 |
اسكريبت خطيب الندامه الفصل الثاني بقلم شهيره عبد الحميد
من فترة كبيرة كنت مخطوبة لشخص صالونات ولانها أول تجربة ليا في الحياة حبيته بكل جوارحي، رغم أني طول الوقت ماكنتش حاسة أنه بيحبني قد ما بحبه.
نادرًا لو عبرلي عن مشاعره وقالي كلمة حلوة، ولما كنت بحاول افتح معاه كلام كنت بحس أني بشحت منه الكلمة، وده لأنه بيقلب أي موضوع لكوميديا وبيفضل يضحك لوحده.
وفي مرة من المرات كنت فعلًا في أمس الحاجة لكلمة تقويني وتطبطب عليا منه، وقتها لملحتله أن النهاردة يوم المرأة العالمي قولت يمكن يغازلني ويقولي اني قوية وشطورة زي ما بشوف رجالة كتير بتشكر في شريكة حياتهم.
لكنه للأسف كالعادة مقدرش احتياجي النفسي للكلمة الحلوة وبردو خد الموضوع بنمط الكوميديا وقالي "وانتي مالك بالمرأة".. يومها اتقهرت وحزنت بشدة.
كانت متطلباتي مجرد كلمة حلوة يطيب بيها خاطري.. قضيت ليلي كله عياط وبكى، وتاني يوم لقيته باعتلي بوكس شوكلاتات يصالحني بيه رغم أنه عارف أن عندي حساسية من الشوكولاته.. وهنا اتاكدت أن حازم عمره ما حبني ولا ركز معايا.
ونهيت العلاقة بينا تمامًا وعملتله بلوكات في كل مكان علشان يختفي من قصاد عيني يمكن أنساه وارتاح.
ونسيت تمامًا اعمله بلوك من على منصة تليجرام وده لأني مبفتحهاش نهائي ولا مرة اتكلمت معاه هناك.
اتفاجئت بـ حازم باعتلي رسالة على تليجرام وبيقولي "رنا".. قلبي دق بشدة اول ما شوفت إشعار على تليجرام الـ عمري ما توقعت أنه ممكن يكلمني عليه.. ودموعي سبقتني قبل ما كلامي وقولتله بكل قوة خفيت وراها ضعفي واشتياقي لوجوده "أنا مش عملالك بلوك على واتساب؟ جاي هنا ليه؟".
كنت قلقانة يدمرني اكتر ويقولي كلمتين يجرحوني، متوقعتش أبدًا أنه راجع علشان يقولي "ما تيجي نرجع" .. "أنا مفتقدك".
يمكن لأول مرة اكون جاهلة في وصف مشاعري وأقول إن عروقي اتجمدت وقلبي للحظات مابقتش حاسة بنبضه...
صمت وهدوء غريب من العالم كأني في دنيا تانية لوحدي..
خايفة أضعف واوضحله لهفتي واشتياقي لوجوده.. وخايفة من تاني يضيع مني.
حازم أول مشاعر عيشتها، حتى لو كانت تجربة غير مكتملة الأركان لكني معتقدش هقدر أحب نفس الاحساس ده ده شخص غيره.
كل حاجة حلوة كانت معاه هو بس.
حاولت أجمع رد يوضحله إني عايزاه لكن بطريقة يفهم منها أنه محتاج يجي على نفسه شوية ويعدل من أخطاءه، وقولتله "محتاجة الـ يفهمني ويحبني يا حازم، هتعرف تعمل ده؟"..
أنا متأكدة اني عروسة مناسبة جدًا لحازم من الناحية الاجتماعية، لكن كنت محتاجة أتأكد لمرة واحدة بس انه عايزني لشخصي مش لمجرد اني عروسة مناسبة وبس.
محتاجة اتحب وشخص يهتم بتفاصيلي وبنفسيتي.
شخص استمد منه قوتي المهزوزة علشان اكمل.
ويحسسني اني اجمل بنت شافها واطمن أنه مش هيشوف غيري ومكتفي بيا.
كان كُلي خوف ياخد كلامي بنمط اني بتشرط عليه لأنه راجعلي ندمان، لكن اتفاجئت أنه بكل حنية بيقولي "أوعدك اعمل اي حاجة علشانك".
ورغم أن كلامه يبان مُختصر لكنه عندي بكنوز الدنيا، أنا عمري ما كنت ميالة لشخص يبهرني بالمال والهدايا والخروجات، بقدر ما تبهرني الحنية والاحتواء وقت الضعف.
وعلشان عارفاه بيحب الكوميديا والهزار وصعب يتكلم جد كتير قولتله "هتجبلي شوكولاته ؟".
اتفاجئت أنه لأول مرة يفهمني ويحس أن حتى وقت الهزار لو جت كلمة حلوة هتكون عندي بالدنيا وقالي "لا" "عشان عندك حساسية منها".
و النهاردة أنا وحازم اتجوزنا وبقالنا اربع سنين في استقرار ورحمة ومودة، لمجرد أنه قدر يفهم شخصيتي وبساطتي.
قدر يفهم أن الاحتواء النفسي أهم من الهدايا.
وانه يسمعلي ويقدر مشاعري أهم من أنه يضحكني.
وبالمناسبة مودة دي تبقى "بنتنا" الـ عندها سنتين دلوقتي.
_حازم أنت جيت يا حبيبي أخيرًا اتاخرت كده ليه؟
كان واقف جنب الباب مخبي أيده ورا ضهره وسألني.
_هي مودة فين؟
_مودة بتلعب في اوضتها.. وريني بقا إيه الـ ورا ضهرك ده متبقاش بايخ.
حاول يداري مني لكني بكل مهارة قدرت اوصل للـ ورا ضهره واتصدمت لما لقيتها شوكولاته!!
وقبل ما انطق بأي كلمة لقيته بيقولي.
_والله عااااارف، ومنستش
بس حرام عليكي مودة بتشوف الشوكولاته عند الناس بتفضحنا كأننا حارمينها.. وعلشان كده بهربلها كل مدة حتة من وراكي.
عمري ما ندمت اني اديت فرصة تانية لحازم وانتظرته يقربلي ويفهمني، لأنه طلع أجمل بكتير مما كنت اتمنى.
مش بس عنده حنية قدرت تغطي على كل الاحتياج الـ جوايا، هو كمان أعظم أب لمودة وبيقدر يعدل بين اهتمامه بشخصياتنا المختلفة.
يمكن لو كان حازم شخص سطحي زمان وشافني تافهة علشان فركشت معاه في يوم المرأة العالمي ومفهمش المضمون الحقيقي الـ جرحني، ماكناش دلوقتي هنا.
كل واحد فينا محتاج يبعد شوية ويفكر ويتعمق في الـ قدامه ويفهم أسبابه، وده في حالة أنه فعلًا بيحب من قلبه حقيقي.
وزي ما حازم كان محتاج فرصة يفهمني.
أنا كمان كنت محتاجة فرصة اصبر عليه.
انتهت احداث الاسكريبت نتمني ان تكون نالت اعجابكم وبانتظار أراؤكم في التعليقات وشكرا لزيارتكم عالم روايات سكيرهوم
للمزيد من الروايات الحصريه زورو قناتنا على التلجرام من هنا
شكرا لزيارتكم عالم روايات سكيرهوم
