 😍❤ هذي هاتطلع تجنن في فيديوات السناب 😍
غاليه يادوب تمشي بحتت في المنجي : خير
المنجي كشخ عليها وماباش يرد
غاليه اضايقت وجت لأمها ركبيني في النص
سعاد سكرت باب السياره : انتن مع المنجي نحنا شايلين الحاجات معانا
غاليه اضايقت وجت ركبت احدا خواتها
هناء راكبه قدام برمت عليها : امس انرن عليك في الليل كنك ماتردش
غاليه : رقدت بعد الطريحه الي خديتها
هناء : حقير خززي عاطه ضربه
صفاء مسكت تليفونها : بحتن فيا هنا
غالية غطت وجها : انا لالا عيوني متورمات
هناء مدتلها نظارتها : البسي نظارتي هاكي
غاليه لبتسها : اوووف بصراحه
هناء : تي هياا لنا سنين معش مشينا زرده
صفاء صورت 😍📱 : تهببببل طلعت
المنجي ركب و يحكي مع البنات : شن جوكن
صفاء ومروه مع بعضهن : تمام 😍 وقعدن يضحكن 😂
مروه : حطلنا اغاني ديرلنا جووو
المنجي ضحك : مانسمعش الا مرسكاوي تبن بونقطه حاضر
صفاء ضحكت : ووووه لالا نبوش
مروه في النص مقعمزه بحتت في المسجل : حي عندك خيط بتاع تليفون مده لياا انحط انا 😍
المنجي مده لها : حطي حاجه كويسه
غاليه قربت منها بصوت واطي : هاتي انقولك شن اتحطي
مروه : شنو ؟
غاليه : حطي ابتاع ..........
