 |
اسكريبت ابيض علي ابيض كامل بقلم الست نور
- أبيض عالأبيض
- ايه!
- زبدة يعني أي بالإنجليزي؟
- butter
- ويطير يعني؟
- fly
- وفراشة يعني؟
- butterfly
- ملقتش فراشة أخف منك، وقال يواد خُد اللي تُقلها دهب قولت مش هتكلفيني كتير بالخمسين كيلو بتوعك.
- ده مدح ولا ذم؟
- فراشة يامااا فراشة! عارفة يعني أي؟ يعني لو الأرض مشالتكيش أشيلك في نن عيني.
- لا لا مش مطمنالك حساك بياع كلام و...
- و...؟
- اشطا أنا بحب كده!
يعني لا هيبقى حب ولا صالونات؟ وهيبقى لا فعل ولا كلام؟ أهو بياع كلام هحتاجه في رحلة كده يدوبك مشوار العمر لو ينفع.
- أحمر يعني؟
- red
- وعَلم يعني؟
- flag
- حطهم على بعض..
- red flag
- أهو أنا شوفت الريد فلاج بعيني بس شوحت بإيدي كده وقولت Red is my favorite color.
- أما أنا بقى شوفتك green flag.
- أحرجتني بكرم أخلاقك والله.
- اسأليني ليه؟
- ليه؟
- لقيتك مُدرسة إنجليزي وأنا ليسانس آداب إنجليزي، قولت هنبرطم باللغة.
- نبرطم؟
- هنخلي عيالنا لبلب.
- لبلب؟
- هنفتح سنتر سوا.
- ونقبض بالدولار!
- ونقبض بالدولار.
بصراحة عرض مغري وأهو شغلانة تخليني أخليه تحت عيني علشان عينه متزوغش كده ولا كده.
- دلوقتي هنبدأ تكريم الطلبة المتفوقين في الإنجليزي.
- كله يسكت علشان تسمعوا اسمكم وتطلعوا تستلموا شهادتكم.
من الحاجات اللي كان نفسي تتعملّي وأنا طالبة اقترحت عليه نعملها وإحنا ميس ومستر مع الطلبة بتوعنا، وهي نكافئ كل الطلاب اللي نجحوا لأن كونهم نجحوا صافي ده مجهود يستحق الشكر والتشجيع.
- طب وكده مش هيبقى فيه فرق بين الأول والأخير؟
- لأ هنخلي شكل الشهايد مختلفة لحفظ فرحة المركز الأول وندي شهادة للي مطلعش الأول علشان ينافس التيرم الجاي على المركز الأول.
تأثير الحركة دي على الطلاب أثار جدل كبير وتحفيز لكل الطلاب وعرفنا من أهاليهم عن تطور مستوى أولادهم وإن طريقتنا نجحت والأمهات اقترحت تساهم بهدايا لولادها نديهالهم لما يجاوبوا من غير ما يعرفوا إنها منهم ولما بيروّحوا بالهدية بيتفاجئوا وبيهنوا ولادهم.
- أنا حابة أتفرغ من الشغل لابننا.
- كنت هقولك كده بس خوفت تفهميها بشكل تاني.
- أنا لو بشك في نيتك واحد في الميه مكنتش هشاركك في رحلة مشوارها العمر كله.
- وأنتِ my true choice والباقي كله false.
- وأنا جيت أ correct my answer لقيتك إجابتي الوحيدة الصح في حياتي.
- طول عمري كنت مقتنع إن الـ he بياخد is بس دلوقتي عرفت إن الـ he بياخد she.
ضحكت مرة واحدة ومن كتر الضحك عيوني دمعت:
- كريتيڤ كريتيڤ يعني مفيش كلام
"تزوجيه مُدرسًا لـ اللغة الإنجليزية، لا يعرف من القواعد غير أن الـ he بياخد she"😂💗
#الست_نور
