رواية أرض الخناجر الفصل العشرون بقلم ايلول
اذكر يوم الودعته بچيت
لهسه باقي بگلبي لچمه
ما ابين ضعفي الاحد
الكارثة انهاريت يمه
جاي تنعاد المشاهد
وين ما صحتلي ظلمة
══━━━━✥◈✥━━━━══
ريـــمه :: فاتحه عيني بصدمة، باب الحوش مفتوح شويه، واعاين صــيهد ووهب واكفين، صــيهد كاض وهـــب من أيده يتنصتون على سلطان وطرواده، راحت روحـــي من ركضوا أثنينهم وكب صياحهم ركضت للبيت اصيح لسليم وسجاد وهمّه صوتهم عله ركضوا الولد وامي وياهم ركضت خايفه عليهم سلطان ساكت وطرواده يدافعله ضامه بظهره ووهب وصيهد متسودنين يردون ياكلون سلطان بسنونهم
وهـــب :: عذبتهاا ولك عذاب اختي من وراك اذا انتَ مو زلمه ومو گد حجاااايتك ليش سويت بيها هيج لييشش؟
وصيهد من بينهم جرّ سلطان يطكه ووهب وياه، والولد بنصهم تمالخوا، روحـــي راحت كلها التمت بس يردون يحيزون بينهم وامي تصرخ، ســليم وسجاد تسودنوا من صــيهد ووهب طكوا سلطان هدوا عليهم يغلطون، وطرواده وميثم وبريا صايرين بنصهم،
عيني راحت على هاسكي يفتر داير ماداير طــروادة وبس يتمالخون يعض طــروادة من هدومه يجر بيه لو يصير بنصهم بس ما يعضهم،صاح ســليم يرجف وبريا كاضه
ســليم:: وخرررر ، حاسبوا أبوكم وجدكم حچايه ما تحجون وي سلطااان.
وصيهد يهد وميثم يصده يتراجفون.
صــيهد:: خرب روح جد جدددك ابن النعااال عليمن تصيح ولك خايس ابن الخايس هو لو زلمه چا اجه وگالي .
سجاد :: يييله على اساس انتَ تتفاهم ويجي يكلك عليمن شايف روحك انتَ اختك وببيتك بيش طالبين سلطان بعد.
وهد وهـــب على سجاد يطكه وعبود يدفع وهب متسودن، صريخ امي جاب الدنيا واجوا اجدادي كلهم وام صيهد تركض،ممالخ صارت بباب الحوش
طــروادة :: صــيهد احاااجيك احاجيك امشي.
صــيهد :: وخرررر واكف ويااه خايس واكف وياااه.
ميته من الخوف اعاينلهم وارجف جدي يغلط وعمي يغلط وبدل ما يهدونهم طردوا سلطان صاح ابوي
شاكر:: بويه وين يروح؟ للمعامل ينكتل.
وجدي بعصبيه يدك عوجيته بالگاع صاح
شعلان:: للمرعى غاد يضل حاله حالّ الرعيان
وشال ايده يهزها ويصيح
- انااا اليطلع من شوري اضيعنه، يعاندني سلطان ظهره اكسره.
وطرواده مد ايده يصيح على جدي وميثم بس يريده يسكت
طــروادة :: شو ما تعارف تحجي انتَ؟ سلطان لو معاندك جا صار براسه حظ لو معاندك جا ماضل ملوع، شترريد تخرب بينه وبين الولد هاك يله ارتاااح ارتاح.
وجدي وابوي وعمي تسودنوا عافوا الولد وداروا على طــروادة يصيحون عليه وجدي يريد يطكه ابوي يهادد ويصيح
شاكر:: احنه بيناتنا انتَ مالك غرض لا تحط روحك بينهم.
شعلان:: حاسب روحك حالك حالهم انتَ ؟ شو اطنه عرض اجتافك، انا غير ما فارغلك الا اخنگنك خنك.
وهوه يعاين عليهم بغضب والولد كل واحد بصفحة سليم حاير بسلطان وولد عمي وليد بعدهم يتهاددون
وليد :: امشي طــروادة رد البيتك ومالك غرض بولدي بالينه بلوه انتَ نطردك وتردّ علينه؟
عيني صارت بعينه مصدوم حاجاه سلطان ومارد عليه هاسكي يفتر داير مادايره، دار وجهه يمشي البيتهم وهاسكي وياه، سلطان يصيح عليه وهوه مايرد صاحت امي على ام صــيهد
ميلاد:: كضييي ولدج وربي بناتج اليتمعشگن الساقطات يسون المصيبه وضمن روسهن
واخواني كبوا وياها يتصاايحون ما راضين بحجيها وصيهد تسودن يريد بس يوصلها
صــيهد:: ياهي التتمعشگ؟ بت النعااال عليمن جاي
تحجين؟
وكب صياحهم للضالين، الولد تسودنوا شلون صــيهد يغلط على امي، سلطان من طكوه وهـــب وصيهد ما شال ايده عليهم بس من صــيهد غلّط تخبل وتعارك وياه.
ام صــيهد جر جرت صــيهد وهوه السانه يرشّ بالغلط، انه روحـــي رايحه وهاجر مجلبه بأيدي تبجي ومرة سلطان من يم باب المطبخ تاكل ليمون وتحجي
الاء::هاه ماسكتوا؟
درت عليها اغمها ورجعت أعاين عليهم أبوي وجدي شسووا بسلطان ومرتضى وياهم ، گالوله هسه تروح للمرعى، طب للبيت وجهه مدمه ركضتله هاجر تبجي شالها يحجي وياها وطب للمطبخ مشيت وراهم گالها
سلطان:: لا تبجين هجوره.
شالت أيدها تأشر على گلبها رفع عينه يسألني گتله
-تكلك اشتاقلك من تروح للمرعى واخافن عليك.
ابتسم نزلها وكعد بالگاع على اركبه صار انصه منها كاض أديها اثنينهن
سلطان:: اخلي ســليم يجيبج عليّ اذا بطيت غاد، بس صيري سباعية ولا تبجين.
الاء:: وألله عياره .
شال راسه سلطان خازرها وكام غسل وجهه يحجي بقمة الهدوء گال المرته
-حطيلي چم لبسه بالجنطه.
مسحت على بطنها تگله
-مابيه حيل اصعد الفرخ بس يحوس.
هز رأسه خوش ومشه هوه صعد الغرفته شالت ايدها تغمه كالبه خلقتها خزرتها محروك گـــلبي
ريمه ::على يوم اكسر ايدج هاي، غمي سلطان مره الثانية وشوفيني.
الاء:: ياهي مالتج رجلي بكيفي اغمه اتفل عليه، انتِ تاكلين تبن وتسدين حلگج.
مشيت عليها گبل گالت
- احجي الابوج من بنصاص الليالي كضج سلطان وي طــروادة؟
فتحت عيني بصدمه وبلعت ريك مرتبكه وهيه تتمضحك رافعه حاجبها گالت بهمس
الاء:: واسولفلهم شلون اخذتي رنـــه ورحتي للگيعان؟ اعرف السالفة كلها.
أعاين بوجها مصدومه وگلبي يدك حيل رديت بنتر حتى انكر
-شجاي تحجين انتِ شو تمسلتين ؟ يا گيعان ؟ ومنو الطالع من البيت؟
ضحكت ضحكه طويله وحطت ايدها على زندي كاضتني بقوة
الاء:: همزين سلطان حچالي السالفة كلها، ضلي ضلي مسويه روحج فقيرة.
مشت من كدامي وانه من الصدمه بس فاتحه عيني، طب سجاد مسحت وجهي صاح
- وين سلطان.
عاينت الوجهه مرتبكه وساكته وهوه اعصاب نتر
سجاد:: ما تحجييين؟
-بغرفته راح يجيب هدومه.
وسليم يتعارك وي امي وابوي ومرتضى بالحوش، نزل سلطان طلع وي ســليم امي حاجته وابوي يكلها
-خيولي هالچلب جعله مارد.
وكفت ابوي ضد اخواني بس حتى يرضي جدي تقهرني، طرد سلطان وراحوا الجدي هوه ومرتضى.
""""
رنـــه :: عفراء رادت تروح بس من شافت طــروادة رد مقهور، گالت ما اروحن وطبت للغرفة تخابر منذر مشيت وراها فاتحه السماعه تسفط بهدوم حسين وزهره وتحجي وياه گالتله
عــفراء:: اضلن يمهم اليوم والله لو اجيت يضل بالي هناه واشلع گلبك.
منذر:: وانا شلون بيه ليلي اكضيه اتگلب ما انامن اذا ما اشبگج .
حطيت ايدي على حلكي اضــحك وهيه ماتدري بيه وراها تحجي وياه بخجل
عــفراء::تعال بات يمنه.
-شبيه مسودن، انا من اجي اخذج طــروادة يگلي لا تعاينلها گدامي.
-ههههه فـــدوه اروحن الغيرته.
-جا وانا شنو ذنبي ولج،والنوب شني هاي جديدة يوميه بايته عدّ أهلج؟ الشهر اليجي ما الج اجازه ما ترحيلهم.
-عود الله كريم مناه لشهر اليجي تجيبنه تجيبنه انتَ رجال كريم وانه استاهل.
-هههههه اضحكي عليّ بحجاياتج الحلوات، يله حبيبتي باجر اجي عليج
- ان شاءالله.
رنـــه :: بس سدت التلفون والتفتت لگتني وراها اضــحك مشيت كعدت كدامها اغمز، طكتني على ايدي خدودها صايرات شكدهن وبس تبتسم يصيرن جنهن طوبه، گالت
عــفراء:: ما طلع طــروادة ؟
-لا، اكلج هسه يطلعون الچلاب كايليله شي يقهره انعل والديهم.
عاينتلي بطرف عينها سكتت وهيه كملت هدوم حسين وزهره عاينت البطنها اسأل
-عفره شتكولين ببطنج بنيه لو ولد؟
-ولج بنيه شفتها، نسيت اكلج والله.
-الله والله تخلينها تبات عدي جم يوم.
احجي وهيه تضحك گالت
عفراء:: مرة سلطان بيها ولد وامها كلساع تجي العمتي عود تريد تضوجني ما تدري بيه انه مخلصه ليلي ادعي ربي يرزقني بنيه.
-خيولن مالج شغل بيهن.
جاي نحجي وطلع طــروادة من غرفته كمنه اثنينا مبدل ومخلي التفكه بجتفه گالتله عفراء
-ها خويه وين رايح؟
زفر نفس بحسره يعاين بوجهنه
طــروادة :: للگيعان، نامن انتن ليش سهرانات.
عــفراء:: عليمن مقهور جدي محاجيك شي؟
هز راسه لا وحسرته تهد الحيل طلع رايح للگيعان وعفراء تعاين وراه، ردينه لفراشنه وهيه بس تتحسر وكلساع تطلع للحوش تعاين بلكن يرد بالها يم طرواه ولا ارتاحت، نمت والصبح فزيت من الحر زهكانه روحـــي، طافيه الكهرباء والغرفه صايره تشوي شوي، حسين وزهره يتگلوب واحد واصل يم باب الغرفة وواحد عابر الحدود طاك بالحايط.
جريتلي هدوم وكمت كوه فاتحه عيني طلعت من الغرفة شلت ايدي العفراء من لكيتها بالمطبخ تسوي ريوك
-صباح الخير.
عــفراء:: صباح النور، عمي شهالنوم اكعدي شوفيني داريني غير خطار عدج.
تحجي وتضحك حكيت شعري
رنـــه :: هو انه اتاني من تجين حتى انتِ تداريني.
ضحكت عفتها ورحت للحمام اسبح دكت علي الباب
-بساع خلصي وتعاي يمنه، كاعدين يم صخلتج وارانبج نتريك.
-جا اريدن اصلي تانوا لا تتريكون هسه.
-ولج الفجر كعدتج وصلينه سوه.
-صدك؟ شو ما اذكر
-وعلي صليتي النوب كلتي جوعانه وسويتيلج لفة طماطه وخضره اكلتيها وغسلتي ورديتي نمتي.
-صخام ولا ادري بروحي.
سبحت بساع عفت شعري مفتوح مبلل، وخليت عليه الشال مفتوح، طلعت للحوش ادور عليهم كاعدين بالحديقة جوه ظل شجرة الرمان وشجرة النارنج على بساط احمر ، دجاجاتي يفترن يمهم والأرانب على صفحة، وطرواده جايب وياه حشيش من الگيعان منطي للصخله، البلبل واكف على جتفه، وطيور الحب بالقفص صوتهن تارس الحوش.
الصينية گدامهم بيها بيض وبيض وطماطه وقوري الچاي والشكر بصفهم، شال راسه طــروادة بس شافني عاين مناه ومناه مشيت يمه مبتسمه
-صباح الخير.
طــروادة::صباح النور، اليوم حاله الشعر والشيله مشمره شني؟
تربعت يم الصينيه
-بحوشنه ياهو يشوفني.
شرب چاي يضحك، اكلت وياهم واحمد ربي واشكره لان نسى سالفتي بيوم العركه من عاينت عليهم، سألته عفراء
عــفراء:: اكلك شني بيت جدي تصالحوا وي بيت غانم؟
-ما ادري شو بالعركه وهدوا ويانه، النوب تصوّب حمزة ابن علي، هسه جدج من الصبح اخذله ضبت فلوس وراح هوه وعمامج.
رنـــه :: اكلك هوه غانم يصير ابن عم شعلان اللح؟
-اي.
-جا ليش چانوا متعاركين.
عاين العفراء وشرب چاي وانه اعاين ليمت يحجي گالت عفراء
عــفراء:: من زمان چانوا يتعاركون، گبل بالين الوادم بلوه همه وحدهم سلف وفن واحد يفك حلكه وياهم ياكلونه، لمن صارت سالفة، تخاربوا، بعد ما تصافوا اخذولهم عشر سنين متعاركين النوب تصالحوا ماكو سنه وردوا تعاركوا. وكضوها هيج يتعاركون ويتصالحون.
طــروادة :: لا تحجين عفره هاي هسه تسألج الف سؤال.
ضحكت وجريت الخبزه من كدامه اكل واحجي
رنـــه :: لا بس كلولي عليمن أول عركه؟
عاينوا واحد بوجهه الثاني گال طــروادة
-علمود عمتج نضال.
عكدت حاجبي ما فاهمه هزيت راسي اسأل
-ليش؟
عــفراء:: علي ابن غانم چان عاشگ عمتي نضال وهيه هم رايدته، عمي وليد گبل هم جان رايد بت غانم ما اطوها اله من دروا علي ونضال عاشگين گالولهم جا تحلمون وكضوا زوجوا عمتي نضال الحسن، زلمه من السلف ( اخوته ببغداد وبس هوه واهله ضال بالسلف علمود الگيعان)
علي بليلة عرس نضال هد عليهم والوادم كضته، كالهم حسن وين ما الكاه اكتله ما يضل بالسلف، حسن اخذ نضال واهله وراح يم اخوته البغداد، ومشت السنين علي ابن غانم تزوج وعمتي نال استقرت ببغداد وي رجلها وهمه ضلت طلايبهم وناس تكرهه ناس وليومج. كل ما تصالحوا ردوا تعاركوا.
رنـــه :: عاينت الطرواده گـــلبي وجعني على سلطان ورغد ما ادري ليش ذكرتهم من سمعت سالفة عمتي نضال، درت عيني العفراء اسألها
-جا ابوي ليش ما وكف وي عمتي نضال؟ جا مو هوه اخذ امي على حب ؟ جا ليش ما رضى عمتي تتزوج على حب.
طــروادة:: ابوي چان بالجيش كلشي مايدري لمن رد لكاها متزوجه ورايحه البغداد.
عــفراء:: اذكر امي كالتلنه ابوي من رد ومالكه نضال سوه فلك وكض اخوته وليد وشاكر كاتلهم ومتعارك وي جدي وجدتي.
اسحب حجي منهم وارد ليوره اول مره يحجولي سوالف قديمة اخذني الواهس اسأل بعد
رنـــه :: جا يعني ابوي زين وياها جا ليش تكولون جانت عمه نضال تكرهنه؟
ضحكوا اثنينهم طــروادة گام يغسل وهوه يكلها
-مو كتلج ما تفتكين بعد راح تجلبج ألف سؤال تسألج.
ضحكت عفراء تگلي
- هيه بعد كرّهت أخوانها كلهم حتى ابوي صارت بيها شلون الحاله النفسيه رادت تحرك گلب اخوانها على خلفتهم، تكضنه تگطعنه تگطع والله انه على گد ما چانت تعضني تعلمت منها العض.
رجع طــروادة يمنه بأيده كوب جديد صب بيه چاي يضحكون گال
طــروادة :: مره امي تدور على عفراء لكت عمتي حاطتها بالتنور وحاطه فوكها سعف تريد تحركها، وعفره ساكته من الخوف صوتها ما يطلع
-ياااا يمه.
عــفراء :: ههههههه ولج چا مره اخذت صــيهد وطرواده ذبتهم بالشط، وابوي لحكهم.
طــروادة :: بس خطيه اكثر واحد شاف الموت منها صــيهد لان تكرهه عمي وليد حطت دوبها من دوب صــيهد موتته الا اشويه، جان جاهل تحطّ اديها برگبته وتخنگه انه اعوفنه واشرد جنت اخافن منها ههههههه .
يحجون ميتين من الضحك ولا عبالك مسويه بيهم هيج حطيت ايدي على گـــلبي.
-تخوف والله زين وما موتت واحد منكم.
طــروادة :: لا لا وره ما خلفت وصارت عدها بنيه عقلت شويه.
حجاها وضحكوا ضحكه طويله مدمعه عيونهم.
عــفراء:: شعقلت؟ ضلينه لو گالوا نضال اجت نشبع بچي وكلنه نصيح لا هله بيها، يمه من تكضنه ما تهدنه اذا ما مخليه بينه نيشان مال عضه كرصه طكه.
رنـــه :: همزين انه شفتها بس من عاقله.
-لا هيه من شويه جــويريه كبّرت صارت زينه وبطلت كامت من تجي ما تطك واحد وكامت تحب بيتها وتريد تعيش بدون مشاكل.
-شلون ماتت؟
-تمرضت خطيه بساع بساع.
طــروادة:: الله يرحمها، يله انا رايح.
عــفراء:: الله وياك، اذا واحد من الولد حاجاك اسكت منه محروك گلبهم على أختهم.
وكف يلف الچفيه على راسه ويتلثم بيها التفكه بجتفه وهاسكي بصفه گال
-لا شتدرين بيه؟ عاذرهم مناه لمن نشوف وين توصل.
رنـــه :: حجاها وطلع كمت اخذت المواعين من يم عــفراء غسلتهن وهيه كعدت حسين وزهره سبحتهم وريكناهم متوسنه لان هيه يمي.
""""
مــاسه:: امي ضلت تبجي وتصيح منين اتلكاها، انه أيدي توجعني ورغد الليل كله تون وتبجي من وجع جسمها ومناه الولد كلساع متعاركين وي واحد حتى بيناتهم صــيهد ووهب تعاركوا علمود رغد .
وهـــب طلع من البيت وصيهد راح للمشتمل، ومن الصبح بدأ العرك، سيرة رغد صارت على لسان كل واحد بالسلف جدي واعمامي راحوا للمستشفى، وصيهد كعد بباب الهول يدخن ميت من القهر، لمن اجه وهـــب وكف گدامه گاله.
وهـــب:: انا اختي مطلعها من الموت وتشوفها گدامك تصرخ من الوجع، تريدني ارضى تحاسبها؟
صــيهد:: ولك ياهو المحاسبها خرب روح جدك، ياهو محاسبها ادري هيه بس اختك جا انا شنوو؟ شو بس احاجيلي وحده وحطيت روحك بالنص عبالك بس انتَ اخوهن، خرا بيكم وبخوتكم.
كام صــيهد ميت من القهر ووهب چلب بيه
وهـــب :: لا بالحسين لا مو هيج أنا قصدي، بس لان رغد تعبانه مارضيت تحاجيها البارحه.
صــيهد:: وخرر عني حركت روحـــي حرك انا ردت احجي وياها وانتَ تصيح تريد تحاسبها.
باسه وهـــب يتعذر وجراه للهول وجده تصيح عليهم
-بسكم يله شني ما تستحون.
وامي چلبت بيهم كعدوا بالهول وندى ركضت سوتلهم ريوك اجه وهـــب اخذه هستوهم ياكلون ودك تليفون صــيهد رد بس گال الو عاين بوجهه وهـــب عاكد حواجبه.
وهـــب :: هزيت راسي آسأل شكو وهوه بس كاض التليفون عاف كلاص الچاي من ايده يحجي.
-ياهو الكتله؟... يله.
سد التليفون. ورد يخابر ما ادري عليمن گال
-عقيل انكتل.
شال راسه بساع گال
-خابر سلطان شوفه وينه.
طلعنه بساع خابرت على سلطان خايفين عليه
سلطان:: الو هلا وهـــب.
-ووين انتَ.
-بالمرعى.
-لا تجذب.
-گالولي عقيل شارد بمچان ورايح ادوره.
-ارجع عقيل انكتل.
-ياهو الكتله صــيهد؟
-لا يابه ما ندري هوه مطلوب ثار.
سديت التليفون منه وطلعنه ما مقهورين عليه مقهورين لان مو احنا الكتلناه.
مــاسه :: بنفس اليوم اللي انكتل بيه عقيل اجتنا گوامه من عشيرته، بيتنا گام وما كعد ناس رايحه وناس جايه وندى وجويريه ما يطلعن من المطبخ چاي وگهوه، حتى بــدور اللي كل مره تشرد هالمره وياهن تساعدهنّ.
لليل وواحد من غير عشيره نشر صورة ابوه اللي گبل جان عقيل كاتله وكاتب
(وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ)
ومخلي اسمه واسم عشريته وكاتب اخذت ثار ابوي وكتلت عقيل،فكانه من ثاره بسّ ضلت دكة بيوتهم والمصاويب ماصارلتها حل.
ورغد تبجي واحنه ملتمين عليها نواسيها گالتلها ندى
ندى:: الله يرحمه ويغفرله لا تبجين عليه كافي
جــويريه:: والله لو منج ولا ابجي دمعه عليه.
بــدور :: صدك رغد والله اضحكي ليش تبجين حرامات.
شالت ايدها طكت بــدور محروك گلبها ودموعها مغطيه وجها
رغد :: موجوووعه يمه راح اموتن.
ندى:: هاي تبجي من الوجع مو عليه.
جــويريه :: هسه هيه فرصه سوي روحج تبجين عليه.
وهيه تلوب بفراشها اجتها امي حايره بيها جسمها كلّه يوجعها
صــيهد وكف بباب الغرفة يصيح عليها
صــيهد :: عليمن تبجين چلب وفطس طبه الف مرض.
وامي خطيه تكلها اي ابجي شمالج ما تبجين على رجلج، ورغد الدموع تصب ومن امي تكلها ابجي على رجلج تموت من الضحك، بس اليسمعها يگول هاي جاي تبجي صاح وهـــب من الباب بحركه.
وهـــب :: رغد بطلي بجي لا أشك حلكج يسوه دمعه من عينج هوه؟
ام صــيهد :: رجلها يمه رجلها جا شلون ما تبجي عليه.
صــيهد:: لا تخليني اسبه واسب آهله بهالساعه رغد لو سمعتج تبجين على هالنكس اخذج ادفنج بصفه.
رغد :: اااااخ يا يمه.
صرخت تبجي وتلم بأيدها وامي تكلها ابجي على رجلج وتخلي رغد بنص البجي والدموع تموت من الضحك والولد بره الغرفه متسودنين مايردونها عبالهم تبجي على عقيل، شربت مسكنات ونامت.
وامي طلعت تكلهم رجلها يمه رجلها شلون ما تبجي عليه، وهمه واكفين يمها بالمطبخ اعصاب وما راضين، طبت ندى صينية الاستكاين بأيدها لابسه شالها ودشداشتها عريضه سكت صــيهد مدنك ووهب راساً رخت ملامحها نظرته تتبع خطوتها همست وهيه مدنكه
-السلام عليكم خويه.
صــيهد :: وعليكم السلام هلا بيج خويه.
مــاسه :: واكفه يم باب المطبخ اعاينلهم راحت ندى للسنگ تغسل مواعين ووهب ضايعه علومه يعاين عليها بضياع، وصيهد يأشر الامي ويحجي بالإشارة ما راضي مرة وهـــب تشتغل شلون بعدها عروس، دار الوهب يحاجيه يگله امشينه ووهب مايدري بروحه مميل راسه على صفحة ويعاينلها وصيهد يحجي وي حايط
صــيهد:: وهـــب.
ام صــيهد :: يا يمه ياا خايب اخيك يحاجيك.
دارت ندى عليهم ولگت وهـــب صافن بيها دنكت منحرجه ووهب مسح وجهه جراه صــيهد طلعه من يمنا ضحكت وامي ضحكت طكت ندى على ايدها تگلها
- ساعة الليعاين عليج تضيع اعلومه ويصفن بيج جن نازله عليه من الجنه، داريه مو تقهرينه!
ندى:: بلعت ريك اهز راسي إي متوتره وبگلبي اكلها محد راح يقهره غيري بس مو بأيدي خاله والله مو بأيدي، كملت شغلي اساعد جــويريه حتى هيه تلكه وقت تدرس بيه للسادس
بس جدتها تفتر عليها حسره تشوفها گاعده تطلعلها شغل من حوه الگاع، جسمها مطكع بزراك تقهر، حدّ الليل اثنينا بالمطبخ وماسه بأيد وحده ويانه، نسوي چاي ونودي للديوان ناسهم هواي يا رايحين يا جايين.
ل١٢ يله كلمن راحله نضفنه لمن خلصت دخلت للغرفة وهب مبدل ومتمدد على الچربايه يعاين بتليفونه، دنكت ساكته اخذت ملابسي ودخلت للحمّام أسبح بعده الشامبو براسي وندك الباب سديت الماي مرتبكه من عرفتها جدة وهـــب تصيح
- اطلعي ولج اريدن اسبح.
بسرعة سبحت وطلعت كاعدتلي بالباب خازرتني وكفت كدامي گالت
- مالج ضله هناه النغله، لا تضلين تفترين وعبالج كاعده ببيتج.
دفعتني من ايدي سدت باب الحمام وراحت وانه باقيه على وكفتي مسحت وجهي ودخلت للغرفة وهـــب نايم وتليفونه بافي مشتغل، مشيت يمه سحبته من ايده طفيته وعفته يمه
نشفت شعري ومشطته، درت عيني اريد اروح انام بفراشي باوعت الوهب متأمله ملامحه وصافنه بيها راساً فتح عينه درت عيني من عنده فازه
وهـــب :: تعاي.
باوعتله اعصر بأصابعي
-راح انام.
طك بأيده على الچربايه.
-اريدن اسولف وياج تعاي شويه.
سكتت اباوع للچربايه وولمكان اللي مخلي ايده عليه مشيت بخطوات متردده مد ايده الايدي سحبني للچربايه وشال الغطا
-وهـــب.
وهوه ما مهتم جراني للچربايه وغطاني وياه.
-اسكتي ما اسويلج شي اريد احجي وياج.
لميت اديه على صدري گـــلبي يدك حيل وفاتحه عيني بخوف لفاني وياه بالغطا وحط ايده على بطني حاضني قشعر بدني وسحبت بطني مقلصتها خله ايده جوه راسي وجراني الصدره
همست صوتي يرجف
-وهـــب.
-بطه.
شلت راسي من صدره اريد اباوع الوجهه خله ايده بخصل شعري الرطبه
-لا تخافين مني امني انا كد حچايتي بس خليني منومج بحضني لا تحرميني من هالشي.
-بس باوع غلط هالشي
-غلط صح المهم مو حرام.
بلعت ريك ساكته دنك خله شفته على كصتي غمضت عيني وهوه باسني بحسره وحضني بأثنين اديه گـــلبي يدك بقوه اريد ابتعد وما اريد، ودي احفظ كل لحظة وياه واخذها بذاكرتي من اروح، حركت ايدي على صدره تحسر يقوي حضنه الي
وهـــب:: اريد اسولف وياج بس لا تزعلين.
بقيت ساكته وحجه بتردد
-احجيلي الحقيقيه، ندى تحبين احد؟
بسرعة هزيت راسي لا وهوه ايده فوك راسي يمسح على شعري رجع گال.
وهـــب :: ندى بقى سؤال واحد جاوبيني الصدك ما انقهر بس لا تجذبين عليَّ ساعتها مو بس انتِ اكرهج حتى روحـــي اكرها.
غمضت عيني دكات گـــلبي فاضحتني مد ايده على حنكي رفع وجهي اله يباوع لعيوني وحجه كلمة كلمة
وهـــب :: متعرضه للأغتصاب؟
فتحت عيني دفعت ايده من وجهي اريد اگوم لزمني بقوة
-عووووفني.
حددني بين أديه
-اششش، بس جاوبيني لا تجذبين علي صارحيني ندى نار جاي تاكل بگلبي كتلج من الاول احجيلي حقيقتج احجي احجي
دفعت ايده بس أريد اكعد وهوه كعد على حيله ولازم اديه اثنينهن فوك صدري مثبتني على الچربايه بجيت احجي بحركه
- لااا لااا كتلك من الاول لااا.
-جا رضااا ياهو ذبحتيني بيه بيوم عرسنه وانتِ تصيحين رضا.
-اخووي اخوي صغير وانخطف.
ابتعد عاف ايدي كعدت على حيلي امسح دموعي يباوعلي بشك
-شلون انحطف شكد عمره؟
رفعت رأسي اباوع الوجهه شال ايده يحذر بغضب
-لا تجذبين عليَّ.
بجيت مخنوگه
-عمره ثلاثة أشهّر، وانخطف.
عكد حاجبه ما مقتنع واني امسح دموعي ويرجعن ينزلن واباوع لوجهه بلجي اقتنع
-ندى انا على الاحبهم احن من گـــلبي ماكو، وعلى اللي يچذبون عليَّ احقر مني ماكو. ديربالج الكاج بيوم مجذبه علي.
هزيت راسي اي اباوع لوجهه تحسر بقهر گال
-هاليومين بس تفض هاي الطلابه اخذج اصورج للجواز.
ابتسمت بوجهه فرحانه وهوه ضايج رجّع تمدد واني كاعده ردت انزل من الجربايه جرامي من أيدي
-ارگدي.
-ماسويت شي.
لماني الصدره يحجي
-بس تردّين تشردين.
سكتت وغمضت عيني براحه مأمنه يحرك ايده على زندي يمسح عليه ومره يلعب بخصل شعري افتح عيني من احس بيه مخلي وجهه بشعري يشمه بحسره،يلوب ويتحسر كلّ شويه،
وكل ما اغفى يفززني همست نعسانه
-وهـــب.
-هممم؟
-أروح لفراشي؟
-لا.
سكتت ورجعت غمضت، شويه ونمت للصبح احس بشي على رگبتي يصعد وينزل الحد حافة ملابسي من يم صدري فتحت عيني بعينه نايم على صفحة مقابيلي ايد جوه رأسه وايد يتحسس بيها رگبتي، دگم ملابسي من الصدر مفتوحات وهوه بكل مره يقرب ايده يفتحه اكثر ويبعد جزء عن جزء وبأطراف اصابعه يتحسس ملمس جسمي متحسر، رفع عينه من صدري لوجهي لكاني كاعده باوع العيني عيونه ذبلانه بلع ريك وزفر نفس بحسره جرّ الغطا ودار وجهه منطيني ظهره.
كمت بسرعة سديتهن ونزلت من الجربايه وهوه غطا راسه ونام.
""""
جــويريه:: بس اني كاعده عيوني من النعاس يلزكن اسوي ريوك الجده وجدي اخذت الصينية ومشيت للغرفه جده كاعده تشاوره سمعت بس اسم صــيهد وهوه هز راسه متحلف من شافني خزرني، خليت الصينية گدامهم ورجعت للمطبخ جبت الچاي واجيت بعدهم يحجون بصيهد ومن اجي يمهم يسكتون خليت الجاي ووكفت احاجيها بهدوء
-جده راح اصعد انام.
شعلان:: امشي امشي اكوب اهدومي، تنام كاتلج النوم.
سكتت نزلت بطانيه فرشتها يمهم وكعدت اكوي بملابسه وهوه يحجي وي جده على رغد متحلف بيها گالها
- خافن عبالها اخليها تاخذ سلطان الا انا جوه التراب يله تاخذه.
وجده تشحن بيه بدل ما تقنعه، بقيت ساكته كملت الملابس وبدأ الكل يكعد اجت يمي ندى للمطبخ تسأل
-كعدتني من وكت اليوم درستي؟
-لا مالحكت عود كلت اكعد بالخمسه ادرس ماكدرت بقيت نايمه للخمسة ونص كعدتني جده وبعد مالحكت ادرس.
ندى:: ميخاف هسه نخلص هوسة الريوك اني اسوي غدا وانتِ اصعدي ادرسي.
هزيت راسي اي واجن البنات وام صــيهد، وماسه رغم أيد وحده بس ماعايفتنه تكنس وتساعد وبدور هم تحاول بس ماتعرف الشغل البيت، جدي اخذ جده وراحوا يشوفون بيت غانم علمود ابنهم التصوب.
رحنه كعدنه يم رغد وجها مورم وهيه تسأل على الولد من يطلعون من البيت تخاف گالتلها ندى
-وهـــب موجود نايم.
ام صــيهد :: وهـــب نايم بعده؟
هزت راسها اي وام صــيهد مستغربه للتسعه كوه طلعنه رغد يمنه للمطبخ اني وماسه ما متريكين كنالها نتريك سوه وندى منتظره وهـــب، بعدنا نسوي بالريوك وطلع وهـــب كعد يم رغد يشاقيها ويسألها
-بعدج موجوعه.
-رجلي ما اكدر ادوسن عليها وضلوعي هم احسهن مورمات.
-خويه هنه ضلوع شلون يورمن شو تخبطين كمتي؟
ضحكنا كلنه ورغد ايدها على ضلوعها وتضحك، جر راسها عليه باسها، صرت من وهـــب يدخل أبقى عادي مو مثل قبل اول ما اجيت اذا دخلوا للبيت جده راساً تكلي اصعدي.
خلينه الريوك بالصينيه وبقيت يم الچاي منتظرته كالت ام صــيهد
-يله يمه جــويريه تعاي تريكي وي اخيوتج.
وهـــب :: خاف تستحي مني اطلع؟
باوعتله مبتسمه اهز راسي لا ضحك ياكل وبدور وماسه ورغد يتشاقن وياه وصوت ضحكتهم تارس المطبخ صبيت چاي وكعدت بين بــدور وماسه اتريك وياهم وندى بصف وهـــب يسويلها لفات والبنات ميتات من الضحك گالهن.
وهـــب :: كون صــيهد كاعد على الصينيه جا ما ضحكتن، بس انا مستحكراتني من اليوم ورايح راح اصير اخوف.
بــدور :: شتخوف انه بس اشوفنك اضــحك، وصيهد بس اشوفنه ارجف.
رغد :: لا ترى صيهد صدك عصبي ويخوف بس حنين اكثر من وهـــب.
وهـــب :: هوه هذا هم حظي جا من اليوم ورايح اتعامل وياجن بصياح واخزرجن والما تمشي عدل اطكها بالنعال.
مــاسه :: عادي هم ما تخوفنه طكاتك ما يوصلن الطكات صــيهد تمر سنين وهنه ما ينسن مدري چم سنة مرت من كتلني اخر مره وانه الهسه اتذكر وجع الكتله.
بــدور :: محد مكتوله بگدي جنت صغيره بكد زهره اروحن للدكان مال بيت حمود ابوكن حلويات ويكضني يوميه يكتلني وما اتوب اخر مره بيت حمود گالوله يوميه تجي تبوك من عدنه وهوه ضل خاتل متانيني بمن صار الظهر ورحت اريد ابوكن وكضني جراني للشط غرگني شبعني ماي خلاني صحت التوبه كمت اذا اشوفن دكان ادورن وجهي الحد هذا عمــري.
جــويريه :: ضحكنا متونسين وهنه يسولفن بضحك ولا عبالك كاتلهن كالت ندى
ندى:: برأيي وهـــب اكثر انسان مكتول من صــيهد لان انتن من كبرتن ما ضربكم بس وهـــب خطيه الحد هسه يضربه مره لزمه بالمشتمل ضربه حيل.
هيه تحجي واحنا نضحك ووهب مد ايده يسدّ حلكها ويگلها
وهـــب :: هوب هوب فضحتينه جا هيج هيه؟
نضحك عليهم وكمت اريد اصب بعد چاي باب المطبخ الخارجي مفتوح على كيف والمح صــيهد واكف على صفحة شايل زهره اخت رنه بأيده ويتنصت عليهم يضحكون كلهم بس اني سكتت رفع راسه لمحني اباوعله دخل وزهره بأيده سكتوا كلهم باوع الرغد وهيه عدلت كعدتها بسرعة بــدور كامت وماسه استندت على وهـــب تريد تگوم تلفت بينهن يحجي بقهر
صــيهد :: ضلن كاعدات ما طبيت كاض سيف.
بــدور غسلت تباوعله وماسه بقت كاعده ندى مدنكه ومحد حجه گال
صــيهد:: شلون صرتي رغد.
-الحمدلله خويه احسن.
هز راسه خوش وزهره بأيده لازمه بأيدها باكيت عصيرخلص وهزته دار عليها يسألها
-هااه؟
زهره :: كطه.
ضحكوا كلهم وهيه مبتسمه اخذه من أيدها شمره بالزباله گاله وهـــب
-زهره اليوم يمنه شعجب.
صــيهد:: تلاكت وياي اكلها وين رايحه ليش طالعه تگلي لايحه لبيتم.
وهـــب :: ولا افهم حجيها، زهره انا ياهو؟
وهيه ضحكت مچلبه برگبة صــيهد دار راسه الي واني واكفه يم الطباخ بس لمحني ورجع دار عليهم گاله
صــيهد :: انا تعلمت افهم اليحجون بالمگلوب.
جــويريه:: شحطت اكح وهوه يباوعلي كامت ام صــيهد تدك على ظهري وبدور انطتني ماي الحد ما ارتاحيت گال الماسه.
صــيهد :: ترى زهره مودينها عليج شوفيها شتريد.
وكفت مــاسه كدامه تحجي وي زهره
مــاسه :: ها زهوره شتردين.
زهره :: لنه تدول اليد بطل
وهـــب :: بطل تريد بطل عرفتهاا.
زهره :: لااا، بطل بطل
ام صــيهد :: زهوره مخلص زيتكم تردين بطل زيت؟
وزهره تهز ايدها ما قابله دارت وجها الصيهد وهوه شايلها بأيد وحده گالتله
زهره :: تبيهم هدول بطل بطل يدلولي ديت، بطل بطل.
وصيهد مات من الضحك ضحكت اباوع لوجهه اول مره اشوفه يضحك هيج ووهب تخبل يگلهم الا اعرفها شتريد، وكفّ كدامها گالها
وهب ::بطل تردين؟
نترت بوجهه
-لاااا.
وهـــب :: هاي هم تصيح تريدلك وحده مربيها طــروادة وتطلع عاقله ماكو.
صــيهد :: انا عرفتها شتريد.
وهـــب :: لا تحجي اليوم الا انا اعارف شتريد شني انتَ وحد وتفهمها، زهره شتردين.
زهره:: اهووه، بطل بطل.
وهـــب :: صــيهد خاف تريد ذاك البطل .
وغمز الصيهد، خزره وماسه گالتله.
مــاسه :: بطل ثلج؟
وزهره محروك گلبها منهم ضلت تهز راسها لا گامت ام صــيهد جابت بطل بيه ثلج وبطل زيت كالتلها
-هذن التردينهن زهره؟
-لااا، بطل بطل.
صــيهد:: احجي انا؟
بــدور :: لاا خلي نحاول بعد، زهره سطل تردين سطل؟
شالت ايدها وغمت بــدور ضحكوا كلهم ورغد گالتلها
رغد :: زهوره شنو البطل التردينه يعني بطل زيت بطل ثلج بطل ماي؟
وهيه تهزّ ايدها ضايجه وتحجي وي صــيهد گالت ام صــيهد
ام صــيهد :: خايبين يمه شلعتوا گلبها صــيهد شتريد تعارفها؟
وهـــب :: جذاب فنك العرفتها.
صــيهد :: زهره تردين بصل؟
زهره :: ااااي.
ضحكنا كلنه وماسه كامت خلت بصل بعلاكه وانطته الها وداها وهـــب يم حوشهم وكفت اغسل مواعين وهوه طب كعد يم امه ورغد ياخذون راحتهم من جده وجدي ما موجودين سألته امه.
صــيهد:: كونك زعلان من كهلان؟
-خيولي.
-لا يمه لا يبعد امك ياهي مالته جا فوك قهر جده وابوك تجون انتم تزعلون عليه جا شمسوي؟
صــيهد :: يوكف وي سلطان ويدري بيه غلطان.
حجه اسم سلطان وعاين الرغد وهيه مدنكه ساكته دخل وهـــب يشرب ماي ويعاين الندى تعجن للغدا
ام صــيهد:: ولو انتَ بمچان سلطان هم يوگف وياك، صــيهد يمه انه ما ارضى تخرب وي ولد عمك وأولهم كهلان.
وهـــب :: يمه اكص ايدي اذا ضل يوم مفارگه واحد جذاب هسه شويه ويروحله للگيعان.
صــيهد:: ولا اروحن.
وهـــب :: ضحكت ما مصدكه ولا اصدك بيه مناه لهناه، اخذته وطلعنه للگيعان، سالفة رغد ضلت معلكه المهم اهل عقيل ما يردون للسلف، تلاكوا ويانه بريا وميثم ومشينه للگاع سوه
ســليم بگيعانه وي الفلح يشتغل، وطرواده نعاين عليه بذنايب گيعانه الكرك على جتافه وهاسكي يركض وراه يلعب بالماي ويصيد سمچ من بين الزرع.
كعدنه بالصريفه بيت صغير من گصب مسوينه الفلح يكعدون بيه، اجه ســليم سلم علينه كمنه اثنينا انه وصيهد سلمنه عليه ناسين الصار، كعدنه كلنه سوه بريا شويه وضعه احسن رجع مثل گبل سليم دغه بعود وهوه سب ســليم بالروسي
بريا:: Сын животного.
صــيهد:: صحى رجع للروسي، بشرني بريا صحيت لان ضاملك كتل، خاف عبالك ناسي من طكيتني.
بريا:: Черт возьми, дни прошли, а ты не забыл.
حجه بريا يضحك وصيهد يصيح
صــيهد:: لا تسبني لا يشهد الحسين اجرك للشط اشبعك ماي
مــيثم :: گوم گوم يگلك نعلعله شرفك صار شكد وماناسي.
بريا:: انتَ تترجم من كل گلبك عدوك انا؟
وكام صــيهد البريا يريد يگضه شرد بريا للگيعان يضحك، گاله مــيثم
مــيثم :: تعال تعال عوفه.
وكف صــيهد بباب الصريفه فاتح الچفيه مخليها بس على راسه گاله مــيثم يشعر
مــيثم :: وخر وجهك عن الشمس
خايف عليك ازرك تصير وتعوفك نجمة السلف.
ضحكنه طكيت ايدي بأيد مــيثم وسليم يصفك وهوه نگلب وجهه يهدد
-لا تضلون تاكلون تبن.
ســليم :: انتم منتبهين بس واحد يجيب طاري نجمة السلف يكوم من مچانه، شمالك خالي ترى عرضنه هاي حتى لو ما نعارفها المهم ندري انتَ عاشگها ومسويها نجمة سلفنه، صدك عود شني نجمة سلفنه فالتوه هيه وتسويها نجمة سلفنه.
وهـــب :: يعاين بخزر دورله شي يطكنه بيه مالكه دار وجهه وراح الطرواده صحت وراه
-فرصه واجتك.
ضحك مــيثم وكام وراه ، شفتهم صفوا سوه ومشوا الطرواده ضلينه احنا نشتغل بالگيعان، وي الغده اجوا طــروادة وصيهد وميثم من گيعه صفوا ويانه نسولف ناقصنه بس سلطان.
""""
رنـــه :: مولدتنه عطلانه والكهرباء كلساع طافيه، مسواكنه مخلص وطرواده لا ما ملحك يروح يتسوك، وفلوسه هم مخلصه ضال يدبر بيها شلون ماجان، عفراء گبل لا تروح اطتني خمسه وعشرين كالت اطيها اله كليله لكيتها ضاله بدشاشتك.
وبدون مايدري وديت زهره على مــاسه جابتلي بصل، طبخت الغده وضليت متانيه ليمت يرجع.
الظهريه تصير تچوي من الحروره بس اشتغلت الكهرباء ركضت شغلت الماطور ترست المبرده ماي شغلتها ومشيت ارش الحوش واترس ماي جديد حتى من يجي طــروادة ويسبح يلكه الماي بارد.
للوحده وهوه ما بين متنه من الجوع طلعت اريد اعايلنه من الحوش بس الحجاب على راسي وتذكرت حجي عفراء من كبل لا تروح كالت
-لا تطلعين بالشمس الا مغطيه وجهج.
غطيت وجهي وصعدت على گن الدجاج اعاين شفت عبود وسجاد اجوا وصلوا يم باب حوشنه تحاضنوا وكلمن راح الاهله نزلت من الگن هزيت ايدي طب عبود سلم ويسأل
عبود:: طــروادة اجه؟
-لا بعده.
طب يسبح وانه رجعت صعدت اعاين شفته اجه ملثم هوه ووياه اثنين من الولد وهاسكي وراهم لمن وصلوا يم النخلات عرفتهم بريا وميثم راحوا البيتهم وطرواده اجه نزلت ووكفت يم الباب فتحته اله احجي
-الله يساعدك اليوم تأخرت.
-ها كتلكم الجوع؟
مشه للحوض يغسل من الطين گبل لا يطب للبيت كتله
- جنت أعاين عليك من السياج هسه يجي هسه يجي وماكو.
غسل وجهه يحجي
-چم مره كتلج لا تعاينين من السياج.
ضحكت جراني عليه يعصر بوجهي كتله
-تدري عرفتك من بين الولد حتى وانتَ ملثم.
طبينه للبيت سوه يسأل
-شلون عرفتيني؟
- اول دليل هاسكي يمشي وراك مو وره مــيثم وبريا ههههه
رفع حاجبه وكف كدامي جتف اديه وهز راسه يسأل
- وشدراج الوياي مــيثم وبريا وهمه ملثمين.
- مبينين من وصلوا بصفنه كلش يم النخلات عرفتهم من عيونهم.
احجي بهدوء عادي ما مهتمه واشرحله هز راسه خوش طلع عبود من الحمام وطب طــروادة يسبح صبيت الغدا وكعدنه سوه زهره گالت الطرواده
زهره :: طلواده طيهد يدول عليك مطي.
طــروادة :: صــيهد يگول علي مطي؟
زهره :: اي
عبود :: معلمها على المطي الحد ما مال حتى تلفظها عدل.
طــروادة :: وين لكيتي صــيهد زهره؟
رنـــه :: كحيت مختنگه وادفعلهم بالصحن
-اكلوا اكلوا خوش طبخ.
زهره :: دبت منهم بطل.
رنـــه :: تكلك من طلعت بباب الحوش هوه مر.
احجي اريد اضيع السالفه گاله حسين
حسين:: رنـــه ودتها تجيبلها بصل من بيت جدي.
خزرته وطرواده عاينلي ضايج سكت ماحجه لان يدري بروحه مقصر بالمسواك گام من الصينيه بدون ما يكمل غداه صبله چاي واجه للهول كعد يمنه گال.
طــروادة :: عبود اخذلك عشره جيب مخضر، بين ما انا افرغ ونروح نتسوك الرمضان.
هز راسه عبود راضي كمنا غسلنه وشلت المواعين غسلتهن عبود اخذ الستكاين والقوري وراح للهول خلصت وكعدت يمهم ثانيه رجليَّه وعبود جر رجلي يسأل
-شنهاي البرجلج.
جريت رجلي منه وطرواده كض رجلي الثانيه
-شبيهن رجليج،ياهو طاكج؟ بيش متعوره؟
همه يجرون وانه اكض بدشداشتي اغطي برجليه اليوم حاره ومالابسه بجامه وهمه ما مهتمين يسحلون بيه يگلبون برجليه ردت ابجي واشكيلهم على بريا حتى يكتلونه بس خفت خاف يكللهم لكيتها يم الديوان وتنگلب السالفه علي كتلهم.
- طحت طحت وتعورت هدوني مالابسه بجامه.
طــروادة جرّ الدشداشه يغطيني وضالين كل واحد كاضله رجل عبود يكله
- شو مزلغات ولج وهاي الزراك مال طكه جده طاكتج؟
طــروادة:: احجي ولج.
- لااا عمي لا هدووني.
جريت رجليَّه منهم كعدت عدل
-اول امس طحت من كن الدجاج.
عبود:: حيل حتى بعد ما تصعدين عليه.
عيبت عليه ودرنه نعاين للتلفزون وي حسين وزهره طــروادة وهوه يعاين غفه تعبان، غطيته ونصينه التلفزون، عبود راح السجاد وحسين وزهره شويه وناموا.
للساعة ب٣ ندك باب الحوش كمت بساع ما فتحت الباب جريت الدبه يم الباب وصعدت عليها شفته بريا هم لاف الجفيه على وجهه وبس عيونه طالعه صوفرتله رفع راسه شافني مچلبه بالسياج هزيت راسي اسأل
-خير شتريد؟
-اريد اخذ روحج، القرده الزعطوطه.
-سد حلكك لا تخليني اغلط عليك اريد اكلك شي.
ضيك عيونه رافعلي راسه وانه حاطه اديه على السياج وماده راسي احجي وياه
-طــروادة گالي ياهو الطاگج على رجليج وسكتت ماكتله انتَ، اعتذر من عدي حتى ما اگله.
ضحك وتلفت يعاين
بريا:: اعتذر منج؟ انا بريا...
ماخليته يكمل كلامه حجيت بنفس طريقته
-ابن الروسياااا.
فتح عينه خازرني وتلفت يدور شي يطكني بيه، باب الحوش مفتوح ما ادري بيه وهاسكي طلع يركض وبريا بس شافه بساع چلب بالسياج وياي وطفر علي طيحني للگاع ضلوعي نربدن وكام يركض خايف من هاسكي ضليت ممدده بالگاع وهاسكي رد للبيت يركض وره بريا وهوه يركض مناه ومناه يطفر.
كعدت على حيلي اصيح عليه
-حل حل كون يعضك.
اجه يركض وراي يصيح
بريا:: بالحسين اكتلج احميني.
وانه وكفت امشي من كدامه اريد اطلعه الهاسكي وهوه يركض وياي وين ما اروح بدون ما يكضني،
اخر شي صعد على گن الدجاجات يريد يطفر وطلع طــروادة صاح على هاسكي وعاين علي خازرني بريا نزل فحطان من الركض گاله
-مو كلت تعال علي ب٣ هل اجيتك وچلابك منين مانجيك يعضن.
اشرلي طــروادة براسه طبي جوه، مشيت واعاين من الشباج گاله
بريا:: ترى طبيت لان هاسكي طلع علي وطفرت لحوشكم.
وطرواده يعاين بطرف عينه گاله
-روح انا اجي.
هز رأسه بريا وطلع مشيت بسرعة للغرفة كعدت شويه ودفع الباب وكفت صفگلي
-عفيه عفيه برنه.
-والله ما سويت شي .
اجه يمي ومد ايده جر اذني لاويها حيل
- موتيييني من اجه ماعرفتي تجين تكعديني، انتِ شني وتطلعيله؟
جلبت بأيده موجوعه وهوه حيل ضايج مني
- تجيبلي مصايب؟ تردين تموتيني انتِ؟
دفعني وخرت ايدي على اذني وهوه رفع ايده بعصبيه يحجي
- وي بريا بفد مچان ما الكاج حجايه ما تحجين وياه حظج اطيحه.
-انه ليمت حاجيه وياهم؟
- سددي حلكج.
مسحت عيوني كعدت بزاويه الغرفة وهوه بم الباب محروك گلبه
- سهله رنـــه اعلمنج.
-شمسويه انه حتى ما غلطت.
-ما غلطتي جا المن ضاله وياه بالحوش، هاسكي يرد منج ليش ما صحتي عليه؟ ليش ما طبيتي تكعديني؟
دنكت ابجي طلع من يمي وانه ما خليت واحد منهم ما سبيته ورجعت اغلط على روحـــي لان كل يوم حاركه گلب طــروادة شويه ورجع يمي بأيده كلاص چاي كعد بالباب مسحت عيوني گال
-حقيره انتِ انا اموتن من القهر يوم الاحرك گلبج وتبجين وانتِ يوميه تحركين گـــلبي. وما تتوبين.
عاينتله دموعي بعيني واحجي بخنك
-اكرهم.
-تكرههم هيه تكرههم، رنـــه ترى كبرتي بالحسين كبرتي صار عمرج ١٦ كون هسه عاقله وعقلج يوزن بلد
شني تصرفين تصرفات زهره ما تسويهن،
١٥-
-١٦، فاتتج سنة يله ابوي سوالج جنسيه، تعاند بكلشي تعاند.
-عاين وعلي بعد راح اعقل ولا احرك كلبك.
-وعلي دوم تگليلي نفس الحجي.
-هالمره صدك.
هز راسه خوش راح للگيعان وانه ضليت كاعده وواعد نفسي اتغير طلعت كتب الثالث ادرس بيهن عبالي بالدراسه ابطل سوالف تعبانه.
""""""
جــويريه:: جده جانت تحجي بس علينه هسه طبكت رغد ويانه كل شويه محاجيتها ورغد بس تبجي النوب تعوف رغد تدور على ندى وسبت اهلها وكالتلها النغله، واني من يمي اكوم اشتغل بسرعة بلكي تعوفني وماتسب امي، بس ما اخلص منها تچوي گـــلبي من تگلي
-بت الچلبه، موت الاخذ امج كون ياخذج ويفكني.
وكفت كدامها ارجف
-لا تغلطين على امي انتِ مو احسن منها حتى تغلطين عليها.
طكتني تغلط وتفشر وام صــيهد وندى يفرغني من أيدها كل عمــري ما شفّت انسان حقود وبلا گلب مثل جده، طلعت من المطبخ متحلفه جرتني ام صــيهد للمغسله غسلت وجهي ارجف كلي واشهك بلا دمع حجت ندى بعصبيه
ندى:: على أي اساس تضربها شنو مسويه وهيج تمد ايدها عليها؟
وام صــيهد ساكته مقهوره ما تگدر تحجي هيه يا دوب حاميه نفسها وحاميه بناتها، مــاسه وبدور كابلني كاعدت مقهورات مــاسه صعدت جابت كتبي
-جــويريه ادرسي ماعدنا شي هسه راح نكعد يمج نسوي العشا وانتِ ادرسي.
هزيت راسي اي فتحت الكتاب ادرس بلكن انسى وجع گـــلبي
والبنات گدامي يسون بالعشا، ويَ اذان المغرب طبت جده للمطبخ تحجي شلون عشا جدي بعده ما كامل، وانه بس شفتها طبكت كتابي وكمت اريد اشتغل وهيه بس شافتني اجتني متسودنه تريد تجر الكتاب من ايدي واني مجلبه بيه تغلط وتجر بالكتاب من أيدي
-ولج كتلج عشه جدج من وكت يكضي.
جرت الكتاب من ايدي حيل تضربني بيه وام صــيهد تخليني وره ظهرها وتحاجيها
ام صــيهد :: انه جاي اسوي العشا عوفي البت.
وجده متسودنه شكت الكتاب بالنص صيحت ومديت ايدي اريد أجره منها طلعت للحوش ركضت وراها وهيه تشگگ بيه
-عوووفيه عوووفيه.
فقدت اغلط واطك بيها ما ادري بروحي احس خلصت اخر ذرة صبر عدي ما ادري شكد صوتي عله واعمامي وجدّي التموا ما ادري منو اليضربني ومنو اليحميني اصرررخ بكل صوتي متخبله نار بگلبي من ظلمهم.
حرارة دم احس بيها تنزل من خشمي اسب بيهم كل ما يضربوني وارجع الغلطه بعشرة مابيه اسكت اكثر.
مــاسه :: تسودنت من شفت حال جــويريه تصرخ بكل صوتها فاقده وطلعوا جدي وابوي اثنينهم على جوري وامي تحمي بيها وندى وانه وبدور كلنه ركضنه بس نريد نطلعها من ايد جده النوب جدي دار يريد يكتل ندى شلون تدافع الجوري وابوي يطك بأمي وأعاين جده ذبت جوري بالگاع وكعدت على صدرها خانگتها. اريد بس افلت من بينهم واركضلها.
وبنفس اللحظة طبوا وهـــب وصيهد يركضون صــيهد دفع جده وجر جوري خلاها بظهره وصاح بصوت رج البيت
صــيهد:: ليششششش تطكينهااااا.
ووهب يتعارك وي جدي وأبوي جدي عاف الدنيا وصاح على صــيهد
شعلان:: ياهي مالتك ولك؟
وكف ابوي بوجهه صــيهد وهوه يتهدد على جدي
صــيهد:: حاااالها حال اخواتي اريدن ابن امه يمد ايده عليها الا اكسرهاا.
وجدي تسودن يصيح على جــويريه
شعلان:: تعااااي ولج تعاااي.
وهيه واكفه بظهر صــيهد ترجف والدم يصب من خشمها صياح وهوسه ورجفة اخوي عليها خلت جدي ينشال وينرگع
شعلان:: تدفع جدتك علمود هاي ولك صــيهد تدفع جدتك.
وصيهد متسودن وهـــب ركض عليه يكضه وهوه نااار ويصيح
صــيهد :: خررررب روحك ورحها خرب هيج هيج منكم ومن أهلكم بالحسين افجررركم وبوفاضل اللي يمد ايده عليهااا افجر البيت بيه.
ركضت الجوري انه وندى ووهب وابوي بس يردون يكضون صــيهد گاله
صــيهد:: هااااي هيه گدامك طكهاا يله فنك فنك اذا ما كتلتك انا مو صــيهد.
وجدي مبتسم يهز راسه صاح على ابوي
شعلان:: وليد اطرده للمرعى ما اريد اشوفنه هناه، صيهد انا اعارف شلون ألوي ذراعك.
وابوي يطك صــيهد ويجر بيه يريده يطلع وهوه يصيح
صــيهد ::خرب روحك نعلعله روح كل موتاك،
طلعوه سحل اخذه وهـــب للمرعى، اخذت جــويريه الغرفة ندى وجدي يگل الجده
-شنهي التردينه هسه اذا تريدين احطن چيله بكصتها واكتلها.
وجده حاطه شيلتها على حلكها تبجي وتكله صــيهد يدفعني
شعلان:: سهله انا احاسبنه الج.
وكضتها تبجي، صعدنه فوك وجويريه خلصت الليل بس تون، وهـــب بساع رجع للبيت وضل كاعد خاف واحد يحاجي جوري ماكناله جدي طك ندى هوه صدك عاقل بس هم ماخذ شويه سوادين من صــيهد
الثاني يوم وجويريه ما تكدر تكوم من الفراش، ووهب راح الصيهد
""
وهـــب :: خفنه صــيهد وسلطان يتعاركون اثنينهم بالمرعى، اخذت طــروادة ورحت والولد اجوا ورانه ، جدي گايل للرعيان يعوفون مرعى الغنم على صــيهد وسلطان همه يسرحون بيهن.
وصلنه للمرعى الرعيان مقسمين الزرع اجزاء كل ما يخلص جزء يحولونهم على الجزء الثاني، نعاين شو الغنم تسرح وتمرح بكيفها ودايسات الزرع كله.
طــروادة :: هاي الغنم سارحه بيهم مو همه سارحين بيهن.
مــيثم :: اظنهم تكاتلوا والغنم ضلّت وحدها.
وهـــب :: ضحكنه ومشينه ندور عليهم وصلنه للبيت لكينه طلي مذبوح ومصلوخ ضال بس الصوف والدم،
ســليم :: هاي شني الذيب غازي الغنم وذول وينهم.
مشه بريا للبيت يدور عليهم ورجع گال ماكو افترينا ندور ونلكاهم حاطين زوالي صغار جوه النخل على الفي نايمين كل واحد بصفحة لافين الجفافي على عيونهم ومنخمدين
درنه نعاين ضال بس الرماد مال جمريه طافيه گال بريا.
بريا:: ذابحين طلي وشاوين معلاك.
طــروادة :: شعلان لو يدري بيهم ذابحين طلي من طليانه جا ضل يلطم.
وهـــب :: هزيناهم هز كعدوا يتثاوبون گالهم مــيثم
مــيثم :: الغنم وين؟
صــيهد :: بالدفتر شتريد تكتب؟
سلطان:: لموهن لموهن طشن.
ضحكنه وبريا وسليم ركضوا يلمونهن
طــروادة:: رعيان انتم؟ بصخلتنه ما اسرحكم.
كعد صــيهد على حيله يدخن گال
صــيهد:: البارحه اختاريتلي خروف من هذا ابو گرون ذبحته اخذت معلاكه والضل رحت لگيعان الوادم ملثم اوزع عليهم واكلهم بثواب المرحوم شعلان.
مــيثم :: عليمن تعاركت وي جدي انتَ؟
وهـــب :: اريد احجي واكلهم علمود بت عمتي خزرني جر نفس من الجكاره گالهم
صــيهد::يغلط.
طــروادة رفعله حاجبه فاهمه، احنا متشمتين بصيهد وسلطان وخابرني ابوي يصيح
وليد ::احنا مو گنالكم محد يروح للمرعى شلون ترحون.
وهـــب :: هسه راح نرد
صيح بعصبيه
-محد منكم يرد حالكم حالهم مادام ترحون بكيفكم ضلوا وياهم.
ضحكت أهز ايدي وعمي شاكر هم خابر على الولد وجدي خابر على مــيثم طردونه كلنه وضل بس طــروادة يضحك علينه، چلبنه بيه
-ضل ويانه.
-زوج انا اضل هنا شلون اتشمت بيكم؟
صــيهد:: لا والله ضل وياي انا ما احمل هذول يمسلتون هواي.
ضحك طــروادة خابر عبود گاله علمود اخوانه وصيهد صار معزب كام ذبحلنه خروف ثاني وهذا يشوي معلاك وهذا يطبخ ومو عقوبه سويناه المه ضحك وسوالف وشعر .
جــويريه :: لو ادري الراح يصير بيه جا تحملت انضرب وما ارد، جا خلصت عمي كاتمه صوتي واتحمل ضرب جده بدون ما ارد بكلمة وحده.
بعزّ الظهريه اجتني مــاسه ترجف
-جــويريه اهلج وعمامج هناه.
كعدت على حيلي صوتي من صريخ امس رايح وعيوني مورمه گـــلبي دك حيل گالت وتمسح بوجهه
-جدي وابوي يگولون خل تلبس عبايتها وتجي.
كمت ارجف لبست ونزلت جده كاعده بالهول ورافعه راسها إلي بشماته اريد اكدر أحجي ماكو جراني جدي للدوانيه ارجف كلي اول واحد صارت عيني عليه ياسر يضحك وي عمي شاكر درت عينيّ الابوي شال ايده يحجي
-هلاا بويه هلا.
وعمي بصفة صاح
-هلا بعروستنا.
شكرا لزيارتكم عالم روايات سكيرهوم
