 |
رواية الابواب الخمس الفصل السابع عشر بقلم ريام الهادي
ربي هيجي الدنيا تخنك
هالكثر متروسة ضيم
هيجي احس بروحي ضايع
كلشي اعرف بس غشيم
بين اخوتي وناسي عايش
ليش احس روحي يتيم
غنيه : انه اليوم اجيتج ولدارج ارد البنيات واخذ بت منج
عمشه : منهي
غنيه : انه اريدن خوله لجاسم يعمشه
عمشه : شنهي ولج بنيتي لجويسم كون
تسودنتي خايب اسگتي
غنيه : دهر صابج شبيهه يمه جاسم رجال اخو خيته وكريم وشاغول وشاري بتج
عمشه : اخذي بنياتج ولي لدارج مالج مره عندي ولا اريدن مره منج
غنيه : وحك الحسين يعمشه مارضيتي خوله لجاسم لا اخذهه غصب عنج وطگي راسج بلطوفه
عمشه : اله بلسحوره چا هذا دربج ودرب بنياتج تعلمني بيجن ماتگب عجاجه اله من بنيات غنيه
صالحه : عمه والله ممسوين شى هجولتينا احنا وجهالنا موزين مشتكيت على خوله ودخلتها السجن والله لو بس مشتكيه لا تاكل الها اقل شى ٣ سنين بلحبوس هااج شوفي جتفي تملخ ابر وعلاجات ومكعد اطيب
عمشه : خوثه خوله مابيها حظ ماعرفت تحط السجين بگلبج وتخلصنا من شرج
ساهره : شو متحمله حيل علينا عمه مجنتي هيج
عمشه : طگت مرارتي منچن ومن طلايبجن يابرابيك هيچ تهجمن عرس بنيتي وتگسرن بختها
غنيه : بتچ عملت الشين وكسرت ولدي لو نسيتي
ذكرى : ادخلو جوه تره صوتكم بلشارع
عمشه : اسگتي انتي ذني مايدخلن بيتي لون على جثتي
ذكرى : عمه ادخلو جوه تعاركو هوسو تعاالو تفضلو دخلو للهول وعمشه صايره نار
خوله : كاعده بلغرفه واسمع صوت بره شنو هاي الهوسه فتحت الشباك وكعد اسمع وصافنه عليهن ذني شيحجن تالي طبن للهول سديت الشباك وكفت على المرايه مشطت شعري وشلته وجريت الكحل بعيني الله شكد حلوة صارت خلي اطلع لذنب وطلعت
هله هاي منو اجانه
صالحه : ارتاحيتي هسه هدمتي بيت اخوتج
وهاي جهالنا متبهذلين رادت ايدي تسكط من وراج
غنيه : انتي خوله تعاالي
خوله : اجيت اتمشى بهدوء سحبتني وباستني من خدي وكالت
غنيه : شحلاتج چا شبي البخت مارضيتي بجاسم وصرتي جنتي يله ملحوكه گلها جم يوم وتصيرين اله واحطچ بعيوني
طكيتها بضحكه عاليه هههههه
ساهره : شكو هذا الضحك كدامج مسرحيه وتضحكين
غنيه : يايمه اترگيها عبن فرحانه
خوله : بربج خاله لو عندج بنيه تزوجيها لواحد مو رجال
غنيه : كضي لسانج يبت عمشه ولدي رجال ومن ظهر رجال والگل تشهدله
عمشه : ومريته الاوليه تشهدله عبن اخوانهه جسرو عظامه لولدج
خايبه بسچ لاتسمعج الوادم وتصدك جويسم رجال انه لو منج البسه فوطه واسرحه ويه خواته كرت عينج ثلث بنيات عندج انه لو منج اشرد بيه من البصره گلها عبن الكل تعرف بعاره
غنيه : يمدمغه نعلت الله عليج هيچ تحشمين بولدي انه امك يجاسم اليوم اطرج طر واكض لسانج واحشه عبن ماتستحين ومالج غير الاهانه
خوله : هوب هوب ميحتاج خاله تتعاركين ويه امي اني اصلاً مااقبل بجاسم
غنيه : انه غمه عبن گلت بت اخيتي وتشيلني بكبرتي واجيت من مجان بعيد وتعنيت
خوله : ليش انتي شلتي امي بصغرها حتى اشيلج بكبرج لو نسيتي شسويتي بيها
صالحه : جايه تفتحين دفاتر عتيكه مكفاج سگطتي اخويه لا عبالج عبرت عليه سوالف التبجبج مالتج ذيج المره ادري بيج كلش زين وكل الواكفين يدرون انتي لعبتي على اخويه وشربتي وخليتي
خوله : مو رجااال كوليها موووو رجاااااال
اعيط بعد لو سمعتيها
عمشه : غنيه اخذي بنياتج ومااريدن اشوف ركعت وجهج كفيت منج ومنهن وانه گلبي موجر عبن الصار كله وخراب بيتي ووليداتي منهن من اني وحديثه ماشفت منچ كل خير وهاي انه عجزت وشرج يحومي وراي چا وچافته عليه وبكل كباحه تردين خوله لولدج
انه لو چتال ابوي انطيه بتي عطيه وانتي ماانطيج اضفر منهه
غنيه : هيج الحجي يعمشه هاي تاليهه تلزميني الباب انه وبنياتي لا تفرحين عبن رادات ليه وغصب عنج وهااي حطيها جارج وافرحي بيهه عبن بارت (عنست) وماضل زلمه نفسه بيها الوادم كلها تسولف وتكول بت عمشه مخبوله وملبوسه واليتكرب عليها يموت
خوله : اي خاله عاشت ايدج اني وحده مخبله وبيه جن وابليس وشيطان وصايره عوائل يمي انتم شلكم دخل بيه يجوز اني اعنس وبرت على كولتج عادي مو غريبه هواي مثلي خو وره الحرب بالالاف ارامل ضالات وكاعدات وساكتات اويلي على الزلمه المشورب اذا ضل يم امه وماكو بنيه تقبل بيه والناس كلها تعرف بيه مو كدها هذا شتحطيله ويطيب اعرف بيج ما ميته عليه تعرفين محد ترضى بيه وكدام الناس لازم تخطبيله لهذا ماكو غيري هم تسدين حلوك الناس عود شوفو زوجته لابني وكلشي مابيه وهم تضمنين ماكو وحده تضوج بناتج بعد ويرجعن لبيتهن يلعبن شاطي باطي وهم حتى تردين لاختج الضربه ضربتين يعني بوش مايخطط مثلج
غنيه : من صخام السود وجهج هاي هيج انتي مسمومه وتنكطين سم عبن تربيه عمشه شترجى منها انه ولدي الف بت تتمنى تراب رجوله چا انتي وعشيرتج گلها تروح فدوة لترابه لاتهوبزين وادكين الصدر وترطنين ماتعرفيني بعدج يخوله انه لو احطج براسي اخلي ليلج من نهارج ماتعرفينه
خوله : اعرف خاله الحجاره الماتعجبك تفشخك وادري الكم الف درب ودرب ليش هو منو دمر حياتي غيرجن وانداريت على ساهره وصالحه وكلت بصوت عالي اخااف انتي متإكده اني ضيعت اخوكم وانتقمتي منه لتنسين انتي واختج دكيتن بابي بالاول ودمرتن حياتي وخليتني سنه ونص مااعرف اني وين ومنو ومكفاكم كملتوها قبل عرسي وهدمتو الحلم الوحيد الردت اعيشه
صالحه : يعني تعادلنا يخوله
خوله : لا عيني لا صرنا اثنين واحد
ساهره : شنو قصدج
خوله : ضربتوني مرتين واني مره بقت تطلبوني مره
ساهره : يعني تعترفين انتي السويتي لاخونه شى وخليتي عرسه ينگلب عزه
خوله : مااريحكم و اكول اي ولا اكول لا خليكم دايخين
المهم هسه اطلبوني ضربه بس هلمره يبنات خالتي ضربتي غير
صالحه : تهددين
خوله : وين كاعدين واهدد تره الي يهدد بس بوخه مابيه خير اني مااهدد اني انفذ اني بلفعل مو بلكلام
يمه
رجعي نسوان اخويه للبيت
عمشه : يااا صدك تحجين كل السونه بيج ويردن من گبور التلفهن ذني حيايه يمه چا ليش اكرب الحيه ليه ويلدغني واصيحن اااااخ
خوله : اي رجعيهن ولدج ميكدرون بليه نسوانهم والجهال مالهم ذنب خليهن يرجعن وكلمن تلزم غرفتها ورجلها
غنيه : خوش والله چا هاهيه ضلت بيد الغمان چاهيج يعمشه بتج تحكمج وهي اطشر عيالج وهي تردهم
خوله : اي واكملها الج اني بيدي اخلي بناتج عيشتهن زفره ويوميه بليه ومصيبه
غنيه : جنج بعدج ماتعرفيني يخوله انه غنيه عگب مااريدن شى يحضر يم رجولي والتندك بخلفتي وروح ابوي ادفنهه وهيه صاحيه
عمشه : بسچ انتي وياهه انه مالي جلمه وحدتجن ترادد وتفلفس وانه ضاله بمجانه عيوني تمايل بينجن هذا البيت بيتي وانه اردن الاريده وانه بنياتج مالهن مجان يمي عكب گل طلايبهن انه ضاله احمس برويحتي واغم گصتي لون سكتت وصارن جنايني ويوم ماتنفتح بوچهي واخلص من جهرتهن اردهن ليه اله انه جوه التراب وياگلني الدود
صالحه : وين نروح اني عندي جهال اثنين وساهره عدها واحد وحامل بلثاني
ذكرى : بلخير الله يكومج بلسلامه
عمشه : والغسل اسگتي يلفاهيه تبارك ليهه
ذكرى : غير حامل ياعمه
عمشه : وغمه خلفت الشينه چا امه ساهره شيطلع شيخ جامع
ساهره : شبيهه ساهره هسه صارت موخوش خلينا ساكتين عمه الستر حلو
عمشه : هاااج هاي الشگول توكف على المعده وتسوي چالي چا خلفتها شون انه مااريدن وحده منجن وليداتي يردون يو انه يو انتن واليريد مريته يلحكها ماالفي عكارب يمي
غنيه : هيج يعمشه
عمشه : لا ادشين عليه يغنيه وردي لدارج الجان اهم من اخيتج انه من زمان مالي مجان يمج واليوم بنياتج مالهن مجان يمي ويله اخذيهن ولي ضيجتو خلگي
صالحه : اروحلج فدوة عمه بقينا ومنسوي اي مشاكل والله غلطه وصارت ولوما خوله وسوايتها ولا اندك بيها
ساهره : عمه جوحي مايرضى نطلع منا يعني يطلكني اذا مرجعت
عمشه : يااا هيج واحد من ولدي يبرد گلبي احبنه من راسه وثاني يوم ازوجهه ست البنيات
غنيه : بسجن تذلن ارواحجن ماعاش وتنفس الهوا ويذل بنياتي امشينا وانه اعرفن اردج لهنا وراسجن مرفوع وهاي المسمومه اخليها تزحف زحوف وترطن بأسم جاسم
خوله : اوكفي خاله يمه رجعيهن
عمشه : خاب سگتي لااجسر سنونج
خوله : بروح ابويه رجعيهن وكافي مشاكل شوفي مرتضى شون مجلب بأمه ويباوع عليج ومهند هسه يجي من المدرسه يسأل عن امه اذا بيوم اختج ذبت لحمها بلشارع لتصيرين مثلها وذبين لحمج خليهن يرجعن وكل وحده تكعد وتسكت بغرفتها وتعرفين بولدج اذا جوحي ضل بليه ساهره عبيد مايترك صالحه لتنطين ابنج الهن
عمشه : خايب منين اجيبنك يابويه وتعاين عمشه شجرالها
خوله : هذا هو ارجعو
تقربت بهدوء وكعدت گبال خالتي وكتلها بصوت هادئ
بناتج رجعن بس قسم بالله واني هاي اول مره اقسم بيه اذا سويتي سحر اليه وزيتي بناتج عليه لا احركهن الج وهنه نايمات مخبله ومسحوره ماعليه عتب حتى حكم ميحكموني اذا ثبتو عقلي مو براسي اخاف الجبير اسكط اخليج بيدج ادفنين بناتج
جوزي مني وحيري بأبنج وشوفيله مره تتحمل سكاطه ولو جاسم اخر رجال بلدنيا مااتزوجه وياريت متجين بعد مامرحب بيج بهذا البيت
غنيه : ماشي يبت عمشه لاتندكين ببنياتي مااندك بيج وانتي يعمشه گضي وليداتج وحابي عليهم لون راحو منج مايردون
عمشه : خايبه ولي باط جبدي بط منچ ومن بنياتج لاتردين هنا هاي المره كعدتي وهوستي مره ثانيه بعتبت الباب ماتوكفين ولا هله بيج خذي شرج ولي
كامت غنيه مخنوكه وعيونها نار لبست العبا وباست بناتها وطلعت جان تكول امي
انتن صعدن لغرفجن يله
كون من طيحون بكبرين گبر الچ وگبر لاخيتج وفوخ گلبي منجن
خوله : شالن غراضهن ديصعدن لزمت صالحه من ايدها
وهمست قريب اذنها
اخاف عبالج ميته عليج وعلى جهالج ورجعتج لا ياام مهند رجعتج حتى يوم مااردلج انتي واختج السويتنه بيه مااتعب واتعنى للبصره كدام عيني
صالحه : متكدرين تسوين شى
خوله : الج مااكدر بس لجهالج اكدر تريد تلجم واحد الجمه بأحبابه لجمت الگلب
بلحباب تكسر الروح وتگصر العمر
وداعت كل دمعه نزلت من عيني لا ابجيجن دم واخليجن تكولن لو موليه وماضاله هنا يله اصعدن ودفعتها
صعدن وحده تباوع بوجهه الثانيه لكيت بدعه كاعده على الدرج
شو صافنه
بديعه : كويه والله يستر منج
ذكرى : عفيه صدك تأذيهن بجهالهن
خوله : شون سمعتن اذن فاره مو مثلجن
بديعه : اني مسمعت بس هسه من ذكرى حجت حسيت من تشاوريها راح اتذبين قنبله
خوله : خليهن خايفات دوم مني هيج اريدهن ماينامن مرتاحات ابد
عمشه :ارتاحيتي چاالمن شردتهن من البيت وصار اشهر ماردن عبن ترتاحين منهن وتالي ترديهن انه ماراضيه وسوايتج شينه ذني حريشي مايطبهن وانتن رديتيهن بكل گلب بارد
خوله : تعرفين جناينج اذا مايرجعن بلطيب يرجعن بسحر يخلنج تمشين وتبوسين بيهن وهاي اختج متكعد راحه اخاف تذبلي شى تخليني مخبله اخاف طار نص عقلي ذيج المره هاي المره يطير كله خليهن يمنه وجوه ايدنه احسن ما من بعيد يأذنه
ساهره ساهره
عمشه : شنهي نصي حسج
ساهره : هااا شتردين
خوله : كولي لرجلج ليتعب نفسه ويدور على الفلوس الفلوس طارن اخذتهن الحمامات للجنه خلي يتعب نفسه ويجمع غيرهن وهم تجي الطيور تاخذهن
ساهره : لطمت على صدرها لتكولين ذبيتيهن
خوله : لا حرامات ولو ردت اسويهن بس كلت انطيهن صدقه لروحج ولروحه حتى من تموتون تلكون من يقرالكم الفاتحه لان اكيد اني مااقراها الكم
ساهره : اذا مااجه جوحي وكتله
خوله : هههههه انت بت امج وكوليله رأسن اكوله كذب واخلي ذني يشهدن ويايه باوعت على ذكرى وبدعه وسهاد صافنه تشهدن ضدي لو ويايه
بديعه : وياج ياخيه هو منو ميريد روحه ويشهد عليج
خوله : وانتي سهاد
سهاد : مالي دخل لا شفت شى ولا سمعت ادخل لغرفتي ومالي دخل بيكم
خوله : شفتي يعني اطلعج جذابه
ساهره : ليش صحتيني مو كلتي كولي لرجلج
خوله : بس ردت اخبث واحرك گلبج ادري بيج لهسه متأمله يلكاهن ضلي اطحني تعرفين طارن الفلوس وراحن ومتكدرين تحجيله هسه انتي مثل بلاع الموس لا يكدر يبلعه ولا يطلعه
ساهره : شوكت نخلص منج شوووكت
خوله : مو ردت اخلصجن بس انتن مو وجهه نعمه ضاله على گلبجن
اني جعت الغدا كمل
ذكرى : يااا نسيت اطبك التمن
خوله : يله يمه لا تصفنين عليه امشي ارتاحي بغرفتج بين ميكملن الجناين الغدا
عمشه : اليالي علن الناصي وعضمن
وگبل بليس ناصحمن وعضمن
نلوم الچلب خرمشمن وعضمن
لوم ابنادم العض حته اخيه
خوله : اي اني صايره چلب واعض واخرمش ارتاحي يمه وامشينا ندخل
عمشه : لا يمه موش عليج على الدنيا الجزت بيه وضيعت تعبي وخلت وليداتي ناس تعض بناس
خوله : تخلص يمه مايضل شى على حاله
ذكرى : شفتي الصار
بديعه : من الاول وداعتج اني كلت راح تصير من الروس
ذكرى : تكول مو بيت ناس تهدد بناس
بديعه : كون مايلوحنا طشار منهم عسى ماناس تحرك ناس المهم منتأذى
ذكرى : اي والله خلي اروح اكمل الغدا
ذكرى : بيومها الهدوء جان رهيب بلبيت حتى الغدا منجمعو وكل واحد اكل بغرفته
جوحي وعبيد محجو اي شى ويه امهم
رجع مهند لغرفة امه جان مونسني ويه يونس
الجو بارد شهر الثاني اليوم عيد ميلاد ناي الاول ماعندي فلوس اسويلها اي شى تمنيت عندي واسويلها احلى ميلاد باوعت للمحبس البيدي كلت ابيعه واسويلها
طلعت من الغرفه لبدعه
بديعه : هااا خيرج
ذكرى : نروح للسوك
بديعه : شعجب شتردين
ذكرى : اريد ابيع محبسي
بديعه : ليش صاير شى
ذكرى : اريد اسوي كيكه لناي اليوم ميلادها وماعندي فلوس اسويلها
بديعه : وعلى شنو بايعه محبسج
ذكرى : كتلج ماعندي فلوس وحتى حليب خلصت لازم اشتري الها
بديعه : وصمد مابين
ذكرى : خلي مسوي فضل ماكو خليني مرتاحه منه
بديعه : شوفي عندي جم دينار نروح نجيب الطحين والبيض والزبد والكاكاو ونسوي الكيكه هنا وعدنا طوز شربت وجم نفاخه يصير احلى عيد الها
ذكرى : شنو ذنبج ياعيني خليهن لبتج وهم اريد حليب الها ميفيد ابيع المحبس احسن
بديعه : يمعوده دصبري
نزلت اركض على خوله فتحت الباب
لكيتها مغطيه راسها وخرت الغطا
خوله : وجع شكو
بديعه : بس تعرفين تحضنين بناي وتبوسين انتي مو عمتها
خوله : شرايده شكوو
بديعه : اليوم عيد ميلادها الاول واحنا مفلسين نريد نسويها عيد وذكرى تريد تبيع محبسها
خوله : وشنو المطلوب مني
بديعه : تشرفين على الحفل وتتعاركين ويه صالحه وساهره وتخربين الميلاد
خوله : صاير دمج خفيف يول
بديعه : غير نريد فلوس واكيد عندج عمشه متخليج خاليه
خوله : شكد تردن
بديعه : خير ومامدت ايده بكيفج
خوله : افتحي الكنتور جزداني جوه الملابس اخذي اشتري كلشي تحتاجي ورجعي
بديعه : يمه فدوة للحنينه
خوله : بله لواكه
بديعه : هااا ونريد حليب الها
خوله : اشتري اي شى لناي الجن ماكو مامسموح لناي اخذو كلشي ورجعي الباقي
بديعه : مو من عيني رايده شى
خوله : لا ممحتاجه اي شى
بديعه : ليش متجين ويانه للسوك تغيرين جو احسن مامخلصتها نايمه
خوله : مابيه حيل روحن انتن
وسدي الباب وراج
ذكرى : صعدت بدعه والضحكه تارسه وجهه وين رحتي
بديعه : جبت فلوس واجيت
ذكرى : لج خاف عيب
بديعه : غير عمتها قابل من الشارع تعالي ويايه للسوك نشتري كلشي
ذكرى : لو بايعه المحبس احسن اخاف هوايه يصير
بديعه : هي كالت اي شى لناي اشترو يمعوده امشي شويه وتظلم
ذكرى : والجهال وين نخليهم
بديعه : شلت ناي ولزمت يونس وبان ونزلت فتحت الباب على خوله نايمه على بطنها ومخليه المخده على راسها
خوله : شكووو يمعوده
بديعه : حطيت ناي على ظهرها وعفت يونس وبان يمها وكتلها امانه ذوله يمج وسديت الباب وركضت لزمت ذكرى واسمع عياط خوله اذا تأخرتن اشمرهم بلشارع
ذكرى : هههههه والله عليج سوالف
ذكرى : خليها مخلصتها اكل ونوم
بدينا نفتر ونشتري غراض الكيك وحليب والتزيين واخذت طوز شربت رمان وشربت برتقال لكيت بدله حلوة على كد ناي وملابس ليونس
اكولج تره هواي صرفنا خلي ابيع المحبس ونرجع فلوسها خاف عيب
بديعه : بله متسكتين مالج دخل متحجي والله
ذكرى : دنمشي بلسوك شفت جيرانه القداما بذيج المنطقه بوستني مره جبيره اكبر من امي وضلت تسألني عن اهلي واكول بخير وزينين والغصه بگلبي
جان تكول
يمه ذكرى ليش هيج مملوصه صايره وجوه عيونج طامسه جنتي جنج العافيه شحلاتج
بديعه : هذا الزواج خاله غير اكبر وحده
هاي مرت حماج
ذكرى : اي ومثل اختي
الله يجعلجن يمه
وصيتي الج تمسكي بصلاتج وقرايتج للقرأن
ذكرى : وهاي شلها دخل بشكلي
يمه المتعوب مايرتاح اله مايتقرب لربه
ذكرى : ان شاء الله خاله
وامسحي مكانج بمي وملح خشن
ذكرى : ملح خشن
اي بنيتي واخذي رشه بسيطه بأركان مكانج واقري عليه المعوذات ٣ مرات الفلق والناس وسبع مرات ايه الكرسي وكت العصر لازم قبل المغرب
وحصني نفسج بالاستغفار والتسبيح وانطي صدقه حتى اذا ماعندج وحالتج ضعيفه تصدقي بكرصت خبز بتمر اي شى الصدقة تدفع بلاوي يمه وتحصن النفس والله يبعد عنج شر بني ادم محروسة بنيتي
ذكرى : امين خاله الله يحفظج مع السلامة
بديعه : مبينه خوش مره
ذكرى : اي جانت بمنطقتنا القديمه مره كلش خيره والكل تحلف براسها يله خلي اشتري بدربي ملح خشن شو عجبتني السالفه
بديعه : نشتري شعدنا
خوله : وخرت المخده درت راسي لكيت ناي تضحك بوجهي وتلزم شعري وتجره وجهه يخليني اضحك حتى لو ضايجه باوعت على الصفحه الثانيه يونس وبان واكفين خايفين مني لان عطت
تعاالو بحضني ضحكت بوجهم واجوي ركض يضحكون
بقيت العب وياهم وناي ابوس بيها وتضحك من گلبها انفتحت الباب ومد راسه مرتضى
مرتضى : عمه خلي اجي يمكم
خوله : باوعت عليه واشرت بيدي تعاال
اجه يركض ولزم ناي دك بوس
من هسه تحب البوس من تگبر شون
بقيت الهي نفسي واضحك على ضحكتهم طلعت مكعبات عندي ضامتهم امي مره لكتهم بلعتيك وغسلتهم وانطتني العب بيهم وضميتهم فرشتهن بلكاع والعب وياهم
لحد مسمعت بدعه وذكرى رجعن مدت راسها بدعه
بديعه : قبل متعيطين صرفنا نص فلوسج
خوله : على شنو صرفتوها
بديعه : عددت الها المشتريات
خوله : ليش مشتريتي شى لبان
بديعه : عدها خير من الله دايمه من احتاج اجي ادك اليتيمه يمج واخذ
خوله : خوش درب لكيتيلج
بديعه : چا غير عمتهم
خوله : وين ذكرى
بديعه : بلمطبخ تسوي الكيك
ذكرى : فرحانه واني اسوي كيكه بنتي واجت بديعه تساعدني جان تطلع سهاد
سهاد : هاي شسوون
بديعه : اليوم ميلاد ناي
سهاد : جيبو اني اسوي الكيكه خوش اسوي
بديعه : اخاف تخربيها
سهاد : هاي شبيج بدعه والله مااخربها اسوي كيك يخبل وهش
بديعه : اذا خربت تجيبين وحده جاهزه لو بيش متكون متعرفين شون حصلنا هاي المواد
سهاد : هاي فوك مااساعدكم والله الكيك مالتي ابويه يموت عليه
ذكرى : تعالي ياريت اني مو قويه حيل بلكيك
وكعدت سهاد تسوي واحنا نساعدها جانت حركتها ماهره وسوت التزيين الكريم مال الكيك وحشتها وزينتها طلعت صدك فنانه واحنا مندري
بديعه : هم بيج بله
سهاد : شعبالج بس غير هذا البيت ميسوي واهس شونها
ذكرى : عااشت ايدج والله تخبل يوم مانردها الج بنفاسج
سهاد : امين يله حضرن الشربت والنفاخ
بديعه : نصيح الاخوات الشريرات
ذكرى : هههههه لازم عيب اذا منصيحهن
سهاد : وابوها ميجي
ذكرى : هو وينه ابوها يمكن حتى عمرها ميعرفه
بديعه : البركه بينا هسه الجهال يگلبون البيت الها
ذكرى : اسبحها وابدل الها وانزلها
بديعه : يله استعجلي
اخذت ناي من خوله وتشكرت منها على الفلوس
شكراً مقصرتي بس يصير عندي ارجعهن
خوله : ذني هديه ناي مني مو الج حتى ترجعيها
ذكرى : مشكوره اخذت الجهال وبدلت الهم واني سبحت ولبست دشداشه نظيفه
ونزلت لكيت نجم كاعد وفلاح وجوحي والكل حتى عمتي مبين بدعه لمتهم الا ابوها ماكو
عمشه : يااا صلوات گبرت البت
انه مااعرفن هاي السوالف عبن ماسويناهه گبل وهاي سوالفجن مال تقشمر
خوله : بس حلووه يمه موو احجي لتستحين غير عيونج نطت على الكيكه
عمشه : چا غير جيعانه
خوله : ههههه والله مو جوعانه
عمشه : اطكج بلنعال بسچ
خوله : ههههه يمعوده گصي الكيكه امي راح تكتلني
نجم : الله يحفظها الج لعد صمد وينه
سهاد : يجوز ميعرف بعيد ميلادها
ذكرى : انتم موجودين البركه بيكم
صالحه : مالها داعي هسه مو جهالنا ماسوينا مثلج قبل شهرين جان عيد ميلاد سما كلشي ماسويت
خوله : احد گلج لتسوين لو تخافين تصرفين
ساهره : ولا اي واحد من جهالنا سوينا
خوله : اي مو جوحي راح يذب الدنانير بحضنج ويكولج سوي لابني عشر طوابق كيك متسكتين
جوحي : وتالي وياج شحجيتي وكلتي جوحي ماخذ منج
خوله : هزيت حواجبي بشماته لا اني ماخذه منك
جوحي : شنوو شكلتي
عمشه : يايمه يله گصوها وانتي يمدهربه بسج يمه اخيتك تضحك وياك لاتاخذ جلمتها راس مال ولجن يله لا اعتراض على عطيتك ربي
خوله : اضحك بوجهه جوحي الجان وجهه يگلب الوان وساهره اصفر وجهه
ذكرى : واكفه وشايله ناي والكل يصفك الها وهي تركص بيدي لابسه البدله البيضه ويونس بصفي كلها واكفه وتصفك وتضحك اله ابوها ماله وجود طفينا شمعتها الاولى
بستها من راسها وايدها يارب حظج احسن من حظ امج
كصينا الكل وزعت للكل وزعت بدعه الشربت نجم حط بيدها فلوس وباس راسها
نجم : ماادري اليوم عيد ميلادها جان جبت الها هديه
ذكرى : كعدتكم ويانه كافيه يوم ميصير عندك مثلها وتفرح بيها
نجم : الله كريم
عبيد : وهاي مني
خوله : لا لا اكيد القيامه راح تگوم ولكم كرصوني
بديعه : خيه اسكتي الله هاديهم
عمشه : وهااي مني واذا عوزت مصرف للبيت اخذهن منج
ذكرى : ههههه كدامج عمه كلهن
خوله : اني انطيت ماانطي بعد
بديعه : هاي مني ومن فلاح
فلاح : الله يحفظها الج
جان فلاح حييل ضايج مااعرف السبب كل ميباوع على جهالي وعليه يهز راسه
خوله : بقى ابو الكرم كله جوحي هز جيبك
جوحي : منيلي ماعندي هي كيكه وكلتونا قابل ذابحين وهبيط ماكلين حتى انطي
خوله : والله لو منطي يمكن ادج روحي سجينه حتى بس اصدك انت انطيت لان الكرصه والعضه متفيد مثل سجينتج صالحه نفس الدچه
صالحه : انكسرت ايدج من حطيتيها عليه
خوله : والله يمكن هاي الحسنه الوحيده السويتها بحياتي وهاااا لا نسيت اكو حسنه ثانيه موو ساهره
ساهره : اني صاعده فوك تجي
جوحي : اي اريد انام من وكت ورايه شغل
خوله : يقويك الله ياخويه لمهن مااوصيك
جوحي : هاي بتج فد يوم افصم راسها عن جسمها
عمشه : اخذ مريتك ولا تهذري وبسگ ملاسن وانتم كل واحد لغرفته يله ورانا شغل من الفجر لا تشلعون گلبي بكعدتكم
ذكرى : نظفت المكان اني فرحانه كملت كلشي والفلوس كلت اشتري بعد حليب بيهن واضمهن حتى مااحتاج نمت وجهالي بحضني وابوهم لا حس ولا نفس
مر شهر كامل وكلمن حاير بعيشته الولد وعمتي على الشغل واني بجهالي
انفتحت باب الغرفه وطب صمد استغربت جيته لدرجه حسيته غريب وطب عليه جنت كاعده بلكاع اصفط ملابس
صمد : شونج
ذكرى : الْحٍمَدٍ للـّہ ودرت وجهي
صمد : اكو مره تستقبل رجلها هيج
ذكرى : هو وينه رجلها
صمد : مسألتي ميت عايش
ذكرى : انداريت عليه وكتله افتر عليك بلشوارع سألت مره عنك فلاح وكال زين يم صاحبه
صمد : ويجوز يم مرتي الثانيه
ذكرى : رغم مااحبه بس صعب احس رجلي عنده غيري اني شاكه ومرات احساسي يأكدلي بس مو مثل مايكولها بوجهي
جريت نفس بضوجه وكلت شسوي سوي
اجه وجرني حييل كومني من الكاااع
صمد : انتي شنو من مره لا تحسين لا تغارين ثلج لو متزوج خشبه هم تحس بيه صار شكد عايفج كلت بس ارجع تركض اليه وتحسسني بشوگها تالي وجهه البومه حتى ضحكه ماكو تكول عدوها مو رجلها غيرج مره تركض ركض اله وتبجي لان مشتاقتله
ذكرى : دفعت ايده مني وكتله ليش انطيتني مجال احبك واحسك واتعلق بيك انت لو مخلصها بره لو تاخذ حاجتك وتنطيني ظهرك حجايه مثل الناس عدله ماعندك ويايه واذا اكعد واسولف وياك تعيط وتكول تعبان عوفيني انام شكد حاولت اتقرب منك وانت تدفرني حرت شسويت حتى افهمك وما فهمتك سنين واكول ميخالف يجي يوم ويعدل وياج وتالي طلعت متزوج عليه وخلص راحتك ونستك وياها
صمد : غير من وراج من وره برودج واهمالج اني رجال ادور ونس وراحه وياج كلهن ماكو
ذكرى : لتقشمر نفسك وتحط لروحك اعذار انت اتزوجتها وره كم شهر من زواجنا يعني انطيتها كل الحب والاهتمام الجان المفروض هو اليه مو الها وعفتك وهجيت بروحي وبجهالي وتالي مدري. شخبلني ورجعني الك وياريت قدرت هذا الشى هلمره كمت تضربني وضيعت اهلي مني ونكروني بسببك بعد ياحنان واحساس ادوره مني تريد تزرع عاكول وتحصد
ورد جوري
صمد : انتي مايفيد وياج شكد احاول اكون وياج زين واجر عدل تعوجين ويايه
ذكرى : شوف صمد اذا جاي ادور عركه وهوسه حتى تطلع من البيت وتغيب اشهر ثانيه من هسه لتعب نفسك ولطلع صوتك روح الله وياك ولطني بنعالك اذا حاسبتك او كلت وينك
صار اشهر عفتني وعفت جهالك ومتعرف ناكل نشرب انطردنا بعدنا بيتك تمرضو جهالك لو صاحين لتجي هسه تمثل عليه انت مشتاق وجاي طاير علينا هذوله جهالك شوفهم عايشين وربك ميكطع والشهاده لله اختك وامك ممقصرات يعني تريد تروح روح والگلب داعيلك لتجي هسه تهوس وتعيط وتضربني وتخليني شماته بحلك الجناين
صمد : مااحجي واوجع راسي وياج وحده بليه احساس مو مره حجاره ولي مني
ذكرى : دفعني وطلع
كعدت ابجي ياربي شوكت اخلص من ضيمي شوكت
كمت مااحجي ولا اتناقش وياه شيريد اكوله اي وبيوم تذكرت سالفه الملح
دورت عليه لكيته بلكنتور لزمته وقسمته نصين نص احطه بلمي وامسح بيه ونص ارشه بالاركان مقري عليه
كمت يوميه قبل المغرب امسح غرفتي وارش بالاركان شوي شوي كمت احس بهدوء وراحه حتى نومتي اختلفت ماانام اله السبحه بيدي واسبح لحد مااغفى واتعب وانام
صمد ينام يمي بس اي شى ميسوي هجرني ويمكن هذا الشى حالياً احسن الي واله لان اثنينا ماله نفس بعض
قررت امسح البيت كله مو بس غرفتي بالاول اتفقت ويه بديعه تجيب ملح زايد واضمه مدري شجاني وقررت هيج يمكن لان حسيت بأختلاف بنفسي كلت عسى ولعل الكل يحسون مثلي
وقبل المغرب اقرا قران لو الف شغله عندي اتركها
جنت امسح العصر غرفه عمتي وخوله متمدده طفرت من مكانها
خوله : شكعد تسووين
ذكرى : امسح ليش
خوله : اختنكت خاله شى بلمي
ذكرى : هااا لا مخاله
خوله : اطلعي بره لتمسحين
ذكرى : هاي شبيج خوله
خوله : كتلج اطلعي بره واياج تمسحين الغرفه اني انظفها
طلعت من الغرفه اجت بدعه شبيهه خوله تعيط
ذكرى : جنت امسح وعاطت
بديعه : اخاف السبب بلملح
ذكرى : هو ملح قابل شيسوي
بديعه : لتنسين قبل شويه رشيتي اركان الغرفه
ذكرى : لتخوفيني يعني شنوو
بديعه : يعني البيها ديختنك من القران مو خوله
ذكرى : يمه الرحمن اسكتي يمعوده هو ناقصني خووف
صالحه : شدسوون
ذكرى : بسم الله الرحمن الرحيم فززتيني جان تجي بصفي وكاالت
صالحه : ابتعدي عن هاي السوالف ذكرى ولتجنين على نفسج
ذكرى : شكوو
صالحه : كتلج ابتعدي ولتعاندين
ذكرى : عافتني ومشت هااي شبيهه
بديعه : والله ذني يخوفن وسالفه الملح مبين كعد تسوي شى بيهن كل شوي وحده كامزه
ذكرى : باجر نروح اني وياج
بديعه : وين
ذكرى : للمره الشفناها بلسوك اروح الها للبيت هي الوحيده الراح تلكالي حل بهذا البيت الكله سحوره
بديعه : لتلعبين بلنار خيه
ذكرى : ماطول ماعندي مكان اروح اله غير هذا البيت لازم انظفه من مصايب ذني
بديعه : مراح يرحمنج ذكرى
ذكرى : رايحه باجر يعني رايحه
