رواية ليالي رمضانية الفصل الواحد والعشرون
اقترب من ابنه الذي عاد لتوه من عمله ووضع يده على كتفه وهو يقول بابتسامة:
- كسبت كام النهاردة
رفع رأسه ونظر إلى والده ليقول بتلقائية:
- ما أنت عارف اليومية بتاعتي يا بابا 250 جنيه
اتسعت ابتسامة والده وهتف بتوضيح:
- اليومية التانية، الشيخ قال في الخطبة قبل كدا إن الواحد عنده شغلانتين شغلانة للدنيا ودي ليها يومية بيحددها صاحب الشغل وشغلانة تانية للآخرة إحنا اللي بنحددها، دلوقتي كسبت ٢٥٠ يومية للدنيا طيب كسبت كام حسنة يومية للآخرة؟ سبحت ربنا 100 مرة وخدت 100 حسنة والحسنة ب 10 يعني 1000 حسنة في خمس دقائق ولا فضلت ساكت؟! استغفرت ربنا كام مرة؟ حمدت ربنا كام مرة؟ كبرت كام مرة؟ عايزك كل يوم تيجي في آخر اليوم وتحسب كدا أنت كسبت كام حسنة وتحسب اليومية بتاعتك هل كسبت النهاردة ولا خسرت ومحتاج تعوض خسارتك...
