 |
اسكريبت تحويشه العمر كامل بقلم شهيره عبد الحميد
بدون ذِكر اسماء...
ليا صديقة عزيزة جدًا عليا ويعتبر اخوات من سنين السنين اتفاجئت من فترة أنها بتكلمني في وقت متأخر وبتقولي "شهيرة أنا لقيت على تليفون اخويا بحث عن حاجات بشعة"..
صحبتي دي طول عمرها بتعتبر نفسها أم لاخوها نسبة أنها أكبر منه بحوالي عشر سنين، وطول الوقت شايفاه ابنها وهي الـ مربياه لدرجة أنه كان بيقولها يا ماما.
لكن الولد ده كبر ودخل في مرحلة المراهقة وهي مازالت شايفاه بعين الطفل الصغير المدلل الـ طلع على أيديها.
في مرة من المرات لما روحتلها زيارة بيتها خدت بالي أنها لابسة تيشرت مفتوح زيادة عن اللزوم وأخوها موجود..
استغليت وقت احنا فيه لوحدنا وقولتلها "مينفعش تلبسي كده قدام اخوكي عيب ده كبر وفاهم دلوقتي ميصحش".. لكنها خدت الموضوع بنمط "انتي عبيطة ده ابني مش اخويا.. مستحيل اتحرج منه ولا هو يبصلي بنظرة وحشة.. ده أساسًا طفل وميفهمش في الحاجات دي نهائي متقلقيش أنا الـ مربياه وعارفة".
كنت متفهمة جدًا نظرتها لطفولة أخوها وأنها غصب عنها هتفضل طول عمرها شايفاه صغير وطفل ومش هتقتنع أن الولد بيمر بمراحل مختلفة على مدار عمره.. زي نظرة الأمهات بالظبط لعيالها.
وكنت متأكدة أنها هتيجي في يوم بمصيبة زي دي تقولي فيها "اكتشفت في بحث تليفون اخويا أنه بيتفرج على حاجات مش كويسة.. والمشكلة أن الحاجات دي مكتوب عليها صاحب مع صاحبه.. ولد مع أخته.. ام مع ابنها.. إلخ "...
يعني كارثة بكل ما تحمله الكلمة.
الطفل الصغير كبر فجأة في عيونها.
بقا مراهق!!
وأول رد قولته لصحبتي باندفاع "أنا مش قولتلك أن اخوكي مش طفل ومبقاش ينفع تقعدي كده قدامه!".
فضلنا نشد ونزعق قصاد بعض وهي شايفة أن مستحيل لبسها يكون سبب في بحث اخوها عن الأشياء دي وإنها يمكن تكون مرحلة طبيعية كلهم بيمروا بيها وليها تصرف معين لازم يتاخد.
وبعد مناقشة طويلة عريضة في الدين قدرت أقنعها أن "أ ـ ب" بتقول البنت لا بتقعد براحتها قصاد اخوها ولا ابوها..
وده مش مبرر زي ما بنات كتير هتصيح إني بحط مبرر للراجل في ذنوبه لأ حاشا لله.
لكن بنحفظ نفسنا بكل الطرق الـ نقدر عليها... زي ما ربنا حذرنا في آية فيما معناها إننا بنحفظ نفسنا حتى لا يطمع الذين في قلوبهم مرض.
من وقت المشكلة دي وصحبتي عملت لنفسها خصوصية اكبر بينها وبين أخوها واستوعبت فطرة اخوها ومراحل تغيراته وقدرت تناقشه بشكل غير مباشر عن عقوبة ذنب الإباحية بدون ما تقوله أنها شافت كذا..
طيب لو هنيجي لڤيديو مهندس علاء حامد لما طلع اتكلم وقال إن البنت مينفعش تقعد بشورت أو لبس محدد جسمها قصاد محارمها لأن ده ميصحش وغلط كبير..
الدنيا اتقلبت وقامت بنوعية:
_احنا هنلبس واسع كمان في بيوتنا؟
(رغم أن في بيجامات كتييير صيفي بنطلون وتي شيرت نص كم رقبته مقفولة بدون ما يكشف اي عورة).
_انتوا بتجيبوا اللوم طول الوقت على الست وبس وبتبرر الاباحية ؟؟
(مين قال إن المهندس بيبرر الاباحية.. ليه مش قادرة تستوعبي أنها نصيحة يمكن جديدة على بنات غيرك واول مرة يعرفوا أن اللبس المكشوف حرام! ).
_اصله اتكلم بطريقة حادة ومقرفة ومش اسلوب شيخ نصوح!
(طب ما بنات كتير معترضتش على طريقته وحبينا نصيحته وأسلوبه! يبقى اكيد الأزمة عندك لأنك مش متقبلة الشخص أو النصيحة ذاتها لكن مهندس علاء حامد اتكلم بشكل كويس جدا لتقديم النصيحة).
_طب ما يروح ينصح الشباب!
(طب ما ينصح بنات وشباب ايه المشكلة بردو؟ مهو اكيد مش كل فيديوهاته عن البنات فقط وإلا انتي مش متبعاه ومتعرفيش حاجة عنه).
_انتوا هتخوفونا من الاخ والاب البنت تعيش فين؟
(في مثل بيقولك حرص ولا تخون.. ايه المشكلة أنك تحرصي طول الوقت على نفسك لحفظها!).
_انتوا متشددين والدين يُسر مش عسر
(طبعًا ديننا دين يُسر وكل أحكام الدين على المرأة ما هي إلا لحفظهاااااا.. وحطي تحت حفظها دي مليون خط.. دين الإسلام عزز المرأة واكرمها.. اديان كتير الست بيحصل فيها كوارثثثث وايشي اختلاط نسل وزنا ومرار طافح على نافوخهم).
_بس أنا بردو محبتش مهندس علاء حامد ده.
(حقك طبعًا الموضوع كله قبول.. محبتوش متهاجمهوش ولا تغلطي فيه طالما مهبدلكيش في الدين ولا أخطأ).
_بس بردو اللبس مش مبرر لافعالهم.
(ومين قال إنه مبرر؟ وإلا كانت الرجالة مشيت تغتصب في المسيحين بقا مهو بشعرهم ولبس حر ونقول حقهم اصل الشعر واصل اللبس.. مفيش مبرر للجاني مُطلقًا كل الحكاية إننا بنحذر بعض حبًا مش ملامة).
وبس كده اعتقد مفيش حاجة تاني نقدر نشرحها لكل شخص فهم فيديو مهندس علاء حامد بشكل خاطئ..
ويارب ينور بصيرتكم جميعًا ويحفظكم من كل شر 🖤.
