رواية شمس تتحدي الغيوم الجزء الثاني (للعشق كلمته الاخيرة) الفصل الخامس
رضينا واطمأنت القلوب بما قسمه القدر لنا
بدأت القلوب تتعافى وبدأت العقول تجمع تركيزها فى أمور الحياة ومصاعبها لتشغل نفسها عن التفكير فيما قد مضى
لم ولن يستطيع الدهر مهما مضى أن ينسينا من عشنا معهم وقضينا معهم اجمل ايام حياتنا
ولكن ماذا علينا أن نفعل غير أننا نتقبل الأمر ونسير مع ركب الحياة
هاهي الآن تجلس مع صديقتها فى غرفة نومها فكم اشتاقا لبعضهما البعض يتحاوران ويتحدثان إلى بعضهما البعض ويبوحان باسرارهما وماتكنه صدورهما
انتي اتهبلتي يابنتي ايه التفكير العقيم ده
شمس :ايمان انتي عارفه اني معنديش ذرة شك واحده فعمر واني بثق فيه ثقه عمياء وهو الحمد لله بيحبني وبيموت فية بس انا ست بتحب وبتغير على جوزها ياايمان
إيمان :من نادين
شمس :ياايمان انتي مش فاهمه ده كل يوم تقريبا فى الموقع بتاع الزفته المستشفى ولازم يجيب سيرتها فى اى موضوع لدرجة اني بجد بقيت بتخنق من سيرة الزفته دي
واوقات كتيرة بيتكلموا فى التليفون وانا خايفه ياايمان اوى
إيمان :انا بس اللي عاوزة افهمه انتي ايه سبب قلقك
شمس :افهميني ياايمان انا من وقت ماحصل الحمل والدكتور محرج علينا حاجات كتيرة اوى وده بيسبب جفاف فى المشاعر مع الوقت صحيح انا بحاول اكون دايما قريبه منه ومبعدش عنه وطول ماهو فى الشركه بكلمه بس بردو خايفه
وبصراحه هي حلوة أوي طريقة كلامها ولبسها ليدي
إيمان :بقولك ايه مش انا رجعت اهوه انا بقى حشوفلك الموضوع ده ايه حكايته بالظبط اهدى بقى القلق والتوتر ده غلط عليكي
شمس :طب طمنيني عليكي انتي عملتي التحاليل والاشعات
إيمان :ايوة وان شاء، الله حروح اجيبها بعد يومين واشوف بقى
شمس :ان شاء الله خير ياحبيبتي متقلقيش
إيمان :يارب ياشمس يارب
بقولك ايه انا حروح اشوف الولاد وحشوني اوى
شمس :ياللا بينا انا كمان مشوفتهمش النهارده
يخرجان من الغرفه ويتجهان لغرفة الصغار
فيجدونهم مستيقطين
تحملهم ايمان وتحتضنهم بشده وتقبلهم:وحشتوتني وحشتوني وحشتوني
ثم تأخذ عليا فى حضنها:قلبي ياناس لولو القمر انتي عارفه انى بحبك اوى ووحشتيني اوى اوى
وبموت فيكي أوي
شمس :انا نفسي اعرف سر حبك لعليا بالشكل ده
ايمان :بحبها أوي ياشمس تصدقيني لو قلتلك اني لما باخدها فحضني بنسى اى حاجه فى الدنيا بنسى تعبي وزعلي بنسى نفسي معاها
شمس :ربنا يكرمك ياحبيبتي يارب
إيمان :يارب ياشموستي يارب
ثم تهدهد الصغيرة :قلبي ياناس قلبي يالولو
تعطيها لشمس وتحمل سليم:سولي حبيبي عامل ايه اوعى تزعل مني انا بحبك والله بس بصراحه يعني بحب لولو اكتر حبه صغنتتين سامحني بقى ماشي ياباشا
فيضحك لها سليم فتفرح بشده :انتي اضحكيلي ياروحي انتي اضحكي لية ياخلاثي ياناس اموت انا والله فى الضحكه الحلوة دي
يفتح الباب على اصوات ضحكاتهم :حمد الله على السلامة يا ست هانم
إيمان :الله يسلمك ياباشا
يزيد :سمعت انك رجعتي من يومين ممكن اعرف الهانم مرجعتش الشغل ليه واللا اخدنا عالراحه سيادتك
إيمان :لا والله يابرنس بس أصلي يعني
يزيد :'فى حاجه حصلت
إيمان :لا بس انا رحت عملت تحاليل وحاجات كده فإن شاء الله والله بكرة حكون في الشركه
يزيد :ان شاء الله خير ياايمان
إيمان :يارب يابشمهندس
يمد يده ليأخذ عليا من شمس ويحتضنها:حبيبة بابي وحشتينى ثم يقبل سليم هو الآخر
يزيد :إيمان متمشيش
إيمان :خير في حاجه
يزيد :اه اصل دكتوره نادين جايه كمان شويه وحتسهر معانا وأكيد طبعا ماما حتمسك فيها عالعشا فأنتي كمان تبقي معانا وحبقى اوصلك تمام
ايمان وهي تنظر لشمس:اوامرك يابشمهندس
يزيد :طيب انا حاخد الولاد معايا اوضتي شويه
شمس:بس حضرتك لسه جاي وتعبان
يزيد :لما اخدهم فى حضني حرتاح
إيمان :ربنا يريح قلبك يارب
يحمل صغاره ويتجه بهما الىغرفة نومه
بينما تتحدث شمس لايمان:شفتي ياايمان الهانم بقت خلاص واحده من البيت وجايه تسهر وتتعشى وطبعا حيقول لعمر يوصلها زي المرة اللي فاتت أنا حتشل وربنا
إيمان :بقولك ايه انتي تهدي كده خالص وانا بقى حعرفلك الموضوع من بابه واجيبلك اراره قشطه يابطتى
شمس :ماشي يامنتي
بعد مرور بعض الوقت حيث كانوا جميعهم هاله وشاكر وعمر وشمس ويزيد وعشق جالسين
يتحدثون سويا وفى انتظار تلك الضيفه التي تسعى إلى فرض سيطرتها على قلب من تريد
هاله :وحشتينا والله ياايمان كده بردو حسن ياخدك مننا اسبوعين بحالهم
إيمان :معلش بقى يالوله ماهو اصله كان واحشني
يزيد :حسن أصيل ومحترم وربنا يقدره عالامانه ويرجع عمار وقلبه مطمن على ابنه يارب
شاكر :كلمته يايزيد
يزيد :ودي حاجه تفوتني بردو يابابا طبعا كلمته اكتر من مرة وهو خلاص حيعمل للولد العمليه قريب ان شاء الله
هاله :ياحبيبي يعني حيفتحوا له قلبه وهو صغير كده وده حيستحمل ده لسه حتة لحمه حمرا
يزيد :ان شاء الله يبقى كويس
إيمان :ده عمار طاير بيه من الفرحه
هاله:الضنا غالي ياحبيبتي عقبال ماربنا يكرمك ياايمان يارب
إيمان :يارب ياطنط
يعلن جرس الباب عن وصول نادين الحداد
تذهب الخادمه لفتح الباب
ويقوم جميعهم استعدادا لاستقبالها فلقد اتت هذه المرة لوحدها لم تحتاج من ياتي بها
سلمت عليهم جميعا بحرارة
وعندما حل الدور على ايمان:انا شفتك قبل كده
إيمان :شفتيني انا مش فاكرة الصراحه
نادين :لاء انا فاكرة كويس اني شفتك اه مش انتي اللى دخلتي بالقهوة فى اول مرة زرت فيها الشركه
إيمان :انا دخلت بالقهوة ليكي مش فاكرة الصراحه يمكن اصل اوقات البشمهندس يبيحب يشرب القهوة من ايدي
ويمكن اكون عرفت ان فى حد معاه فعملت حسابه لكن بصراحه انا مااخدتش بالي منك خالص
ينظر لها يزيد بدهشه مماتقول لنادين
فتشعر نادين بالاحراج:اه طيب اوكيه
هاله:اتفضلي ياحبيبتي انتي حتفضلي واقفه كده
تجلس نادين على الكرسي المجاور ليزيد بينما تلتصق شمس بعمر
عمر:مالك ياشمس لزقه فية كده ليه
شمس :ايه مش عاجبك واللا ايه
عمر:انا بقول تقعدي على رجلي أحسن
شمس :انت بتتريق
عمر :لا وربنا انا اصلا جاي على بالي نسيبهم واخدك واطلع بيكي اصلك وحشاني اوى
شمس :بجد ياعمر طب ياللا بينا
إيمان وقد استمعت لما يقولان فهمست لها:اتلمي وامسكي نفسك شويه خليني اعرف ادرس الموضوع واحدد هدفي كويس
شمس :ماشي اما اشوف اخرتها معاكي
إيمان :كل خير ان شاء الله
تنظر لعشق التى كانت جالسه على قدم أبيها :ازيك ياعشق
عشق:كويسه
يزيد :قولي الحمد لله
عشق :الحمد لله
نادين :تعرفي اني طول مانا فى البيت بحكيلهم عنك وعن طعامتك وبقولهم عشق دي امورة اوي
عشق:ميرسي ياطنط بابي
يزيد :نعم ياروح بابي
عشق :انا اتفقت مع إيمي حنروح بكرة نزور مامي
يزيد :هو انتي مش حترجعي الشركه بكرة ياايمان
إيمان :لاء طبعا حرجع ان شاء الله
فتغمز لها عشق بعينيها
إيمان :ماهو انا بعد ما حخلص الشغل حاجي اخدها ونروح بسرعه عشان مامتها وحشتها أوى
يزيد :خلاص ياعشق حنتكلم بعدين
عشق وهي تقبله:اوكيه يابابي
ثم تنزل من على قدميه وتذهب لتجلس بجوار ايمان :ايمي حبيبتي انتي وحشتيني اوى متروحيش عند حسن تاني
فيضحكون على كلامها
عمر :ازاي يعني متروحش عند حسن لازم تروحله طبعا ياحبيبتي
عشق:خلاص يبقى مش تغيبى بقى عشان لولي وسولي بيسالوا عنك
نادين:هما الصغيرين عاملين إيه
يزيد :بخير الحمد لله
نادين:انا نفسي اشوفهم اوى
هاله :بس كده دلوقتي اخدك ونطلع اوضتهم تشوفيهم
يزيد :بس هما فاوضتي ياماما
عشق سريعا:محدش يدخل اوضة مامي
فينظر لها جميعهم وماتفوهت به
يزيد :عشق اطلعي اوضتك دلوقتى
تغضب عشق من ابيها وتصعد سريعا
إيمان :بشمهندس بعد اذنك حطلعلها
يزيد :اقعدي ياايمان من فضلك
تجلس ايمان وقلبها ينفطر على الصغيرة
نادين:اسفه والله انا مقصدش انك تزعل البنت انا كنت عاوزة اشوفهم بس لكن لو فى مشكله خلاص عادي
يزيد :لا طبعا مفيش حاجه انا اللي بعتذر منك بس اصل عشق من وقت وفاة مامتها وهي بقت حساسه أوى
عمر من فضلك اطلع هات الولاد من اوضتي
عمر :ماشي يايزيد
يصعد عمر ليحضر الأولاد ولكنه يمر على غرفة عشق فيسمعها وهي تبكي وواضعه صورة امها أمامها
يفتح عليها الباب:حبيبة عمو بتعيط
عشق:انا مش بعيط ياعمو
عمر:انتي زعلانه ليه دلوقتي
عشق:اول مرة بابي يزعق فية
عمر:معلش حبيبتي بس انتي احرجتي نادين
ياللا تعالي معايا ننزل سوا
عشق :لاء مش حنزل بابي قاللي اطلعي ياعشق
يجدون ايمان تفتح الباب:قلبي ياناس بابي قاللي اطلع اناديكي ياللا بينا
عشق:لاء مش حنزل ياايمي
ايمان:عشق عشان خاطري مش انا حبيبتك
عشق:ايوة انتي حبيبتي حاضر ياايمي
ينزلون جميعهم ويحملون الاطفال على اكتافهم
عمر يحمل سليم وايمان تحمل عليا
تسلم نادين عليهم وهم يحملونهم دون محاوله منها لاخذ أحدهم فقط تسلم وهما على اكتافهم
حلوين اوى ربنا يخليهم
تجلس عشق بجانب ايمان دون التحدث بكلمه
تقوم إيمان سريعا :طنط انا طالعه اغير للولا
شاكر :هيا عملتها
إيمان :اه
تاخذها وتصعد بها للأعلى
نادين :واضح ان ايمان دي واخده عليكم اوى هي مش بردو موظفه عندكم فى الشركه
شمس :ايمان صاحبتي وصديقة العيله
هاله :ايمان ياحبيبتي احنا مش بنعتبرها موظفه فى الشركه احنا بنعتبرها واحده مننا وهي من وقت وفاة المرحومه مسابتناش وهي اللي واخده بالها من الولاد الصغيرين وبتحبهم اوى
نادين:هى متجوزه مش كده
يزيد :ايوة طبعا
نادين :وهي فاضيه على كده تيجي وتاخد بالها من الولاد
يزيد :ايمان جوزها بيشتغل فشرم وهما لسه متجوزين قريب ومعندهاش لسه ولاد
نادين :طب وهما الولاد مش عندهم مربيه تاخد بالها منهم
هاله:مربيه لا احنا مبنجبش لولادنا مربيات احنا بنحب نربي ولادنا بنفسنا وماحدش ياخدهم فحضنهم غيرنا
نادين:انا اقصد بس انها حتوفر عليكم التعب مش اكتر
شمس :تعبهم راحه مش كده ياحبيبي
عمر:طبعا ياحبيبتي
هاله:وانتي جوزك متوفى من زمان ياحبيبتي
نادين:من سنتين
هاله:معقوله حد بردو يسيب الجمال ده كله ويموت
عمر لشمس:مغفل
شمس وهي تبرق له:عمر
عمر يقبل يديها سريعا:بهزر والمصحف بهزر
نادين :عمره بقى ربنا يرحمه
هاله:بس معلش يعني هو المشكله فى الحمل كانت عندك واللا عنده
عمر:ماما الدكتورة تزعل
ذ
هاله:والله مااقصد ياحبيبي ده انا بدردش معاها بس انتي زعلتي ياحبيبتي
نادين:لا ابدا ياطنط ده انا بحبك اوي ده انا جايه عشان وحشتيني
هاله:وانا والله ياحبيبتي ربنا العالم قلبي اتفتحلك ازاي
عمر وهو يهمس لها:انتي قلبك مفتوح لكل الناس ياماما
هاله:بس ياولد
نادين :والله هو محدش فينا كان عنده مشكله بس احنا كنا متفقين ناجل الموضوع شويه
هاله:ليه ياحبيبتي هو انتوا قعدتوا متجوزين اد ايه
نادين:حوالي سبع سنين
هاله:سبع سنين وبتاجلوا امال كنتوا حتخلفوا امتى
نادين:اصلي كنت بعمل ماجيستير ودكتوراة ومكنش حينفع يكون فيه بيبي مستقبلي كان اهم بالنسبه لي
هاله:ربنا يعوضك خير ان شاء الله
نادين :ان شاء الله ياطنط
هاله:طب بعد اذنكم شويه وحرجعلكم
تنزل ايمان من على السلم وقد غيرت لعاليا ملابسها
فالتفت يزيد لها وتذكر عليا عندما كانت تنزل بعشق وهي صغيرة بنفس تلك الهيئه
فهربت دمعه من عينيه
ايمان وهي تعطيها له:بص بقى يابابي احنا بقينا حلوين ازاي
ياخذها يزيد:حبيبة قلب بابي
تخرج هاله اليهم وقد طلبت من الخدم وضع الطعام على السفرة:ممكن بقى تقوموا عشان العشا
ياللا يادكتورة
نادبن:ياريت تناديني باسمي انا مش عاوزة احس اني غريبه عنكم
هاله:ماغريب الا الشيطان وبعدين ده انتي غاليه عندنا والله طب ياللا يانادين
عمر وهو يمشي بجوارها:والله مامستريحلك ياحاجه
وعاوز اعرف ايه اللي فدماغك
هاله:بعدين حقولك اصبر على رزقك
عمر:ماشي ياست الكل اديني صابر اهوه اما نشوف
يجلسون جميعهم على المائده
تقترب نادين من الكرسي الذي كانت تجلس عليه عليا لتجلس عليه
فيجد يزيد الشرار يتطاير من اعين عشق فيتصرف سريعا قبل ان تجلس :
يسحب لها احد الكراسي :اتفضلى
نادين:ميرسي
ثم يجلس هو فى مكانه
بينما يجلس عمر وتجلس شمس بجانبه :عمورة
عمر :نعم ياقلب عمورة
شمس :ولادك عاوزين ياكلوا ورق عنب
عمر:بس كده من عينيه
يقوم ويضع لها فى الطبق ورق العنب
نادين:هو انتي حامل فى تواءم
شمس :اه
نادين:هو انتوا كلكم بتجيبوا توائم
ايمان:الله اكبر امسكي الخشب ياحبيبتي
نادين :لاء، مش، قصدي بس استغربت
هاله:ربك لما يريد بقى
عقبال كده ماربنا يعوض عليكي ويرزقك بالذريه الصالحه
نادين :ميرسي ياطنط
تجلس عشق بحوار ايمان
نادين:حبيبتي تعالي اقعدي جمبي ااكلك. عشق:انا كبيرة وبعرف اكل لوحدي ميرسي ياطنط
نادين :شطورة ايوة انا بحب البنوته اللي تعتمد على نفسها
عشق:ايمي قطعيلي الفرخه دي مش عارفه اقطعها
فينظر لها يزيد بغضب
ايمان:من عيوني ياقلبي احلى حتة فرخه لاحلى عشق فى الدنيا
عشق:موني انا عاوزاكي تيجي نلعب سوا
نادين :ايه رايك يوم الاجازة اجي اخدك ونروح الملاهي سوا
عشق:ميرسي ياطنط انا بروح مع ايمي حبيبتي
إيمان :معلش بقى يادكتورة خليكي انتي فى المستشفى وسيبيلنا احنا لعب العيال ده
نادين:اه طيب
يتحدثون فى عدة موضوعات حتى يمر الوقت سريعا
نادبن:طيب انا حستئذن بقى.
شاكر :نورتينا يابنتي
نادين:البيت منور بحضرتك ياعمى
هاله:ابقى تعالي تاني حزعل منك لو مجيتيش. نادين:اكيد طبعا حاجي تاني
تصبحوا على خير
فيردون عليها :وانتي من اهل الخير
شمس لعمر :عارف لو وصلتها ودبني لولع فيك
يقوم يزيد بتوصيلها للسيارة:نورتينا والله يادكتورة
نادبن:هو مش ممكن نشيل الالقاب بيننا ممكن نبقى صحاب
يزيد :طبعا ده شرف لية
نادين:خلاص يبقى تناديني نادين وانا اقولك يزيد ممكن
يزيد :اكيد طبعا اتفضلي يا نادين اركبي
اه صحيح انا بجد بعتذرلك عن الطريقه اللي عشق كلمتك بيها والله هي مش كده
نادين :انا فاهمه والله ومقدرة اللي هيا فيه وعارفه انها اول مابتشوف اى واحده بتخاف منها
يزيد :انا متشكر انك تفهمتي الوضع
نادين:طبعا يايزيد وبعدين انا حسه اني انا وهي حنبقى صحاب وقريب اوي
يزيد :ده شئ، يسعدني طبعا
نادين وهي تمد يديها للسلام عليه:تصبح على خير
يزيد:وانتي من اهل الخير
تركب سيارتها وتتحرك وتمشي
بينما يدخل يزيد ويحدث ايمان:ياللا يااستاذه عشان اوصلك
ايمان:لاء انا عاوزة عمورة هو اللى يوصلني
عمر:تحت الامر والطاعه يابرنسيسه
ايمان:انا بردو اللي برنسيسه امشي انجر ادامي
عمر:والله انا قلبي بيقوللي ان التوصيل ده وراها حاجه
يزيد لشمس:هو فى ايه
شمس :علمي علمك
انا حطلع استريح
هاله:يزيد ياللا يابني نطلع الولاد
يزيد :ماشي ياماما هي عشق طلعت اوضتها
هاله:ايوة
يصعدون للاعلى فيضع الصغار فى فراشهم بينما يتجه لغرفة ابنته فيجدها نائمه وفى احضانها صورة عاليا
يجلس بجوارها ويمسد على شعرها:ممكن اعرف القمر بتاعي ماله
عشق:مفيش يابابي
يزيد :طب ممكن تقومي تتكلمي معايا
تجلس عشق :نعم يابابي
يزيد :ليه عاملني نادين بالشكل ده ليه احرجتيها كده
عشق:مش بحبها مش عاوزاها تيجي هنا بضايق لما بشوفها
يزيد :ليه عملتلك ايه
عشق:هو كده
يزيد :عشق حتخبي على بابي حبيبك
عشق:وهي قاعده فى الصالون كانت قاعده عالكرسي بتاع مامي وانا مش عاوزة حد غيرها يقعد عليه
وكانت حتقعد على كرسي السفرة بتاع مامي
وكمان كانت عاوزة تطلع لاخواتي وانا مش بحب حد يطلع لاخواتي
يزيد :ياسلام ماايمان بتطلع لاخواتك
عشق :ايمان حبيبتي وانا بحبها اوى
بابي انا مش بحبها مش بحبها مش عاوزة اشوفها
يزيد وقد فهم مادار فى عقل صغيرته:طيب ياقلب بابي ممكن تنامى
بس البنات الحلوين لما يكون عندهم ضيوف يعاملوهم بأدب
عشق :حاضر يا بابي
🌹فى العربيه
عمر هو فى ايه بالظبط
عمر:فى ايه فايه ياايمان
ايمان :الست اللي اسمها نادين دي ايه اللي جايبها عندكم أنا قلبي مش مستريحلها والفار بيلعب فعبي
عمر:ليه بس ماالست كانت قاعده باحترامها. ايمان:وانت ان شاء الله ايه ظروفك معاها
عمر:ظروفي معاها ازاي يعني.
إيمان :شمس مقلقه منها قلبها مش مستريح من وجودها جمبك مراتك بتغير عليك يابني ادم انت
عمر:شموستي بتغير علية حبيتي ياناس اقسم بالله تبقى مجنونه هو انا عمرى احب واللا قلبي يدق لغيرها انا ممكن اه اكون قلتلها اني معجب بيها بطريقتها بشكلها لكن حب لا طبعا استحاله طب اودي شمس فين دي واخده كل قلبي
إيمان :بجد ياعمر
عمر :ايمان انتي ممكن تشكي فحبي لشمس
إيمان :استحاله طبعا بس، قلق شمس قلقني انا كمان
عمر:سيبي شمس علية المجنونه دي ازاي اصلا يخطر ببالها حاجه كده هي مش عارفه انها روحي وقلبي وعينيه
إيمان :ربنا يخليكم لبعض يارب
عمر:ويخليكي لينا يااجدع صاحبه فى الدنيا
😒 فى غرفة شاكر وهاله😒
شاكر:هاتي اللي عندك ياهاله
هاله:شاكر انت زعلان مني واللا ايه ياحبيبي
شاكر:ايوة ياهاله انا زعلان منك واول مرة ازعل منك من يوم مادخلتي البيت ده
هاله:ليه انا عملت ايه
شاكر:انتي معملتيش ياهاله بس فكرتي ومجرد التفكير فحاجه زى اللي جت فبالك دي زعلتني منك
هاله:انا اسفه ياحبيبي والله حقك علية بس غصب عني ده ابني ياناس نفسي يخرج من اللي هو فيه نفسي ربنا يعوض عليه باللي تريح باله وتحتويه وتعوصه عن غياب مراته
انا خايفة عليه ياشاكر خايفه على ابني الحزن يهلكه ويضيع شبابه
شاكر:وانا عمري ماحقف قصاد راحة ابني ومش عاوزه يترهبن كنت انا عملتها مانا نفسي اتحطيت فنفس الموقف فيوم من الأيام
صحيح يصعب علية ان واحده تاخد مكان عاليا فى البيت وفقلب يزيد لكن بردو هو ابني
ويصعب علية حاله بس مش دي ياهاله مش دي
هاله:ليه بس، ياشاكرمالها ناقصها ايه دكتورة اد الدنيا ومن عيله كبيرة وجميله وكويسه يبقى ليه لاء وبعدين هو احنا بنقول بكرة يتجوزها ده يفكر براحته وياخد قراره وقت ماهو عاوز ويحب
شاكر :افهميني ياحبيبتي هي صحيح زي مابتقولي جميله وصغيرة ومن عيله ومناسبه ليه جدا بس من الناحيه الشكليه بس واجهه مش اكتر شكل ديكور ادام الناس لكن من جوه مخوخه فاضيه معندهاش مشاعر ولا احاسيس عمليه جدا. متنفعش معاه
عاليه كانت محتويه يزيد كانت مراته وحبيته وصاحبته وكل دنيته كان مكتفي بيها بالدنيا كلها
يوم ماواحده تبقى مكانها لازم تكون زي المرحومه تحبه تحتويه تعوضه وتعوض ولاده
تفتكري اللي اسمها نادين دي حتعمل كده
هاله :وليه لاء، ماهي قعدت معانا واتكلمت وكانت نفسها عشق تتكلم معاها بس عشق هى اللي احرجتها
شاكر:عشق حست وفهمت ان نادين بترسم على ابوها وعاوزه تاخد مكان امها شافتها وهي قاعده على كرسيها وكمان كانت حتقعد على كرسيها عالسفرة لولا ان يزيد لحق الموقف بسرعه
عشق الطفله فهمتها وفهمت انها بتمثل الحنيه عشان تكسبها لصفها
دي حتي لما قالت عاوزة تشوف الاطفال مفكرتش تمد ايدها تشيل حد فيهم
بصي ياهاله انا عارف انك عاوزة تسعدي يزيد لكن مش مع دي
دي واحده رفضت انها تخلف وحرمت نفسها وجوزها من الولاد عشان مستقبلها بزمتك دي حتعرف تربي ولاده وتديهم الحنان اللي هما عاوزينه ومحتاجينه
دي كل اللي حيبقى فدماغها المستشفى ووضعها الاجتماعي ده يزيد نفسه ممكن يدور عليها وميلاقيهاش يبقى ايه فايدتها
انا لايهمني الوضع الاجتماعي ولا النسب ولا الحسب انا كل اللي عاوزه لابني واحده تعوضه وتعوض ولاده مش اكتر
فهمتي ياهاله
هاله:ايوة فهمتك ياحبيبي ربنا يعوض عليك يابني باللي تريح بالك ويرحمك ياعاليه ياحبيبتي يارب
والله مانسيتك ولا عمري حنساكي انتي ماتعرفيش قلبي موجوع عليكي ازاي ياحبيبتي بس حنعمل ايه
😑😑😑😑😑😑😑😑😑😑
بعد مرور يومين توقظه من نومه:قوم ياعلاء، قوم بسرعه
علاء:فى ايه حصل ايه
نيرة:انا حامل انا حامل ياعلاء
علاء:انتي بتقولي حامل نيرة اقعدي كده ياحبيبتى واتكلمي بالراحه انتي قلتي ايه دلوقتي
نيرة:بقولك انا حامل بص اهوه التحليل اهوه لسه عاملاه وطلعت حامل
علاء وهو يحتضنها:بجد حامل انتي حامل ياحبيبتى يانيرة ربنا يخليكي لية يارب.
نيرة:انا عاوزة اروح للدكتور اتاكد اكتر والنبي
علاء:يامجنونه وهو فى دكتور بيفتح بدري كده اصبري طيب
نيرة:مش قادرة اصبر ياعلاء، مش قادرة لازم اتاكد بنفسي بص الدكتورة اللي رحتلها النهارده بتفتح الساعه عشرة الصبح نروح والنبي
علاء بفرحه:حاضر حاضر طب هى الساعه كام دلوقتي
نيرة:الساعه تمانيه
علاء :هو عصام جاب دارين
نيرة:ايوة وسلمى اخدتها وكملوا نومهم
علاء :خلاص ياستي قومي نفطرو البسي على مااخد دش واصللي ونروح ياقلبي
بعد مرور ساعتين تنام على الفراش امام الطبيبه :كيس الحمل فعلا موجود
وفى مفاجاة حلوة كمان
علاء:مفاجاة ايه يا دكتورة
الدكتوره :دول اتنين مش واحد. علاء:ايه لا مش معقول بجد
الدكتوره :ايوة طبعا بص شايف النقطتين دول
علاء:ايوة شايفهم
الدكتوره :دول النطفتين كل نطفه بيبي الف مبروك
علاء :الله يبارك فيكي بس ازاي
الدكتوره :عشان انا كنت كاتبالها على منشطات فخلتها تحمل فى تواءم
علاء:يامانت كريم يارب يامانت كريم يارب الف حمد وشكر ليك يارب
كانت الدكتورة فرحانه جدا وهى شايفاه حيموت من ابفرحه بالشكل ده
وهما خارجين من عند الدكتور
نيرة :علاء، انا عاوزة اروح افرح بابا
علاء :ياللا بينا
تذهب اليه فى المحل:صباح الخير ياحاج
ابراهيم:صباح النور ياولاد انتوا رايحين على فين عالصبح كده
علاء:لاء، احنا جايين مش، رايحين
ثم يحتضن نيرة:نيرة حامل ياحاج
ابراهيم :بجد الف مبروك ياولاد يحتضنهم ويقبل ابنته الف مبروك يابنتي الف مبروك ياحبيبتي
نيرة:الله يبارك فيك يابابا
ابراهيم:احنا لازم نحتفل بالمناسبه دي انا حقفل المحل ونطلع عالشقه عندي وسلمى تجيب دارين وعصام يبجي وانا عازمكم النهارده ده احلى خبر فى الدنيا
يجتمعون جميعهم على هذا الخبر الجميل وقد طلب لهم والدهم طعاما جاهزا وكانوا جميعهم فرحين بهذا الخبر
كانت دارين متعلقه بسلمى وبشده لاتريد ان تفارق حضنها تناديها بماما
سلمى هي من ترعاها وتهتم بامرها فهي امها بكل ماتحمل الكلمه من معنى
ايراهيم :مالها دارين حاسس انها ماريفه
سلمى :هي بتسنن ياحبيبتي ومش مستحمله
نيرة :انا والله كل ماباجي اخدها مبترضاش ابدا يابابا مش عاوزة غير سلمى وبس.
ابراهيم :قلبها حاسس انها امها ربنا يكرمك يابنتي يارب
تكتمل سهرتهم ويأخذ علاء زوجته واخته وينصرفون
بينما يطلب من عصام ان يبقى معه بعض الوقت
يجلس مع ابنه :ايه يابني مش كفايه كده بقى
عصام :كفايه ايه يابابا
ابراهيم :كفايه تعاقب نفسك لحد كده البنت بتحبك وبتحب بنتك واديك شايف بنتك روحها فيها ازاي
عاوز تستنى لحد امتى تستنى لحد ماتروح منك وياخدها غيرك
عصام :ربنا يهنيها يابابا سلمى بنت حلال وتستاهل كل خير
ابراهيم:وليه متكنش انت اللي يهنيها يابني
عصام :انا خدت حظي خلاص يابابا ومبقاش فية طاقه ادي لحد حاجه خلاص
ابراهيم :اللي زى سلمي عمرها ماحتاخد حتدي وبكل حب حتديك الحب والحنان والأمان والتضحيه
قللي الصراحه ياعصام انت بتحبها واللا لاء
عصام:حكدب عليك لو قلتلك اني مبحبهاش ايوة بحبها يابابا يمكن فى الاول مكنتش حاسس ناحيتها بحاجه لكن مع الوقت لقيت نفسي بحبها وبحب حبها لبنتي ولاختي
ولاخوها بقيت بحب حبها واحترامها ليك لكن انا مش حقدر اظلمها معايا
ابراهيم :يابني كونك تسيبها لغيرك ياخدها منك هو ده الظلم الحقيقي ليها ولنفسك فوق يابني فوق ياعصام قبل ماتضيع من ايدك سلمى بترفض عرسان كتير علشانك حرام تضيعها منك حرام والله
لو خسرتها عمرك ماحتعرف تعوضها تاني
🌹🌹🌹🌹🌹🌹
فى شقة سناء تجلس معها امل وزياد يلعب امامهم ويتحدثان سويا:حبيبة وبنتها وحشوني اوى
امل:معلش والله انتي عارفه ياماما الحمل تاعبها شويه وماهر جوزها خايف عليها اوى
سناء:ربنا يكملها على خير يارب وانتي بقى مش حتفرحينا باخ واللا اخت لزياد
أمل :والله وليد كان لسه بيقوللي نفسه فعيل كمان
سناء:جيبوا ياحبيبتي وافرحوا بولادكم وربك هو اللي بيرزق
امل:الحمد لله والله ياماما من وقت ما وليد نزل الشغل وهو نفسيته اتحسنت والمرتب كويس ومعيشنا مرتاحين وانتي كمان ربنا يخليكي لينا يارب مش سايبانا بس انا والله مستنيه بس زياد يدخل المدرسه
سناء :مدرسة ده ايه لا انا عاوزة اشوف اخوات زياد بيلعبوا كده وبكرة شمس تقوم بالسلامه والبت ايمان هي كمان ربنا يكرمها والاقي كده ولادكم كلكم بيجروا حواليه يااه ده انا وقتها الدنيا مش حتكون سايعاني من الفرحه
امل:ياحبيبتي ياماما ربنا يخليكي لينا يارب
يسمعون دقا على الباب تقوم امل لتفتح الباب فتجد ايمان امامها:والله انتي بنت خلال كنا لسه جايبين فسيرتك. تدخل ايمان ووجهها لايبشر بخير.
سناء:ايمان مالك ياحبيبتي في ايه
ترتمي ايمان فى احضانها:الحقيني ياخالتي انا تعبانه اوي انا ملقتش حد اروحله ولا يحس بية غيرك ياخالتي.
سناء:ياحبيبتي يابنتي مالك ياايمان
امل الحقيني والنبي بكوباية ليمون للبنت تهدي اعصابها
مالك ياحبيبتي فيكي ايه
إيمان :انا مش حخلف ياخالتي مش حكون ام انا حتحرم اني ابقى ام ياخالتي
سناء:ايه الكلام اللي بتقوليه ده انتي جبتي الكلام ده منين
ايمان:التحاليل والاشعات هي اللي بتقول كده
انا مبخلفش انا عندي عيب خلقي فى الرحم مش حعرف اخلف ممش ممكن اخلف
سناء :طب الدكتور شاف التحاليل والاشعات وقالك
ايمان:انا رحت لدكتورين ياخالتي والاتنين قالوا نفس الكلام مفيش امل ولا حتى حينفع اطفال انابيب
بيقولولي عاوزة معجزة عشان تخلفي
انا خلاص اتحكم علية اعيش العمر كله محرومه من الولاد
