رواية شمس تتحدي الغيوم الجزء الثاني (للعشق كلمته الاخيرة) الفصل السابع
ذكريات تهاجمنا تحيط بنا من كل ناحية لا تريد ان تتركنا وحالنا
وكيف لها ان تتركنا وتبتعد عنا وقد أصبحت جزء منا
نحاول أن نسكت السنتنا عن البوح بمكنونات صدورنا فتصرخ القلوب بانينها
نضع اصابعنا فى اذاننا لتصم عن تلك الاصوات التي كنا نعشقها
فيصرخ القلب لحنينه واشتياقه لهم
يالها من حسرة تدخل القلب عندما يفترق الحبيب عن حبيبه
والعاشق عن معشوقه
مالهذا القدر يلعب لعبته معنا ماله بنا فليتركنا وحالنا فكفانا مانحن فيه
كنا ننتظر السعاده ونتلهف إليها كمايشتاق الصغير ليوم العيد ليرتدي ملابسه وفجأة ذهب العيد وحل علينا الحزن والآلام
ولكن منذ متى والحزن يدوم فلابد وان يأتي اليوم الذي تتحرر فيه القلوب من اسرها وتفك قيدها وتتعافى من الامها وتفتح ذراعيها للحياة
😒تفتح لها الباب فتجدها غير قادرة على الحركه يبدو عليها التعب والارهاق :ياحبيبتي ياشمس ده انتي شكلك تعبانه اوى ادخلى ياحبيبتي
شمس :الحمد لله ياطنط
ام إيمان :ربنا يقومك بالف سلامه أن شاء الله انتي شكلك قربتي خلاص
شمس :انا لسه بادءه الشهر التامن
ام إيمان :ياحبيبتي ربنا يقومك بالف سلامه ادخليلها اهي جوة
تفتح عليها الباب فتجدها جالسه شارده فى ذكرياتها والدموع تنساب على خديها:مونتي وحشتيني ياقلبي
فتنهض ايمان سريعا لهاوتمسح دموعها:شمس هو انا مش قايلالك متجيش ينفع كده ولما تتعبي
شمس :اخس عليكي يعنى انتي مش عاوزاني اجيلك واللا ايه
ايمان :خايفه عليكي ياقلبي مش الدكتور محذرك من الحركه
شمس :مانا مش حقدر اقعدمن غير مااشوفك يامونتي
ايمان :طمنيني على الحلوين اللي نفسي اشوفهم عاملين إيه
شمس وهي تضع يدبها على بطنها:قربوا يشرفوا خلاص
إيمان :حددتوا اسماءهم واللا لسه
شمس :اه ان شاء الله أدهم وهلا
إيمان :ياحبايب قلبي ربنا يجيبهم بألف سلامه بس ايم هلا ده غريب شويه
شمس:عمر ياستي هو اللي عاوزه عشان يبقى على اسم ماما هاله
إيمان :ياحبايبي انا متهيألي اول مااشوفهم حقطعهم
وعليا وسليم وعشق عاملين إيه وحشوني اوى
شمس :والله لو وحشوكي تيجي تشوفيهم
إيمان :مش قادرة والله ياشمس غصب عني
شمس :لحد امتى ياحبيبتي فات شهر وانتي عالحاله دي حتفوقى وترجعي لحياتك وللناس اللي بتحبك امتى ياقلبي
إيمان :لما أحس اني بقيت قادرة ياشمس
شمس :ندمانه على قرارك ياايمان حسه انك استعجلتي
إيمان :لا ابدا بالعكس ده القرار الصح كل ماكان حيتاخر كان حيبقى عبء اوى علية وكان يبقى صعب إنى أخده
شمس :بس انتي اخدتي قرارك قبل ماتسمعي رده ياايمان ليه مديتيهوش فرصه يقولك رده مش يمكن كان اتمسك بيكي ليه صممتي ورفضتي حتى انك تسمعيه وجيتي على نفسك وعليه بالشكل ده ياحبيبتى
إيمان :مقدرتش ياشمس غصب عني والله مقدرتش استنى لحد مااسمعه وهو بيختار الولاد ويفضلهم علية مكنتش حقدر استحمل صدقيني كانت حتبقى هي دي نهايتي
انا سيبته وانا بقول لنفسي انه أكيد كان حيختارني انا سيبته وانا بقنع نفسي بده عشان اقدر أكمل حياتي وانا بتمناله السعاده من قلبي
شمس :بس ده كتير عليكي اوى ياحبيبتي وبعدين حسن كان ممكن فعلا يختارك انتي ياايمان حسن بيحبك أوى
إيمان :عارفه وعمري ماشكيت لحظه فحبه لية
شمس انا بحب حسن بحبه اوى وحبي ليه صعب انه يتحرك او يتهزمن مكانه
وعندي اسيبه وانا بحبه وجوايا عشق ليه احسن مليون مرة من اني اسيبه لأنه فضل الولاد علية
عاوزة مفتكرش غير الذكريات الحلوة اللي كانت بيننا وبس من غير مايعكر صفوها اى حاجه تانيه
حسن مبيغيبش عني لحظه فخيالي طول الوقت
ضحكنا وهزارنا مع بعض
شمس:طب لحد امتى انتي طول مانتي بالشكل ده عمرك ماحتقدري تتخطي المرحله دي من حياتك
فوقي ياحبيبتي حتفضلي حابسه نفسك كده لحد امتى لاعاوزة تنزلي الشركه ولا جيتي شفتي الولاد اللي روحك فيهم ولا عاوزة تخرجي مامتك زعلانه عشانك اوي ياايمان فوقي الله يخليكي انتي اخدتي قرارك ونفذتيه غصب عن الكل يبقى خلاص كفايه لحد كده نفوق بقى ونحاول نبدأ من اول وجديد عشان خاطري
إيمان :ان شاء الله يا شمس ان شاء الله حخرج وحبقى كويسه
لولو كويسه وسولي عامل ايه وعشق حبيبة قلبي بتسأل عني واللا نستني
شمس : امبارح اخدوا تطعيم الست شهور وسخنين ياحبايبي ومش طايقين حد يلمسهم
إيمان :ياحبايب قلبي الف سلامه عليهم
شمس :اما عشق بقى نفسها تجيلك اوى وكل شويه تسألني وتقوللي ايمي وحشتني ليه مبقتش تيجي هو حد زعلها
إيمان :ان شاء الله حاجي هما وحشوني اوى.
شمس :طب ايه رايك تقومي تلبسي وتيجي معايا تشوفيهم
إيمان :مش قادرة والله ياشمس تعبانه
شمس :مين دي اللي تعبانه هو فى حد يبقى تعبان وحلو كده قومي ابت ياللا
تقوم شمس وتفتح دولابها وتخرج منه فستانا جميلا كم كانت تحبه إيمان :انا عارفه انك بتحبي الفستان ده اوى ياللا قومي البسيه وظبطي نفسك كده على مااكلم عمر اشوفه بيهبب ايه هو كمان
إيمان :شمس الله يخليكي انا مش حخرج مش عاوزة اشوف حد
شمس :وانا والله ماحخرج من غيرك اه مانا مش حفضل قاعده كده وشايفاكي بتضيعى حياتك لا وربنا خلاص احنا حنعتبر اللي فات مات واحنا ولاد النهارده ننسى بقى ونعيش
إيمان :تفتكري حقدر ياشمس
شمس :مع برسيل مفيش مستحيل مش ده كلامك
إيمان :ههههههه بحبك ياشموستي
شمس وهي تحتضنها:بموت فيكي ياقلب شموستك
😒😒ترتدي ملابسها وتخرج مع صديقتها بينما تغلق أمها خلفهم الباب وتدخل لابيها:خرجت مع شمس
والدها :ربنا يصلح الحال يارب
أمها :يعني كده خلاص البنت مستقبلها ضاع
والدها :ليه بتقولي كده ياام أحمد
أمها :مانت عارف اللي بتطلق بيبقى وضعها ايه وبنتك اتطلقت وهي مكملتش كام شهر جواز تفتكر حد حيرضى يتجوزها غيرش كان مطلق واللا ارمل وساحب وراه عيلين تلاته
والدها:وانا ايه اللي يخليني اوافق على حاجه زى دي بنتي ست الكل وزينة البنات وان ماكنش يجيها اللي يقدرها ويصونها يبقى مالوش داعي
أمها :مبتخلفش ياحبيبتي قلبي واجعني عليها اوى انا بحاول امسك نفسي ادامها بالعافية لكن ربنا العالم حالي ايه
أبوها :محدش يعرف بكرة في إيه ربك عنده خير ياما وان شاء الله حيعوضها خير إيمان طول عمرها طيبه وحنينه وربنا حينصرها ان شاء الله
امها:يارب يااخويا يارب
😒😒يدخلان فيجدان عشق جالسه تذاكر ومعها أنس يذاكر معها وما ان لمحت إيمان جرت عليها وارتمت فى احضانها:إيمي حبيبتي وحشتيني اوى
إيمان :انتي اللي وحشتيني اوى ياروحي عامله ايه ياقلبي
عشق:انا بعمل الهوم وورك وانس بيذاكرلي
أنس وهو يسلم عليها:حبيبتي ياموني وحشتينا اوي
ايمان :انوس حبيبي انت وحشتني اكتر يابطل قولولي بقي الصراحه بتذاكروا واللا بتلعبوا
عشق :لا والله ده انس كل مااجي اقوم يزعقلي ويقوللي اقعدي ذاكري
إيمان :شاطر ياانس ياحبيبي
تخرج هاله على اصواتهم فترحب بها :ايمان حبيبتي الف حمدالله على سلامتك ياست البنات البيت نور وربنا
إيمان :حبيبتي ياطنط هاله حضرتك وحشتيني اكتر والله وعمى اخباره ايه
هاله :والله كل يوم يسأل عنك ونفسه يشوفك هو فاوضته بيقرا قران تعالي نطلعوله
إيمان :بس انا عاوزة
هاله وهي تسحبها:عارفه انك عاوزة الولاد حتدخوليلهم بس تعالي لعمك الاول ده حيفرح اوي لما يشوفك
شمس :ماشي وانا حطلع اغير هدومي واجيلكم
يطرقان الباب ويدخلان عليه فيصدق ويضع المصحف جانبا:اهلا بالهرابه اللى خلعت مننا
إيمان وهي تسلم عليه:ازي حضرتك ياعمى وازى صحتك
شاكر :الحمد لله والله فنعمه المهم طمنيني عليكي انتي عامله ايه كده بردو تروحي وتقولي عدولي طب انا بقى زعلان منك ومخاصمك
إيمان :يالهوي لا طبعا مقدرش على كده الا البرنس بتاعنا الاستاذ احمد مظهر فى فيلم صلاح الدين ياناس
انا عاوزة اعرف انت عيالك مطلعوش مزز ليك ليه هاه
شاكر :ههههههه ربنا يفرح قلبك يارب ياايمان
إيمان :انا اخدت نصيبي من الفرح خلاص الحمد لله على كده جبرنا خلاص
هاله :بس ياهبله ايه اللي بتقوليه ده ده انتي فعز شبابك والدنيا فاتحالك دراعاتها
شاكر :تعالي ياايمان اقعدي جمبي
بصي ياحبيبتي محدش فينا مااتعرضش لمحنه فحياته احنا فدار الابتلاء وربك لما بيحب عبده بيبتليه عشان بختبر صبره وايمانه بيه وكل ماتصبري وتثقي فربنا هو سبحانه حيعوضك واكتر مما كنتي تحلمي
مش بنقول ملك الملوك اذا وهب لا تسألن عن السبب
انا عارف انك كنتي بتحبيه اوى بس خلاص حياتكم مع بعض خلصت واخدتوا نصيبكم من بعض ننسى ونعيش بقى
ونخلينا واثقين فربنا اللي لا بيغفل ولا بينام وقادر ربنا انه يعوض عليكي باللى احسن واحسن
إيمان :ونعمه بالله انا والله راضيه باللي ربنا كاتبهولي
شاكر :انا متأكد ان ربنا شايلك الخير ياحبيبتي انتي تستاهلي كل خير ياايمان ولازم يكونلك حظ من اسمك لازم يبقى ايمانك بربنا كبير
إيمان :ربنا يخليك يا رب يا عمى ويديك الصحه والعافيه يارب ويخليلك القمر بتاعك ده
شاكر :هاله اهي دي تعويض ربنا لية
هاله:ده انت اللي حبيبي وعوض ربنا لية انا كنت ولا حاجه وانت خليتني كل حاجه
إيمان :لا انا كده حبقى عزول وشكلي وحش انا مضطرة انسحب من اللحظه الرومانسبه دي
شاكر :لا ياحبيبتي احنا رومانسيين كده على طول صح ياهاله
هاله:صح ياقلب هاله هي اللي بتتحجج عشان تجري على حبايبها اللي وحشوها
إيمان :وحشوني اوى معقوله عدى شهر كامل من غير مااشوفهم
تدخل عليهم الغرفه فتجد عليا جالسه فى فراشها وكانها استمعت لصوتها وجلست فى انتظارها وماان راتها حتى ظلت ترفرف بيديها وتضحك لها وترفع لها بدبها لتحملها
حملتها سريعا واخذت تقبلها قبلا كثيرة من كل مكان وجهها وايديها وارجلها وتحتضنها بشده حضنا تنسى به كل الامها حضنا ينسبها حرمانها من انها ستصبح اما فى يوم من الايام
حضنا ينسيها كل مامرت به وماعانته فى تلك الأيام
الماضية :لولو انا بحبك اوى ووحشتيني اوى انتي منسيتينش ياحبيبتي فاكراني انا قلت انك مش حتكوني لسه عارفاني واكيد حتعيطي اول مااشيلك ياحبيبتي يالولو ياروحي انا ياعمري انا احنا بقى عندناسبع شهور ده احنا كبرنا وبقينا عرايس حلوين
أخذت تهدهدها وتحتضنها وتدور بها والصغيرة تضحك
سمعت بكاء الآخر :سولي حبيبي صحا هو كمان اهلا اهلا بالباشا الصغير ياربي عمر ادامي سبحان الله ده انت كربون منه يابني ياعيني عليك ملقتش غير عمر وتطلع شبهه طب كنت اطلع شبه الاستاذ احمد مظهر جدك واللا البرنس ابوك واللاحتى خالك علي ملقتش غير عمك عمراللى تطلعله
بس ياللا بقى مش مهم
سبحان الله هو بعينه عمر ياناس بحواجبه ومناخيره وبؤه المكعبر
بقى انا بؤي مكعبر ياجذمه
تلتفت للصوت :عمر ازيك ياعمر
عمر:والله انا اول مادخلت وقالولي انك هنا مصدقتش قلت اجي اشوفك بسرعه وحشتيني ياموني كده بردو الغيبه دي كلها الف حمد لله على السلامة يا قمر
إيمان :الله يسلمك يا عمر شمس كانت عندي وجينا مع بعض
عمر:مقالتليش الغلسه مع انها مكلماني وهي عندك وماقالتليش انك حتيجي معاها
إيمان :حتفرق معاك حاجه سيادتك
عمر :انتي مجنونه طبعا حتفرق كنت حفرش الفيللا كلها ورد وفل وياسمين وادبحلك عجل كمان هو احنا عندنا كام موني
ايمان :ربنا يخليك ياعمر يارب ويقوملك شمس بالف سلامه
عمر :شموستي يارب ياموني يارب امال هيا سايباكي وراحت فين
انا اهوه ياحبيبي كنت بغير وبصلي العصر
عمر:ربنا يتقبل ياقمر البهوات اللي جوة عاملين ايه شايفه صاحبتك بقى شكلها مكعبر ازاي بصراحه شكلها مش عاطفى خالص
شمس :ومين بقى ان شاء الله اللي شكلها عاطفي الست نادين بتاعتك
عمر :نادين دي برنسيس قمر وهو يغمز لايمان حاجه كده تحسيها طايرة فى السما
شمس وهي تمسكه من ملابسه:وانا حخليك تطير وراها ان شاء الله
عمر :ههههههه يامجنونه هو انا فى حد مكلبش فقلبي غيرك
يجدون سليم يضحك
عمر:شفتي اهو سولي بيضحك عليكي مراة عمك هبله ياسولي صح
بقولك ايه تعالي ساعديني اغير هدومي وحطيلي رجلي فشوية مياه دافيين وملح
شمس :وده ليه أن شاء الله
عمر :طول اليوم واقف على رحلي فى المستشفى مع العمال لما تعبت
إيمان :هي المستشفى دي مبتخلصش ست شهور بتتبنى ومخلصتش انا تعبت خلاص وجبتواخري انا عاوزة المستشفى دي تخلص باي شكل انت فاهم
عمر :يااما مالك اتحولتي كده ليه
شمس :اتفضلي قدامي
عمر:حاضر حاضر
تضحك عليهم ايمان وهم يخرجان من الغرفه لينما هي تستكمل ضحكها مع الصغار
ثم تسمع طرقا على الباب :بشمهندس يزيد
يزيد:وحشتيني اوى ياايمان كل دي غيبه علينا
إيمان :كنت تعبانه والله يابشمهندس
يزيد :طب هان عليكي الولتد تحرميهم منك الفترة دي كلها
إيمان :غصب عني والله مش بايدي كانوا وحشينني اوى بس ماكنتش قادرة
يزيد :ألف حمد الله على السلامة ودي اخر مرة حسمحلك غبها تبعدي عننا
إيمان :حاضر
شفتي سليم كبر ازاي وبقى نسخه من عمر
إيمان :ههههههههه استنساخ سبحان الله
بس لولو قلبي زي القمر شبه مامتها الله يرحمها ويغفر لها بالظبط نسخه منها
يزيد :يارب تاخد طبعها فى اخلاقها وطيبتها وحنيتها
إيمان :طبعا ده أكيد إن شاء الله لازم حتطلع طيبه وجميله وست البنات كلهم صح يالولي صح ياقلبي
قولي لبابي انا حبقى أجمل بنوته فى الدنيا يابابي
يزيد :روح بابي انتي
طيب انا حروح اغير هدومي عشان ماما محضرة وليمه احتفالا بيكي
إيمان :هههههه والله طنط هاله دي عسل
يزيد :وحشتني ضحكتك اوى متخليهاش تغيب عننا تاني
إيمان :غصب عني والله
يزيد :حيعدي كله بيعدي ياايمان
إيمان :تفتكر جرح القلب بيطيب وبنتعافى منه يابشمهندس
يزيد وهو يمسح دمعه هاربه من عينيه:بيطيب ياايمان هو صحيح مكانه فى القلب بيبقى معلم واثره عمره مابيروح بس بيطيب وبنتعافى وبنعيش
هي دي الحياة بس الناس الطيبه اللى كانت حياتنا ومالكه روحنا عمرنا مابنقدر ننساهم
ياللا انا رايح اغير هدومي
تجلس ايمان على الكرسي وهي تحتضن عاليا وتبكي على حالها وتتذكر حبيب قلبها الذي لم تعشق سواه
بينما هو يدخل غرفته ويترك لدموع عينيه العنان يمسك صورتها بين ايديه ويتحدث إليها :وحشتيني وحشتيني اوى ياعاليا ياااه الدنيا من غيرك وحشه اوى ملهاش طعم
انا مفتقدك اوى مفتقد ضحكتك وحنيتك وخوفك علية
فاكرة لما كنت اول ماارجع من الشغل لازم تقلعيني هدومي وتخليني احكيلك كل اللي حصل فى الشغل وحشني الكلام معاكي اوى
يحتضن الصورة بقوة :وحشتيني ياقلب يزيد
😒😒😒😒😒😒😒
تضع الطعام على المائده وهي مستعده بكامل اناقتها وتذهب لايقاظه من النوم:ياللا ياكسلان قوم بقى انت مشبعتش نوم
ادم وهو يفتح عينيه :انا مشبعتش منك انتي تعالي هنا
مياده:هههههههه طب قوم بقى الاكل حيبرد ياللا عشان تاكله وهو سخن
ادم:تعرفي اني فعلا جعان اوى
مياده:طب ياللا قوم انا عملتلك كل الاكل اللي بتحبه
آدم :وانا بحبك انتي
مياده:بجد ياادم بتحبني
آدم :بجد طبعا ياعيون ادم مانا قلتلك طول مانتي مريحاني حتخليني احبك
مياده:مانا بعمل كل اللي بتطلبه مني اهوه واديني اصريت واجبرت اهلي اني لازم اسافر عشان الشغل واخيرا وبالعافيه وافقوا وبقيت معاك على طول ياحبيبي فى الشغل وفى البيت مبسوط كده
ادم:فى قمة الانبساط ياللا بينا
مياده :ياللا ياروحي
يجلسان على المائده وتضع له الطعام فى فمه:كلي يابطتي
ادم:ماشي ياروح بطتك
يعلن هاتفه عن اتصال
مياده وهي تحضر له الهاتف:انجي
آدم :سيبك منها
مياده:يعني مش حترد عليها.
آدم :معقوله بردو اكون قاعد مع مراتي حبيبتي واكلم حد غيرها
مياده :يعني انت نسيتها خلاص وحتقطع علاقتك بيها
ادم:متبقيش غبيه انا مينفعش اقطع علاقتي بانجي
انجي ليها معارف كتير وبتنفعني فشغلي وبستفاد من وراها كتير ولو قطعت علاقتي بيها حاكون انا الخسران مش هيا
مياده::ييه بقى افهم من كده انك حتفضل على علاقه بيها وبتخوني معاها مش كده يعني انا مستحمله كل ده عشان بردو تفضل هيا كابسه على نفسي
ادم:مياده انا مش عاوز عكننه بقولك انتي ليكي اني اعملك اللي نفسك فيه واجيبلك اللى عاوزاه واللي عمرك ماكنتي تحلمي بيه اكتر من كده ملكيش فيه واعمل اللي اعمله فاهمه واللا مش فاهمه
مياده :بس انا مراتك وبغير عليك ياادم ببقى حموت من الغيرة وانا عارفه انك نايم فحضنها
آدم :مصالح ياهبله مصالح مش اكتر لكن انا مفيش فقلبي غيرك هو انا لما حبيت اتجوز اتجوزتها هيا واللا انتي دي تتمنى مني اشارة كل امنيتها فى الدنيا اني بس اشاورلها ده يبقى معناه ايه مش معناه اني بحبك انتي وانتي اللي فقلبي
مياده :ايوة بس
آدم :مفيش بس ياللا انا حلبس وخارج
مياده :رايح فين
ادم:ادم ميتسالش رايح فين
مياده :رايحلها صح
آدم :ساعه وجاي مش حتاخر
حضريلي هدومي على مااخد دش
يلبس ويتركها ويخرج بينما هي تنفجر من البكاء:يعني كل اللي بعمله ده ومفيش فايده بردو حتفضل الزفته دي كابسه على نفسي وواخداه مني طب اعمل ايه اتصرف ازاي لا انا لازم ادم يبقى بتاعي لوحدي باى شكل انا لازم افكر كويس ازاي اخليه لية لوحدي ومفيش غيري فحياته
انا حتى اذا كنت عاوزاه عشان يأمن لي مستقبلي مش اكتر لكن بردو هو جوزى انا ولازم يكونلي لواحدي
😒😒😒😒😒😒😒
يجري اتصالا هاتفيا معه:طمني يابشمهندس ايه الأخبار
عمار :الحمد لله ياحسن عملوله العمليه الحمد لله
حسن :بجد طب وإيه الاخبار طمني
عمار :الحمد لله والله كله تمام هما الدكاترة طمنوني وقالولي العمليه نجحت بس هو حيفضل فى العنايه كام يوم وبعد كده حيفضل فترة تحت رعايتهم
حسن :ألف حمد الله على سلامته ربنا يكمل شفاه على خير
عمار:يارب ياحسن يارب
طمني الشغل اخباره ايه
حسن:الحمد لله والله كله تمام
عمار :وانت عامل ايه ياحسن طمني عليك
حسن :عايش الحمد لله
عمار :مفيش أخبار جديده عن إيمان
حسن :خلاص يابشمهندس ايمان قفلت كل الطرق وكل الابواب فوشي دي حتى غيرت رقم تليفونها حاولت اتصلت بيها على تليفون باباها قاللي خلاص مفيش فايده
عمار :قدر الله وما شاء فعل خلاص ياحسن كل واحد فيكم يبدأ حياته من اول وجديد وربنا يكتبلكم الخير
ويعوضكم ان شاء الله انتوا الاتنين تستاهلوا كل خير
حسن :مفيش حاجه ممكن تعوضني عن إيمان
ايمان مكسب لأى حد تدخل حياته لكن انا اللي خسرت ولو عشت عمري كله ادور عن بديل ليها مش حلاقي
عمار :كان عندك استعداد تضحي برغبتك فى الابوة ياحسن عشان حبك ليها
حسن :اختيارين اصعب من بعض هي ليه الدنيا وحشه كده ليه استكترت علية سعادتي معاها انا تعبان اوى من غيرها انا كل ماالتليفون يرن اقول هيا اكيد وحشتها اكيد مش حتقدر تبعد عني
كل شويه ابص فصورنا واتفرج على فيديوهاتنا مع بعض معقوله خلاص ايمان مبقتش فحياتي معقوله مبقتش اعرف عنها حاجه
عمار :حنعمل ايه ياحسن خلاص
حسن :ايوة خلاص
عمار :وانت نويت على ايه ياحسن
حسن :مش حنزل اسكندريه تاني انا حستقر هنا خلاص حفضل فشرم
عمار:محدش عارف بكرة فى ايه ياحسن ادعيلها ربنا يقف جمبها وانت ان شاء الله بكرة تنسى
حسن :ايمان انسى ايمان استحالة انساها ولا حاجه الدنيا كلها ممكن تنسيني إيمان
عمار :إيمان فعلا نادر لما تلاقي حد زيها بس حنعمل إيه
حسن :عمري ماتخيلت ان سعادتي معاها حتخلص بسرعه كده
عمار :أكيد ربنا ليه حكمه فده ارمي حمولك على ربنا وقول يارب
حسن :يارب يابشمهندس يارب
بشمهندس دلوقتى فى مشكله
عمار:خير ياحسن
حسن :فى اوراق مهمه لازم تتمضى منك شخصيا
عمار:وانا مينفعش انزل ياحسن
حسن:ممكن مدام اشرقت تنزل
عمار:لاء طبعا مينفعش بص مفيش غير حل واحد
حسن :حل ايه
عمار:حعمل لماسه توكيل وتنزل هي تمصي الاوراق المطلوبة
حسن :مفيش مشكله اللي يريحك
عمار:خللي بالك منها ياحسن حتبقى فامانتك
حين:ماسه دي اختي الصغيرة يابشمهندس
متقلقش عليها هما يومين وترجعلكم بالف سلامه
يغلق معه الهاتف ويتحدث لها:كده بردو ياايمان تبقي انتي القاضي والجلاد
بس انا السبب انا اللى وصلتلك احساسي ان الولاد عندي رقم واحد وانا اللي غلطان اني طاوعتك كان لازم اتمسك بيكي اكتر من كده كان لازم أرفض ومطاوعكيش
سامحيني ياايمان اني مقدرتش احافظ عليكي سامحيني ياحبيبتي
😒😒😒😒😒😒
تجلس مع اختها وتتحدث إليها
يعني انتي وصلتي لأيه دلوقتى
نادين :ولا حاجه لسه ياليلى
ليلى:انتي بتهزري صح معقوله حاجه تستصعب عليكي يانادين
نادين :يزيد مش زى اي حد يزيد محتاج معامله خاصه ومش بسهوله اقدر اقنعه بية انا زرتهم فى البيت اكتر من مرة محستش ان فى ترحيب بية زي ماكنت متصورة
والبنت اللي اسمها عشق دي مع انها صغيرة بس نظراتها نار عينيها كلها كره لية
كل مااحاول اكلمها ترد علية بقلة زوق يااما متردش
ليلى :غيرانه على باباها طبعا
طب والتليفونات مش عامله حاجه وزياراته فى الموقع
نادين :مااتصلش ولامرة انا اللي لازم اتصل بيه
هو محترم جدا وجينتل فى الرد بس مش عارفه هل هو معجب بس بيتقل واللا ايه بجد مش قادرة احدد
اما الموقع فهو مبقاش كتير بيجي نادر اوى ويادوب خمس دقايق ويمشي احيانا كتير اروح يقولولي البشمهندس جه ومشى
ليلى :طب وانتي حتعملي ايه شكلك كده زهقتي
نادين:مش نادين اللي تحط حاجه فدماغها وتزهق منها ومتوصلهاش يزيد مش حيكون غير لية مهما كان التمن
وانا على أتم الاستعداد اني أخوض اي معركه فسبيل الوصول ليزيد
وبكرة تشوفي اختك حتعمل ايه ياليلى
ليلى :انتي حتقوليلي عليكي لما تحطي حاجه فدماغك عمرك ماحددتي هدف ومقدرتيش توصليله
نادين هو انتي حبيتيه واللا ده رغبه مش اكتر
نادين :عاجبني اوى يا ليلى و حموت عليه انتي عارفه برغم ان علي وعمر اجمل منه فى الشكل بس هو حاجه تانيه خالص
ماشي يايزيد انا وراك ومش حياس ولا حزهق ولاحمل من اني اوصلك
بقى انا نادين اللي كل الرجاله يتمنوا مني اشارة تحيرني كده وراك
بس وغلاوتك حوصلك يعني حوصلك ومش حتكون لحد غيري
مهما كان التمن حتى لو حرتكب جنايه
