الحلقة الأولى... صباح الموت

احدث اعمالى رواية "ضريح الفتاة المجمدة" ستصدر ابتداءا من معرض القاهرة للكتاب ان شاءالله بجناح دار المعارف، متنسوش الشير والمنشن

من سنتين اتعرض على والدى ارض فى الواحات بعيدة ومتطرفة بسعر قليل جدًا ، وتحديدًا 5 يناير 2050 ، ولأن والدى زيه زى احد طموح، لأ وايه عنده تطلُعات ، اشتراها وقال انها مستقبل لينا وقت ما الدنيا تضيق نعيش فيها انا واخواتى ، ولأن اخواتى مش عاقلين حتى الرجالة منهم ، كتب الارض بإسمي مروة سيد العايدى ، انا الوحيدة اللى متجوزتش رغم ان سنى 37 سنة ، مش علشان انا وحشة او فيا عيب ، لكن علشان انا مش شايفة الرجالة اللى بيتقدمولى انهم يستاهلوا واحدة زيي ، هما اقل مني كتير وانا مش مطلوب مني خالص انى اوافق لمجرد نظرة المجتمع السخيفة اللى متغيرتش من سنة 2000 ، ان الواحدة كده عنست ومالهاش لازمة ولاطموح فى الحياة ، عندى اختين بنات هبة ودى اصغر منى بخمس سنين ، واختى التانية داليا ودى اصغر واحدة فينا وعندها 27 سنة ، اخواتى الشباب ، واحد اكبر مني بسنتين ، اسمه هلال ، والتانى اصغر مني ب3 سنين واسمه حازم .

على مدار السنتين اللى فاتوا كنا بنروح نبص على الارض بتاعتنا هناك تخاطيف ، لكن انا كنت ببقى مرعوبة وانا رايحة هناك ، المنطقة نفسيًا مش مريحة ، مجرد مابابا بيقف فى المكان هناك بالعربية بحس كأن فى ناس جنبي وحواليا ومش شايفاهم ، وكمان القصص اللى بتتحكى عن المنطقة بترعبنى اكتر ، لان بيقولوا ان من كام سنة الارض هنا هبطت فجأة وعزلت المنطقة اللى جنبنا خالص عن كل المناطق اللى حواليها وكل اللى بيوصل بينهم جسر ، وكل واحد بيقول كلمة شوية ، حبة يقولوا ان الارض دى ساكنها ناس ميتين ، وحبة يقولوا قطاع طرق ، وحبة تانيين يقولو دى ناس شمال وبتطلع اساطير على المنطقة علشان يداروا جرايمهم ، وكل الاقوال دى بابا كان بيكذبها ودايمًا يقولى مقولته الشهيرة ماعفريت الا انسان .

ماما رغم انها كبيرة فى السن لكن كيوت فى نفسها كده ومهتمة بشكلها وجمالها ، والله احيانًا لما بتقف جنبي بيفتكروها اختى ومش هبقى ببالغ لما اقول انها بتتعاكس كمان ، اخويا الكبير هلال مُتزمت حبتين ، حتى لما اتجوز برضو دماغه مقفولة رغم ان كل البنات دلوقتى لبسها قصير والدنيا free وكل واحدة بتعمل اللى عايزاه ، بس هنعمل ايه اخونا ولازم نستحمله ، المهم انه كل ماكان يروح معانا نزور الارض بتاعتنا يفضل يقرأ آيات قرأنية ويقولنا الأرض دى فيها حاجة مش طبيعية ولازم نبيعها ، بابا من كتر مازهق بطل يجيبه معانا .

من ساعة ماخدنا الأرض وانا بسمع صوت انثوي فى البيت بتاعنا بين الفترة والتانية وبيقول كلام غريب زى "لازم تزورونا” ، " مستنينكم فى ارضنا" ، والأغرب لما بسمع صوت بيفضل ينادى " صباح الموت " ، قعدت قلبت ودورت علشان احاول افسر معنى الكلام ملقتش اى تفسير .

اخويا حازم الاصغر مني مش متجوز ، هو من النوع الانطوائي لكن زيادة عن اللزوم ، من ساعة ماراح معانا يشوف الأرض وبقيت من الوقت للتانى بسمع همس واحدة فى اوضته بليل وهو نايم وعمال يزووم ، كذا مرة ادخل عليه الاقيه بيهلوس ويفضل يقول ، انتي ازاى ميتة ياسلوى؟! ..انا عايزك اوى

فى الاول كنت بصحيه وافضل اقوله:

= ياابنى اتجوز بقى ومتقرفناش ، بدل ماانت مقضيها احلام كده

كان رده المُعتاد :

.. الموضوع اكبر من كده يامروة ، شكله حوار احنا مش اده

= ياابنى طب فهمنى التفاصيل بتشوف ايه بالظبط ومين سلوى

.. مش عايز احكى حاجة سيبينى فى حالى واخرجى بره الاوضة واقفلى الباب وراكى

اتبدلت احواله جدًا ومش هو بس بابا وماما بقى بيحصل بينهم خناقات ومشاكل كتير ، هلوسته كانت كبيرة جدًا للدرجة انه فى مرة كان بينادى عليا بيقولى ياسلوى ، بابا قبل كده سمعه وهو بيهلوس وقال انه هيوديه لحد بيفهم فى موضوع الجن والكلام ده ، ومع مرور الوقت مبقاش مركز معاه ولا حطه فى دماغه رغم انه عارف ان حالته بتسوء بزيادة.

فى يوم حازم كانت مهيبرة اوى منه ، نده عليا ودخلتله الاوضة وقالى وهو بيترعش وجسمه بيتنفض :

= اللى هقولهولك ده متنسيهوش واحفظيه كويس انا عارف انك الوحيدة اللى هتسمعينى وهتفهمينى كويس ، احنا لازم نموت نروح ارضهم

.. مين دول

= ياحوت

.. مش فاهمة ياحازم

= سلوى ميتة وجاتلى امبارح بليل نامت معايا واديتنى السكينة دى وقالتلى احطها فى قلبي الصبح وكمان عرفت مكان المدافن بتاعتنا وقالتلى انها هتطلعنى من القبر واعيش تانى للابد معاهم

.. ايه التخاريف اللى انت بتقولها دى ؟ وبعدين ايه اللى جاب السكينة دى هنا ؟ شكلها قديم جدًا ؟!

= سكينة ياحوت ياسلوى سكينة ياحوت

.. اسمى مروة ياحازم فوق

جالى صدمة وذهول لما قالى:

= صباح الموت

حط السكينة فى قلبه والدم غرق كل مكان ، وهو بيطلع فى الروح مسك ايدى جامد وقالى :

.. انس كمان ميت ، سلوى قالتلى انه هيجيلك .........