رواية شمس تتحدي الغيوم الجزء الثاني (للعشق كلمته الاخيرة) الفصل السادس عشر
معقوله اللي بتقولوه ده ياجماعه هو فى حد يعمل كده بردو ازاي تعملوا كده فبنتكم
عبد الله :وهو احنا كنا نعرف ان كل ده حيحصل احنا جوزناها على سنة الله ورسوله
كنا فاكرين اننا بنسعدها وانها حتشوف الدنيا اللى اتحرمت منها
يزيد :جوزتوها اسمحلي حضرتك اللى سمعته دلوقتى مسمهوش جواز ده اسمه بيع وشرا صفقه انت بعت بنتك وقبضت التمن انا اسف فى اللفظ بس هي دي الحقيقه
نجوى:لاء والله العظيم ابدا متظلمناش يابشمهندس احنا مكناش نعرف كده خالص
الست اللي جت كلمتنا قالتلنا انه راجل محترم وغني وحيعيش البنت ملكه واحنا زي اي اهل فى الدنيا نفسنا نشوف بنتنا عايشه عيشه كويسه ومرتاحه
شمس :تقوموا تروحوا تجوزوها لحد انتم متعرفهوش غريب محدش يعرفله اصل ولا فصل ماجاش فبالكم انه ممكن يكون نصاب او حرامي
هاله :بصراحه الواحد بقى بيسمع عن حاجات تشيب والله
عبد الله :هو لما جه البيت عندنا كان باين عليه انه شاريها اوي خدنا واشترالها شبكه غاليه اوى وفرجنا على الفيلا اللي حتعيش فيها وهي فعلا عايشه فيها هو مكدبش
شمس :خدامه عايشه فيها خدامه ياريتك كنت جوزتها لواحد بيبيع فجل وجرجير بس يبقى ابن بلدها عارفين اصله وفصله ليه اهل يترد عليهم
مش واحد ال ايه ثري عربي
طبعا اول ما شفتوا الفلوس والهدايا اللى جبهالها عينيكم زغللت
وطمعتوا وجوزتوهاله فيومين وسلمتوهاله وياللا مع السلامه
ودلوقتى جايين تعيطوا ليه بتدوروا عليها تاني بعد ايه بعد ماضيعتوها
عبد الله :ماتبقيش قاسيه علينا كده يابنتي انا والله كنت فاكرها حتعيش سعيده زي ماوعدنا
لكن اتفاجئنا لما لقيناها بتقوللنا انهم بعد ماوصلوا اتفاجئت انه متجوز تلاته وهي الرابعه وعنده ولاد كتير وواخدها عشان تخدمهم
طول النهار خدمه ليهم ولولادهم ولا شافت فرح ولا داقت طعم الهنا
عمار :ده انتوا تحمدوا ربنا انها جت على اد الخدمه وان بنتكم لسه عايشه على وش الدنيا
انتم معندكمش فكرة ان فى كتير نصابين بيدخلوا على أهل البنت على انهم رجال اعمال وناس محترمه وراقيه واول ماياخدوا البنت ويسافروا بيها ممكن اوي يشغلوها فاعمال مشبوهه وممكن كمان ياخدوا اعضاءها ويتاجروا بيها وفى كمان بيستغلوا ارحامهم عشان الناس اللى مستعده لأى عمل اجرامي فى مقابل ان يبقى عندهم ولاد
نجوى وهي تبكي :ياحبيبتي يابنتي انا اللي عملت فيكي كده
الله يخليكم يارب انا عاوزة بنتي ترجعلي ساعدونا والنبي
شمس سامحيني يابنتي انا عارفه ان اللي بيحصل لبنتي ده عقاب ربنا لية عشان المعامله اللى كنت بعاملك بيها بس هي ملهاش ذنب هى مهما كان اختك ياشمس لحمك ودمك
انا حموت عليها خايفه اصحى على خبر موتها دول نازلين فيها ضرب وبهدله والراجل بيعاملها كأنه شاريها من سوق النخاسه
مقطع جسمها من الضرب والبهدله
عمر :انتي قصدك ان هو سادي كمان
نجوى :ايوة ياعمر أيوة
شاكر :لا حول ولا قوة الا بالله انا مش عارف اقول ايه والله انتوا ازاي عملتم جريمه زي دي فحق بنتكم
ثري عربي ايه وزفت ايه مانا شفت البنت فى فرح عمر وشمس ولما جيتوا هنا ماالبنت جميله وصغيرة وزي الفل ترموها رميه زي دي
ده احنا لما بييجي عريس لبنت من بناتنا بنسال عنه طوب الأرض
مبنطمنش على لحمنا غير وهي جمبنا
ده اللي ماتصبحه وتمسيه ماتعرف إيه جرى فيه
وانتوا رايحين ترموا بنتكم لواحد متعرفوش أراضيه عشان شوية فلوس يااخي ملعون ابو الفلوس اللي تخلينا نفرط فى ضنانا بالشكل ده
عبدالله :احنا اتعلمنا الدرس خلاص والله بس احنا مش عارفين نعمل ايه البنت محبوسه مش عارفه تخرج وكل ماتقولله طلقني ورجعني بلدي يضربها هو وولاده
دي لما قدرت تكلمنا كلمتنا من تليفون واحده من بنات الراجل لما وطت على رجليها باستها وصعبت عليها
ده احنا لما لقيناها مبتتصلش كنا فاكرينها ال ايه سعيده وفرحانه اتاريها ياحبيبتي متمرمطه دول ناس مبيخافوش ربنا
انا مش عارف اعمل ايه ولا ارجع البنت ازاي احنا ملناش حد غيركم يساعدنا الله يخليكم تقفوا جمبنا وتساعدونا نرجعها انا مش عايز حاجه غير اشوفها واخدها فحضني وبس مش عايز اى حاجه تانيه
يزيد :اكيد طبعا حنساعدكم ومش ممكن حنرضى بحاجه زي دي
حنعمل اتصالاتنا عشان نقدر نوصلها ونطلقها ونرجعها بالسلامه
أشرقت :موجود اللي يقدر يساعدنا اننا نرجع البنت موجود وهو اكتر حد يقدر يساعد فى حاجه زي دي
عمار :انتي تقصدي مين يااشرقت
أشرقت :مروان ياعمار انتي ناسي انه شغال فى الخارجيه وليه اتصالات كتير جدا وهو اكتر حد حيقدر يقوم بالمهمه دي
عمار :صح معاكي حق ومروان انسان كويس جدا وعمره ماحيرفض مساعدتنا
شاكر :والله جميلكم ده حيبقى فوق راسنا
عمار :متقولش كده ياعمى انتم مش عارفين غلاوتكم عندنا واللا إيه واللى منكم اكيد بهمونا
شمس :انا متشكرة اوى يااشرقت بس الله يخليكي مفيش وقت ياريت لو تكلموه دلوقتى على طول
طبعا عمار اتصل بمروان اللي اكد ليه انه حيتولى الموضوع ده بنفسه وفى خلال اسبوع بالكتير حيجيبلهم رنا بنفسه وحيطقها كمان
وطبعا عبدالله اتأسف لبنته عن تقصيره فحقها السنين دي كلها وانه مكنش ليها الأب اللي تفتخر بيه
وكمان نجوى اتاسفت لشمس على اللي كانت بتعمله معاها وانها مستعده لأي شئ ترد بيه جميلهم ده عليها
اما شمس فبالنسبه لابوها طبعا لازم تسامحه ده ابوها مهما عمل
لكن بالنسبه لنجوى مراته صحيح هي اعتذرت لشمس واعترفت بغلطها فحقها وطلبت منها تسامحها
لكن شمس صعب عليها انها تنسى كل اللي عملته معاها وان لولا خالتهاسناء، الله اعلم كان ممكن يحصللها ايه
اه قالتلها خلاص مفيش حاجه والمسامح كريم لكن صعب بردو انها تفتحلها قلبها وتنسى كل حاجه اكيد بردو التعامل حيكون فى حدود
معلش ياجماعه احنا مش ملايكه احنا بنى ادمين وبنحتاج وقت عشان نقدر ننسى ونفتح قلوبنا لناس اذونا وتعبونا
ولازم كمان نتأكد إن مشاعرهم دي صادقة مش وليدة موقف وخلاص
🌹🌹🌹🌹🌹🌹🌹🌹
بينما هو يعمل فى ورشته ويمسح عرقه بين الحين والاخر وهو يقوم بتصليح احدى السيارات
اذ به يسمع صوته وهو يلقي عليه التحيه :سلام عليكم ياعلاء
علاء بمحبه فهو يحب عصام من قلبه وموضوع اخته لا يربطه نهائيا بحبه له:وعليكم السلام ورحمة الله وبركاته تعالى ياعصام
عصام :علاء ممكن اتكلم معاك شويه
علاء وهو يقوم بغسل يديه :اتفضل ياعصام معاك بقولك ايه انا مصدع تيجي نقعد نشرب كوبايتين شاي عالقهوة
عصام :ياريت والله
علاء :ياللا بينا حماده خللي بالك من الورشه خمسه وراجعين
😎معاك ياعصام خير مالك فى حاجه
عصام : مفيش حاجه خلاص ياعلاء الحمد لله انا اتعافيت من كل حاجه وحشه عملتها فحق حد او اتعملت فية
وجه الوقت اللي لازم اكمل حياتي بشكل صح
انا اسف اوى ياعلاء والله اسف
علاء :اسف اسف على ايه ياعصام
عصام :اسف على وجع القلب اللي سببته لسلمى اسف على اني كنت السبب فعذابها الفترة دي كلها
اسف على اني جيت عليها وعلى مشاعرها بما فيه الكفايه
اوعى تفتكر اني محبتش سلمى ولا حبيت حبها لية ولبنتي
والله ابدا ربنا يعلم اني بحب سلمى من كل قلبي واذا كان عندي امنيه دلوقتى بتمناها مش حتكون غير سلمى وبس
اتاخرت كتير انا عارف ومستعد لأي حاجه اعملها عشان تسامحوني على التأخير ده
بس انا متأكد انك اكتر واحد حتحس بية وحتحس بالجرح اللي عيشته
واني كنت محتاج وقت كافي يخليني قادر افتح صفحه جديده مع الدنيا
علاء :حاسس بيك ياعصام بس انت جرحك طول اوي ياراجل
ييجي ايه جمب جرحي عالاقل انت ربنا كرمك وخرجت ببنتك ربنا يخليهالك يارب
لكن انا الحمد لله على كل شيء
ومع ذلك بدات من اول وجديد واديك اهوه شفت كرم ربنا ياعصام اصل ربك مفيش احن ولا اكرم منه خد مني بنت وعوضني ببنتين ربنا يجيبهم بالف سلامه يا رب
عصام :خفت اظلمها معايا ياعلاء خفت اقصر معاها او مقدرش اديها الحب اللي تستاهله سلمى مقامها كبير اوي عندي وتستاهل انها متشوفش معايا غير الحلو
علاء :ودلوقتى ياعصام
عصام :دلوقتى انا جاي وعلى اتم الاستعداد اني اعمل اي حاجه بس سلمى متروحش مني وتفضل معايا العمر كله وتبقى مراتي وحبيبتي وام ولادي
انا بحب سلمى ياعلاء بحبها من كل قلبي ويسعدني ويشرفني انك تقبل انك تجوزهالي قلت ايه
علاء :وهل فى قول يقال بعد الذي قد قيل ههههههههه
حمد الله على السلامة يا راجل
كفارة ياحبيب اخوك تعالى فحضن اخوك حبيبك ياولا
يحتضنان بعضهما البعض :وانا عمري ماحطمن على اختي غير معاك ياعصام
الف مبروك يا حبيبي ربنا يفرح قلبكم يارب
احد الموجودين :خير ياجماعه فرحونا معاكم
علاء :عصام اخويا وحبيبي طلب ايد اختي وانا وافقت
كل الموجودين :ألف مبروك ربنا يتمم على خير يارب
عصام :الله يبارك فيكم عقبال عندكم يارب
عصام :علاء حتعمل ايه فى العريس اللي جاي لسلمى
علاء:طبعا مراتي حبيبتي اديتك التقرير الإخباري عالعموم متقلقش حعمل معاه زي مانت عملت قبل كده معايا لما جيت اخطب نيرة
انت قدمت السبت وجه دورك تلاقي الحد
عصام :تمام وانا حروح اجيب بابا ونيحي البيت نتقدم رسمي
علاء :لا استنى عندك بقى ده انتوا جيتوا فملعبي يابابا
والمقلب اللي عملتوه فية لازم بتردلكم اه ده انا يومها كان حيجيلي شلل الرعاش
عصام :هههههههه حقك ياابو نسب
علاء :تمام اوي بكرة بقى في معاد العريس المنتظر حتيجي انت والحاج ونعمل نفس التمثيليه على اختك واختي وبكده اكون اخت تاري
عصام :ههههههه حبيبي ياجوز اختي
علاء :ربنا يديم المحبه بيننا يارب
🌺🌺🌺🌺🌺🌺🌺🌺
يدخلها العسكري لمكانها بالسحن مرة اخرى بعد ان تعافت :ياللا ادخلي لاخواتك ياحلوة
تدخل وهي تحاول الا تتحدث لأحد فكفاها ماحدث لها تجلس جانبا وهي ضامه ركبتيها الى ذقتها لاتريد التحدث لأحد شارده فيما قد حدث وفيما هو ات
تقترب منها احدى السجناء :انتي شرفتي تاني يابطه سمعنا انك كنتي حامل ياعيني وسقطتى
وياترى بقى كنتي متجوزه واللا لامؤاخذه كنتي حامل فى الحرام قولي قولي متتكسفيش ده احنا حنبقى اهل
مياده :الله يخليكي سيبيني فحالي
المرأة :نعم ياروح امك انتي حتعمليهم علية واللا ايه لا ده انا اشرحك
مياده :هو انا عملتلك حاجه واللا جيت جمبك ماتسيبيني فحالي بقى
تقترب منها احدى السجينات وتخرج من فمها موسا:قومي ياوليه انتي من جمب البنيه والا وديني لاشرحلك وشك واخليه خريطه
المرأة :حاضر اديني قايمه اهوه
بينما تجلس الاخرى جمبها :محسوبتك مريم جريمةقتل
مياده :قتل قتلتي مين
مريم :حماتي قتلتها وريحت البشريه من شرها
مياده:قتلتي حماتك ليه عملتلك ايه عشان تقتليلها
مريم :عمايلها سوده ومنيله الله يجحمها مطرح ماراحت ورتني المرار شفت معاها عذاب السنين عشر سنين هى وابنها نازلين فية ضرب واهانه وبهدله خلاص جبت اخري منها
واخرة المتمه ال ايه عايزة تخطبله وانا خلاص راحت علية بت الورمه قلت لابقى هي كده جابت اخرها معايا وذنبها على جمبها وهي اللي عجلت باجلها رحت قتلاها بقى عشان ارتاح
مياده:وقتلتيها ازاي
مريم :وحياتك جبت ايد الهون النحاس وفضلت اديها بيه على دماغها وناري مبردتش غير لما لقيت دمها مغرق الدنيا
مياده :بس انتي كده ممكن تتعدمي
مريم :ميهمنيش المهم اني فشيت غللي منها وخلصت الدنيا من شرها
قوليلي بقى ياحلوة شكلك بنت ناس انتي اسمك ايه
مياده :مياده
مريم :وانتي صحيح ممسوكه اداب زى مابيقولوا مستستغربيش ياحبيبتي اصل هنا مفيش حاجه بتستخبى
مياده :انا مظلومه وربنا العالم اني اتاخدت ظلم
مريم :ماكلنا بنقول كده فى الأول
مياده :لا والله انا معملتش حاجه دي انجي اللي منها لله هي اللي عملت فية كده عشان اتجوزت الراجل اللي كانت بتحبه
مريم :لا ده انتي شكلك حكايه بقولك ايه انتي تحكيلي كل حاجه من طاطا لسلام عليكم
مياده:ححكيلك يامريم انا بجد محتاجه اطلع اللي جوايا لحد انا تعبانه اوي يمكن ارتاح
🌺🌺🌺🌺🌺🌺🌺
مشى عبدالله ونجوى زوجته وهما يدعوان ربهما ان تعود ابنتهما لهم
يجلسون جميعهم للتحدث فى عدة امور بينما تستئذن شمس للصعود فكفاها ماحدث اليوم وبالتأكيد لم يتركها عمر استئذنوا من عمار واشرقت وصعدوا
بينما بدأ عمار فى الحديث مع يزيد وشاكر
واخذت ايمان واشرقت جانبا للتحدث بأريحية
أشرقت :مبسوطه ياايمان
إيمان :الحمد لله يااشرقت انا متاكده اني حكون مبسوطه مع يزيد
أشرقت :ربنا يعوضك بيه خير ياحبيبتي يارب انتوا الاتنين تستاهلوا انكم تبدؤا حياتكم سوا والحب بييجي مع الوقت وبالمعامله الطيبه وحبه واحتواؤه ليكي حتلاقي نفسك بتحبيه وحبك وعشقك ليه حيبقى ليهم الكلمه الأخيرة
إيمان :وحب ماسه لحسن كمان حيبقى ليه الكلمه الاخيرة يااشرقت
أشرقت :ايمان انتي بتقولي ايه
إيمان :اشرقت من فضلك وطي صوتك عشان محدش يسمعنا انا جوايا كلمتين عاوزة اقولهوملك ممكن تسمعيني
أشرقت :اتفضلي طبعا ياايمان
إيمان :انتي عارفه ان اللي بيحب بيعرف يكشف نظرة الحب فعين اى حد وحب ماسه لحسن كان مكشوف وواضح قدامي زي الشمس
صحيح مكنتش متاكده فى الاول لكن بعد مااخدتيها وسافرتوا قبل الفرح اتاكدت من حبهاليه
واوعي تفتكري اني واخده منها موقف والله ابدا انا عارفه ان الحب شئ، ملناش سيطرة عليه ولا نقدر نخليه على هوانا
أشرقت اللي لازم تفهميه كويس ان انا وحسن خلاص كنا حكايه وانتهت وهما من حقهم نديهم فرصه مع بعض انا عارفه حسن كويس وفاهمه اللي جواه ناحيتي كل اللي جواه احساس بالذنب وتانيب الضمير انه اتخللى عني وده نابع من اخلاقه واصله الطيب
متستغربيش اني بقول كده عنه هي دي الحقيقه بس اللي متاكده منه ان حبي ليه كان اكبر من حبه لية بكتير ومكنش بالقدر الكافي اللي يخليه يتمسك بية بدليل انه انهارمع اول مشكله قابلتنا
يجوز يكون حبني او حب فية حاجات معينه
لكن اللي انا متاكده منه انه ماسه بالنسبه له حتكون هي الحب الحقيقي حتكون عشقه اللي ملقهوش معايا عارفه ليه لان علاقتهم حتبتدي فظروف صعبه
حبهم حيتولد وحينبت من وسط المشاكل وده حيبقى اقوى مليون مرة
حتلاقي معاه الحب وهو كمان حيلاقي معاها اللي بيتمناه
اديهم فرصه مع بعض يااشرفت متقفليش فوشهم الأبواب
أشرقت :ايمان انتي ايه اللي بتقوليه ده انتي مقتنعه بالكلام ده
ده انتي المفروض تكوني كارهاه وبتدعي عليه ومستنيه تشمتي فيه ازاي عاوزاني اساعده على انه يلاقي السعاده والحب مع بنتي
معقوبه انتي مدركه انتي بتقولي ايه والله انا شاكه فقواكي العقليه
ايمان :ههههههه لا اطمني ياشوشو انا عاقله جدا وده يمكن اكتر وقت كنت عاقله فيه ومدركة كل كلمه بقولها. اشرقت انا عمري ماكنت ناكرة للجميل ابدا
انا كنت سعيده معاه ولولا اللي حصل عمري ماكنت حسيبه ابدا بس سبحان الله ربنا اراد ده عشان ابقى انا هنا دلوقتى وسط عيلتي الجديده اللي بحبها
اشرقت ماسه بتحب حسن ولسه بتحبه انا متاكده انا عارفه انك زعلانه منه عشاني لكن انا اللي بقولك اهوه انا مش زعلانه والله مازعلانه انا خلاص
بقى لية عيلتي اللي بحبها وكل املي فى الدنيا اني اسعدهم واعوضهم عن غياب اقرب الناس ليهم
وانتي حبيبتي يااشرقت وحفرحلك اكيد لما اشوفك مطمئنه على بنتك مع اللي يصونها ويحميها ويحطها فعنيه
أشرقت :والله ده يرجعلها هي ياايمان هي حرة تختار اللي يريحها احنا علينا نقدملها النصيحه وهي تتحمل نتيجة اختيارها
يعلن جرس الباب عن وصول على ومروة والاولاد وتنزل عهدةحيث كانت تغير لطفلتها وترضعها لتبدا السهرة مع من سيرحلون فى الصباح الباكر
كم كانت سهرة جميله تكلموا فى عدة موضوعات وضحكوا من قلوبهم حتى شمس نزلت مرة اخرى واستكملت معهم السهرة
ثم قامت ايمان من بينهم فجأة
يزيد :مالك ياايمان فى حاجه
إيمان :عشق فين
يزيد :تلاقيها مع انس ياايمان مالك فى ايه
إيمان :معلش ثواني بس اطمن عليها وارجعلكم
ينظر بعضهم لبعض :هو فى ايه هما مش انس وعشق بيلعبوا سوا
يزيد :المفروض
تنادي ايمان عليها فلا من مجيب:عشق ياعشق
يأتي أنس على الصوت:ايمي فى حاجه
إيمان : هي عشق مش معاك ياانس
أنس :كانت معايا من شويه وانا نادى علية مازن يسالني عن حاجه فى المدرسه وانا مبحبش الواد ده بيقعد يبص لعشق وهو بيكلمني فقلتلها تدخل جوة
تتركه ايمان وتصعد للأعلى تفتح غرفتها فلا تجدها تفتح كل الغرف ثم تجد نفسها تلقائيا تفتح غرفة عاليا التى لم تدخلها من قبل
فتفاجئت بها جالسه على الفراش وصورة امها فى يديها تتحدث اليها
إيمان :عشق حرام عليكي انتي هنا
عشق :ايوة ياايمي انا هنا قاعده مع مامي شويه بتكلم معاها تعالي اقعدي معانا
تجلس بجوارها :بتتكلموا فايه بقى
عشق:كنت بحكيلها طول اليوم عملنا ايه وبحكيلها عن لولي وسولي وقلتلها ان عهد جت وصالحت بابي وجدو حبيبي
ايمان :ومامي قالتلك ايه بقى
عشق:قالتلي انهامبسوطه اوي عشان احنا مبسوطين
إيمان :مامي امورة اوي فى الصورة دي
عشق :استني انا حوريكي صور مامي وبابي ففرحهم
تقوم سريعا وتفتح احد الادراج وتقوم باستخراج كل الصور
طبعا ايمان شافت فى الصور عيون عاليا اللي بتلمع من حبها وعشقها ليزيد وشافت حب يزيد وحنانه عليها فى الصور
اتفرجت معاها على معظم الصور وكانت بتحكيلها شوية حكايات وهي بتفرجها
وقعدوا يضحكوا مع بعض
فتح عليهم الباب فجأة :ايه ده انتوا هنا
ده انا قالب الدنيا عليكم
عشق :هههههه بابي افتكرنا انخطفنا ياايمي تعالى يابابي انا كنت بفرج ايمي حبيبتي على صورك انت ومامي
يزيد :ماشي ياحبيبتي بس ياللا بقى ننزل عيب كده الضيوف تحت وهما ماشيين بكرة مش ياللا ياايمان
إيمان :حاضر ياللا بينا ياشوشو
عشق:ياللا ياايمي
إيمان :ديكورات الاوضه هنا حلوة اوي وريحة الاوضه بتفكرني بريحتها الله يرحمها
يزيد :الديكورات هى اللي كانت مختاراها وانا برش الاوضه دايما ببرفانها اللي كانت بتحبه عشان تفضل ريحتها فى الاوضه وكل ماعشق تدخل الاوضه تشم ريحة مامتها
إيمان :صوركم حلوة اوي مع بعض
يزيد :الله يرحمها كانت حابه ان كل ذكرى لينا ناخد ليها صورة وتبقى قدام عيوننا الاوضه دي فيها ذكريات كتير اوى لينا ياايمان
إيمان :تعيش وتفتكر يايزيد
يزيد :انا اسف لو كان دخولك هنا ضايقك.
إيمان :بالعكس انا مبسوطه اوى اللي شفته هنا بياكدلي اد ايه انت مخلص يايزيد وبتعرف تحب وتعشق
انا بجد بحسد نفسي على اني ارتبطت بيك يايزيد
يزيد وهو يمسك يدها :انا اللي بحسد نفسي على انك دخلتي حياتي وحياة ولادي يا ايمان
إيمان :ربنا يقدرني واكون عند حسن ظنك فية يارب
يزيد :ربنا يقدرني انا واسعدك ياايمان
ايمان :الجماعه تحت اتاخرنا عليهم
يزيد :اتفضلي يامولاتي
إيمان :سموك الاول يامولاي الملك
يزيد :ههههههههه
🌺🌺🌺🌺🌺🌺🌺🌺
بعد ان استمعت لحكايتها من البدايه للنهايه
مريم :معقوله يامياده انا حسه كاني بتفرج على فيلم معقوله انتي تعملي ده كله ليه طيب
يعني بعد مااهلك صرفوا عليكي وعلموكي وبقيتي مهندسه اد الدنيا يوصل بيكي الحال انك تترمي فى السجن مع القتالين والحراميه ليه عملتي فنفسك كده ليه
مياده :طمعي هو اللي وصلني لكده حقدي على كل اللي حواليه
مريم :حقد وانتي اللي زيك يحقد ليه مانتي ربنا رزقك باهل طيبين ومهندسه وبتشتغلي وحلوة وجميله وزي القمر كنتي عاوزة ايه اكتر من كده
هي ليه النعمه عالانسان جبل ياربي
طب عاجبك بقى اللي انتي فيه دلوقتى
وبعدين اللي زي انجي دي المفروض كنتي قطعتي علاقتك بيها من ساعة ماربنا مافضحكيش بعد العامله المهببه البي عملتيها مع المدير
تقومي كمان تسلميها نفسك وتشتغلي عند عشيقها
وتلفي عليه كمان والله انا ماعارفه اقولك ايه انتي تستاهلي الدبح يامياده.
مياده:عارفه والله عارفه وربنا يعلم اني عاوزة اتوب واستغفر ربنا عن كل اللي حصل كفايه ان اهلي اتبروا مني ومعتش لية حد فى الدنيا خلاص
واللي قاهرني انه راح اتجوزها رسمي عشان تساعده يخلص مني
مريم :اللي زى ادم كده كتير وانتي مكنتيش اول واحده ولا حتكوني اخر واحده فحياته ياحلوة فى غيرك كتير لسه جاي عليهم الدور اللي زي ده مبيشبعش
المهم بصي يامياده انتي لازم تستغفري ربنا وتتوبي وياعالم يمكن تظهر برائتك تبات نار تصبح رماد وليها رب يدبر ها
مياده :تفتكري ممكن اخرج من هنا طب ازاي ده كلهم شهدوا ضدي ولما حاولت اتحايل عليهم يقولوا كلمة حق ضربوني وبهدلوني
مريم :سيبيها على ربنا ياعالم قادر فلحظه يتغير الحال ويرزفك باللي ينجدك ويطلعك منها انتي طاهرة
مياده :طاهرة ازى
مريم :ينفع تصلي يعني
مياده :اه ايوة انا مفيش حاجه بس حينفع بذنوبي دي كلها
مريم :انتي عبيطه يابت ده ربنا بيحب اوى العبد اللي اول مايغلط يقف بين ايديه كده ويعيط ويبكي قومي معايا حصبلك ميه تتوضي وتصللي وتدعي ربنا يقف جمبك وينجدك
تقوم وتتوضا وتقف بين يدي الله تدعوه ان يغفر لها وينجدها مما هي فيه تبكي من قلبها تظل طوال الليل على سجادة الصلاة تستغفر الله وتطلب عفوه
❤️❤️ تعلن الشمس عن اشراق يوم جديد
يستيقظ كل من فى البيت لتوديعهم قبل السفر على وعد بلقاء قريب وسماع اخبار مطمئنه عن رنا ورجوعها أرض الوطن بالسلامه
يقوم عمر بتوصيلهم للمطار
بينما تصعد ايمان لغرفة الصغار لاطعامهم
يدخل عليها يزيدفيجدها تطعمهم يجلس بجوارها ليساعدها لكن سليم يوقع الطعام على نفسه
إيمان :لا ده انت كده بقى لازم تاخد دش ياكابتن وتغير هدومك
يزيد ممكن تساعدني ندي لسولي شاور فى البانيو
يزيد :ياللا بينا
يقوم ويحمله بينما تقوم ايمان بتحضير ملابس له حتى تغير له ملابسه سريعا قبل ان يصيبه البرد
يدخلان به وتبدأ فى خلع ملابسه بمساعدة يزيد لها :يزيد امسكه كويس خللي بالك احسن يقع
تبدا فى وضع الماء، فيخاف الصغير ويمسك بملابسهم ويحاول الخروج من البانيو كان يبكي بينما كان منظره جميلا والماء، ينزل على جسده
ايمان :حبيبي خلاص والله خلصت أهوه ابتلت ملابسها بشده حتى التصقت على جسدها
واظهرت معالمه كم كانت محرجه من هذا الموقف
سرعان مااخذته فى احضانها لتغير له ملابسه سريعا
يزيد :طب غيري انتي الاول حتبردي
إيمان :مينفعش لازم هو يغير الاول عشان ميبردش
بعد ان انتهت الله شفتني يابابي بقيت امور ازاي عسل ياناس عمر بعينه ياناس انا مش عارفه مامي عاليه لحست من على ايده السكر واللا ايه
يزيد :يعني ايه الكلام ده ياموني.
ايمان :اصل واحنا صغيرين لما كانت تبقى واحده حامل وتكون نفسها يطلع البيبي شبه حد كانت تحط فى ايده سكر وتلحسه عشان يطلع شبهه
يزيد :هههههه لا وربنا وبيطلع شبهه فعلا
ايمان :وغلاوتك مااعرف هما بيقولوا كده
انا حروح اغير بسرعه وارجعلكم ياحبايبي
يزيد :ايمان استني رايحه فين بشكلك ده
ايمان :رايحه اغير
يزيد :وحتخرجي بالشكل ده
ايمان :مفيش حد عمر راح المطار مفيش غير بابا بس
يزيد :ولا بابا مينفعش حد يشوفك كده ياايمان خليكي هنا وانا حروح اجيبلك هدوم واجيلك بسرعه
يخرج لاحضار شيئا لترتديه بينما هي كانت تشعر من داخلها بالفرحه لاحساسها بغيرته عليها
❤️❤️❤️❤️❤️: يفتح الحارس السجن:مريم محمد
مريم :ايوة ياحضرة الصول
العسكري:امشي انجري قدامي جايلك زيارة
مريم:زيارة لية انا يكونش الموكوس جوزي جاي يشمت فية انا رايحه اشوف مين عاوزني وراجعالكم عارفين لو حد قرب لمياده حجيب كرشه قدامه.
ماتزقش ماشيه اهوه يااختي ماتصبر جتكم الهم
العسكري :ماتبطلي طولة لسان يابت
مريم :بتةاما تبتك كلمني بأدب احسن ما اوريك شغلك اه هي موته واللا اكتر
يفتح باب وتدخل:قلتلك متزقش جتك ضربه
الضابط:فى ايه ياعسكري
العسكري :كل مااكلمها كلمه ترد عشرة لسانها متبري منها ياباشا
الظابط :طب سيبهالي وروح انت ياعسكري
العسكري :تمام يافندم يخرج ويغلق الباب
مربم وهي تؤدي التحيه العسكريه:تمام يافندم
الظابط:ههههههه منورانا ياحضرة الظابط
ده احنا اخلاقنا باظت خالص هنا قلتلك بلاش السجون حتتبهدلي
مربم :حبيتهم اوي يا حضرة الظابط حسام بقى في بينهم وبيني الفه
حسام :ههههههه طب اودي وشي فين من اللوا محمد لما يلاقي بنته الوحيده وكل امله فى الدنيا بقت
بتطلع موس من بؤها وبتقول الفاظ زي دي
مريم:مش شغلنا ياباشا مانت عارف محدش بياكلها بالساهل
حسام :طب واحنا بقى مش حناكل سوا واللا ايه يامريم
مريم:احم احم بعدين ياكابتن لقد دقت ساعة العمل
حسام :ماشي ياكابتن قوليلي بقى فى اخبار جديده عن البنت اللي اسمها مياده دي
مريم :بص بقى اطلبلي واحد ليمون يهدي اعصابي واحكيلك كل حاجه تمام يابرنس
حسام :هههههه تمام يا تاعبه قلب البرنس
