 |
اسكريبت السلعوة كامل بقلم شهيره عبد الحميد
فاكرين سلعوة؟
يمكن مواليد التسعينات فقط الـ هيفتكروا اكذوبة سلعوة الـ كلنا صدقناها وقتها لما اتحكالنا أن كان في بنت زمان بتحب الأغاني ووالدتها ست صالحة بتقرأ قرءان كتير على مدار اليوم، والبنت دي في مرة اتهورت وخدت المصحف من أيد والدتها وداست عليه واتسخطت لكائن غريب اسمه "سلعوة".. ونهاية الحدوتة دي كانت بتختلف شوية، منهم الـ بيقول سلعوة هربت وبتظهر لناس في أماكن فاضية زي الزراعة والصحرا.. ومنهم الـ بيقول خدوها حديقة الحيوان ولما ماتت حنطوها في متحف.. إلخ.
ولحد دلوقتي في شك من حيث أن القصة دي حقيقة أو خيال الله أعلم مفيش إثبات.
لكن من ضمن الاساطير القديمة ويمكن قليل جدًا الـ سمع عنها هي أسطورة "مرجان ابن الجان".
ودي أسطورة اقدم حبتين من سلعوة انتشرت في الثمانينات بالتحديد في محافظة الإسكندرية عن شاب في مُقتبل العشرينات.
الشاب ده كان إنسان مُسالم بزيادة، لا بتاع مشاكل ولا بيحب حتى يختلط بـ شباب منطقته.
مرجان كان عايش مع والدته فقط وبيشتغل من صغره علشان يساعد في البيت، أمه كانت بياعة خضار ومعروفة في الحتة بأنها ست بركة وسمعتها طيبة.
جت فترة مرضت الست أم مرجان مرض شديد وكانت في أخر أيامها، وعلشان تطمن على ابنها استدعت ستات المنطقة كلهم في يوم وعرضت عليهم لو أي واحدة فيهم عندها بنت وتقبل تتجوز من مرجان أبنها وهيعيشها ملكة لأنها هتسيبله ورث كبير مقالتش عنه لاي حد.
الستات منهم الـ مصدقش أم مرجان ورفضوا يجوزوا بناتهم لواحد يعتبر مرمطون زي مرجان، ومنهم ستات طمعوا وصمموا يعرفوا إيه هو الكنز ده بالظبط قبل ما يتم الجواز.
لكن ام مرجان صممت على كلامها أنها مش هتقول لأي حد على مكان الكنز إلا ابنها ومش هتقوله كمان غير وهي بتطلع في الروح.
كل الستات رفضوا إلا ست واحدة كانت غلبانة زي أم مرجان وانتظرت لما كل ستات الحتة مشيوا، وقربت من أم مرجان وقالتلها "أنا موافقة.. بس علشان نكون على نور أنا بنتي فيها عيوب صعبة.. يا ترى مرجان هيقبلها؟".
الست أم مرجان سألتها عن عيوب بنتها ووقتها الست قالت "أنا بنتي بصريح العبارة كده متتعاشرش.. صوت عالي تلاقي.. عصبية من غير سبب تلاقي.. ده غير شخيرها في النوم الـ بيصحينا كلنا.. والأدهى من كل ده أنها كسولة ومعفنة، لا عمرها غسلت كوباية ولا حتى بتعرف تسلق بيض".
ضحكت الست أم مرجان وقالت للست أم سمارة "أنا كمان ابني له عيوبه مفيش شخص كامل.. ابني غلبان وعلى نياته يعني يوم ما مراته تتعاكس ولا حد يضايقها مش هيقدر يقف قصاده.. ورزقه على قده يادوبك بيعرف يجيب اللقمة، يعني لا هيعرف يصيغها ولا يوزنها بالمال.. لكن اوعدك الكنز الـ هسيبه لمرجان هيغير حياتهم هما الاتنين بإذن الله ".
وتم الاتفاق بين الست أم سمارة والست أم مرجان.. وفي الليلة الـ اتجوز فيها مرجان من سمارة، الحاجة أم مرجان ماتت..!
ليلة الزفاف كانت شبه عزا، كلها صويت وعياط وستات بتجري يمين وشمال علشان يلحقوا يدفنوها في عز النهار.
خلص مرجان مراسم الدفن ولما رجع البيت لقى سمارة قاعدة بتبص من الشباك، ولما سألها "انتي محضرتيش معايا دفنة امي ليه؟ مش المفروض انك مراتي دلوقتي وتكوني جنبي؟".
ردت سمارة وقالتله "مبحبش الشارع والدوشة".
كان ردها بارد وغريب! لكن مُرجان وقتها خد الموضوع بشكل تاني وقالها "احسن بردو، كده كده مش مستحب وجود الستات في الجنازات".
وعلى هذا الحال استمر بين مرجان وسمارة.. كل ما سمارة تقصر معاه في حاجة كانت بتقابل كم حنية وصبر غريب من مرجان.. رغم أنه ولا مرة قالها كلام حلو أو عبرلها عن مشاعره، كان بيعبر بس بالمواقف.
وفي يوم رجع مرجان من شغله لقى سمارة ماسكة في دماغ واحدة من الجيران والناس حواليهم متجمعة.. ساب الشنط الـ في أيده ومسك سمارة بعدها عن الجارة بالعافية وهو بيعتذر للست ولما دخل البيت بمراته قالها " حصل إيه ؟"
ردت وقالتله "الست بنتلــ.... بتنشر غسيلها عليا علشان تبوظلي غسيلي".. بص مرجان ناحية البلكونة ملقاش هدوم على المنشر، بل استعجب أن سمارة بتغسل وهو مش موجود وهي مبتعملش اي حاجة في البيت اصلًا وسألها "انتي غسلتي؟ فين الغسيل ده؟".
ردت سمارة بعصبية وقالتله "ما أنت لما هترجع هتغسل.. يرضيك تبوظ الـ هتغسله؟".
ضحك مرجان وقالها "انتي جميلة يا سمارة.. محتاجة بس بدل ما بتطلعي طاقتك في العراك، انك تستغليها في حاجة أحسن تخلي الناس تحبك زي ما بحبك".
كانت دي المرة الأولى الـ يقول فيها مرجان كلمة صريحة زي دي..
حتى أن سمارة كانت في قمة ذهولها..!
إزاي بعد كل الإهمال الـ بتقدمهوله في البيت حبها؟
إزاي كمل معاها لحد دلوقتي بدون ما يشتكي منها ولا مرة لأهلها ؟
إزاي بعد ما امها كانت بتقولها "دانتي هترجعيلي من الصباحية" هي لحد الآن عايشة مع راجل بيستقبل كل مصايبها بهدوء بل وكمان وقع في حبها !
يمكن الخناقة دي حصلت بين سمارة وجارتها علشان سمارة تكتشف معدن جوزها يومها، وسألته "هو فين الكنز الـ قالت عليه امك؟ أهل المنطقة بيسألوا".
مرجان افتكر الليلة الـ ماتت فيها أمه، ورجع لنفس المشهد لما كانت أمه نايمة على دراعه بتطلع في الروح وقالتله كلمة هو مقدرش يستوعبها.. وقال لسمارة "مش عارف.. امي قالتلي دور جواك.. وماتت"..
سمارة استشعرت أن الكنز المقصود بيه هو شخصية مرجان عمومًا..
مرجان هو الكنز لأي بنت تتمنى راجل هين لين زيه.
ومن اليوم ده بدأت سمارة تغير من نفسها لأجل جوزها.
بدأت تتعلم منه الثبات الانفعالي
والتضحيات
والحب
وبعد حوالي مرور تلت سنين بدأت المنطقة تلاحظ الخير الـ في بيت سمارة ومرجان..
مش بس كده
ده بدأ رجالة الحتة يغيروا منه ويحصلهم مشاكل بسبب مرجان.. وكل ست بقت تسمع عن الهنا الـ عايشاه سمارة وقد ايه جوزها بيساعدها في البيت ومدلعها وبيعملها كل حاجة.
وبقا مرجان عقدة كل أشباه الرجال...
المشكلة أن رجالة المنطقة سلطوا العيال الصغيرة أنهم كل ما يشوفوا مرجان في الشارع يحدفوه بالطوب ويقولوا عليه مرجان ابن الجان علشان يهزقوه وتسقط قيمته قصاد ستات الحتة.
وبالفعل لأن مرجان مُسالم ومش بتاع مشاكل كان بيستحمل تحديف الطوب عليه كل ليلة ويجري على بيته يقفل على نفسه ويقعد يبكي على كتف سمارة.
وفي يوم مُرجان من كتر البكى حصله زي ضيق تنفس وبيموت، سمارة وقتها قطعتله التيشيرت بتاعه وبدأت تضغط على صدره بقوة يمكن تقدر تلحقه قبل ما يموت.
وبالفعل الأزمة دي انتهت بعد دقيقتين، لكن سمارة خدت بالها أن في سلسلة متعلقة في صدر مرجان وهي بتدوس على صدره السلسلة دي اتكسرت ووقع منها مفتاح صغير...!
ولما فاق مرجان وحكت له سمارة عن المفتاح الـ وقع من سلسلة صدره قالها أنه ميعرفش حاجة عنه، وان السلسلة دي أمه جابتهاله وهو صغير وحرصت عليه ميقلعهاش أبدًا.
سمارة عيونها لمعت وقالتله "علشان كده امك قالتلك قبل ما تموت دور جواك! اكيد ده مفتاح الكنز يا مرجان".
بدأ مرجان وسمارة يقلبوا البيت على أي حاجة مقفولة وعايزة مفتاح.. واتفاجيء مرجان بصندوق خشب فوق الدولاب مش باين من التراب وأول مرة يشوفه.
استخدم المفتاح وبالفعل فتح معاه ولقى كمية دهب كبيرة جدًا كفيلة تغير حياته كلها، وجواب موجود مع الدهب بخط أمه بتقوله "ده صندوق العيلة يا مرجان.. متفكرش أن امك علشان بياعة خضار ماكنش ليها اصل وفصل.. أنا كنت من عيلة كبيرة يا ضنايا لكن ابوك غدر بيا لما اتجوزني طمع وحسسته أن لا ورايا ولا قدامي.. ومن وقتها وأنا قررت اعيش بيك على قدي، وكل ورثي من اهلي يكون ليك علشان تبدأ بيه حياتك..".
في نفس اللحظة دي هجموا رجالة المنطقة على بيت مرجان علشان يضربوه ويطفشوه نهائي من الحتة.. ولما شافوا صندوق الدهب معاهم قلقوا اكتر لأن بالشكل ده مرجان مش بس هيكون زوج مثالي، ده كمان هيكون غني ووقتها ستاتهم هتتمرد عليهم اكتر واكتر.
وخدوا مرجان والصندوق معاه على ورشة حديد تحت البيت، سيحوا الدهب وحطوا وش مرجان فيه علشان يتحول مرجان الطيب لـ مسخ مُرعب كل الناس بتخاف منه.
ومن وقتها وأسطورة مرجان ابن الجان بتلف المحافظات، أن كان في جان متنكر، ولما الناس قفشوه ظهر وشه الحقيقي الممسوخ واختفى من المنطقة ونزل عاش في مكانه "تحت البحر".
والحقيقة أن مرجان لا مات ولا انتحر في البحر..
مرجان خدته سمارة بعيد وعزلته عن اذى العالم وبقت هي الـ بتشتغل وتشوف طلباته كلها كأنها جيشه الوحيد.
مرجان زرع الحب وسقى مراته بكل أنواع الرحمة، ولما الحياة اشتدت وتعسرت، ضللت هي عليه 🖤.
المشكلة أن في التوقيت ده اخلاق الرجالة اتغيرت بدرجة مرعبة، يعني لو كان في راجل كويس بنسبة عشرة في المية بقوا كلهم يفرضوا سلطتهم وجبروتهم على زوجاتهم بشكل مُبالغ.
كأن الـ هيكون كويس فيهم هيتعمل فيه زي مرجان.
وتقريبًا كده والله اعلم، نسبة أشباه الرجال مازالت أكبر من نسبة وجود امثال مرجان.
