 |
رواية الابواب الخمس الفصل الثالث عشر بقلم ريام الهادي
مو كلمن عثر معناهه شايب صار
ولاكلمن توضى بماي معناها تايب
اكو بيهم شباب وعمره بالعشرين
لچمات الگلب خلنه شايب
ذكرى : عطت وابجي ومخنوكه والوب واصيح
اريد صمد اريد ارجعله رجعوني اله
قبل ايااام :
ذكرى : كاعده على الدچه ورجلي بلحديقه حافيه تلامس رجليه الحشيش وصافنه على السما واسمع صوت زقزقت العصافير الساعه ٧ الصبح واباوع شلون يتنقلن من شجره لشجره حرات مالهن قيد ولا هموم تمنيت اكون مثلهن حره واطير واترك كلشي ورايه القلق اكلني على اخويه وخايفه من صمد يدك الناقصه ويبقي فوزي بلحبس تعبت من التفكير الليل ماانامه وجهالي ماادري بيهم كل همي شلون اخلص من هاي المصيبه
انحطت ايد على جتفي رفعت راسي لكيت امي
اجت وكعدت بصفي
ام ذكرى : هااا بنتي شو من الصبح كاعده
ذكرى : منمت اصلاً
ام ذكرى : ليش يابنيتي مو انتي تعبانه وراج رضاعه
ذكرى : راح افطم ناي من صدري اخاف عليها مخلصتها شوطات واخاف يصير بيها شى حتى حليبي بدا ينشف من القهر
ام ذكرى :بنتي اني رغم كلشي وياج تعرفين بيه بس هم لازم تفكرين شناويه حتى الواحد يعرف شون يتصرف
ذكرى : ماابقى على ذمته لو اخر رجال بلدنيا واعرف بيج يوم مقهوره على فوزي وحيل مابيج من البجي تره كلشي احس سواء انتي او بابا
ام ذكرى : ربج يفرجها يمه عينا بعين الكريم كوم تريكي وارجعي نامي ارتاحي ساعه من ساعه فرج
ذكرى : كمت ويايه امي بستها من راسها تريكنا واجه بابا كعد اباوع عيونه تعبانات والقهر ماكل بروحه اكل تريك وطلع للمركز كمت غسلت مواعين الريوم وغسلت ملابس صارت ساعه ١٠ نزلت وداد من غرفتها ودخلت للمطبخ شويه وكاال
وداد :عمه ماعدنا بتيته ولا طماطه شون
ام ذكرى : مابيه اطلع للسوك اليوم رجلي تون عليه
وداد : سوده عليه لو موجود فوزي مجان عافنا هيج حال الضيم حالنا الله يجازي الجان السبب
ذكرى : تباوع عليه وتحجي عرفت تقصدني سكتت مالي خلك من الصبح اجاوب
وداد : رايحه اتوسك ما اتأخر
طلعت وداد للسوك كلت خلي انظف البيت اخاف ترجع وتذبلي سم
وداد : امشي بلسوك وزهكانه من روحي لوبيدي احرك ذكرى وعشيرتها اني شنو ذنبي يصير بيج هيج هي تتعارك ويه رجلها ورجلي يوكع بيها امشي وادردم ويه روحي
اشتريت طماطه وخيار وبتيته وكلت اتمشى اشوف خضره جان تشوفني صالحه
صالحه : هله ام مهدي شونج
وداد : هله وعفتها ومشيت جان تلزم ايدي
صالحه : الله جابج عندي حجايه وياج
وداد : واني ماعندي ولازم ارجع للبيت ورايه غدا
صالحه : هسه ياعيني اني شعليه اخت رجلج وحمايه اني شدخلني وضايجه مني
وداد : ليش مو رجلج الجبير ميكدر يجبر اخوه الاصغر منه يتنازل ويطلع فوزي وتعالي كوليلي هو حماج اذا هيج ميريد ذكرى المن ملفيها يمه مجان من زمان طلكها وخلصنا
صالحه : لا حبيبتي حمايه يحبها ومداريها بس حماتج مايمله عينها شى
وداد : غير اتزوج عليها
صالحه : قابل ذبحها غلطه وصارت وماكو رجال ماعنده سوالف مكسره واعترف بغلطه ومستعد يطلك ذيج ويرجع مرته وجهاله لحضه بس الله يسلمها حماتج راسها ناشف ومعاجبها كلشي وتتعيقل براسه وراسنا
وداد : وهسه شتردين مني
صالحه : اسمعي ام مهدي اني اكثر وحده حاسه بيج وشون هسه انتي تايهه بليه رجلج اني قبل فتره صرت مثلج من اخذو عبيد واخوته ضليت تحت امر امه واخوته وحالي يكسر الخاطر تره حطي بالج فوزي ميطلع اله برجعة ذكرى
وداد : وذكرى متريد ترجع شون اسحلها من شعرها وارجعهه خليني بهمي ام مهند على ساعه اخذ جهالي واهج لاخوتي كوه صابره ومنتظره اشوف شيصير
صالحه : ابشرج ميصير شى رجلج ضال وميطلع لو الف محامي يخلون اله
وداد : يوميه احجي واعد مليت ومحد يسمعلي حتى عمي وعمتي منطبن الحق لذكرى كتلك زهكانه لدرجه كل شويه اكول اخذ جهالي وغراضي واروح هناك اشرفلي
صالحه : وشتحصلين هم يبقى فوزي بلسجن ويه الحراميه وبيتج ينهجم وذكرى تطلك وترتاح وتكعد بيت ابوهه معززه والبيت الها يصير يعني هم تهجولتي واخذت مكانج وهم راح يبقى العار ملاحك جهالج ابوهم بلسجون
وداد : شتحجين قابل هو بايك ناهب حتى عار
صالحه : الوادم عليهه الظاهر وتعاي تلزمين كل واحد وتحجيله ليش رجلج دخل السجن كافي من يسألون ابنج وين ابوك يكول الهم بلسجن وحق الجمعنا هسه بليه ميعاد لا سمعه تضل الج ولجهالج ولا مستقبل يمعوده الوادم بيت بله ويكيفون واحد يوكع بضيق حتى يستلموه ومتعرفين شضامتلج الدنيا
وداد : وشنو الاسوي
صالحه : بيدج كلشي هم تخلصين من ذكرى وهم ترجعين رجلج بحضنج وكلشي يرجع لمكانه وابوج الله يرحمه
وداد : اكلها مترجع تكول احرك روحي وماارجع حتى اسمه من تسمعه تتخبل
صالحه : ماكو اسهل منها هسه ترحين ويايه للبيت انطيج شغله بسيطه ترشيهه على فراشها وشغله ثانيه تحطيها جوه الجربايه والشغله ثالثه تنرش على الاكل وراهه راح هي تصيح رجعوني اله
وداد : ضربت على وجهه صخام سحر
صالحه : فضحتينا منا الشارع شو امشي واني افهمج
يله امشي والله خوفتيني عيني اني لا درب سحوره ولا اتقرب منها كلش اخاف
صالحه : قابل اني اعرف الهن لج ذني محبه مو سحر
وداد : وشنو الفرق نفس الشى اثنينهن تخلي الواحد مو صاحي
صالحه : السحر تهجمين بيت تأذين واحد هذا يسمووه سحر اني الراح انطي الج محبه البنيه ترجع لبيتها الي علمج حلال ورب الحلال هم غير راح يعمر بيتها وترجع لرجلها وابو جهالها وتنلم المشكله كلها وكل واحد يكعد ويسكت بيته فكري بيها ام مهدي هي الشغله لصالحج قبل لتكون لصالح حمايه
وداد : وانتي شنو مصلحتج بكل هاي الشغله
صالحه : احبيبه لا الي ناكه بيها ولا جمل كل الراح يصير لخاطر حمايه وجهاله لتنسين هو ابن خالتي وماارضاله الاذيه وهجمان البيوت وهاي الاخذها فوك حماتج وحده بت شارع واخلاقهه زباله شون نقبل انلفيها يمنا وتبقى ذكرى غاليه عليه وجمعني وياه العشره اكلج وداد انتي تأخرتي واني تأخرت ارضي ياخيتي وفكيها ماعندج غيو هذا الحل
وداد : والله دوختيني وخفت
صالحه : اهووو يمعوده شبيج جبانه عبالي سباعيه وحوك غيرج وحده هي تسويلها محبه وتسگيها وترجعها وتخلص منها مو يجي لحد يمها وترفضه
كولي رفضتي شراح تحصلين رجلج يخيس بلسجون وتتهجولين يم الجناين اكيد ترحين لاخوتج وشكد ميكونون حنان يوم يومين ويملون وتبقين تحت رحمه نسوانهم عدا جهالج وعندج بنيه منو يتزوجها من تكبر وابوها خلص شبابه بلسجون استري على بيتج ورجلج اذا بقت ذكرى راح ادمر كلشي حلو عندج وهي تكعد وتتربع بذاك البيت وتحط رجل على رجل وعود اكعدي اندبي حضج وشكي ملابسج وامسحي ايدج بلحايط
وداد : اخاف يأذيها
صالحه : كلشي ميسويها غير ترجع ترغب برجلها وتريده
وداد : وجم يوم لازم اسوي الها
صالحه : لحد متخلصين كل المواد
وداد : ودوم تبقى تريد صمد
صالحه : هي جم يوم تلوب عليه مثل السمجه المزوهره وراهه يختفي لج عيني خفيف والله كلها جم يوم من ترجع مثل الورد لج فكري بنفسج والله محد يفيدج هاي راح ادمر كلشي برجعتها الكم
وداد : جيبي
صالحه : اي هيج من الاول نشفتي حلكي من السوالف امشي ويايه اعلمج
وصلن لبيت عمشه دخلت صالحه بسرعه ورحعت هاااج مثل مكتلج هاي شيشه صغيره بيها مثل المي ترشي وكت المغرب كم قطره مو هواي على فراشها والمخده وهو بسرعه يطير ميترك اثر لتخافين ولازم وكت المغرب وهاي العلاكه الصغيره لتفتحيها ولا تتقربين منها تحطيها جوه الجربايه وديري بالج احد يشوفها ادحسيها زين
وداد : سهله وبعد هاي شنو
صالحه : وهاي بيها مثل الملح ترشي بأكلها ديري بالج تثولين وترشي بلجدر كله بس ماعونها واذا مادبرت سويلج اكله شى عود بس الها وانطيها تاكل لازم ٣ مرات تاكل منه لازم وداد والتزمي بكلشي لحد متخلصين الشيشه وهذا الابيض المثل الملح
وداد : واذا حست بطعمه
صالحه : متحس مابيه طعم جنه يشبهه الملح بس مابيه طعم من اليوم تبدين واني راح اقنع عبيد من يمي حتى يحجي ويه اخوته وساهره هم منا لحد ميطلع فوزي
وداد : منو يعرف راح اسوي هيج يمعوده هاي بديعه مرت فلاح تكها لذكرى لتروح تكول الها ساعدتج وتحجي لاهلها وفوزي يطين عيشتي
صالحه : اله تخبلت واكول لبدعه غير هسه تلبس عبايتها وتلكيها گبلج يم ذكرى
وداد : اهم شى محد يعرف
صالحه : لتخافين بيني وبينج لتنسين يوميه وداد لازم تكملي كله وهااا اخاف تشغلون قران المغربيه طفي
وداد : اي عمتي تشغل دوم
صالحه : طفي واذا مكدرتي نصي المهم الصوت ميوصل لغرفه ذكرى
وداد : اي هيه غرفتها فوك قريب غرفتي انصي وكلشي مينسمع فوك
صالحه : عاشت ايدج
يله روحي ليشوفنا احد
وداد : اروح تأخرت
ذكرى : طلع فوزي وجانت فرحتنا جبيره وخاصه اني كاعده بلكاع وابويه واخويه وامي وداد وجهالي وجهاله كلنا على الصينيه نتعشى عيوني تتنقل من واحد لواحد وابتسامتي الي اختفت رجعت بشوفتهم هيج ملمومين
فوزي : ليش هيج وجهج تعبان هاي التفاحات البخدودج ذابلات
ذكرى : ليش الصارلك شويه ياگلبي من ورايه ريتني بذاك الوكت ميته ولا عرضتك لهيج موقف
فوزي : هلمره حجيتيها مره الثانيه اذا طلعت من حلكج اضربج عليه نسيتي انتي بتي قبل متكونين اختي هاي الايد ياما وياما شالتج وتفتر بيج بس حتى لتبجين وتردين يوم متكبرين هاي الايد تشوف دمعتج وتسكت اكصها اذا مدافعت عنج
ذكرى : لزمت ايده وبستها وسحبني لحضنه وباس راسي
وداد : الله يحفظكم سوه بس نسيت شغله انت هم عندك جهال ومحتاجين ايدك ومحتاجين وكفتك وياهم ذكرى كبرت مو صغيره عمرها سنه وادافع الها لازم كل واحد يعيش حياته وانت عندك مسؤوليه السويته غلط هاي كدام عمي وعمتي احجيها صحيح هي اختك الوحيده بس عندك ولد وبنيه محتاجيك اكثر منها تصرفك مال مراهقين واحد همجي وميفهم ولا جنك دارس وخريج ركض وهجمت عليه ودخلت السجن وفوكاها مندمان
فوزي : شوفي وداد هااي ويضرب على جتف ذكرى هااي لو انطيها عمري مااعزه عليهه وماطول الشغله تخص ذكرى مااندم
وداد : وجهالك
فوزي : ممقصر وياهم شبيهم هياتهم زينين ومثل معفتهم رجعت لكيتهم
وداد : واذا صار عليك شى هلمره عبرت وربك ستر بله لو ميت بيدك جان اني شحصلتي جهالك شحصلو
فوزي : عود من اموت او يصير عليه شى اشمري الجهال لاهلي ولذكرى همه يربوهم واعرف ذكرى تحط جهالي على راسها وتربيهم احسن تربيه وانتي عود روحي لاهلج لاخوتج وعيشي حياتج مو كل حجايه وصحتي اخوتي حزام ظهري ولا جني موجود ورجلج وكدام الكل دوم تكوليها هاي اني هم كدام الكل اكولها اني حزام ظهر اختي وان صار عليه شى ذبي الجهال ولي
وداد : تسمع عمو بربك هذا منطق
فوزي : حجايه ثانيه هذا الماعون اكسره على راسج
ابو فوزي : كافي ابني مو كاعد كدامك صاير متحترم
فوزي : العفو يابه قدرك على راسي هاي طلعتني من طوري وعلا صوتي بوجودك
ابو فوزي : كوم ابني ارتاح وسد هذا الموضوع ربك لطف وانتي بنتي رجلج تعبان والشافه مو قليل هوني عليه مو تزيدين اذيته وشغله ذكرى اني احلها
ذكرى : التزمت السكوت مااكدر احجي شى وداد تريد تشرب من دمي من اصفن على كلامها اكول حقها ومن اصفن على وضعي اكول اني هم حقي منو الي ومنو يدافع عني وياخذ حقي غير اخويه
صعدت وداد ضايجه وبقى فوزي كاعد ويسولف النا شصار ويااه طول الايام الفاتت
وبعدها صعد
اني هم اخذت جهالي وصعدت ولاول مره بعد ايام طويله انام مرتاحه غمضت عيني وحطيت ناي من الجهه اليمنى ويونس من اليسرى وغفيت على ريحتهم من وكت لخد
كعدت عطشانه بنص الليل مريت من يمه غرفه فوزي حتى انزل واروح للمطبخ اشرب مي صوتهم جان عالي سمعت وداد متخبله وتحجي ويااه بعصبيه
وداد : يعني منروح لديالى انت مو بعت المحل واشتريت كاع هناك حتى تشتغل بيها
فوزي : هاي ذيج الفتره هسه الوضع اختلف
وداد : شنو الي اختلف صار اشهر نخطط حتى نشيل وانعيش هناك كاع شكبرها واخويه حازم كمل بناء البيت مالتنا بقت شغلات بسيطه تريد بعد كل هذا التعب وكت الفلوس نعوفه ونبقى هنا
فوزي :الوضع اختلف
وداد : والله موتتني بلوضع ياوضع هاااا لتكول علمود ذكرى
فوزي : اي غير راح تطلك وتبقى هي وجهالها هنا منو الهم
وداد : كرهتني بذكرى وبلساعه الشفت بيها ذكرى حرام عليك يعني ذبيت روحك لخاطرها وهسه راح تذب مستقبلنا ومستقبل جهالك جوه رجلها يصير هيج اذا هو حتى عمي من عرف معترض وكال روح شوف مستقبلك تجي انتي هسه بكل سهوله تضيع كلشي
فوزي : ذاك الوكت وحد اكول ابويه تجي شهريه من المحل المأجره والمشتمل وعايشين بخير واني اروح واجي كل اسبوع عليهم بس من تطلك ذكرى شون اعوفهم
وداد : مثل ماعفت ابوك وامك تعوفها
فوزي : هنا مستحيل البنيه صغيره ومدبر نفسها وياها برگبتها اثنين جهال والاضرب صمد وياها بنفس الفرع يعني مراح يعوفها براحتها تردين اعوف كلشي واروح لديالى
وداد : صغيره شنو عمرها ٢٢ سنه ومتزوجه ومثل مجانت بذاك البيت متحمله مسؤوليه بهذا البيت هم تتحمل وعود عيني روح وتعال كل اسبوع عليها مثل مجنت ناوي ويه اهلك تسوي
فوزي : سدي الموضوع وبعد لدوخيني بيه اسبوعين واروح لديالى ابيع الكاع والبيت وارجع افتح محل هنا يجوز بصف محل ابويه واشتغل اي شى بيه واعيشج واعيش جهالي وعيني تبقى على اهلي
وداد : كلشي اهلك اختك واحنا جوه رجلهم دومك مفضلهم علينا يصير هيج
فوزي : من اجيت لهسه اكلتي راسي لو ادري باقي بلسجن شابع نوم ولا هاي الدوخه طفي الضوا خلي انخمد تعبتيني شكد قابليتج مال لغوه جبيره
ذكرى : نزلت واني كلامهم دوخني كلشي تخربط عليهم برجوعي ياربي شون بيه شسوي ومااخلي حياة فوزي تتأذه بسببي
شربت مي ورجعت نمت رغم الراحه الي اني بيها بس مرات نفسي يضيق جنت اكول يمكن بسبب خوفي على اخويه والمشاكل الاحنا بيها وكلت اكيد برجعت فوزي مراح تتكرر وهم تكررت
ثاني يوم وداد متباوع بوجهي وعفتها مااريد اضوجها اكثر ماهيه ضايجه مني
حجيت كلشي لامي ردت احجي ويه فوزي واقنعه يروح لديالى ويكمل مشروعه
ام فوزي : اسكتي ولتدخلين
ذكرى : ليش ماما خطيه جانو مكملين كلشي
ام فوزي : اني يوم ما كالي الدنيا اظلمت بعيني هو بس هلواحد عندي قابل عشره وذيج تريد تاخذه وتروح يم اهلها وردت العب بيها طوبه بس ابوج مقبل وكال خلي لتعرضين اله خلي يعيش حياته
ذكرى : يعني ماادخل
ام فوزي : ايااج الْحٍمَدٍ للـّہ من بقى اسكتي يمه هسه گلبي صار هلكبره كل مااتذكر انحرم من صوته ودخلته لو من جهاله مهدي وحوراء اكول مااتحمل يمكن اموت وراه
ذكرى : اسم الله ماما
ام فوزي : خلي يبقى يمنا وعلى راسج وراس جهالج وهاي مالج دخل بيها تحجي تحجي وتالي تسكت والماعجبها تروح لاهلها نخلص منها جم يوم
ذكرى : هذا هو راح اسكت
مر الوكت وللعصر اندك الجرس واجت ام اكرم لان جيرانه تبارك بطلعة فوزي واني اجيت اسلم عليها
ام اكرم : والله ياام فوزي ولا ندري بلعركه كلها لان جنا بحديثه بيت اختي اني واكرم وابوه والبارحه بليل رجعنا زواج ابن اختي
ام فوزي : بلخير عليكم
ام اكرم : الخير الي يصيبج خيه ومن رجعنا كالت مرت ابني على العركه والله اني جايتج هم اتحمد بالسلامه لفوزي وهم اسألج
ام فوزي : على شنو
ام اكرم : تعرفين اني خطبت بتهم خوله لابني اكرم والحجي بينا اني مردتها وعركات يابو عركات حتى الولد هج من البيت من وراها لو تخطبوها اليه لو ماارجع اضطريت اروح واخطب وفوكاهه ارمله حتى مو بنيه يعني القسمه سوده مصخمه
ذكرى : كاعده اسمع كلامها متحملت وكتلها خوله خوش بنيه وحبابه ومثقفه ليش هيج تحجين خاله
ام اكرم : يابنتي الناس مو من ثوبنا شون انتم تورطتو وانطيتو مره اني تورطت واخذت مره واجيت اسأل عنها
ذكرى : مو بعد جم يوم المهر مال محكمه
ام اكرم : اوف يوم عيد وتخرب لااذبح لوجهه الله
ذكرى : لا خاله خطيه والله خوله وردة واكرم مبين يحبها
ام اكرم : واهلها
ذكرى : مالج دخل بأهلها متردوها تتواصل وياهم خلي اكرم يحدد تواصلها بس لتظلومها وتظلموه وانتي تكولين اكرم يحبها
ام اكرم : يااا يموت عليها خليني ساكته
ذكرى : لعد خطيه خلي فرحته تكمل ولتكسرين گلبه
ام اكرم : هو اني من محبتي اخاف عليه بنتي
ذكرى : لتخافين خوله راح تسعده
ام اكرم : الله كريم ارفع الزحمه تأخرت وبلخير على سلامة فوزي
طلعت ام اكرم وبقيت اكول بلكت الله وتتزوج خوله وتعيش بعيد عن ذاك البيت وترجع مثل قبل كلها حيويه وحياه
ومرت الايام علاقتي بوداد بارده مثل الثلج ساكته واتعامل بهدوء وياها اخاف اتناقش وياهه بشغله وتعيط
قررت ارفع قضيه طلاك وكلت خلي يرتاح فوزي واخلي يشوف محامي
الحاله كامت تزيد عندي يوميه اختنك المغرب وبليل واشوف كوابيس ومرات اشوف جهالي يبجون على ابوهم بلحلم
قللت الاكل كمت مااشتهي حتى اللكمه كوه تنزل بلعومي كمت الوب اريد اسمع اخبار صمد وارجع واكول هاي شبيج ذكرى تخبلتي
من يوم مااجيت لبيت اهلي واني كاطعه الصلاه ومن اريد اتقرب منها اختنك واضوج وحتى اتعب مثل الشايل طابوك على ظهره ومن يروح وكت الصلاه واقرر مااصلي كل الحيل يرد بيه فوزي لكه محامي وكال اسوي وكاله اله حتى يمشي كام كل ميحجي على سالفه الطلاك اختنك واريد ابجي
مرت على طلعت فوزي اكثر من ١٥ يوم
صحتي بدت تتخربط كلت احتمال بسبب التوتر مال ذيج الايام زادت الحاله وكمت اشتاق واختنك مدري شصار بيوم لحد مايوم كعدت من النوم حلمانه واعيط
اريد صمد اريد ارجعله رجعوني اله
اجت امي تركض
ام فوزي : اسم الله يمه شجاج
ذكرى : يوم فدوة اريد ارجع لبيتي
ام فوزي : تخبلتي اكيد يابيت ولج وعكب باجر موعد المحامي حتى انطلكج
ذكرى : مااريد اطلك اريد ارجع
ام فوزي : شصار وهيج غيرتي رأيج لا لا مو صاحيه انتي يمه ذكرى صاحيه لو بعدج بنومج تحجين
ذكرى : صاحيه والله وكمت ابجي اشهك من البجي سدت حلكي امي بأيدها
ام فوزي : اشش اسكتي ليسمع اخوج ويشمرج من السطح والله غير كتل نفسه حتى يشوفلج محامي ويطلكج بأسرع وكت
ذكرى : مااريد اطلك ماما عفيه خليني اروح لبيتي وخلي فوزي يشوف دربه اني خربت كلشي بجيتي ومن يوم مصارت شغلتي وهو يوميه عركه ويه وداد راح يخرب عائلته بسببي
ام فوزي : لج تقنعيني تردين ترجعين علمود فوزي
ذكرى : اي اي ارجع علموده
ام فوزي : اسمعي وبدون شلاع گلب روحه لذاك البيت ماكو وترحين ويه اخوج للمحامي تطلكين وتسدين هذا الموضوع افتهمتي اذا سمعج اخوج يمكن يذبحج ايااك تعيدين هذا الحجي
ذكرى : كمت ابجي واشهك وامي عافتني وطلعت وثاني يوم احس نار وگابه بيه ياربي دخيلك شون بيه
امي راحت للسوك علمود ملابس وغراض للجهال وفوزي وابويه طالعين بقت بس وداد شافتني اروح واجي وامرد بديه واملخ بلحم بجوانب اضافيري
وداد :شبيج
ذكرى : اريد اروح لذاك البيت عندي غراض اجيبهم واجي
وداد : مترحين احد لازمج
ذكرى : اخاف امي تجي لو فوزي وابويه
وداد : لتخافين اني اراقبلج روحي ولتتأخرين
ذكرى : ناي نايمه ويونس يلعب ويه مهدي فدوة انتبهي عليهم
وداد : منتبهه روحي
لبست عباتي وطلعت اتلفت بلشارع مثل البايك بوكه
طبيت للبيت شافتني بدعه وعاطت من الفرحه واجت تركض تحضن وتبوس بيه
بديعه : ذكيره يابذاته اشتاقيتلج شونج
ذكرى : الْحٍمَدٍ للـّہ لو مشتاقه تمرين
بديعه : والله اخاف من اخوج كلت خاف مانعها من عدنا
ذكرى : لا خطيه كلشي محاجي
بديعه : شبيج عيونج هنا وهنا
ذكرى : وين صمد
بديعه : هااااا
ذكرى : صمد شبيج وينه
بديعه : بغرفتكم اكو شى صاير يمعوده لتتعاركين ويااه
ذكرى : لا مااتعارك
صعدت وعفت بدعه فتحت الباب لكيته نايم تقربت منه لحظه احس روحي اريد اخنكه من كثر ما كارهته وبلحظه اريد اشمر نفسي بحضنه من شوقي اله
فز من النوم لكاني كاعده بصفه طفر من نومته
صمد : هاا ذكرى بيج شى الجهال بيهم شى
ذكرى : حضنته وكمت ابجي وكتله اشتاقيتلك
هو حضني وكاال اني هم لعد اذا هيج مشتاقه ليش مترجعين لبيتج وغرفتج تشوفين شلون البيت اظلم بلياج
ذكرى : امي واخويه ميقبلون
صمد : مالج دخل بيهم بس كولي اي وهسه اجيب الجهال وبعد محد اله يمج شى
صمد : هااا ترجعين
ذكرى : هزيت راسي واني اكول اله اي ارجع
وجليله
صمد : طلكتها ولا تفكرين بيها
تعاالي يله ننزل نجيب ناي ويونس
لزم ايدي ودننزل صارت صالحه وساهره بوجهنا
صالحه : هله هاي منو نور البيت
ذكرى : هله بيج
ساهره : رجعتي
صمد : اي رجعت ومالجن دخل
ساهره : لا عمي كل الهله بيها وهاي هلهوله بمناسبة رجوعها كللللللللوووووش
بسبب هلاهل ساهره عمتي وخوله طلعن وبدعه واكفه وفاتحه عيونها
عمشه : هاي ياهي
صالحه : جنتج عمه رجعت
عمشه : واخيج يدري
ذكرى : هزيت راسي بمعناه لا
عمشه : ذيب البساتين ومريتك الثانيه
صمد : طلكتها يمه
خوله : ليش
صمد : طلعت مو حامل
خوله : يعني انفضحت واكلت كتله معدله وتالي مو حامل عمي مو نسوان بله ازرك وانتي شرجعج
صمد : شلج دخل رجعت ذكرى لبيتها
خوله : باوعت على ساهره وصالحه وكلت
هاااا ولجن طكيتنها بلدهن
بديعه : شديصير عفيه ذكرى صدك رجعتي
صمد : شبيجن مفرحانات هاي مكان متكيفون
صالحه : والله اني طايره من الفرح بلخير خويه عليك
عمشه : لا تتبختر يايمه اخيها مايجوز منك اله يكضي بيك التوبه اترك البت ترد لاهلها
وانه وياك نروح نترخص من واليها
صمد : اني هسه رايح اجيب غراضها واجي
ابقي ذكرى هنا
طب نجم مستغرب يباوع بلوجوه
خير شكووو
خوله : تعاال بارك لاخوك رجع مرته وتهز بيدها
نجم : انتي شجابج هنا
ذكرى : حسيت بدوخه وراسي ثكيل وكوه واكفه بعدني اريد ارد على كلام نجم سمعت الباب من الدك اتكسرت
خوله : الزم راسك مبين اخوها هلمره راح يفتحه نصين
طلع نجم ودخل فوزي تتجادح عيونه من الاعصاب
فوزي : انتي شسوين هنا
صمد : فوزي اختك اجت برجلها وتريد ارجعها واني رجعتها اطلع بره وكافي مشاكل
فوزي : امشي كدامج لا اسحلك من شعرج
ذكرى : فدوة فوزي عوفني والله مااريد اتعبك ويايه خليني ارجع لبيتي والجهال لابوهم وانت حير بمرتك وجهالك
فوزي : اذا مطلعتي هسه كدامي ياذكرى لا اطلع حليب امي من خشمج كداااااااامي
صمد : شنو هاي الملحه كعد اكولك عوفني
ذكرى زوجتي ورجعت لبيتها مسوت شى حرام ولا غلط
نجم : على كيفك فوزي تعال اكعد وخلي نتفاهم
فوزي : وخر مني نجم اريد افهم انتي شون ترجعين شون كدرتي تخطين رجلج بهذا البيت قبل كم تصيحين طلكني منه وهسه تردي
ذكرى : كمت ابجي واشهك اي اريده وماارجع ويااك
عمشه : لو انه بمجانك يمه اردن لبيتي هااي جدامك البت رايده زلمتها فضها يمه هي فاتحه وخسرانه لا تعلل گلبج وتراجف
فوزي : مااتحرك خطوه منا اله تجين ويايه وركض فوزي وسحبني من ايدي حيل وتلازمو هو وصمد ونجم صار بنصهم واجه فلاح من بره جان هستوه راجع اجه يركض ونجم وفلاح لزمووه وهو كل عيطه يعيها يهز البيت هز
فوزي : لج امشي كدااااامي لج ذكرى لا تكسرين ظهري وتصغريني لا تخليني اندم على كل لحظه فضلتج بيها على نفسي
ذكرى : شهكت بكل علوو صوتي وكتله عوفني وارجع لبيتك ماارجع وياااك
فوزي : اذا طلعت منا اخوج مااااااات تفهميني اخوج مااات امشي ويايه وداعت معزتج بگلبي انسه السويتي هسه بس امشي ويايه
ذكرى : كعدت على الدرج ولزمت راسي واعيط ماارجع عوفني ابوس رجلك عوفني
نجم : عوفها هسه فوزي وتعال غير وكت حاجيها
فوزي : بس هدوني والله مااسوي شى الها بس احجي ويااها
فلاح : كافي مشاكل ابو مهدي عيب كل شويه صوتنا طالع بلشارع
فوزي : كتلكم مااسوي شى الها بس احاجيها
عاافوه واجي دنك عليه وصرنا وجهه بوجهه ويحجي
فوزي : بشنو قصرت وياج حتى هيج تصغريني انتي مو كلتي ماارجعله لو اموت
مو گلتي خلصني منه
ذكرى : هزيت راسي ودموعي مغركه خدي وكتله اي
فوزي : ليش هيج تسوين بيه وتخلين ذوله يتشمتون بيه كعدت بنص الحراميه والسرسريه والنشاله ومفتخر لان دافعت عن اختي كلت مااخلي بيوم بشر يقلل من قيمتها راضي اخلص عمري هنا ولا اخلي واحد ميسوه اضفرها يهينها ويعذبها طول مااشتم الهوا تالي هيج تجازيني تكسرين عيني وترجعين اله
ذكرى : دنكت ابوس ايده سحبها
كاام وكف على حيله وكاال ترجعين هسه ويايه وهذا البيت تنسي افتهمتي
صمد : هي كوه مو كالتلك مترجع
فوزي : انجب انت ارعن واسكت لا افلش سنونك بحلكك كووومي
ذكرى : لزمت راسي حييييل اني نصين نص يعيط ويصيح اخذني ياخويه اخذني من هذا الجحيم اختج مربطه بسلاسل من ناار تحرك كل قطعه بجسمها اخذها من بيت النار هذا وارحم بحالها والنص الثاني يعيط ابقي ويريد صمد اريد اجر الهوا وارفع عيوني بعيون اخويه واكول اله امشي نرجع لبيتنا هذا مو مكاني بس مع الاسف لساني نطق عكس داخلي وكاال بصوت عاالي وبدموع تنزل على دمار حياتي وكلت
مااارجع رووووووووح
عمشه : اخوك اش ماعمل وياك حيه
اكرمه ولاتدور اعليه حيه
اذا عاف اللبن وانگلب حيه
الزمن عگرب يلدغه القاط ميه
وتضرب ايد بأيد اندار عليها فوزي وكاال
واني الحيه ماالفيها بحياتي واكطع راسها بيدي تعال صمد اخذ جهالك وانتي لج اذا شفتج بيوم واصل لذاك البيت رجلج اكسرهن من اليوم مالج اهل واخوج مات البنيه الي تنزل راس اخوها واهلها متستاهل حتى تتسمى بأسمهم عيشي هنا بنص هذا البيت يلوك الج
عافني فوزي وطلع لحظتها حسيت روحي طلعت مو اخويه وكعت على وجهي محسيت بروحي بعد
عمشه : يبووو البت طاحت
بديعه : ركضنا عليها شلناها وهي جسمها ثلج والحلك ازرك صمد راح ويه فوزي حتى مدار بال لوكعتها بقينا نتراكض ونغسل بوجهه
عمشه : صفكنهه بعجل لون تصحى
خوله : ميحتاج انتن صافكاتها صفكه معدله
عمشه : كضي لسانج واكرمينا بسكوتج لا تزيديها يبت عمشه
خوله : حرامات والله كلت راح تعيش اثاري هذا البيت الي يطبله ميطلع اله بجفنه
عمشه : فك ياخه ولي دفعتها لخوله وهي حطت ايدها وتكتفت وتتفرج على حال ذكرى المنتهي
ذكرى : فتحت عيني وبديعه تفرك براسي اريد اركز على وضعي لكيت ناي بصفي ويونس يكمز يم الجربايه
ذكرى : راسي ااااااخ
بديعه : سلامتج احبيبه عساها بعدوينج
ذكرى : شجابهم الجهال
بديعه : صمد جابوهم والغراض هم امج وابوج تخبلو من عرفو كامو يعيطون يكول صمد تالي ممجاوبهم جاب الجهال واجه
ذكرى : حضنت بدعه وابجي والله تعبت والقران تعبت
بديعه : ميفيد الحجي بعد الصار صار ورجعتي وماضلج اهلي مثلي يذكرى تحتمين بيهم هسه العليج تسكتين ومتحجين وتذكري دوم مالج مكان بس هنا
ذكرى : واهلي
بديعه : بعد الصار مستحيل يسامحوج وهذا صمد على القصد يمشي ويعيط باب بيت اهلج هي اجتني وكالت ارجع اني شعليه خله فوزي عيونه براسه تصير زين ماذبحه
ذكرى : سوده بوجهي اذيته لاخويه وخليته عليج بحلك صمد
بديعه : اني لو افهم شصار وغير رإيج جان ارتاحيت
ذكرى : ماادري والله بس هسه اني اريد صمد واريد ارجعله
بديعه : ورجعتي والله يعينج على الجااي اعوفج وحدج ترتاحين
بقيت اليوم كله راسي احسه يطك يحجي صمد ويايه ويبوس بيه واني محاسه مثل السكرانه ساعه اوعى وساعه افقد ومااحس شبيهه
بقيت ٣ ايام فوك ماانزل بس للحمام حتى محد صاحني الم راسي يزيد وصدري ينقبض اكثر ومخنوكه وكل شويه ابجي بسبب وبدون سبب حاولت بدعه تخفف عني وميفيد لهسه نظرات اخويه تاكل بروحي واشهك واتذكره
وصمد كل شويه يتحارش ويبوس ويريد يتقرب مني واني انفر منه لحد ما ثالث يوم اني منا احس واحد لازم رگبتي ومخنوكه وهو كل شويه حاضني ومزيد خنكتي متحملت وبدون قصد دفعته حيل اجت ايدي بعينه وهو شاغت روحه
صمد : بت الگلب بت الزمال اليوم اله احرك ساسج النكس هواي احترمتج من اجيتي لهسه جان يلزمني من شعري كمت اعيط
عوووفني
صمد : شنو انتي شايفه نفسج صار جم يوم متحمل مصاختج ومااريدك ومخنوكه وبس تبجين اذا هيج ميته على اهلج المن اجيتيني
ذكرى : حظي المصخم ماادري ليش اجيتك ماادري عوفني مو كطعت شعري
صمد : اني صوجي من زمان لو كاتلج كتله زينه جان تمشين عدل انتي مثل الحيوان بس بلكتل تمشين جان يسحلني وركع راسي بلكنتور شاغت روحي
بديعه : عياط ذكرى عالي غرفتها بصف غرفتي
ركضنا اني وفلاح
فتحنا الباب نريد يعوفها مجلب بشعرها ويعيط
صمد : مكافي اخوج سكطني اليوم اله اسكطج
فلاح : تخبلت ولك عوفها
صمد : امشو اطلعو بره
بديعه : دفعنا اني وفلاح وجان يقفل الباب ونسمع عياط ذكرى هاي اول مره صمد يضربها
نجم : شكووو شصاير
فلاح : هذا المطي صمد تخبل على مرته وقفل الباب ونازل ضرب بيها
صعد نجم يركض جان تلزمه سهاد
سهاد : لتصعد شعليك انت رجال ومرته
نجم : دوخري مني ودفع ايدها
عمشه : احترك ابو اصلكم شنهي شجرى
بديعه : عمه فدووة الحكي هذا صمد تخبل على ذكرى وملخها من الكتل والجهال تعيط جوه
صعدت عمشه تركض ويدكون على الباب واني ابجي على صوت ذكرى والجهال
نجم : لك صمد افتح الباب لك عااار لتضربها
عمشه : يمه صمد بروح ابيك فچ (افتح) الباب من دهر الصابك تسودنت لك صمد يامصخم ياملطم فچه
نجم : لك صمد عووووفهاااا اليوم ادفنك بيدي عووووفها
نجم فقد وكام يضرب حييل ركض جااب جاكوج وكسر الباب وفتحه
ركض سحبه من هدومه وضربه حيل لصمد ودفعه
وعاط بيه تعاالي غطيها
اجيت ركض غطيتها بلكااع ومكطع شعرها وملخ وجهه والجهال فاحطين من البجي
فلاح اخذ صمد وطلعه ونجم يريد يشيلها ويحطها على الجربايه جان تلزمه امه وكالت
عمشه : لاتكضها لا تنسى رويحتك هاي مرت اخيك ينجم
