 |
اسكريبت اللوحة الملعونة كامل بقلم محمد المغربي
الجانب المظلم من الرسم ، لوحة شيطانية اترسمت على ايد بنت عندها ١٧ سنة..
الحكاية بدأت في الدنمارك سنة ١٩٧٩ لما كرستين البنت صاحبة الـ ١٧ سنة كانت بتحب الرسم وبتعمل لوحات لأصدقائها تهاديهم بيها في المناسبات والي بدأت شهرتها تنتشر في المدينة بتاعتها بعد انبهار الناس باللوحات ديه لأنها كانت فعلاً موهوبة ، عشان يتحول الموضوع من مجرد هواية لمهنة بتاخد منها فلوس وبدأت تبيع لوحاتها في كل حتة لحد ما يجي في يوم ويجيلها واحدة ست تطلب منها ترسم صورة لحفيدتها الي اتوفت غريقة لأنها معندهاش اي صور او ذكري منها تحتفظ بيها
وقتها كرستين استغربت وسألتها طيب هرسمها ازاي وانا مشوفتهاش ومعرفش شكلها ، ردت عليها الست انها هتوصف ملامحها وهي ترسم زي ما هتوصفلها بالظبط ومقابل ده هتديها مبلغ كبير من الفلوس ، استغربت كرستين لكن في النهاية وافقت وبدأت ترسم اللوحة زي ما الست وصفت بالظبط ،الغريب ان وهي بتوصفلها طلبت منها تطلع الملامح والتفاصيل بالمنظر المرعب الي انت شايفه قدامك ده وكان تبريرها لده ان ده اخر منظر شافت عليه حفيدتها وهي بتطلع في الروح بعد ما طلعوها غرقانه والمنظر مش عاوز يتمحي من خيالها.. سبب غريب لكن في النهاية كرستين عملت الي هي عوزاه منها وطلعت اللوحة بشكلها النهائي كده .. استلمت الست اللوحة ودفعت الفلوس وبعد اسبوع تقريباً يحصل حاجة غريبة
تتفاجئ كرستين وسط اللوحات الكتير الي عندها في الاوضة وهي بترتبهم والي كانوا بتوع ناس تانيين ان اللوحة الي رسمتها للست الي حفيدتها غرقت موجودة وسط اللوحات ديه، رغم ان هي سلمتها اللوحة وخدت اجرها فا الموضوع كان غريب لكنها اعتقدت ان حصل لغط وان الست خدت لوحة تانية مثلا ولو ان الموضوع صعب بس حاولت تقنع نفسها بكده وكانت منتظرة الست تجيلها تاني تاخد اللوحة
وتاني يوم على طول من اكتشاف الي حصل تتفاجئ كرستين ان لوحة من اللوحات الي في الاوضة والي كانت لطفل صغير مكان الالوان اتغير للون الاحمر يشبه الدم ، مش بس كده، الالوان بعد ما كانت نشفت بقت بارزة من اللوحة كأنها متلطخة بالدم فعلاً، في نفس اللحظة كانت اللوحة الي جنبها هي لوحة الست الي حفيدتها غرقت والي كان عين البنت في اللوحة كأنها منورة وبوقها المفتوح كان خارج منه حاجة شبه الدخان
كرستين اتذعرت من الي هي شيفاه وأما ندهت على اهلها يجوا يشوفوا الي حصل اتفاجئت ان كل حاجة رجعت لشكلها الطبيعي فـ اعتقدت ان الي شافته مجرد تهيؤات بس في نفس اليوم بليل تعرف من الناس ان نفس الطفل الي لوحته شافتها بالمنظر ده لقيوه مقـ..تول ومتقـ..طع ومحطوط في برميل قمامة ومحرو.ق والي كشف الموضوع واحد من الناس الي كانوا معدين لما شم ريحة لحمة مشوية خارجة من الصندوق ولما فتحه لقي الطفل ده جواه محرو.ق!
الاغرب ان صورة الطفل اتمسحت من على اللوحة كأنها لم تُرسم أصلا ، عشان تبدأ مرحلة جديدة من الرعب الحقيقي الي المره ديه مفيش شك انه ممكن يكون تهيؤات بالنسبة لكرستين واهلها لأنهم شافوا فعلاً الصورة بتاعت الطفل كانت مرسومة على اللوحة وده الي خلالهم يربطوا الاحداث ببعض بس محدش شك ان ممكن يكون اللوحة بتاعت الست الي حفيدتها غرقت ممكن تكون هي السبب..
وبعد ايام من الي حصل والتفكير المستمر الي موصلش حد من عيلة كرستين لسبب منطقي للي حصل تتفاجئ وللمرة التانية بـ لوحة من اللوحات والي المرة ديه كانت لراجل مسن و زوجته ، فجأة الألوان كلها بقت حمرا وبارزة من اللوحة كأنها متلخطة بالدم وفي نفس الوقت اللوحة الي جنبها بتاعت الست الي حفيدتها غرقت العيون فيها منورة والبنت طالع من بوقها المفتوح حاجة تشبه الدخان
المره ديه كريستين اصابها الذعر وفضلت تصر.خ بطريقة هيسترية ولما أهلها دخلوا عليها لقوا ان كل حاجة طبيعية وده الي خلاهم يفكروا ان البنت نفسها الي فيها حاجة ، في نفس يوم ينتشر في المدينة خبر وفاة المسن و زوجته في حادثة قتـ..ل غريبة ، لأن منظرهم وهما مقتـ..ولين كان نفس منظرهم وهما مرسومين على اللوحة بالظبط، الراجل كان حاطت ايديه على كتف الست وبيبتسموا *ديه كانت صورتهم المرسومة على اللوحة*
الشرطة اقتحمت البيت بعد استلام البلاغ من الجيران بخروج ريحة غريبة من شقة الراجل ومراته عشان يقتحموا الشقة ويشوفوا الراجل متعلق هو وهي مشنو_قين وحاطت ايديه على كتفها وفاتحين بوقهم بطريقة غريبة كأنهم بيبتسموا وده الي خلي خبر قتـ..لهم ينتشر بين الناس بسبب الطريقة الي لقوهم عليها والي الناس كانت مستغرباها
كريستين واهلها لما عرفوا اتحول الشك لتأكيد ان اللوحات ديه ليها علاقة بالي بيحصل خصوصاً ان اللوحة بتاعت الراجل و مراته الصورة اتمسحت من عليها زي زيها زي الطفل إلي قبلهم واصابهم حالة من الرعب وقرروا انهم يبلغوا الشرطة بكل الي حصل ، بدأت الشرطة في التحقيقات وسمعت شهادة كرستين من بداية الي حصل ورجوع اللوحة بتاعت الطفلة الي ما..تت غريقة مرورا بحـ..ـالات القـ..تل ، الي خلي الشرطة تفكر ان الموضوع ليه علاقة بشي خارق هو تأكيد كرستين وأهلها عن اختفاء صور الاشخاص الي ما.تت من اللوحات بعد قتـ..لهم ومنظر اللوحة المرعب بتاعت البنت الي ما..تت غريبة فما كان الا انهم عرضوا القضية على بعض الروحانين والناس الي بيطلقوا عليهم علماء في السحر والأمور الي شبه ديه .. ويبدأ يكتشفوا حاجات مرعبة اكتر من الي فاتت
بعد التحريات والمواصفات الي اديتها ليهم كرستين عن الست الي العجوز الي جتلها اتضح ان الست ديه ابنها ومراته وبنتهم ماتو..ا مقتـ..ولين في ليلة واحدة والجيران شهدوا ان الست ديه كانت اخر واحدة موجودة عندهم في الليلة الي اتقـ..تلوا فيها وان من بعدها اختفت والشرطة كانت بتدور عليها ومقدرتش توصلها
اما اللوحة الي اترسمت فا الناس المتخصصين في السحر قالوا ان اللوحة ديه عليها طلسم شيطاني مش اي حد يقدر يشوفه غير ناس معينة وان الرسمة ديه مرسومة بمواصفات معينة من الشيطان نفسه وانه كمان بيتجسد فيها وهي السبب في كل الي ما..توا لأن ده نوع سحر عدد قليل جداً في العالم الي يقدر يستخدمه والي بيحضر فيه الشيطان بنفسه
اتقال ان كل الي حصل ده كان تدبير شيطاني واستخدام الناس الي ما.تت كا قرابين ليه وان مش بعيد الست العجوز ديه تكون نفسها هي الشيطان متجسد في شكلها خصوصاً ان محدش قدر يوصلها من بعد الي حصل فا مش بعيد تكون مقـ..تولة هي كمان وانها وهبت روحها للشيطان ، وان اكيد هي الي قتـ..لت ابنها و اسرتها كا قربان..
من بعد الي حصل واللوحة اختفت تماماً واترسم واحدة مشابهة ليها واتحطت في المتاحف والكتب عشان الحكاية تتوارث لكل الأجيال ، بس فيه كلام ان اللوحة ديه لحد دلوقتي موجودة في مكان سري مع ناس معينة وان بيتم استحضار الشيطان من خلالها بيظهر في اللوحة وبيخاطب الناس ديه الي لحد دلوقتي بينفذوا تعليماته الي من ضمنـ..ها الد.م والفساد المنتشر في الأرض
