 |
رواية الابواب الخمس الفصل الخامس عشر بقلم ريام الهادي
ماريدك بعد يل كتلك اشتـــاكَيت
خلص باب المحنه وياك سديته
اشد بعيوني جمر لو مره لاكيتك
واكص الساني لو مره حاجيته
لتـــثق بعد ب كلبي ماكو احساس
اي يا حساس البقه وانت شليته
تحط جرحك بروحي وتكلي انساك
وانت بكل بشاعه الكَلـــب اذيته
تذكر من اجاك الكَلب شابع ضيم
وانت بكل قساوه الكَلب ذليته
خلص كافي بعد ماريدك ابتعد روح
حبنه الجان صافي مو نفسه بديته
عفتــــك بعد لتكــــلي ارجع عاد
الكبر لو اخذ واحد ميرجعه البيته
ام اكرم : هااي اغراض بتكم ماكو قسمه
عمشه : شنهي ام اكرم تسودنتي
ام اكرم : شون ترضيها ازوج ابني لوحده
بيها جن
خوله : اكرم وين دفعت امي وطلعت اركض لبيتهم
اركض حافيه مثل المخبله شنو يعني ميريدني بعد دفعت الباب وكمزت مرت اخوه
يمه فززتيني شكوو خير شو جايه مااجتكم عمتي
خوله : وين اكرم وافتر بلبيت واصيح اكرم وينك اكرم
يمعوده صوتج مو هنا طالع
خوله : جذابه هو اهنا متأكده
يمعوده والله مو هنا لتخبصينا
خوله : احجي وارجف شوكت يرجع
شمدريني بله احد كلج ولية امره اني
خوله : راح انتظره
لا عيني روحي لبيتكم شنو عمتي مجنت وكالت الكم ماكو عرس
خوله : اسكتي انتي ولتدخلين وباقيه ومااطلع اله يجي اكرم
لتعيطين ابقي اني شكوو صدك مااريد اعاندج اخاف الجني مالتج ينگلب طنطل عليه واني مره حبله واخاف على ابني شو وخري
خوله : دفعتني وراحت للمطبخ كمت اروح واجي الزم رگبتي من الخنكه مااريد ابجي هسه يجي اكرم ويلعب طوبه بأمه ويسكتها متإكده هاي بكيفها تحجي ميقبل على سوالفها ادري بيها متحبني وهي تسوي هيج حتى تخرب بينا
ذكرى : ام اكرم عيني شلج بهذا الحجي العرس عكب باجر
ام اكرم : واني كتلكم ماكو عرس ياعرس فدوة اكو ام تزوج ابنها لوحده مخبله
عمشه : دهر صابج وجسر عظامج انه بنيتي زينه البنيات وحلاهن لاتاكلين تبن واستجني لا والعباس امدج هنا ومايضل بيج عظمه صاحيه عبن انه ساكتتلج ومااعرفن شجرالج
منهي وسوست براسج وتسودنتي وتلغين العرس هي صگله (لعبة قديمه) وتنهين گلشي
ام اكرم : مالج دخل منين عرفت ومنو گلي هاي الغراض البارحه جابهن اكرم وباجر توصل ورقة بتكم مال طلاك
عمشه : چا شنهي بگيفج تخطبون وتملجون وتالي هيج يعوفها وقبل عرسها تايهه مالها وليان وحك الخلقج اسويهه دم للرچاب اخوتهه موجودين وانه اعرفن شون ياخذون حگها
ام اكرم : غيرج وحده تسكت تعرفين بتج مو صاحيه ومسكونه والله اعلم شبيهه بعد شون تورطين ولد الناس بيها
ذكرى : كافي ام اكرم عيب هذا الحجي وتره محد ضرب اكرم على ايده وكال تعال اخطبها هو كتل نفسه واجه محد دك بابكم
ام اكرم : انتي بلذات اسكتي اجيتج حتى استفسر عنج وسويتها بس هيه وبس ومنطيتي بيها لان تردين تخلصين منها تلكين ٢٤ ساعه هي وشياطينها تكمز يم راسج وردتي تخلصين منها
عمشه : لا انتي ماينسكتلج جان اتجرها عمشه من ربطتها وضربتها على راسها كوه لزمناها اني وام اسماعيل وبدعه جانت ام اسماعيل ساكته تسمع حتى تجمع سوالف وتعرف شون اطشها بلمنطقه
عمشه : انه امك يعبيد چا تردين تفض هيج بليه مااطلع دمج وهاي الوادم اشهدها عليج
انعل ابو اصلكم اليوم
ذكرى : عمه فدووة كافي عيب منا الناس كوه لازميها لعمتي وتعيط حتى الفوطه مالتها وكعت
عمشه :ميلي مني اليوم اكض بيها التوبه بت المهوش انه تهدين عليه واسكتلج
ام اكرم : اذا ماافضحكم ناس
عمشه : هدني افوخ گلبي بيها يايابه يابويه
شالت النعال وركعته وذيج ركضت يجون اخوتهه وانه اعلمكم لا اشحتكم من المنطقه گلها
بديعه : فدوة عمه كافي الناس بدت تطلع شوو تعالي طبي
ام اسماعيل : ماطول ماكو عرس اروح لبيتي من رخصتكم
جان تلزمها عمشه من ربطتها
عمشه : مامرخوصه ياام اسماعيل حطي وذانج وياي انه اعرفنج واعرف سوالفج لا تكتيهن بحضن هاي وهاي السمعتي تنسي
ام اسماعيل : هاي شبيج عمشه قابل اني احجي
عمشه : لا ابوي طلع من الكبور يسولف ويرد
انه اعرفن طينتج احمسنچ حمس وروح ابوي لون طلعت چلمه منج ولا تكولين عمشه ماگالت جتالتج انه كضي زين لا اكصه
ام اسماعيل : هذا هو مااحجي بس عوفيني
عمشه : ولي درب الصد مارد حطت عينهه طار گلشي والبت تكدرت جفن كون الجفنچ
ذكرى : تعاالي عمه فدوة ادخلي وانتي بدعه شوفي خوله وين صارت ليش تأخرت
عمشه : يمه كون بعدوينج يمه كسرو فرحتج المايخافون الله
بديعه : رايحه وراها
لبست عباتي وطلعت لكيت ام اكرم دخلت لبيت ام ستار عرفت راح تفتر على وحده وحده حتى تبلغهن شكد حقيره
لكيت الباب مفتوح وطلعت جنتهم من المطبخ حاطه ايدها على خصرها
خوش والله البيت صار سوك بيت ام العتيك كله يمنا كل شويه وحده الصبح وحده وخوله اجت هداده وهسه انتي
بديعه : فتحت عيووني مستغربه منوو الصبح الاجت
مالج دخل واخذي هاي ام الشياطين واطلعو من البيت وصختو
بديعه : والله ماكو غيرج الشيطان عوذه على هلوجهه الفگر
غميتها وطبيت للهول لكيت خوله حاطه ايدها على راسها ومتربعه وكاعده بلكاع اجيت ركض عليها
شبيج فدووة رفعت وجهه وباوعت عليه
خوله : تأخر وبعده مجااي
بديعه : عفيه امشي نرجع صارت مشكله شكبرها واخاف تجي امه وتأذيج بلحجي واطردج
خوله : مااتحرك منا والله لحد ميجي
بديعه : كومي اروحلج فدوة لترخصين روحج اذا يريدج بيت اهلج هياته ويجيج
دنكت ارفعها حتى اكومها جان يطب اكرم شافته كامت على حيلها وركضت عليه وترجف وتحجي متت قهر عليها
خوله : اكرم شفت شفت امك لزمت ايده اريد احس بالامان منه وخر ايده مني وكااال بنبره ضوجة
اكرم : شجابج
خوله : شنو شبيك اكرم شنو شجابني
اكرم : تعالي ويايه
خوله :مشه كدامي واني امشي وراه عين على مشيتي والدرج وعين عليه
دخلنا للغرفه الي المفروض تكون غرفتي
طبيت الها وسدت الباب واشوف شون جديده وريحه الاخشاب بيها ومفروشه
اتلمس بيها شون حلوة ومرتبه وكلها مرايات شفت البوب مال الكنتور مفتوحه مشيت بهدوء وسديت البوب ايدي تمشي بهدوء على كل خشبه بلغرفه بدايه من الكومديات للجربايه للكنتور كل خشبه احسها تلامسني واكول هذا مكاني هنا راح اعيش ويه الانسان الوحيد الي حبيته اباوع لكن ركن بيها وعيووني ادمع باوعت على الميز عليه عطور مالته
انداريت عليه تقربت منه وحضنته حييل وكمت اشهك من البجي حطيت وجهي بصدره ردت اختل بيه واختفي من الكل اريد ارتاح والصار قبل شويه كابوس وراح اكعد منه ويروح باجر الحنه مالتي باجر افرح واصير عروس والكل يهلهل الي
دفعني على كيف وخرني منه وكاال
امي جابتلج الملابس
خوله : رفعت عيني بعينه ومسحت دموعي
يعني تدري
اكرم : كتلها لتستعجلين
خوله : واستعجلت واجت وبعدين
دنك ومجاوبني
احجي اكرم يعني موافق على تصرف امك زين شنو الجنيته بحقك وتعوفني بهاي الطريقه كولي ماادري بأمي من اجت وشمرت ملابسج قبل الحنه بيوم كول اني بعدني شاريج ومالج دخل بأمي وبأي واحد عكب باجر عرسنا كول احبج ومنتظر الساعه الانام بيها بحضنج يله اسمعك ليش ساكت ليش متباوع عليه رفعت راسه بيدي كوول اكرم اني حبيبتك خوله وكدامك احجي
اكرم : ليش مكتيلي
خوله : على شنو
اكرم : على مرضج
خوله : مرض يامرض
اكرم : بعدج لهسه تنكرين لهاي الدرجه صغير كدامج وتقشمريني
خوله : فهمني شسمعت ومن منو
اكرم : اجت مرت اخوج الصبح وكالت كدامي وكدام امي زوجوج لواحد سيد بعد مجزعو من الفر على الساده والناس التشتغل بهاي الامور ومفاد بيج فاقده عقلج وتأذين نفسج ناس تكول مسحوره ناس تكول بيها جن ناس بيها مس وتالي تزوجج حتى يعالجج وشهرين ورجعتي ميت السيد واحتمال انتي كاتلته وبعدج مطايبه وبيج جن
خوله : كمل اسمع
اكرم : انطتني عنوان بيت السيد وهسه جنت يمهم
خوله : انداريت ومشيت بهدوء وكعدت على الجربايه وهو گبالي كمل اسمعك
اكرم : طلعتلي العلويه
خوله : وشكالت
اكرم : حجت كلشي وشون جانو يعالجوج وكوه صحيتي بس مكملو العلاج كله لان مات واخذج ابنها ورجعج لبيتكم لان شاك بيج انتي كتلي ابوه ومراد تصير مشاكل وهوسه رجعج بدون محد يعرف حتى لتكبر السالفه
خوله : زين حجولك شون السيد جان يضربني لو حجولك شون جان يستمتع من يغتصبني
اكرم : كاافي خوله
خوله : ليش كافي مثل متحب تحجي وتسمع كلشي عني من الغرب احجيلك اني
شبديلك من وين من نسوان اخويه الي يشوفن الموت ولا يشوفني وشون سون سحر بس حتى اتزوج اخوهن الحقير
وانگلب عليه وخلاني بيني وبين الخبال شعره
تعرف شنو شعور من تفقد حواسك ومتحس بأي شى غير بشغلات تملخ بجسمك ومتكدر حتى تشكي لو تعيط لو تشوف شغلات مرعبه ومتكدر توصفها لبشر لان مراح يصدكك وتعيش بعالم مو عالمك عالم اظلم مخيف كله وجوه شيطانيه همه يأذوك ويستمتعون بعياطك ودمك ومن صحيت من هذا العالم لكيت روحي بعالم اتعس من عالم الشياطين الجنت بيه
كعدت على رجال بكد ابويه يستغل كلشي بجسمي حتى يستمتع يضرب ليل نهار بحجه العلاج وتالي الليل يغتصبني سوه بيه المجرم حرب ميسوون بيه لحمي كطعه عدا الجويات وملاخ الشعر لك حتى المي مرات ميقبل اشرب حتى ابوس رجله واتوسل وبعدها يله يقبل ينطيني كلاص مي
سنه ونص اني عايشه بعالمين واحد احقر من الثاني ردت ارجع لبيت امي حتى احتمي بحضنها مثل طفله تايهه تباوع بوجهه الغرب وخايفه وتسأل امي وين اريدها وتالي لكيت حضنها بارد شمرتني هيه واخوتي حتى يخلصون من خبالاتي
مثل ميسموها كل واحد من اخوتي حزام ظهري حاضن مرته ونايم وهو يدري هيه سبب دمار اخته وضياع مستقبلها والوضع كلش عادي وطبيعي طز بأختنا المهم نسوانه
عشت سنين احارب اطلع منهم درست وتعبت وتحملت كلشي حتى استقل بحياتي وتالي محد رحمني وسحبوني الهم وأذوني بقذارتهم
ومن مات السيد كلت ارجع ماارحم احد خوله القديمه ماتت لازم تاخذ حقها من كل واحد أذاها حتى وان جان اخوتي لان همه رضو الاذيه اليه ولا واحد منهم وكف ويايه الكل دارت ظهرها وعاشو ياكلون ويشربون واطفالهم ونسوانهم بحضنهم ويسرحون ويمرحون بدون حتى ميفكرون اختنا الوحيده وينها
وبديت أذي كل واحد أذاني بنقطه ضعفه لحد ماشفتك متوقعت احبك لان اني مايوم حبيت ولا اعرف الحب شنو وياك عرفته وياك حسيته ابتعدت عن كلشي وعفت اي شى يأذيني وماافكر بيه واكول راح اعيش الحياه الي اريدها ويه الانسان الوحيد الاحبه وكلشي صارلي قدر ومكتوب والله راح يعوضني بعد كل هاي الاذيه وتالي قبل الحنه بيوم واني احف هااك شوف وجهي نص ونص عروس تحف وفرحانه تندك بابها ويشمرون ملابسها عليها ويكولون ماكو عرس بح خلصنا شتتوقع ردت فعلي
اكرم : تدرين بيه احبج وردتج مرتي وام بيتي ومقصرت واجيت وخطبتج بس
خوله : ايييي بس شنو وره البس مالتك احجي داسمعك
اكرم : اني مااكدر اتزوجج
خوله : وكفت على حيلي وتمشيت بأتجاهه زين ليش
اكرم : انتي بعدج مطيبانه واكيد بعده بيج هذا المس والله اعلم من نتزوج شراح تسوين
خوله : خفت مني
اكرم : مو خفت لتنسين السحر مذكور بلقران وتأثيره موزين واني ما مستعد ابدي حياتي ويه وحده
خوله : كمل كوول وحده مريضة
اكرم :خوله افهميني الشغله مو بس اني وانتي اهلي هم عرفو يعني من اول يوم ردت اخطبج حرت شسويت حتى بس نتزوج لو على الاقل مصارحتني جان كدرت اتلافه الصار اليوم مشفتي امي شسوت من عرفت بيج الشغله مو هينه لا هو مرض واطيبين واكول عادي بلعلاج والاطباء يروح ولا شغله نسوان وقال وقلت واركع كل وحده على حلكها واسكتها
الشغله اكبر هاج انتي بنفسج تكولين نسوان اخوتي يسون سحوره يعني مراح يعوفنج بيوم ومحد راح يتأذه بكدي وكد اهلي واذا صار جهال عدنا الله اعلم شنو مصيرهم
خوله : لهاي الدرجه بايعني
اكرم : اني مبايعج ولا فكرت ابيعج بلعكس اول مشكله وكعتي بيها شغله الرساله وره مده دزيت اهلي وشلعت گلبهم وجبتهم سحل وخطبوج بس هاي الشغله اكبر بهوايه
خوله : نزلت دمعتي وكتله تريدني لو لا بله مقدمات واعذار
اكرم : اني اشوف ماكو نصيب وكل واحد يروح بدربه
خوله : بهاي السهوله هيج غمض فتح روحي مااريدج
كاام يعيط حسي بيه اني هم متأذي مو بس انتي متأذيه وصعبه عليج وعليه انتي كذبتي وضميتي مرضج وخليتينا بهذا الموقف لتجين هسه تذبيها براسي
خوله : تره الحب تضحيه وتحمل شفتني اكطع شعري وافتر بلشارع لو امشي واضرب بلناس كمت اعيط حييل عليه
لك انت شنو من ياطينه بسرعه بعتني سمعت لهذا وذاك وضربتني عرض الحايط
من گلك ماطبت شفت شى مني خوفك لهاي الدرجه ماعندك رجوله وتخاف على نفسك
اكرم : احترمي نفسج شنو ماعندي رجوله
خوله : مو كل رجال حط شوارب صاح اني رجال تره الرجال افعال وانت بلفعل جبان
سمعت منهم صدكتهم ومن سمعت مني مصدكت وبقيت مصر ننهي كلشي انت لا حبيتني ولا عرفت الحب اصلاً كله رغبه وتملك مو اكثر لو تحبني لو مخبله تاخذني تره الكدامك اصحى منك ومن عشيرتك
كلها
اكرم : والله احبج لهيج هيج تظلميني
خوله : كمت اضحك والدموع تارسه عيني وخدي عدا گلبي الينزف دم من القهر وكتله انت جذااااااب وجباااان ومابيك كل خير
واني الما اريدك
لزم ايدي وعااط اوكفي بس افهميني
دفعت ايده حيييل وفتحت الباب واعيط بعلو صوتي
ولك شأفهم اكو شى ينكال بعد شكد أذتني امي ونسوان اخوتي والسيد والزمن بكدك محد أذاني لان صعدتني لسابع سما وركعتني على راسي لسابع كااع انت واحد كل كلمة ماعندك وغلطت عمري حبيتك ضال بيد النسوان وحده تودي حجايه والثانيه تجيبك
اسمع اكرم باجر تروح اطلكني واي حجايه مااريد واي حق يمك اخذه نكعه واشرب ميه وصدك مراح تتهنى بعمرك يجوز تتزوج وحده صاحيه مو مريضة على كولتك رغم صحتي احسن منك ومنكم كلكم تعيش وياها وتخلف منها ثق بالله مراح تحبها ولا راح تحس بالاحساس الي حسيته بحضني ويجي يوم تعض اصابيعك ندم لان تنازلت عني
لو تفتر الدنيا كلها مراح تلكه وحده مثلي جانت مستعده تنطيك روحها جوه رجليك في سبيل راحتك وسعادتك
وهاااك نزعت الحلقه وشمرتها بوجهه
كفر البس حلقه لواحد مو رجال مثلك
نزلت اركض يله بدعه امشي
بديعه : يله امشي طلعنا من البيت وهيه حافيه اباوع عليها شون تبجي وتمسح بعيونها حييل دخلنا للبيت
اجو يركضون
عمشه : هااا يمه ابشري
خوله : عرس وماكو
عمشه : يبوووو طركاعه ولفت علينا عساهه بحضه وبخته السواهه يمه خوله ليش ساكته اصرخي عيطي كسري لا تسكتين
خوله : وين صالحه
ساهره : مو تدرين طالعه للسوك تشتري ملابس للجهال
عمشه : يااا هسه وكت صالحه شجرالج يمه
ذكرى : شكال اكرم احجي
عمشه : وروح ابيج الغاالي لا اهججهم من الدربونه كلها واهجم بيتهم ومااخلي اكرم يتهنى ساعه وحده خايبه هي تايهه وما وراهه زلم
خوله : اي تايهه وماكو زلم ولدج مابيهم حظ درب النسوان وبس
عمشه : سوده بوچهي البت ضاعت فرحتهه يمه خوله شرالج عيونج شارده هنا وهنا
خوله : وينها صالحه
سهاد : شتردين من صالحه من دخلتي لهسه صالحه وصالحه غير نفهم ليش لغه العرس
بديعه : مو وكتج سهاد
ذكرى : صافنين على خوله تروح وتجي وتصيح صالحه انداريت على ساهره حسيتها قلقه وممرتاحه وتفرك بيدها
ونحجي ويه خوله متجاوب لحد مطبت صالحه
صالحه : هاااا شبيكم شو واكفين كملتن حفافه لا وينها ام اسماعيل حتى تحفلي
خوله : اني شفت صالحه كدام عيني لو شفت احلامي وسعادتي الي انداست اليوم وسمعتي الراح تصير على كل لسان شون انعفت قبل حنتي بيوم واني بيه جن ومخبله جاان اركض على المطبخ فقدت كلشي كمت مااشوف
ذكرى : ركضت خوله للمطبخ وطلعت وبيدها سجينه مال لحم وركضت على صالحه ركضنا كلنا وعياطنا ماله والي
صالحه من الخوف ركضت وكعت على وجهه ونامت فوكاها خوله وتريد تذبحها
خوله : اليوم مااخليج عايشه كح.. باجر اصبحج بلنجف ياساقطه
عمشه : يبووو ولج يمه اتركيهه يبووو واتجر بخوله
ذكرى : لزمت ايدها حييل ملحكت جان تجرحها بكتفها حييل والدمايه ترست الدنيا
خوله : عوفوني اليوم اذبحهه هلكلبه بت الگلب مااخليها عايشه والله
بديعه : ابوس رجلج عوفيها راح تمووووووت
خوله : هو هذا الاريده تمووووت ساقطه هيج ادمريني فوك السحوره والاذيه ادمريني قبل عرسي
صالحه : الحكوني ااااااخ يمه لج ماسويت شى اني شعليه الله ياخذج وخررري مني
ساهره : ولج حقيره عوفيها وجرت خوله من شعرها جان تدفع خوله لساهره حييل وبسلجينه شخطت ايدها من طول للطول وعاطت ساهره من الخوف والدم
ذكرى : سحبناها كوه وضربتها على ايدها وبدعه تجر حييل بيها وتعيط وكعدت السجينه من ايدها تريد ترجع تلزمها دفعتها برجلي
وسحبت خوله اني وامها وبدعه من فوك صالحه ولزمت ايدها حييل ونمت فوكاها وعطت على بدعه تلزمها من رجلها هيه وسهاد حييل لزمنها وقربت وجهي من اذنها
وكمت اقرا ايه الكرسي بصوت عالي جانت خوله فاقده وتعيط اااااااااااااااه ولكم ليييييش متخاافون الله وينك ياالله مدتشوفهم ليششش هيج يصير بيه
انت مو قووي ليش متضربهم أذوني واني ما أذيتهم وتشهك وتعيط ليش انت مو مترضى الاذيه ذوله الشياطين دمروني ياااااااا الله سااااعدني وينك ليش تقبل الهم لييييش
شنو السويته بدنياتي واتعاقب هيج
ليش كلشي تنطيهم واني تاخذ مني ابسط شى لييييش
ذكرى : اقرا اياات بأذنها وابجي وكلنا نبجي ويااها ساهره سحبت صالحه من الكااع وطلعن يركضن من البيت
خوله : تعبت ياالله انت تدري شكد تعبت ترحم الناس كلها ومترحمني لييييش
ذكرى : استغفري ربج حبيبتي وكولي ياالله حرام هذا الحجي مالتج
خوله : لعد مو حرام الديصير بيه مووو حررام جاوبيني تروح الحقيره الصبح وتخرب عرسي انتظرت كل هاي الايام حتى تعرف شون تأذيني شافتني شكد مرتاحه وسعيده كالت شون ماانغص عليها انتظرت اهم يوم حتى اصير علج بحلك العاالم
إذتني وانتقمت لاخوها كوليلي منين اجيب حقي منيييين وذوله الغمان اخوتي كلهم جلاب صايرين لنسوانهم منو الي حتى الله تنازل عني
ذكرى : كمت من فوكاها واشرت للبنات يعوفوها سحبتها وحطيتها بحضني وامسد بشعرها واقرا اياات ودموعها مغركه صدري
حرام هذا الحجي ربج كريم وعظيم ورحيم وماتضيق اله ماتفرج هذا كله اختبار من رب العالمين يجوز اختبار صعب حتى يشوف قوه ايمانج وتحملج لتعيدين هذا الحجي الله سبحانه وتعالى ميتخلى عن عبده ابد هو اقرب الينا من حبل الوريد وكل الديصير واجهي بقوه تحملج اعرف تأذيتي بس ثقي بقدره الله وعظمته ماكو واحد ينام مظلوم ماينصره رب العالمين ولو بعد حين
خوله : اااااااااااااه ياقلبي شتتحمل بعد
ذكرى : ياعيني عليج حضنتها حيل وابجي على كسرتها
خوله : راح ذكرى عافني وكله منهن
عمشه : اليوم ابيس بيهن البرابيك مايردن للبيت عگب سوايتهن رفعت راسها وباوعت على امها
خوله : كله منج هذا الديصير برگبتج كسرتي وقهرتي وظلمي من وراج
عمشه : يمه انه شنهي السويته وهيج تحاجيني
خوله : كتلج الف مره بنات الگلب طلعيهن طلعيهن مجلبه بيهن لان فايداتج بسحورتجن انتي مثلهن مكيفه على هاي السالفه حتى هاي المكروده سحلتوها بسحورتجن انتي مثلهن متخافين الله
ذكرى : حطيت ايدي على حلكها كاافي فدوة اروحلج كاافي وكومي ويايه فوك
خوله : وخرت ايد ذكرى عوفيني اريد اطلع ضيم گلبي بيها كله منها تشوفني اتلوه كدامها ومجلبه بيهن هاااا ارتاحيتي صرتي علج بحلك النسوان عود سكتي نسوان منطقتج بنتج انعافت قبل العرس بيومين
وفرشت عرسها ملحكت تفرشها
ذكرى : كوومي تعالي بدعه ساعديني
صعدنا خوله لغرفتي نسحل بيها سحول
نومتها على فراشي
كمز يونس لحضنها
كوووم ماما عوف عمه بيها اوااا
خوله : عوفي سحبت يونس لحضني وحضنته وهو يبوس بخدي ويمسح بعيوني اباوع عليه ياريتني بعدني بعمرك ومااعرف شصاير بلدنيا ياريتني بعمرك ومااعيش العشته
بديعه : شراح نسوي هسه
ذكرى : شمدريني هاي صالحه دمها ترس الهول مدري ماتت
بديعه : عساها وابو زايد هاي شبيج هسه تروح لبيت كرابتهم وياخذوها يداوها هاي بزون بسبعة ارواح
ذكرى : الله يستر من الولد شراح يسوون من يعرفون
بديعه : وعبيد شراح يكول من يشوف مرته مدمايه
ذكرى : طبها ستين مرض
نامت خوله من البجي وحتى يونس نام وياها
نزلت لكيت عمتي تبجي عفتها لان مالي حيلها اعرف ورانا هوسه ثانيه بجية الولد
بقيت بلمطبخ اكمل الغدا ولو منو اله نفس بعد ياكل
طفيت الجدوره ورحت على ملابسها شلتهم وصحت سهاد تساعدني
سهاد : وين راح نوديهن
ذكرى : للبيتونه كلهن مااريدها تشوفهن
صعدناها ودموعي تنزل على فرحتها الراحت وامسح عيوني
لحد مرجعت ملابسها القديمه وشكو شى اشترته للعرس ضميته فوك
سمعت صووت طلعت من غرفة عمتي
لكيت فلاح وصمد ونجم يحجون ويه عمتي همه سمعو وراحو ركضو على اكرم
وكفت بلباب وين رايحين
صمد : وخري من عدنا اليوم احرك بيتهم عليهم
ذكرى : وليش همه
فلاح : ام يونس وخري واليرحم والديج
نجم : لتدخلين ذكرى
ذكرى : هم فضيحه وهم كتل ومكتول هو شعليه الولد تره هم تأذه العله بمرت اخوكم الراحت من الصبح وخربت كلشي
صمد : هاي هم احسابها بعدين
عمشه : تنحي من دربهم خليهم يهجمون البيت على روسهم جلاب لازم يعرفون بنات الوادم موش لعبه بيدهم
ذكرى : الولد كالو اله مرتك بيها جن ومو صاحيه شتردون يتزوجها ويكول عادي فتره ويروح تره الشغله جبيره مو سهله رحتو وعيطتو وضربتو والناس طلعت تسأل شنو السبب شراح تكولون الهم عاف اختنا قبل يوم الحنه لان بيها مس ومسحوره وجانت مو صاحيه قبل وحضرت جنابه هسه دره وميريد يتزوجها
صمد : شتحجين انتي وخري بابا
ذكرى : فكرو بيها وعوفو العصبيه هاي سمعتها وزحمه من الناس كولو مصار نصيب وانتهى وخلي يولي وبيكم زود طيحو حظ ذنيج هااي اذا مو اخوتكم عبيد وجوحي راح يجون هداده على خوله لان ضربت نسوانهم
نجم : خلي واحد يطخها والقران انسه همه اخوتي والدم بلدم
عمشه : تسودنتي يعمشه وليداتج تذابحو
فلاح : يمه متسكتين بله
صمد : شو بردتو امشي انطيح حظه لاكرم
نجم : خلي نتتظر اخوتك الكبار
ذكرى : طبك تكسي بلباب ونزل جوحي وعبيد والشرار طاير من عيونهم
عبيد : وينها الساقطه المنحطه اليوم اذبحها بيدي
نجم : ليش ومنو يخليك تلزمها مستحيت جاي هداد على اختك بعد سوايه مرتك
عبيد : انت مالك دخل واذا حجيت اكسر البيت على راسك
تلازمو اثنينهم جان تعيط عمشه
عمشه : بسگم عساني متت ومااشوفكم هيج اسمعووً عبيد وجوحي تاخذون نسوانكم وتولون مالكم عيشه هنا
عبيد : يمه كل عركه واطردينا فوك ما بتج العايله
عمشه : مرتك الحيه مو مثلها انه گله من ايدي جبت الچمر وحطيتهه بيها ومااريدن انجوي اخيتك انكسرت وگله من بنات غنيه
ومن اليوم مايضلن واطلعون بطرك ملابسكم گلشي ماالكم
جوحي : هاي فوك مااطيحين حظ بتج ضربت نسوانه بسجينه
عمشه : كصرت لو خاشتها بگلوبهن البرابيك اسمعو ذني مايدخلن لبيتي وانتم وياهن يله ولو
ذكرى : علت اصواتهم وكاام عبيد يضرب بلكرويته وكسر البوفيه الصغيره سحبه نجم وفلاح طلعوه بره
عمشه : گل وحده لغرفتها وانت صمد اركد هنا وعيف اختك نايمه بغرفتك
ذكرى : البيت هدأ بعد كل هاي المصايب جن ناار وگبت بيه
اني وبدعه وحده تباوع بوجهه الثانيه جان تكووول
بديعه : هااي حوبتج يذكرى والله حوبتج خلتهم طشارهم ماله والي
